دکتۆر کەمال میراودەلی: جیهان بە یەک دەنگ، ترامپ خیانەتێکی ستراتیجی بیشەرەفانە لە کورد دەکا!

ڕەنگدانەوە و دەنگدانەوەی خیانەتی ترامپ لە میدیای جیهانییدا پێشەکی لە نووسینێکی پێشوودا وتم: لەوەتی کارەساتی کۆچڕەوەکەی 1991 ەوە ئاوا میدیای جیهانی هاوسۆز و پشتگیری کورد نەبووە، دیارە لەگەڵ جیاوازیی ئاشکرادا. […]
بۆ ناردنی ئەم بابەتە بۆ سەر فەیسبووکەکەت یان هاوڕێکانت کلیک بکەرە سەر ئەو سمبولانە

ڕەنگدانەوە و دەنگدانەوەی خیانەتی ترامپ لە میدیای جیهانییدا

پێشەکی
لە نووسینێکی پێشوودا وتم: لەوەتی کارەساتی کۆچڕەوەکەی 1991 ەوە ئاوا میدیای جیهانی هاوسۆز و پشتگیری کورد نەبووە، دیارە لەگەڵ جیاوازیی ئاشکرادا.
1- هی 1991 زیاتر سۆز و بەزەییەک بوو میدیای جیهانی هاروژاندی، لەوەی سیاسیی بێت، دیمەنی هەزاران خێزانی دەربەدەر و مەرگی دەیان منال لە بەفر و قوڕدا، عەتفی جیهانی ڕاکێشا و میدیای رۆژاوایی گرنگی پێدا.
2- کامپەینەکە کاریگەر بوو، کوردی دەرەوە دەوری کاریگەری هەبوو. من ئەو کات سەرۆکی مەڵبەندی ڕۆشنبیری کورد بووم لە لەندەن بەردەوام کەمپەینمان هەبوو، و بە نامە و یاداشتنامە بەردەام سەرۆک وەزیرانی بەریتانیم ئاگادار دەکرد و هەموو جار وەلامم وەردەگرتەوە، دوایی بە دروستبوونی هەواری ئارام بە دەستپێشخەری بەریتانیا تەواو بوو..
3- ئەمجارە خۆشبەختانە پێش کارەساتەکە ئەم هاوسۆزییە فراوانە هەیە. دیارە چاوی دنیا لە سەر رۆژاوایە. هەر کارەساتێکی کورد کوشتن روو بدات، میدیا زیاتر دەتەقێتەوە و زۆر بە قورسیی لە سەر ترامپ دەکەوێت.
4- لە 1991 رۆژاوا دەبوو چاوەڕێی بریاری نەتەوە یەکگرتۆکان بکات تا هێز بنێرێت و ناوچەی ئارام دروست بکات. ئەمجارە هێزی ئەمریکیی و ئەوروپایی و هاوپەیمانی رۆژاوا جگە هێزی رووسی لە سوریا و ڕۆژاوایە و رۆژانە چالاکی ئاسمانیی و زەمینییان هەیە. واتە پێشتر کارەساتەکە سەددام دروستی کرد، ئێستا ئەمریکا و هاوپەیمانانی بە کشانەوەیان دەشێ دروستی بکەن.
5- وەک وتم: لە 1991 دا تەنیا سۆزو بەزەیی بوو ڕۆژاوا هیچ قەرزداری کورد نەبوو, ئەوە نەبێت کە بووش داوای لەگەلی عێراق بە کورد و عەرەبەوە کرد لە دژی سەددام ڕاپەڕن و دوایی کە راپەرین، پشتی تێکردن و رێگای سەددامی دا بە فڕۆکە و دەبابە کورد و شیعە سەرکوت بکات. ئەمجارە ئەوە نزیکەی چوار سالە کوردی رۆژاوا بە فەرمی هاوپەیمانی رۆژاوایە، نەک تەنیا ئەمریکا.. و زیاتر لە 10.000 شەهیدی بۆ جەنگێک داوە کە بەڕاستی جەنگی هەموو مرۆڤایەتییە دژی دڕندەترین و دواکەوتووترین و فاشیستترین هێزێکی دینیی هەمەجی لە سەدەی بیست و یەکدا. و خۆشبەختانە هەموو میدیای رۆژاوا بە تایبەتی هەرە ناودار و مەینستریمەکان دان بەمەدا دەنین و بە زەقی جەختی لە سەر دەکەن و بڕیارەکەی ترامپ بە خیانەتێکی ستراتیجیی و بێشەرەفانە لە کورد بەڵێ لە کورد. لە یەپەگە ناو دەبەن.
6- کورد لە ١٩٩١ دا هیچ دەوریكی نەبوو- کە ئەمریکا بەردەوام بووایە لە ڕێگادان بە سەددام هێچ ئەنجامێکی سەلبی بۆ ڕۆژاوا نەدەبوو، ئێستا جیاوازە، کوردی رۆژاوا لەنگەری هاوتایی و هاوکێشەکانی هێزیان لە نێوان رۆژاوا بەتایبەتی ئەمریکا لە لایەکەوە و روسیا و تورکیا و ئێران لە لایەکی ترەوە راگرتووە، شکانی کورد کۆتایی بە دەوری ستراتیجی سەربەخۆی رۆژاوا وەک هێزی زەمینیی و سیاسیی لە سوریا دێنێت، جگە لەمەش سەرهەلدانەوەی بەهێزی داعش یان هەر گروپیکی دیکەی ئیسلامیی تێرۆریستی کاریگەرییەکی زۆری لە سەر ڕەوشی ئاسایشی ئەوروپیی و دنیا دەبێت.
7- لە 1991 کورد دەربەدەر و بێ هێزو بێکەس بوو، هیچ وەرەقەیەکی بەرامبەر رۆژاوا و سەددام بە دەستەوە نەبوو، کوردی رۆژاوا خاوەن سوپایەکی جەنگاوەر و جەربەزە و مەشقپێکراوە، چەکی پێشکەوتووی هەیە، ئەزمووونی جەنگی بەرەیی و گەریلایی هەیە، رێکخستنێکی بەهیز و سەرکردایەتییەکی دڵسۆز و خۆبەخش و دور لە خیانەتی هەیە هەیە، سەدی 30ی خاکی سوریای لەدەستدایە کە دەولەمەندە بە نەوت و ئاو و زەیتوون و کشتوکاڵ، ئابووری سەربەخۆی هەیە، سیستمیکی ئیداریی و سیاسی سەربازیی خۆبەڕێوەبردنی لامەرکەزیی بەهێزی دامەزراندووە. و پێوەندی سیاسی و دیپلۆماسی جیهانیی تا رادەیەک هەیە. گەرچی بە داخەوە وەک پێویست نییە و لە رووی نەخشەڕێگای ستراتیجی و کادر و کەفائەتەوە لاوازە.
8- تاقە پەنای کورد لە 1991 دا، بە هاناهاتنەوەی رۆژاوا بوو، ئەمڕۆ کوردی رۆژاوا بژاردەی تری هەیە بە تایبەتی دروستکردنی پێوەندی بەهێز لە گەڵ روسیا بۆ گەیشتن بە جارەسەرییەکی سیاسیی کە لەم قۆناغەدا بەلای کەمەوە خۆی لە تاوانی تورک بپارێزی و هێزی سەربازیی و دەسکەوتە ئیداریی و سیاسییەکانی بهێڵێتەوە.
9- پشتگیریی کوردی ڕۆژاوا تەنیا راگەیاندن و میدیای جیهانی نییە لە ئاستی حکومەتەکانی جیهاندا بەتایبەتی هاوپەیمانی جیهانیی دژی داعش [فەرەنسا، بەریتانیا، ئەلمانیا، و… هتد] ئەم پشتگیرییە هەیە، تەنانەت لە ناو خودی ئەمریکاشدا ترامپ تاق بۆتەوە و لە ناو دەزگای عەسکەریی و تەنانەت سیاسییشدا [ جگە لە لۆبیە تورکییەکانی وەزارەتی دەرەوەی ئەمریکی] و لە ناوحیزبەکەی خۆشیدا نارەزایی توند دەربارەی کشانەوە لە سوریا و خیانەت لە کورد هەیە.
10- لە کاتێکدا هەموو دەولەتە عەرەبەکان لە سالی 1991 دا پشتگری سەددام و دژی ئەوە بوون ئەمریکا سەددام بڕۆخێنێت، ئێستا ولاتانی عەەربی پەرت و لاوازن و دژ بە کوردی رۆژاواش نین، بە تایبەتی گەورەترین و دەولەمەندترین بەرەی عەرەب [سەعودیە، ئەمارات، میسر و بەحرەین’] دژ بە تورکیان و دەبوو کوردەکانی رۆژاوا کاریان لە سەر ئەمە بکردایە و نوێنەریان بۆ میسر و ئەمارات ناردبایە. گەر ئەمریکا بیەویت رۆژاوا بکاتە دەولەت جگە لە روسیا و تورکیا و ئێران و ئیسرائیل هیچ دەولەتیک نییە بتوانێ یان بیەوێت کۆسپێک بۆ ئەمە دروست بکات، ئەوانیش ناتوانن گەر ئەمریکا جددی ىێت و لەگەڵ ولاتە ئەوروپاییەکان پرسی رۆژاوا بەرێتە نەتەوە یەکگرتۆکان.
11- کورد دەتوانی ئەم سۆزو پشتگیریەی جیهان بۆ دامەزراندنی سیاسیی و دیپلۆماسیی مافی چارەنووسی کورد لە رۆژاوا بە کاریگەری بەکار بێنێت. واتە گەر ئێستا بۆ مەبەستی تەکتیکی بە چارەسەریی مامناوەندی رازی بێت لە ئاسۆی درێژخایەندا مافی چارەنووس و ئیدارەی فیدرالی شتێکە کە رای سیاسیی ئەمریکیی و ئەوروپا ودنیا و تەنانەت ڕوسیاش قبوڵی دەکات و گرنگ ئەوەیە کە کوردی رۆژاوا بە بێ ناوبژیی جیهانی ڕوسیا و ئەمجا روسیا و ئەمریکا پێکەوە و ئەمجا نەتەوە یەکگرتۆکان و زامنی مافەکان لە دەستووردا و بە بریاری نەتەوە یەکگرتۆکان، رێکەوتنیکی سەرپێیی نەنووسراو نەکات.. حوسییەکانی یەمەن باشترین مۆدێلی هەنووکەیی پێشکەس دەکەن کە چۆن ئەمری واقیعی دەسەلاتی سەربازیی بگۆڕی بۆ دەسەلاتی سیاسیی و ئیداریی و دەستووریی باوەڕپێکراو و هەر پرۆسەیەکی ئاشتیی و ئاساییکردنەوە بە چاودیری تەرەفی سێیەم یان نەتەوە یەکگرتۆکان بێت.
12- لە کاتێکدا لە ١٩٩١دا، سوپای عێراقی بە سەرکوتوویی لە جەنگی ئێران هاتبووە دەر و هێشتا زۆر بە هێز بوو، سوپای سوریی تا رادەیەکی زۆر لێکترازاوە و رژێمی سووری توانستی بەشەری ئەوەی نییە بە هێج جۆرێک بی پشتیوانی روسیا ناوچەکان بگرێتەوە و ئەو ‌‌هیزەی لە رووی چەندێتیەوە نییە. هەروەها کێشەی سیاسیی و ئابووریی ناوخۆیی و کێشەی گەورەی لەگەل داعش و هێزە ئیسلامییەکانی سەر بە تورکیا هەیە، و جەنگی ئیدلیب جەنگێکە کە روسیا رایگرتووە و درەنگ یان زوو دەبێ ببێت،و گروپە ئیسلامییەکانی سەر بە تورکیا ئەوەی پێی دەوترێ سوپای نیشتمانی سوریا ، زۆر بۆ سوریا و ڕوسیاش خەتەرترن لە کورد کە تا ئێستا تەقەیەکیان لە سوپای سوری ئەسەد نەکردووە و دژی دوژمنی هاوبەشی کورد و سوریا و روسیا ، واتە داعش جەنگاون و خاکی سوریایان پاراستووە. ئەمە وەرەقەیەکی بەهێزە بەدەست کوردەوە کە لەگەڵ ڕوسیا و سوریا بەکاری بێنێت،
13- هاوپەیمانی تورک و روسیا کە چارەنووسی کوردی تا رادەیەک پیوە بەستراوە، جێگەی متمانەی ی یەکتر نین و هەروەها پێوەندی نیوان تورک و ئەمریکاش.، ئەردۆگان دەوریکی دوو ڕووانە لە نێوان ئەو دوو هێزەدا دەبینێت، تا رادەیەکی زۆر لەگەل روسیا نزیکبۆتەوە و لە ئەمریکا دوورکەوتؤتەوە کە بە بتوانیت بە ئاسانی بگەرێتەوە بە تایبنەتی لە پرسە ستراتیجییەکندا وەک کڕینی سیستمی بەرگری سارۆخی ئێس-٤٠٠ و راکێشانی خەتی گازی تورکیش ستریم و پێوەندی ئابووریی و دارایی و توریستیی و سیاسیی و پابەندی بە پرۆسەی ئەستانا و سۆچی یەوە، ناتوانێت واز لەهەموو ئەمانە بۆ گەرانەوە بۆ باوەشی ئەمریکا بێنێت بە تایبەتی کە متمانەشی بە ئەمریکا نیە و ئەمریکاش بە مەرجەکانی تورک رازی نابێت و فایلی چەند كێشەیەکی ناکۆکی گرنگ لە نێوان تورکیا و ئەمریکا ماوەتەوە، کێشەی گولەن، کێشەی باجی ئەمریکی لە سەر هەناردەی پۆل او ئاسنی تورکی، پاکیجی سیستمی پاتریۆت، فرۆشتنی فڕۆکەی ئێف 35، شکاندنی تورکیا بۆ مەرجیەکانی سزاکانی سەر ئێران، و، هەڵوێستی تورکیا بەرامبەر بە کوردی رۆژاوا. هەموو ئەمانە بە تویتێکی ترامپ تەواو نابن.
14- ئەنجام ذڵنیابن کە کشانەوەیەکی ترامپی-یانە لە سوریا سەر ناگرێت و باشتر کە ترامپ مەسەلەی کورد و پاشەڕۆژی کوردی رۆژاوای بە خەستی هاروژاند، گرنگ ئەوەیە کورد هەموو کارتە سەربازیی و سیاسیی و دیپلۆماسییەکانی زیرەکانە و باوەر ىەخۆبووانە بەکاربێنێت.
لە بەشەکانی دواییدا بە تێرو تەسەلی رەنگدانەوە و دەنگدانەوەی پرسی کورد لە سوریا لە میدیای جیهانییدا دەخەمە بەرچاو

بۆ ناردنی ئەم بابەتە بۆ سەر فەیسبووکەکەت یان هاوڕێکانت کلیک بکەرە سەر ئەو سمبولانە
دکتۆر کەمال میراودەلی

ئەرشیڤی بەڕێز: دکتۆر کەمال میراودەلی