نەبەز گۆران: پاش سزاكانی ئەوان با كورد دەستپێبكات.
بەهیچ جۆرێك نابێت ڕێگە بدرێت سەركردایەتی ریفراندۆم، مامەڵە بە دەنگەكانەوە بكات. ئێمە پێشوتر كەدەمانووت با دوابخرێت، لەبەر ئەوەنەبوو ئێمە كوردنین و ئێوە زۆر كوردن، لەبەر ئەوەبوو دەمانووت باخۆمان بونیادبنێین پاشان دەستپێبكەین، ئەما گوێتان نەگرت. ئێستا هەرچۆنێك بێت دۆخێكتاندروستكردوە تەواوی دۆخەكە كۆمەڵگەی كوردی دەگرێتەوە. هەموو ئەو سزایانەی رووبەرووی هەرێم كرانەوە، تەنها یەك سزایان بەرپرسەكان دەگرێتەوە و ئەوانی دیكە تاك بەتاكی كۆمەڵگەكە دەگرێتەوە. كەوایە ئەوان سزای گۆمەڵگەیەك دەدەن، نەك سزای دەستەیەكی دەسەڵاتدار.
ئەوەی ئەمڕۆ لەپەرلەمانی عێراقی عەرەبی بینیمان، دووبارەكردنەوەی هەمان گوتاری فاشیەتی پێشوبوو، ساڵانێكە باس لەوەدەكەین ئەم سیستەمە بەردەوام كارەكتەری فاشی بەرهەم دەهێنێت، بروایان پێنەدەكردین و دەیانگوت دۆستمانن! ئێستا كە دۆستە فاشییەكانیان دەبینین، تێدەگەن كێشە لە كارەكتەرەكاندا نییە، كێشە لە تەواوی سیستەمەكەدایە كە ئەوە بەرهەمەكەیەتی. چونەوە بۆلای ئەم فاشییەتە، تەنها لەوانە دەوەشێتەوە هێندە لاوازن، لەپێناو بەرژەوەندییەكانی خۆیاندا شوناسەكەشیان لەبیردەكەن.
هەر سزایەكیش گەر بەشەریشەوەبێت رووبەرووی هەرێم ببێتەوە، بەرپرسیاری یەكەمی پارتی و یەكێتین. دەبێت ئەم بەرپرسیارییەتیە بخەنە ئەستۆی خۆیان و، وایان لێنەكات پاشگەز ببنەوە. وەك (نازم حیكمەت) دەڵێت: ئازایەتی گرنگ نییە، تەسلیم نەبوون گرنگە.”
گەر برواتان بەخۆتان و ئیرادەی خۆتان هەیە، لێگەڕێن با دەستبكەن بە سزاكانی خۆیان. تەواوی ئەو سزا ئابووریانەی هەیانە جێبەجێی بكەن. هەرچۆن لەسەرەتای نەوەدەكان دەستمان پێكرد و ئێوە بەرهەمەكەتان خوارد و گوێتان لە كەسە پاك و راستگۆكان نەگرت، ئەمجارەش لەسەرەتاوە دەست پێبكەین، بەڵام هەمان ئەزموون دووبارە مەكەنەوە.(هەرچەندە جێی متمانە نین.) ترسان لەو سزایانە لەدەستدانی ئازایەتی تاكە، ئێمەی تاك زۆربەمان هەرچۆنێك بێت بەردەوام لەم بیست و پێنج ساڵەدا لەژێر سزای حوكومرانی ئێوەدابووین، ئێستاش لە پاڵ سزای ئێوەدا سزای عێراقی عەرەبی فاشیی دەستپێدەكات. لەهەردوو حاڵەتەكەدا بەرگریكردن لە داوای خەڵك، كە ویتان سەربەخۆیمان دەوێت، ئەركی ئێوە و هەموو كەسێكی خۆ بەبەرپرسیارە. گەر ئەمجارە بەم سزایانە تەسلیم ببن، نەك هەرخۆتان بەڵكو كۆمەڵگەیەكتان تەسیلم كردوە. گەر ئازایەتییەكیش لەخۆتاندا شك دەبەن و تەسلیم نابن، بەرگەی سزاكانیش بگرن و دەست لەو ئامانجە هەڵمەگرن كە هاوارتان بۆدەكرد. گەر ئێوە مامەڵە بەدەنگەكانەوە نەكەن و تەسلیمی عێراقی فاشییەت نەبنەوە (كە خۆشتان بەشێكی ئەو فاشیەتەن) كۆمەڵگەكە بریاری خۆیدا و جیابوونەوەی ویست.
ئێستا سەدەكۆنەكان نین هەمووشتێك بەئاسانی بۆ عێراقی عەرەبی بچێتە سەر، ئێستا قۆناغێكی ترە. بەڵام گەر پشت بەو لۆبی نەوتە ببەستن كە كۆمەڵێك خانەنشینی دورخراوەی ناو دەسەڵاتن لە جیهانی ئەوروپا و ئەمریكا، هیچتان پێناكرێت. لەبری ئەوە پێویستە بگەرێنەوە بۆ بروابوون بەخۆتان، بۆ یەكریزی ناوماڵی كورد. بۆ شوێنێك بەرژوەندییە تایبەتییەكانی خۆتان و خێزانەكانتان لەبیربكەن و، ئامانجێك بكەنە بنەمای هەمووشتێك، كە ئەو ئامانجە دەبێتە پاییەكی بەهێز بۆ سەرەتایەكی باش.(هەرچەند سەیری ئاكارەكانتان دەكەم، هەستدەكەم من خەون دەبینم و ئەمەتان لێ چاوەرێناكرێت!)
منێكی هاوڵاتی كە دەنگم نەداوە بە ریفراندۆم و نەچووم بەلای سندوقەكاندا. هۆكەشی ئەوەبوو دەمزانی میكانیزمی پرۆسەكە هەڵەیە، بەڵام زۆر ئاساییە بۆم لەمەو دوا دەست لە قەڵەم و كتێبەكانم هەڵبگرم و، ببمە قاچاخچییەكی سەرسنوورەكان و كەلوپەل بهێنم بۆ خەڵكی ئەم وڵاتە، بەو مەرجەی جارێكی تر كورد نەگەڕێتەوە بۆناو ئەو فەزا فاشییەی ناو عێراق و جارێكی تر مامەڵە بەكوردەوە نەكەن بۆ بەرژەوەندییەكانی خۆتان. رەنگە توشی سەختییەكی زۆر ببین و هەمووشمان ئەمەمان لەبەرچاو بوو، وەلێ كۆتایمان پێنایەت. ئەوان كە سزاكانی خۆیان دەستپێكرد، با كوردیش دەستبكات بە خۆبونیاتنانێكی راستەقینە. هەرچەندە ئەم رستانە وتنیان خۆشە و كردنیان قورسە، لێ چارەسەر هەر ئەوەیە بروا بەخۆت بكەیت و لەخاڵی سفرەوە دەست پێبكەیت. ئەم خاڵی سفرە بۆ بونیاتنانی دەوڵەت جیاوازترە لەو خاڵە سفرەی كە بۆ چوونەوەبوو بۆ عێراق. ئەمە تەنها ئامۆژگاری و سەرنجی هاوڵاتییەكی ئەم وڵاتەیە كە هەرگیز بروای بەو سیستەمە حیزبی و خێڵەكییە نەبووە و بیست و پێنج ساڵە دەست و پەنجەی لەگەڵ نەرمدەكات و رەخنەی لێدەگرێت. خۆ گەر لەمەشدا دیسانەوە بە پێچەوانەی ویستی خەڵك جوڵانەوە و سەرلەنوێ كەوتنەوە شوێن بەرژەوەندییەكانی خۆیان، پێویستە دەنگی (بەڵێ) كان سزایان بدەن.
(گەر دەوڵەت دروستبكەن، بەهەمان هەناسەی پێشوو من یەكێك دەبم لە رەخنەگرە سەرسەختەكانی كەم و كورتییەكانی ئەو دەوڵەتە، ئەما گەر مامەڵە بكەن بەم دەنگدانەوە، پێویستە ئەوانەی بەڵێیان بۆكردون بتان بەنە ناو هۆڵی دادگاكان. گەر بیانوشتان هەیە بۆ تەسلیم بوون، ئومێدی ئەوەتان لەبەرچاو بێت هێشتا خەڵكێكی زۆر هەیە كە لەپێناو دەوڵەتدا بە هەموو جیاوازییەكانەوە ئامادەیە هەموو كارێك بكات.)
