نەبەز جەلال: عەفرین دەبێتە دەروازە بۆ نەتەوەیەک.!

بۆ ناردنی ئەم بابەتە بۆ سەر بەشی بەرێزت یان هاوڕێکانت لە تۆڕە کۆمەڵایەتییەکان، کلیک بکەرە سەر ئەو سمبولانە

کورد لە هەر چوارپارچەی کوردستاندا بەدۆخێکی قورسی مێژووی گەرمی شەڕی ناڕەوا و بەرگری کردنێکی توندی ململانێی ڕاستەقینەی نەتەوەیی بونی خۆیدا گوزەر دەکات.
باشوری کوردستان پاش 26 ساڵی حوکومڕانی لەدەستکەوتی گەورەوە گەیشت بەشکست و بەرهەمی دەستکەوتەکەی بوە ئازارێکی قورسی رۆحی و دەروونی بۆ سەرتاسەری خەڵکی کوردستان. ڕوداوی بەدەستەوەدانی نیوەی خاکی باشوری کوردستان بە هۆکاری شکستی بەڕێوەبردن و پاوانخوازی دەسەڵاتی دوو پارتی سیاسی لە هەرێمی کوردستان و زۆرانبازی هێزی بەناو براوەکان بوو بۆ سەرکەوتن و دیاریکردنی دێڕێکی زەقی درۆینەی کاری نەکردە لەمێژووی گەلێکی بەش مەینەتدا بوو بۆ تاکێکی هەڵچنراو.
بە پێچەوانەی چاوەڕوانی دەستکەوتەکەشییەوە بوە مایەی دڵشکاندنی زۆرینەی خەڵکی کوردستان و بێ ئومێدی و پەرتبونی ماڵی کورد و بچوککردنەوەی دۆزی کورد لەدونیادا کە کورد تێیدا گەیشتبوە لوتکە، هێزی بەرگریکار و دڵسۆز و وڵاتپارێزی خەڵکی رۆژئاوای کوردستان کە لە کۆبانی و ناوچەکانی تردا بوونە سیمبولی بەرگری و بەرخۆدان و مایەی سەربەرزی کورد و سەرخستنی پرۆسەی ڕزگاری ئازادی بۆ نیشتیمان بەرهەمیان دروستکردنی کانتۆنەکانی بەڕێوەبردنی خۆجێییی خەڵک بوو بۆ خەڵکەکەی خۆیان و نیشتیمان.
بەدڵنیایی بەردەوامی مانەوە و بەرگریکردنی ئەم هێزە کوردستانیانە لە خۆرئاوادا دەبێتە مایەی سەرکەوتنی زیاتر و گەڕاندنەوەی شکۆی ڕاستەقینەی نەتەوەو کوردبونێکی ڕاستەقینە بۆخەڵکی کوردستان و خاکەکەی نەک وابەستە بەحیزبی فەرماندە و تاک پاڵەوان و دەسەڵاتە بازرگانییە گوماناوییەکانیان لە پارچەکانی تری ووڵاتدا.
بێگومان شکستی کورد لە رۆژئاوای کوردستاندا دەبێتە شکستی تەواوی خەڵکی کوردستان و دواکەوتنی کورد لە بەشداریپێکردنی پرۆسەی ئاڵوگۆڕی ناوچەکە لە نێوان زلهێزەکان و نەخشە نوێیەکەیدا بۆ گۆڕانکاری.
تورک دوای تەواوبوونی جەنگی نابەرابەری دژ بەکوردانی عەفرین ناوەستێت، ملهوڕییەکانی زیاتر دەکات و دەستی زیاتر درێژدەکات لە پێناو دروستکردنی پشتێنەیەکی دڵنیایی پارێزراوی تۆکمەتر و دورتر لە سنورەکانی بەرکەوتنی خۆیی لە نێو خاکی تورکیادا.
پلانی دانان و لێدانی سەنگەرەکانی بەرگریکردنی خۆیان زیاتر دەکەن لە چوارچێوە دیاریکراوەکەدا بۆ گۆڕەپانەکانی شەڕ و هێڵی ئاگرینی بەرکەوتن لەو شوێنەی ئەوان ناوی دەبەن دوژمن.!.
بە مانایەکی تر هەموو ئەو ناوچانەی بەجێ دۆستنشین و تورکنشینی خۆیانی دەزانن دەیگەڕێننەوە نێو باوەش و ژێر باڵی پێکەوە ژیانێکی ئاشتیانەی سوڵتان و دەیکەنەوە ماڵی تورکی خۆیی و دەستی بێ مەقاشی بێکێشەو ڕاستەوخۆی خۆیان دەبن بۆ هەرێمی کوردستان و شەڕ دەخەنەوە نێو ناوچە تورکنشینەکانی هەرێمی باشورەوە بە شارەکانی هەولێر و کەرکوک و موسڵیشەوە بۆ گەیشتن بەدوا خەونی میرنشینی سوڵتانەوە لە باشوری کوردستان.
