نەبەز گۆران: بەغداد خۆشە، خۆش!

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

لە زنجیرەی(ماركۆ پۆڵۆ) شازن بە شا دەڵێت: ئەگەر كێشەیەك بە تیرێك چارەسەر بكرێت، حەق نییە مەنجەنیقێك بەكار بهێنی.” هەڵپەی گەڕانەوە بۆ ناوەند، هەڵپەیەكە بۆ بەدەست هێنانی شوێن لەناوەندا. ئێمە پێشتر پێمانوابوو دەبێت كوردەكان لە هەرێم، پێكەوە بەیەك پاكێجەوە، بەیەك پرۆژەوە كاربكەن بۆ ئەوەی بچنە _ بەغداد_ ئەو شوێنانە بەدەست بهێنن، بەشی كوردە، ئەما پێدەچێت ئایدۆلۆژیای حیزبی و، ویستی حیزبی زۆر لەوە بچوكتر بیربكەنەوە تەنها یەكجار لە دەرەوەی حیزب بیربكەنەوە و خەمەكەیان لە خەمی حیزبی گەورەتربێت.
ئێستا كۆمەڵێك كەس ململانێدەكەن لەسەر پۆستی_ سەرۆك كۆماریی_ لەبنەرەتدا ئەم پۆستە بەشی كوردە. لەو بەشەش تا ئەمجارە كە دیارنییە، هەمیشە (یەكێتیی نیشتیمانی) لەو شوێنە كاندیدی داناوە، هەڵبەت پێشوتر كێشەیەكی وا لەسەر ئەو شوێنە نەبوو، بەڵام دوای لابردنی سەرۆكی هەرێم، لەسە بریاری ژەنەراڵ (ماكگۆر) ئیدی كێشە كەوتوەتە سەر پۆستی _سەرۆك كۆماریی.
بەشێك لە كاندیدەكان بۆ نمایشە، بەشێكی دیكەشیان تەنها بۆ خۆ دەرخستنە و پێویستیان بەوەیە لە _ سی ڤی_ یەكەیان بڵێن: ئێمە كاندید بووین بۆ ئەو پۆستە! بەشە گرنگەكە پەیوەندی بە دوو پارتەكەی دەسەڵاتەوە هەیە، ئێستا ئەم دوو پارتە دوای شكستێكی گەورە لە سەربەخۆیی ئابووریی و سیاسیی، لە ململانێدان، لە هەڵپەدان چۆن خۆیان بگەیەننە ناوەند و شوێنێك بۆ خۆیان دابینبكەن. ئەو گوتارەی پێشوتر بەرزیانكردبوویەوە، بە پێچەوانەیەوە دەجوڵێنەوە. (هەقی خۆیانە، چونكە چۆنیان بووێت، جەماوەرەكەیان بەو شێوەیە شیوەنیان بۆ دەكات.)
روونە گەر پارتی سووربێت لەسەر ئەو پۆستە و ئەم سووربوونەی بۆ بچێتە سەر، بێگومان یەكێتیی تووشی شكستێكی سیاسیی و مەعنەوی گەورە دەبێت. گەر ئەم سووربوونەش بۆ دەسكەوتی دیكەبێت، ئەوا چیرۆكەكە دەگۆڕێت. ئەما هێشتا روون نییە كێ‌ براوە دەبێت لەم ململانێیەدا، ڤەلێ‌ ئەوەی بینیمان ژەنەراڵ(ماكگۆر) پێیخۆشە كاك (بەرهەم ساڵح) لەو شوێنەبێت. لە بەیاننامەكەدا كە لەگەڵ خانم (هێرۆ ئیبراهیم ئەحمەد) دانیشتبوو هاتووە، كە ژەنەراڵ (ماكگۆر) گوتوویەتی: ” پێویستە كەسێك لەو پۆستە بێت، زمان بزانێ‌، پێشتر ئەزمونی هەبووبێت لە حكومەتی ناوەندی، پەیوەندییە دیبلۆماسییەكانی باشبن و… هتد) تەنها ئەوە ماوە بڵێت: (دەبێت سەری كەچەڵ بێت و ماڵیان لە گەڕەكی عەقاری بێت!) قسەیەكیش هەیە هێشتا روون نییە تا چەند راستە، دەڵێن: گوایە ئێرانییەكان و هێزە عێراقییەكانیش ئەم كاندیدەی سەركردایەتی یەكێتیان پێخۆشە.
