نەبەز گۆران: بۆچی موچەخۆرەكانی بەغداد شیوەندەگێڕن؟!

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

بەر لەهەموو شتێك، من، تۆ، ئەوان، هەر هاوڵاتییەكی ئاسایی ئەم هەرێمە، هەر دەنگ و بۆچوونێكی هەیە، ئیدی دەنگەكەی بە (بەڵێ‌) یە، یان بە (نەخێر) یان بە (بایكۆت) مافی خۆیەتی. ئەم مافە، مافێكی سەرەتایی هەر مرۆڤێكە چۆن بیردەكاتەوە و بە چ شێوەیەك سەیری تەواوی پرۆسەكە دەكات. قسەم لەسەر هیچ هاوڵاتییەك و هیچ بۆچوونێكی جیاوازی حیزبی و ناحیزبی نییە، قسەشەم لەسەر شێوەی تێگەشتنەكانی هاوڵاتییان نییە.
قسەی من لەسەر ئەو تاقمەیە لە بەغدادن، بەتایبەت پەرلەمانتارەكان. ئەم تاقمە و دەستەو گروپەكانیان خەریكی شیوەنگێڕانن، تەواوی شیوەنگێرانەكەشیان بۆ هیچ نییە، جگە لەو موچەیەی وەریدەگرن و دەیانەوێت لە دەستیان نەچێت. (گەر ریفراندۆم موچەكەیان ببڕێت، ئاسایی بێت لەلات خۆیان بكەن بە پەرلەمانتاری عەرەبی عێراقی، چونكە شەیدای پارەن) ئەم تاقمە بیریانچووە ئەوان كە لە بەغدادن نوێنەری كوردن، نوێنەری موچەكان و بەرژەوەندییەكانی خۆیان نیین. ( لەهەرحاڵەتێكدا پێویست بكات، كۆمەڵێكی زۆر نهێنی لەسەر ئەم شیوەنگێرانە هەیە تا ئێستا نەوتراون، گەر زۆر لەشیوەنگێران بەردەوامبن، ئیدی كاتی بڵاوكردنەوەیان هاتووە.)
ئەم تاقمەی ناو پەرلەمانی عێراق ئەركەكەیان ئەوەیە بەرگری لە ماف و داخوازییەكانی كورد بكەن، هەرچۆن پەرلەمانتارە عێراقییەكانی شیعە و سوننە، بەرگری لە عێراقی عەرەبی، بەرگری لە عێراقی یەكپارچەیی و شوناسەكەی خۆیان دەكەن، ئەركی ئەم تاقمە پەرلەمانتارەی كورد ئەوەیە بەرگری لە كورد و لە هەرێم بكەن، كەچی ئەمانە دێن پێچەوانەكەی دەكەن و بەناوی گوایە دژی سیستەمە (پیسخۆر)ەكەی هەرێمن، بەهەمان ئاوازی پەرلەمانتارە عەرەبەكان بەرگری لەو عێراقە دەكەن، كە لەگەڵ ئەم هەرێمە لە رووی _پیسخۆریی_ میلیشایی_ مەزەهەبی_ خێڵەكی و… هتد. هیچ جیاوازییەكی نییە. ئەمانە نەك هەر قسەیان لەسەر ئەو سیستەمە شێواوەی عێراق نییە، ئەمانە هەموو هەوڵیان ئەوەیە بەرگریی لەو سیستەمە بكەن و دژی ئەركەكەی خۆیان بن، بۆ ئەوەی لای عەرەبەكان خۆشەویست ببن و شتێكیان دەست بكەوێت. راستی مەسەلەكەش ئەمەیە ئەم شیوەنەیان لێرە دەیكەن بۆ بەرگریكردن نییە لە مافی خەڵك، بۆ بەرگریكردنە لە موچە و دەسكەوتەكانی خۆیان. بۆ بەرگریكردنە لەو رێككەوتنانەی لەژێرەوە لەگەڵ كۆمەڵێك بازرگان هەیانە و، لەبری جێبەجێكردنی ئەركی پەرلەمانتاریان خەریكی تەندەر وەرگرتنن. هەندێك لەمانە بەجۆرێك كەوتونەتە ناو _پیسخۆری_ ییەوە، گەر فایلەكانیان بڵاوبكرێتەوە بۆخەڵك روندەبێتەوە لەگەڵ بەرپرسە پیسخۆرەكانی ئێرە جیاوازیان نییە. ئەمانە بەشێكیان خەریكی پارە وەرگرتن و كڕینی موڵكو ماڵن. كە دێنە سەرشاشەكانیش وەك ئەوەی نەیاناسین بەجۆرێك قسە دەكەن و خۆیان دەدەنە پاڵ كەسە پاكەكان، گوایە ئەوانن سەرمەشقی ئازادیی و سەرمەشقی پاكی و بێگەردی!
لە راستیدا ئیتر ئەركی گەنجان و حیزبەكانە بەم تاقمە شیوەنگێرە موچەخۆر و تەندەر وەرگرەی بەغداد بڵێن: یان لەشوێنی خۆتان بوەستن، یان با بەخەڵكتان بناسین و ئەوەی لەپشتەوە خەریكین بیخەینە روو. یەكێكی دیكە لە كێشەكانی ئەم موچەخۆرانەی بەغداد ئەوەیە، هێندە بێشكۆن، هێندە تێكشكاو بێ‌ ئیرادەن، لەبەردەم عەرەبێكی ناسیونالیستی بێكەڵكدا، بەوجۆرە دەدوێت كە عەرەبەكە پێیخۆشبێت. ئەم موچەخۆرانە باكیان بەوە نییە لە پێناو موچەیەكی خۆیاندا، لەپێناو تەندەرێكدا هەموو بەهاكانی خۆیان لەدەست بدەن. لەوەش واوەتر دەچێت و قسە لەسەر خەڵكانێك دەكەن، گەر وەك ئەو خەڵكانە پۆستیان هەبایە، یان وەك ئەو خەڵكانە پارەیانبكردایە، هەزارجار لە بازاری حیزبیدا خۆیان هەراج دەكرد.
تۆ وەك گەنجێك، وەك هاوڵاتییەكی ماف خوراو، چۆن دژی ئەم سیستەمەیت، چۆن نارازیت، چۆن یاخی بوویت، هەموویت لێجوانە. بەڵام ئەو موچەخۆرانەی بەغداد پێویستە بناسی. ئەمانە نە نوێنەری من و تۆن، نە دەبنە نوێنەر، ئەوانە گەر شكۆیان هەبایە لەبەرخاتری بەرژەوەندییەكانی خۆیان، بەو جۆرە ئەركەكەی خۆیان لەبیرنەدەكرد. ئەمانە گەر وەك ئێمە بیانناسیی و بزانی لەژێرەوە خەریكی چین، دڵنیام تێدەگەی ئەم چێشت خۆرانەی ناو ماڵی ئەم و ئەو، زۆر مێژوویان پیسترە لەو بەرپرسانەی ئێرە. حەیفە گەنجێكی پاك و بێگەردبیت و رێگە بدەیت ئەم تاقمە خۆیان بكەن بەپاڵەوانت. حەیفە یاخی بوون و جوانییەكانی خۆت گرێبدەی بەم تاقمەوە. ئەمانە نەك تۆ، بۆ موچەكەیان و كەمێك دەستكەوتی بچوك، ئاساییە بەلایانە شوناسە كوردییەكەی خۆشیان بگۆڕن.( بڕوام وایە گەر هاوڕێیانم رازیبن، ئیتر كاتی ئەوە هاتووە هەندێك لەوانە كەسایەتییان وەك خۆی بناسرێت بە خەڵك.)
نەبەز گۆران
– تێبینی: من ئەمڕۆ كە ریفراندۆم بوو، لەبەر ئەوەی پشوبوو، خەوتبووم. بۆشم گرنگ نییە تۆ دەنگت داوە یان نا، یان چۆن دەنگ داوە، بەس بۆم گرنگە وردە وردە كەمێك راستی لەسەر ئەو تاقمە موچەخۆرەی بەغداد بڵێم و هەوڵدەدەم هاوڕێكانی خۆم رازیبكەم، ئەوەی پێویستە خەڵك بیزانێت بڵاوی بكەینەوە و لەوەزیاتر بەئەدەب نەبین و لەپاڵ ئەوانیش دڵنیام هەندێك كەسیتریش پێوەدەبن