نەوزادى موهەندیس: چۆن! ئەم دۆخە قەتیسەى هەرێمى کوردستان تێبپەڕێنرێت؟

کلیک بکەرە سەر وێنەی نوسەر دەگەیت بە ئەرشیڤەکەی

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئاشکرایە هەرێمى کوردستان لەدواى ئەنجامدانى ڕیفرادۆمەوە لە 25/9/2017وە ڕووبەڕووى گەمارۆى سیاسى و ئابورى و ئەمنى بوەوە لەلایەن وڵاتانى دەرودراوسێ و بەغدادیشەوە و ئەمەش بوە هۆکارى لێکترازان و دوورکەوتنەوەى زیاترى هێزە سیاسیەکانى کوردستان و پەرتکردنى نێوماڵى کورد لە کوردستان و تاڕادەیەکیش لەدواى ڕووداوەکانى 16/10/2017 لە ناوچەدابرێنراوەکانیش توشى کارەسات و شکستى سەربازى هات. هەموو ئەو ڕووداوانە کاریگەرى خراپیان کردە سەر دۆخى سیاسى و ئابورى و ئەمنى و کۆمەڵایەتى کوردستان و هێندەى تر درزى نێوان سەرکردە و لایەنە سیاسیەکانى تۆخکردەوە و فراوانترى کرد.و کار گەیشتە تۆمەتبەخشینەوە و تاوانبارکردنى یەکترى بە خیانەتکردن لە نەتەوە و نیشتیمان.
دواتریش بەهۆى ئەنجامدانى هەڵبژاردنى پەڕلەمانى عێراقەوە لە 12/5/2018دا و هەر لەگەڵ ڕاگەیاندنى ئەنجامە بەراییەکاندا، لەسەرتاسەرى عێراق بەکوردستانیشەوە دەنگى ناڕەزایى بەرزبۆوە لەسەر ئەنجامەکان و زۆرینەى لایەنەکان ناڕازیبوون لەو ئەنجامانە و کەوتنە تانەلێدان و داواى بەدەست ئەژمارکردنى سندوقەکانى دەنگدانیان کردو ئەمەش بوە هۆى ئەوەى کە جارێکى تر ناکۆکى و ململانێ حیزبیەکان لە کوردستاندا تۆخببنەوە و ژمارەیەک لایەنى سیاسى کە 4 لایەنى سەرەکى(گۆڕان و یەکگرتوو و کۆمەڵ و هاوپەیمانى و لەگەڵیشیاندا بزوتنەوەى ئیسلامى و شیوعى ) بوون و بەرەیەکیان لە یەکێتى و پارتى گرت و تۆمەتى تەزویر و ساختەکاریان بۆ هەڵبەستن و ئەوەى پێیانکرا لە پەڕلەمانى عێراق و دادگاى فیدڕاڵى کردیان بۆ ئەوەى یان تەواوى پڕۆسەى هەڵبژاردنەکە ڕەتبکرێتەوە یان 100% ئەنجامەکان و ێندوقەکان بەدەست ئەژمار بکرێتەوە. بەڵام هیچ کام لەو داواکاریانە جێبەجێ نەبوو ،تەنها ئەو ێندوقانەیان ئەژمارکردەوە کە تانەیان لەسەربوو.ئەوەتا تاکو ئێستا کە نزیکەى 3 مانگى تەواوە هێشتا ئەنجانى کۆتایى دەرنەکەوتوە و دادگاى فیدڕاڵیش پەسەندى نەکردوە.بەم شێوەیە دەوڵەتى عێراقى ماوەى 3 مانگە بێ پەڕلەمان و بەبێ دەسەڵاتى یاسادانانە و حکومەتیش حکومەتى کاربەڕێکەرە و لەئێستاشدا باشور و ناوەڕاستى عێراقیش گیرۆدەى گێژاوێکى سیاسى و ئابورى بۆتەوە و جەماوەریش لەهەموان ناڕازین و دەستیان داوەتە خۆپیشاندا کە ماوەى مانگێکى تەواوە.ئەم دۆخە نەخوازراوەى عێراق بۆتە هۆى لێکهەڵوەشانى تەواوى نێوماڵى شیعە و سونە و کوردیش.