گەر ئەم كاندیدە ئەمریكا و ئێران و هێزە عێراقییەكان پشتیوانی بكەن، پێناچێت بە حیزبێكی وەك پارتی كاریگەرییەك لەسەری دروستبێت. بەڵام ئەگەر بەو جۆرە نەبێت، ئەوا ململانێی دوو پارتە دەسەڵاتدارەكە لەسەر ئەو شوێنە، رێككەوتنی دیكەی تێ دەكەوێت. من بۆخۆم گومانم نییە لەوەی ، ماڵی (مام جەلال) لەبەرامبەر ئەو پۆستەدا، پۆستی سەرۆك حوكومەتی هەرێمی كوردستانیان دەوێت، واتە كاتێك دەست لەو پۆستە هەڵدەگرن، لەهەرێم سەرۆكی حوكومەتی هەرێم ببەن بۆ خۆیان. گەر پارتی پێی وابێت لەبەر ئەوەی كورسییەكانی لە یەكێتیی زۆرترە، ئیدی دەتوانێت پۆستی سەرۆك كۆمار و سەرۆكی حوكومەتی هەرێمی كوردستان ببان، رەنگە خوێندنەوەی بۆ هەیمەنەی دەرەوە لەسەر ناوچەكە دروست نەبێت، هەرچۆنێك بێت ئەم سەرئێشەیەی ئێستا بۆ خۆیانیان دروستكردوە، لە كۆتاییدا هێزە دەرەكییەكان یەكلایی دەكەنەوە.
هەمیشە لەم جۆرە كێشە و سەر ئێشانە لەنێوان حیزبە كوردییەكان و، بەتایبەت دوو پارتەكەدا بوونی هەیە. لە كۆتایشدا ئەوەی بڕیار لەسەر چارەسەرە بنەرەتییەكە دەدات، خۆیان نین، هێزە دەرەكییەكانن. ئەشێت وەك حیزب، كە یەكێك لە ئامانجەكانی حیزب گەیشتنە بە دەسەڵات، حەقی خۆیان بێت ململانێ‌ بكەن، بەڵام خەمەكە لەوەدایە بەردەوام گوتاری ناسیۆنالیستی بەرزدەكەنەوە و شیوەن بۆ ئەو گوتارە دەكەن و، لە كۆتایشدا ئەو گوتارە تەنها بۆ فریودانە و خەمەكەیان خەمی حیزبییە نەك نەتەوەیی. ئێستا هەڵپەكە بۆ ناوەندە هەڵپەی حیزبییە، برادەرێكی خاوەن پۆست دەیگووت: (بەغداد هێندەی ئەتڵەنتا خۆشە.) پیسخۆرییەكی بەرفراوان لە حوكومرانییەكەیدایە، پارەیەكی زۆر رژاوە، ئۆتۆمبێل و پاسەوان شایەنی باس نین، ئەتوانی بە چوار ساڵ ژیانی خۆت و منداڵەكانت و دەوروبەرت مسەوگەر بكەیت. گەر ئەم ناوەندە ئەم شتانەی تێدا نەبواییە، بێگومان حیزبەكان ئەم سەر ئێشەییان دروست نەدەكرد.
خەمەكە لەوەدایە، وەك شاژن دەڵێت: ئەم كێشەیە بە تیرێك چارە دەكرا، كەچی مەنجەنیقی بۆ بەكار دەهێنن. بەكار هێنانی مەنجەنیقەكانیش كاتییە و، كۆتاییەكەی ئەوەیە، هێزە دەرەكییەكان بریاردەدەن كێبێت، گەر بۆ پارتی بێت ئەوا سەرۆك حوكومەتی هەرێم لەدەستدەدات، گەر بۆ یەكێتیی بێت، ئەوا پارتی تووشی دۆخی ناجێگری سایكۆلۆژی دەبێت، لەهەر دووحاڵەتەكەدا _بەغداد_ ئەوەنە خۆشە، دەبێت لەپێناویدا خۆت بخەیتە ئەم دۆخانەوە! (جەماوەری بەرێز… لەكۆتاییدا هەر بە بۆنەی خۆشی _بەغداد_ەوە، ئاهەنگێك بۆ ساڵیادی ریفراندۆم رێكدەخەین، بەهیواین بتانبینین چۆن لەم ئاهەنگەدا خۆتان رادەوەشێنن.)

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت