نەبەز گۆران: حیزب وەك نەخۆشخانە، بەتایبەت پێشكەشە بە جنێودەرەكانی: (یەكگرتوو، گۆڕان، كۆمەڵ، پارتی، یەكێتیی.)

ئەم فەزا ناتەندروستەی لە ئێستادا لەناو دونیای شاشەكان، بەتایبەت تۆرەكۆمەڵایەتییەكاندا دەیبینین، بەرهەمی پەروەردەیەكی ناتەندروستی ئایدۆلۆژییە. لە فەزایەكی وەك ئەمەدا نابێت قسە لەسەر پەروەردەی خێزانی بكەین، دەبێت قسە لەسەر پەروەردەی حیزبی […]
بۆ ناردنی ئەم بابەتە بۆ سەر فەیسبووکەکەت یان هاوڕێکانت کلیک بکەرە سەر ئەو سمبولانە

ئەم فەزا ناتەندروستەی لە ئێستادا لەناو دونیای شاشەكان، بەتایبەت تۆرەكۆمەڵایەتییەكاندا دەیبینین، بەرهەمی پەروەردەیەكی ناتەندروستی ئایدۆلۆژییە. لە فەزایەكی وەك ئەمەدا نابێت قسە لەسەر پەروەردەی خێزانی بكەین، دەبێت قسە لەسەر پەروەردەی حیزبی و ئایدۆلۆژیی بكەین، چونكە دونیا وێرانەكەی ناو شاشەكان ئایدۆلۆژیا دروستیكردوە نەك خێزان. دونیای ناوشاشەكان، دونیاییەكی ئایدۆلۆژییە، دونیاییەكە حیزب لە رێگای منداڵەكانییەوە، سەرقاڵی ناشیرینكردن و وێرانكردنی هەمووشتێكە. ئەم منداڵانەی حیزب، نە هەرگیز رەخنە و سوكایەتی لەیەك جیادەكەنەوە، نە باكیان بەوەیە چی لە دەمیانەوە دەرژێتە خوارەوە، نە دەشزانن جنێو و تێگەیشتن جیابكەنەوە، نە بۆشیانگرتنە بزانن دونیای رەخنە چییە و دونیای سوكایەتی چییە و، دونیابینی جیاواز چییە. ئاستی نزمی ئەمانە گەیشتوەتە شوێنێك، كە ئامادەن لەپێناو بەرگریكردن لە ئایدۆلۆژیای حیزبی، لەناو فەرهەنگی زماندا بگەڕێن بۆ خراپترین و ناشیرینترین وشە. كاتێك هەڵوەستە لەسەر ئەم ئاستە نزمەیان دەكەیت، راستەوخۆ بۆت رووندەبێتەوە پەروەردەی حیزبی لەم هەرێمە لەو پەڕی داڕماندایە. (هەندێكجار بەرستە و شەی سەخت پێویستە وێنە راستەقینەكەی خۆیانیان پیشاندەی.)
كۆمیدیاییە پێمانوابێت لەم هەرێمە لەرووی پەروەردەییەوە حیزبێك لە حیزبێكی دیكە جیاوازە. هیچ جیاوازییەك بوونی نەماوە، هەمووی لەژێر پەروەردەیەكی خراپدا دەناڵێنێت. هەمووان خەریكی بەرهەم هێنانی نەوەیەكن، ئەم نەوەیە لەپشت شاشەكانەوە ئامادەیە لەچركەساتێكدا دەست بۆ (خوشك و دایك، خێزان، تایبەت مەندی كەسایەتی) ببات. كاتێكیش دەرك بەم وێرانەیە دەكەیت، كە بتەوێت لە گۆشەنیگایەكی رەخنەییەوە قسە لەسەر رووبەری سیاسیی حیزبی بكەیت. لەگەڵ هەریەك لەو حیزبانە رووبەروو ببیتەوە و رەخنەیەك بگریت لە ئەدای سیاسیان، یان ئەدای جوڵەكانیان، یەك لەشكر لە (هەرچی