بەرامبەر هەمان دۆخی دابەشکراوە لە ناوچەی زۆنی سلێمانی و گەرمیاندا بۆ ئێران و بێبەش نەکردنی دەسەڵاتدارانی ناوچەکە لە حوکومڕانی پێبڕاو و لەسەر دابەشکردنی هێز لەسەر و ئەگەرەکانی دەسەڵات لە بەدەستهێنانی دەسەڵات لە ناوچەکەدا.
دەربڕین و جوڵە و هەڵسوکەوتەکانی ئەردۆغان ئاسایی نین، فۆرمێکی جیاواز لە هەڵسوکەوتێکی زلهێزانەیی زیاترە بەرجەستە دەکات ، وەک لە دەست و دەسەڵاتی سەرکۆمارێکی تورکیا بۆ پەلکێشکردن و کۆنترۆڵکردنی زیاتری ناوچەکە ئەوەی بۆتە جێیی ململانێی ئەمریکا و روسیا و بەشێکی ئەوروپا لە گەمە گەورەکە و بۆرسە جیهانیەکەی ناودەبرێت.
گوژمی هێرشەکانی تورکیا کە دەیکات سەر رۆژئاوا بۆ ئەوەیە بەرگرییەکەی پتەوتربێت و نایەوێت هیچ لەو گۆڕانکاریانەی دێنە ناو بازنەکەوە پریشکی ئاگری بەر ووڵاتی تورکیا بکەوێت و خاکەکەی بەپارێزراو بهێڵێتەوە لەم جەنگە کە ئاراستەی فراوانبونێکی زۆر گەورەتری لێ چاوەڕوان دەکرێت.
لێرەدا بەرپرسیارێتی هێزە کوردییەکان و بەتایبەتیش لە ناوچە و شوێنی بەرکەوتنەکەدا هێزەکانی پارتی کرێکارانی کوردستان دەبێت لە دۆخی بێدەنگی و سڕبوونیاندا بۆ باکوور بێنە دەرەوە و دۆخی نەخوازراوی ئێستای کوردستان بکەنە مەشخەڵی بەرخۆدان و تروسکایی ئازادی راستەقینە و بڕیاری تەواو و هەڵوێستی خۆیی بەرامبەر ئەم دۆخە بخەنە نێو زەمینی سیاسی و جوڵەی ئەرێنی باکوری کوردستان و تورکیاوە و هێزی سەرتاسەری خۆی بکاتە جێی سەنگ و مەحەکی یەکلایکردنەوەی دۆزی کورد و کوردستان، لە پاڵیشدا هەرجۆرە چالاکیەکی تری کە لە توانایدا هەیە بۆ جێبەجێکردن بێ سڵەمینەوە بخاتە گەڕ بۆ گەیشتنی هەرچی زووترە بە ئامانج و لە دەست نەدانی ئەم کاتە گرنگ و گونجاوەی بۆتە دەرفەت بۆ هەموو خەڵکی کوردستان و خودی بەدەستهێنان و گەیشتن بەمافەکانی گەلی کورد لە کوردستان. ئامادەکاریش بخوڵقێت بۆ تێگەیشتنێکی سروشتیانەی هێزەکانی باشوری کوردستانیش لە وەرگرتن و قۆستنەوەی ئەم چانسی گەورەبون و یەک ماڵییەی کورد و دەست لەو خۆبەدەستەوەدان و ملکەچییە ناوچەییانە هەڵبگرن و دۆزی راستەقینەی کوردستان بخەنە پێش هەر ویستێکی تاکی و حیزبی و بازرگانییەوە بۆ تەواوی مافەکانی خەڵک و خاکی کوردستان بۆ گەیشتن بەسەرکەوتن. یەکانگیر لەگەڵ گشت ئەمانەشدا دەبێت رەوەندی کوردییش دەست لە ناودەست ، تێکۆشانەکانیان یەک بخەن و لۆبیەکی سەرتاسەری پێکبهێنن ، دەنگ و ڕەنگی کوردستانیان بخەنە خزمەت پرۆسەی ئازادکردن و سەربەخۆیی کوردستانەوە.
دەنا بە دڵنیایی کاتی لەدەستدانی ئەم جۆرە هێرش و پەلاماردانانە دەمانبەنە قەراغی لەبیر بردنەوە و پەراوێز خستنێکی سەرتاسەری و دەبینە دواکەوتەی پرۆسەی سیاسیەکەی خۆرهەڵاتی ناوین. گەلی کوردیش دەگەڕێتەوە دۆخی جاران و دەبێتەوە بە بن دەستێکی سەرکوتکراوی دۆڕاو لە گۆڕەپانی جەنگ و چانسی دروست بونەوەی رۆژێکی وەک ئەمڕۆمان بە سەدان ساڵی تر بۆ نارەخسێت لە بەخت و تەختی مێژوودا.

بۆ ناردنی ئەم بابەتە بۆ سەر بەشی بەرێزت یان هاوڕێکانت لە تۆڕە کۆمەڵایەتییەکان، کلیک بکەرە سەر ئەو سمبولانە
نەبەز جەلال

ئەرشیڤی بەڕێز: نەبەز جەلال