ئەوەى گرنگە چۆن دەتوانرێت ئەم دۆخە قەتیس و مەنگەى کوردستان بشەڵقێنرێت و بتوانرێت لە کاریگەریە خراپەکانى ڕووداوەکانى ڕابووردوو ڕزگاربکرێت و هەنگاو بەرەو ئایندەیەکى باشتر و گەشتر بنرێت؟
ئەم دۆخە هەموان لێى بەرپرسیارن لەسەرکردە و حیزب و جەماوەریش بە بچوک و گەورەیانەوە،چونکە هیچ کامیان خەمخۆریەکى جدیان دەرنەبڕیوە بۆ تێپەڕکردن و بازدان بەسەر ڕق و کینە کۆنەکان و بەرژەوەندیە حیزبى و کەسیەکانى خۆیاندا و جەماوەریش متمانەو بڕواى بەهیچ کام لەو سەرکردە و حیزبانە نەماوە و هیچ سەرکردە و حیزبێکیش ناتوانێت نوێنەرایەتى جەماوەر بکات و شەقامى کوردى بجوڵێنێت و داواى مافە ڕەواکانى خۆیان بکەن.حیزب و سەرکردە سیاسیە بەناو ئۆپۆزسیۆنەکانیش نایەنەوێت ببنە ئۆپۆزسیۆنى ڕاستەقینە و ناشتوانن ئەو ڕۆڵە بە ڕاستگۆیانە بەرجەستە بکەن و هەموانیان ئەوەندەى هەڵپەى دەسەڵاتگرتنە دەست و کۆکردنەوەى سەروەت و سامان و بەدەستهێنانى پلە و پۆست و ئیمتیازاتى حیزبى و کەسین نیوهێندەى پەرۆشى ئایندەى گەل و نەتەوە نین.
هەربۆیە ئەم دۆخە قەتیسە دەخوازێت کە:
1- سەرکردەیەکى کاریزما و بەهێز دروست ببێت (بەوێنەى مام جەلالى ڕەحمەتى) و بتوانێت سنور و تابۆ حیزبیەکان تێبپەڕێنێت و هەنگاوى پەرۆشانە هەڵبگرێت بەرەو ئاشتى و ئاشتبونەوە لەنێوان سەرکردە و حیزبە سیاسیەکان و جەماوەریشدا.
2- حکومەتى هەرێم هەوڵبدات کە ژیان و گوزەرانى جەماوەر باش بکات و خۆشگوزەرانیان بۆ دابین بکات و خزمەتگوزاریە بنچینەییەکانیان بۆ دابین بکات لە ئاو و کارەبا و سووتەمەنى و مووچەى مانگانە.
3- حکومەت هەوڵى ئاوەدانکردنەوەى وڵات بدات و پڕۆژەى خزمەتگوزارى و ئاوەدانى جێبەجێبکات بۆ نەهێشتنى بێکارى و هەژارى و هەڵاوسان و کاربکات بۆ بوژاندنەوەى بازاڕ و بازرگانى و ئابورى وڵات.
4- هەوڵدبدرێت پەیوەندیە ناوچەیى و نێودەوڵەتیەکان لەگەڵ حکومەتى هەرێمدا پتەوبکرێتەوە و ئاسایى بکرێتەوە بۆ تێپەڕاندنى کاریگەریەکانى ڕیفراندۆم.
5- هەوڵى یەک و یەکگرتوویى ڕیزەکانى کۆمەڵگاى کوردەوارى بدرێت و هەموان لەسەر یەک گوتار و یەک کردار ڕێکبکەون و لەبەرامبەر بەغدادى شڵەژاو و تێکچوودا بەبەهێز خۆ پیشان بدەن و داواى مافە ڕەواکانى گەلەکەمان و ئیستحقاقى هەڵبژاردن بکەن.
جگە لەم هەنگاوانە کورد هیچ ڕێگەیەکى لەبەردەمدا نیە،وهیچ کاتیش دوورکەوتنەوە و دڕدۆنگى و لێکترازان لەبەرژەوەندى کورد نەبوە و تەنها بەیەک و یەکگرتوویى کورد توانیویەتى مافەکانى خۆى مسۆگەر بکات،و ئەم دۆخەش پێویستى بەهەوڵ و خەمخۆرى هەموان هەیە چونکە ناوچەکە بەگشتى لەبەردەم گۆڕانکارى گەورە و کتوپڕدایە و پڕیشکى هەر جەنگێکیش ڕاستەوخۆ بەر هەرێمى کوردستان دەکەوێت،جا چەندە ئامادە و یەک ماڵ و توندتۆڵبین ئەوەندە دەتوانین خۆمان بپارێزین ،ئەگینا بەم دۆخەى ئێستامانەوە ئەوەى هەشە لەدەستمان دەچێت.بۆیە هەق وایە سەرکردە و حیزب سیاسیەکان پەرۆشى زیاتر بنوێنن و بەرژەوەندى گەل و نەتەوە بخەنە سەروو بەرژەوەندیە حیزبى و دەسکەوتە مادیە بچوکەکانەوە.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت