بەهرۆز جەعفەر: نەخشەی سیاسی و ئابوری لە هەرێمی کوردستان پێویستی به گۆڕینە.

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

دەوڵەتی کوردی نە بە نەوت و نە بە هێڵی غازی سروشتی دانامەزرێ، بە گۆڕینی شەڕی مەزهەبی بە ململانێ و شەڕی قەومی نایەتە دی، بەڵکو پێویستی بە دروستکردنی دامودەستگەی شەرعی و ڕێساو یاسایە.
سەرکردایەتی سیاسیی کوردستان لە باشور، نە هیچ کاریگەرییەکیان لەسەر ڕای گشتی هەیە، نە ئەتوانن فشار لەم و لەوی ئیقلیمی بکەن، نە نرخی نەوت و هێڵی غاز و پێداویستیە ژیارییەکانی ناوچەکەیان پێ دەستکاری ئەکرێ، ئەوەی ئەبێت بیکەن و بە دەستیانە بریتی یە لە چاکسازی ڕیشەیی و دروستکردنی موئەسەسات و بیناکردنەوەی کوردستان لە ڕووی توانا مرۆییەکان و ئابوریی و سەربازیی و دیبلۆماسیەوە، بێگومان ئەمەش یان پێ ناکرێ.
دەستگە حزبیەکان، چونکە کادیریان پەروەردە نەکردووەو، هەرکەسێ بێ ئیش بووە جێیان کردۆتەوەو ئەویش بێ تێگەیشتن لە بنەماکانی زانستە سیاسی و پەیوەندییە کۆمەڵایەتیە هاوچەرخەکان دەستی داوەتە کوردایەتی و، ئیتر سیاسەت لە فۆڕمە کوردییەکەیدا ناشیرینترین شکڵی وەرگرتووە، ببینە دە ڕۆژ پێش ئێستا باسی لە دەستدان یان هەر نەبێ تێکچونی ڕەوشی شاری کەرکوک مان کرد، بە دەیان کۆمێنت و وەڵامی بازاڕی ڕەت کراینەوەو، وەڵا وامانزانی مالیکی و عەبادی ئەم بابەتەیان نوسیوەو، وەڵا واو وا… کەچی هەفتەیەکی نەبرد ئەنجومەنی ئاسایشی هەرێم خۆی بەیاننامەیەکیان بڵاوکردەوە باس لە هێرش کردنە سەر کەرکوک و کوردستان ئەکەن!.
پێش پێنج بۆ شەش مانگ، لە بەرئەوەی لە دیدارێکدا گوتم” بارزانی بەس خۆی لەگەڵ ڕیفراندۆمەو، بە تاقی تەنهایە” کەچی ئەوەندەی تر ناو و ناتۆرەو، دژی ئیرادەی بەرەی گەل و ئەمانەمان ڕووبەڕووکرایەوە، ئەیانگوت ئێمە هەشتا دەوڵەت مان لەگەڵە و ئێران و تورکیا قسە ناکەن و، کوا یەکێتی لەگەڵە؟. گۆڕان؟. کۆمەڵ؟. کۆمەڵانی خەڵک؟.
بۆیە کورد ئەبێت لە ناوەوە خۆی بەهێز بکاتەوەو بگۆڕێت، ببینە لە ( لە ئابی 2014) ەوە کورد ڕۆژانە ( 260000) دووسەت و شەست هەزار بەرمیل نەوتی کەرکوک ئەفرۆشێ، کوا داهاتەکەی؟. ئەیانگوت کورد سیاسەتی ناوچەکە ئەگۆڕێ، ئەوەتا ناوچەکە تەحەکوم بە هەرشتێکەوە ئەکا، ئەوەتا تەنانەت هەناردەکردنیشی ڕاگرت. بۆیە لەڕاستی دا پێش ئەوەی سەرکردایەتی سیاسیی باسی نەخشەی ڕۆژهەڵاتی ناوەڕاست بکا، پێویستە باس لە گۆڕینی نەخشەو بونیادی سیاسیی بنچینەیی هەرێم بکرێت. سێکتەری نەوت و غازی سروشتی پرسێکی ئابورییە بۆ گەشەپێدانی مرۆیی نەک پرسێک بێت تێکەڵ بە کوردایەتی بکرێت.