نەبەز گۆران: شەری شاشەكان راست نییە.

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئەو فەزا پڕ تۆمەتباركردنەی یەكتری، ئەو هێرشانەی لە دونیای شاشەكانەوە دەیكەنە سەریەكتری، ئەو مەترسیانەی باسیدەكەن، هیچ كامێكیان راست نییە. تەواوی ئەو فەزایەی دەیانەوێت دروستی بكەن، بۆئەوەیە شكستی ریفراندۆم و رێككەوتنەكەیان بشارنەوە، دەیانەوێت هەڵبژاردن نەكرێت و لە شوێنی خۆیان بمێننەوە. هەر ئەوانەی ئێستا لەسەر شاشەكان قسەی زۆر خراپ بەیەكتری دەڵێن، چاوەروانبكەن سبەینێ‌ پێكەوە لەسەر مێزی گفتوگۆ دانیشن و پێبەكەنن.(بەرگری لە بەرژەوەندییە تایبەتییەكانی خۆیان دەكەن.)
ناكرێت هاوڵاتیيانی ئەم هەرێمە چ لە كاتی ئاشتیدا، چ لەكاتی ناكۆكییە زۆر تایبەتییەكانی خۆیاندا بروایان پێبكەن. ئێستا هەریەكەیان دێت ئەویتر تۆمەتباردەكات و دەیەوێت خۆی لە پرۆسەكە پاك بكاتەوە. هەر یەكەیان دێت باس لە ترسێك و باس لە هەرەشەیەك دەكات، لەكاتێكدا نە هەرەشەیەك لە ئارادایە، نەترسێك، نە هیچ كامیان دەتوانن خۆی لە پرۆسەكە و شكستەكەی ریفراندۆم پاك بكاتەوە و، نە هیچ كامیان دەتوانێت بڵێت: من ئاگام لە رێككەوتنەكە نەبووە.
رێككەوتنەكە كرا، وەك خۆشی جێبەجێدەكرێت، لەم چركەساتەی ئێمە تێدا دەنووسین، هەردوولا لە رێگەی كەناڵە تایبەتییەكانی خۆیانەوە، لە گفتوگۆدان لەگەڵ (عەبادی) هەریەكەیان دەیەوێت لە رێگەی گفتوگۆوە جارێكی تر بگەڕێتەوە بۆناو گۆڕەپانی سیاسیی. هەرچۆن رێككەوتنەكەیان بەنهێنی كرد، لە ئێستاشدا بەنهێنی خەریكی هەوڵدانن بۆ نزیكبوونەوە لە دەسەڵاتی عێراق. كەچی دێن لەشاشەكانەوە باس لە مەترسی و هەرەشە و ناكۆكی گەورە دەكەن.
دوای وەستانی جوڵەی هێزە سەربازییەكان، دەستدەكرێت بەكۆنترۆڵكردنی سنوورەكان و فرۆكەخانەكان. پاشان چەند هێزێكی كوردی پێكەوە پرۆژەیەك ئامادە دەكەن بۆ گفتوگۆ لەگەڵ بەغداد لەسەر بنەمای دەستووری عێراق. حوكومەتی عێراقیش بودجەی پارێزگاكان و موچەی فەرمانبەران دەنێرێت. ئەمە تەواوی دیمەنەكەیە. جاگەر بیانەوێت بیشێوێنن و ململانێ‌ تایبەتییەكانی خۆیان بخەنە ناو، بێگومان دۆخەكەیان لەوە خراپتردەبێت. لەبری ئەم شێواندنەش باشترە بێن ددان بە شكستی ریفراندۆم بهێنن و، ددان بەوەدا بنێن رێككەوتنەكە خۆیان پێی رازی بوون. پێویستیشە خەڵكی كوردستان گوێ‌ بەو شێواوییە نەدەن لە شاشەكانەوە دروستی دەكەن و چاوەڕێبكەن هەفتەیەكی ترنابات، شیوەنی سەرشاشەكان كپ دەبێتەوە و، دیمەنێكی تر دێتە ئاراوە.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت