نەوزادى موهەندیس: ئاڵنگاریەکانى بەردەم حکومەتى ئایندەى عێراق.

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

لە ئێستادا کە تەنها 15 ڕۆژ لەبەردەم پێکهێنانى کابینەى پێنجەمى حکومەتى ئایندەى عێراقدا ماوە، پڕۆسەى پێکهێنانى حکومەتى ئایندەى عێراق گەرمترین باسوخواسى لەبارەوە دەکرێت و هەموانى سەرقاڵکردوە و هەموانیش لەهەوڵدان بۆ ئەوەى گەورەترین پشک و زۆرترین پلەو پۆستى تیادا بەدەستبهێنن، زۆربەشیان ئەوەندەى لەخەمى دەستخستن و جێگە و پێگە قایمکردنى خۆیان و حیزبەکانیاندان نیوهێندە لەخەمى سەرکەوتنى بەڕێز عادل عبدالمهدى ڕاسپێردراودا نین و نیوهێندەى تریش لەخەمى ئایندەى عێراق و گەلەکەشیدا نین، بەداخەوە لە عێراقى بەناو نوێدا هیچ جۆرە ئینتیمایەک و دڵسۆزیەک و ڕاستگۆییەک نەماوە و هەموان لەململانێیەکى شاراوەى ئاشکرادان بۆ زاڵکردن و خۆسەپاندن و بەهێزکردنى خۆیان بەسەر ئەوانى تردا.عێراقى نوێ پێویستى بە کەسانى بەهێز و دیپلۆماتکار و خاوەن بیروڕاو بۆچونى نیشتیمانیانە هەیە نەک بیربۆچونى حیزبى و ئاینى و تایەفى تەسک و بچوک. چونکە عێراقى نوێ و لانى کەم بۆ 4 ساڵى ئایندە لەبەردەم گۆڕانکارى ناوخۆیى و ناوچەیى گەورەدایە و گەلێک ئاڵنگارى ڕووبەڕووى دەبێتەوە کە واپێویست دەکات هەموان پێکەوە ڕووبەڕووى ببنەوە و هەوڵبدەن عێراق لە گێژاوى مەترسیەکان ڕزگار بکەن و بیپەڕێننەوە بۆ کەنارى ئارامى ،ئاشکراشە هەرێمى کوردستانیش هەموو ئەم ئەگەر و گۆڕانکارى و ئاڵنگاریانە دەیگرێتەوە، بۆیە پێویستە لەسەر کوردیش هەوڵ و هیمەتى گەورەتر و باشتر بدات بۆ ئەوەى جێگە و پێگەى خۆى قایمتر و بەهێزتر بکات و ڕێگەنەدات کەنارگیر و پەراوێز بخرێت.
حکومەتى ئایندەى عێراق بەم دۆخە سیاسى و ئابورى و ئەمنى و کۆمەڵایەتیە زۆر خراپەیەوە ڕووبەڕووى گەلێک ئاڵنگارى دەبێتەوە کە هەموانیان پێکەوە دەبنە ڕێگر و مەترسى بۆ سەرى و بۆ سەرکەوتنیشى لەئایندەدا،چونکە ئەو ئاڵنگاریانە کێشە و گرفتى بچوک نین، بەڵکو هەریەکەیان بۆخۆى کێشەیەکى گەورە و لە چارەسەر نەهاتوون، نا لەبەرئەوەى ناتوانرێت ڕێگە چارەیان بۆ بدۆزرێتەوە بەشێوەیەکى زانستى و واقعى، بەڵکو لەبەر نەبوون و کاڵبونەوەى متمانە و ڕاستگۆیى و نەبونى نیەتێکى هەقیقى بۆ چارەسەرکردنیان چونکە زۆربە بەرژەوەندیە حیزبى و کەسى و بنەماڵەییەکانیان خستۆتە سەروو بەرژەوەندیەکانى عێراق و گەلانى عێراقەوە.
لەو ئاڵنگاریانەى کە ڕووبەڕووى بەڕێز عادل عبدالمهدى سەرۆک وەزیرانى ڕاسپێردراو و حکوتى نوێش دەبێتەوە لە ئایندەدا بریتین لە:
1- ململانێ سیاسى و ئاینى و مەزهەبى و نەتەوەییەکان.
2- نەبونى متمانەى تەواو لەلایەن جەماوەرەوە بە دەسەڵاتداران و بەڵێن و کردارەکانى حکومەت.
3- بوونى ڕق و کین و بێزاریەکى گەورە لەنێو جەماوەردا بەرامبەر بەحکومەت بەهۆى نەبووونى خزمەتگوزاریە سەرەکیەکان بۆ هاوڵاتیان لە تەواوى ناوچەکانى عێراقدا.
4- بوونى گەندەڵیەکى تا سەر ئێسقان لەناو سەرجەم دامودەزگا و ئۆرگانەکانى حکومەتدا کە ئاسان نیە لەماوەیەکى کەمدا بنبەڕبکرێت.
5- بوونى ژمارەیەکى زۆر میلیشیاى چەکدارى جۆراوجۆر کە هەموانیان خۆیان بە جێگرەوەى سوپاى نیزامى و هێزە ئەمنیەکان دادەنێن و بەو هۆیەشەوە چەک و تەقەمەنیەکى زۆر بڵاوبۆتەوە دوور لە دەستى حکومەت و کۆنتڕۆڵکردنیشى هەروا ئاسان نیە، چونکە هەریەکە لەو میلیشیایانە لەلایەن هێز و دەوڵەتانى ناوچەییەوە پشتیوانیان لێدەکرێت.
6- بەردەوامبوونى تارمایى جەنگى داعش و تیرۆریستان و بنەبڕنەکردنیان.
7- کێشە و گرفتى سیاسى و ئابورى و سنورى و ئەمنى و ئاوى لەنێوان عێراق و وڵاتانى دەرودراوسێ لەلایەک وەک ئێران و تورکیا و سوریا و سعودیە و… هتد.
8- لەلایەکى تریشەوە بوونى کێشە و گرفت لەگەڵ وڵاتانى زلهێز و خاوەنى بەرژەوەندى لەعێراق و ناوچەکەدا.
9- کێشەى ڕاگرتنى هاوسەنگى لەنێوان بەرژەوەندیە تێکچڕژاوەکانى وڵاتانى ناوچەیى و زلهێزەکان کە هەموانیان عێراقیان کردۆتە گۆڕەپانى یەکلاکردنەوەى ململانێکانیان و لەسەر حسابى خاک و گەلانى عێراق درێژە بە ململانێکانیان دەدەن.
هەربۆیە بەڕێز عادل عبدالمهدى و کابینە حکومیەکەى لە ئایندەدا ڕووبەڕووى هەموو ئەم ئاڵنگاریانە دەبنەوەو ساناش نیە کە بتوانن هەموانیان چارەسەر بکەن، هەربۆیە پێویست دەکات لەسەر هەموان ڕاستگۆیانە و هیەمتێکى دڵسۆزانە بنوێنن بۆ پشتیوانى حکومەتى ئایندەى عێراق و تەنها هەڵپەى پلەو و پۆستیان نەبێت و نەکەونە داونانەوە و پیلانگیڕى دژى حکومەت وەک چۆن لە ڕابووردودا کاریان کردوە و عێراق و گەلانى عێراقیان بەم ڕۆژگارە سەخت و دژوار و پڕ نائومێدیە گەیاندوە.
حکومەتى ئایندە دەبێت حکومەتێکى گشتگیرو بەهێز و بەتوانا بێت، حکومەتى کەمینە و زۆرینە نەبێت،حکومەتى ئاینى و مەزهەب و نەتەوەیەکى دیاریکرا نەبێت، حکومەتى هەموان و بۆ هەموانیش بێت، حکومەتێک بێت ڕێز لە بنەماکانى هاوڵاتیبوون و توانا و لێوەشاوەیىو کەسى و ومافەکانى مرۆڤ بگرێت، حکومەتێک بێت دوور لە ملانێ ناڕەوا سیاسی و مەزهەبیەکان بێت، حکومەتى سەرتاسەرى عێراق بێت، حکومەتێکى دەستورى بێت و ڕێز لە مادە و بڕگە دەستوریەکان بگرێت، حکومەتێک بێت یاسا تیایدا سەروەربێت بە کردارەکى نەک تەنها وەک دروشم بەرزبکرێتەوە.
بەم شێوەیە کاتێک حکومەتى ئایندەى عێراق بە یەکسانى و دادپەوەرى ڕوانیە تەواوى پێکهاتەو هاوڵاتیانى عێراق ئەو کات هەموان هەست بە ئارامى و ڕۆشنى ئایندەى خۆیان و نەوەکانیشیان دەکەن و ڕاستەوخۆ دەبنە پاڵپشت و پشتیوانى حکومەتەکەیان و دەبنە پارێزەرى و قوربانیشى لەپێناودا دەدەن، هاوڵاتیانى و جەماوەرى عێراق هەرکات هەستیان بە خەمخوۆرى حکومەتەکەیان کرد ئەوکات ئەوانیش متمانەى پێدەکەن وهاوکار و پشتیوانى دەبن نەک وەک ناحەز ونەیار و گەندەڵکار لێى بڕوانن، بۆیە گرنگە حکومەتى ئایندەى عێراق پەند لەساڵانى ڕابووردوو وەربگرێت و هەڵەکانى پێش خۆى دووبارە نەکاتەوە، گەر وانەکات زۆر نزیکە تەمەنى کورت و بێ خزمەت بێت و بەرەو هەڵدێر و هەڵوەشانەوە و ڕووخانیش هەنگاو بنێت.
لەکۆتاییدا کار و ئەرکى حکومەتى نوێى عێراق سانا و سووک نین، بەڵکو ڕووبەڕووى کێشە کەڵەکەبوەکانى 15 ساڵى ڕابووردوو دەبێتەوە بەباش و خراپیانەوە لە ناوخۆى عێراق لەنێوان ناوچە جیاوازەکانى باشور و ناوەڕاستدا و لەگەڵ هەرێمى کوردستان و لەگەڵ دەردوراسێکان و… هتد. بۆیە وادەخوازێت کە بەڕێز عادل عبدالمهدى وەک سەرۆکى حکومەت و تەواوى کابینە حکومیەکەشى پشوودرێژو بەئارام و خۆڕاگربن و سەرسەختانەش ڕووبەڕووى هەموو ئاڵنگاریەکانیش ببنەوە و تەنها ڕێگەى سەرکەوتن و پشتیوانى لێکردنیشیان بریتیە لەدەستگرتنیان بە جێبەجێکردنى مادە دەستوریەکان و بنەماکانى دیموکراسى و تەوافوقى سیاسى و سیستەمى پەڕلەمانى و فیدڕاڵیەتە و ئەرکیشیانە کە هەوڵى جدیانە بدەن بۆ چەسپاندن و پتەوکردنى زیاترى ئۆرگانەکانى دەوڵەت بۆ هێنانە کایەى سیستەمى حوکمڕانیەکى ساغڵەم و ڕەشید و سەرکەوتوو کە ببێتە نمونەیەکى گەش بۆ ئایندە و هەموانیش لە ژێر سایەیدا هەست بەمان و شکۆ و کەرامەتى مرۆڤانەى خۆیان بکەن و تیایدا بحەسێنەوە.