و پەرچی، وەك هانائارێنت دەڵێت) دەستدەكەن بە سوكایەتی. ئیدی چ ئەوانەیان خۆیان بەنوێنەری ئەخلاقی پاك دەزانن، چ ئەوانەیان خۆیان بەنوێنەری پەروەردەیەكی باش دەزانن، چ ئەوانەیان خۆیان بە نوێنەری زمانێكی پاك و دونیابینییەكی نوێ‌ دەزانن، جیاوازیان نییە. هەر حیزبە و لەشكرێك لەو جنێودەر و سوكایەتیپێكەرانەی هەیە و سەرقاڵی پەلاماردانن لەسەر ژیان و خێزانی ئەم و ئەو. (یەك رەخنە لە ئەدای سیاسیی حیزبێك بەسە بۆ ئەوەی، سەبەتەیەك جنێو سوكایەتی لەدەمی كادیری حیزبی بچنیتەوە.)
ئێمە نیگەران نین لەم دۆخە، چونكە دەزانین ئیدی حیزبی كوردی و ئایدۆلۆژیاكەی ئەمە بەرهەمەكەیەتی. دەشزانین لەناو فەزایەكداین ئەم فەزایە هێندە دورە لە كتێب و دورە لە بیركردنەوەوە، هەر ئەو مۆدێلەی لێچاوەرواندەكرێت كە حیزب ببێتە نەخۆشخانەیەك بۆ كۆكردنەوەی هەزاران بیمار لەناو خۆیدا. گومانم لەوە نییە پەروەردەی حیزبی بە تەواوەتی شێواوە، بەڵام ترسم لەوەیە ئەم پەروەردە نادروستە ببێتە (عادەت) و بچێتە ناو خێزانەكانەوە. گەر ئەمە چوویە ناو خێزانەكانەوە ئیدی بناغەی یەكەمی كۆمەڵگە بەتەواوەتی هەڵدەوەشێتەوە. بێگومان هیچ (دایك و باوكێك) خۆشحاڵنییە نەوەكەی ببینێت سەرقاڵی سوكایەتی كردنبێت بەخەڵك. هەموو (دایك و باوكێك) پێخۆشە نەوەكەی نمونەیەكی باش، لە ئەدەب، لە زمان پاكی، لە دونیابینی فراوان بێت. ئەما كە لەدەرەوەی خەونی (دایك و باوك) نەوەكانیان بەم جیهانە وێرانەوە سەرقاڵن، ئەبێت راستەوخۆ قسە لەسەر پەروەردەی حیزبی بكەین. حیزبی كوردی لەم هەرێمە شتێك نەماوە خراپی نەكات. شتێك نەماوە مانای بداتێ‌ و بێمانای نەكات، تەنها یەك شتماوە ئەویش پەروەردەی خێزانییە، چاوەرواندەكرێت لەرێگەی ئەم پەروەردە حیزبییە نادروستەوە، پەروەردەی خێزانیش وەك هەموو شتەكانی دیكە بشێوێنێت. نمونە: ئەوەی ئێستا لە دونیای شاشەكان دەیبینین، نمونەیەكە تاپێمانبڵێت: خۆرزگاركردن لەو جیهانەی سوكایەتیپێكەران دروستیدەكەن، خۆ رزگاركردنە لەو پەروەردە ئاست نزمە ئایدۆلۆژییەی حیزب لە دونیای شاشەكاندا نمایشی دەكات. (دەتوانی كارەكتەرێكی حیزبی بیت، بەڵام ئەمە مانای ئەوەنییە لە پێناو حیزبدا، ماهییەتی خۆت و شكۆی خۆت لەدەست بدەیت و، رێگا بەخۆت بدەیت لەو ئاستەنزمەدا خۆت ببینیتەوە.)

 

بۆ ناردنی ئەم بابەتە بۆ سەر فەیسبووکەکەت یان هاوڕێکانت کلیک بکەرە سەر ئەو سمبولانە
نەبەز گۆران

ئەرشیڤی بەڕێز: نەبەز گۆران