نوری کەریم: سەرکۆزەری بارودۆخی کورد.

سەرنجێکی سەرپێیی لەبارو دۆخی شپرزەی کوردستان بدەین، زەق و رەق و بێ رتوش خۆمان دەبینین وەک هەین، زۆر بەکورتی: خۆرهەڵاتی کوردستان : هێزی کورد پەرشوبڵاو وبێهێز، شیروتیر لەیەکتر دەسون.بارودۆخی شلۆقی […]
بۆ ناردنی ئەم بابەتە بۆ سەر بەشی بەرێزت یان هاوڕێکانت لە تۆڕە کۆمەڵایەتییەکان، کلیک بکەرە سەر ئەو سمبولانە

سەرنجێکی سەرپێیی لەبارو دۆخی شپرزەی کوردستان بدەین، زەق و رەق و بێ رتوش خۆمان دەبینین وەک هەین، زۆر بەکورتی:
خۆرهەڵاتی کوردستان : هێزی کورد پەرشوبڵاو وبێهێز، شیروتیر لەیەکتر دەسون.بارودۆخی شلۆقی ئێران و مەترسی یە راستینەکانی سەر رژێمەکەش نەیکردە ئەوەی گوڕ و تینێکیان تێکەوێتەوە، هەر وەک ئاردی نێو دڕکان هەر شنەبایەک یاری یان پێدەکات. هۆکارەکەش ئاشکرایە (من ئاغا و تۆ ئاغا، کێ جێگەمان بۆ داخا). جۆن بۆلتن راوێژکاری ئاسایشی نەتەوەیی ئەمەریکا وتی: هاوبەشیی ئاهەنگەکانی جەژنی نەورۆز دەکەین لەگەڵ ئێرانی یەکاندا لە تاران! (زەبەلاحترین فرۆکە هەڵگری ئەمەریکا لە ئاوەکانی کەنداودا بە 1500 فڕۆکەی شەڕکارەوە ئامادەیە)
باشوری کوردستان: تاجی سەری 27 ساڵەی فەرمانڕەوایی یەکەی پارتی و یەکێتی (ریفراندۆمێکی ناوەخت و 16ی ئۆکتۆبەرێکی رەش و فرۆشتنی نیوەی خاکی هەرێم و شکاندنی شکۆی کورد و پێشمەرگە) ئەوە جگە لە (بای بای عێراق، هیوادارین دراوسێ یەکی گونجاو بن!) ئینجا بە پێی خۆشیان گەڕانەوە و (سەلام عەلێک هاتینەوەخزمەتتان). ئەوا ساڵی 2018ش نیوەیی دەبێت و رۆژ ومانگەکانی تیژ تێدەپەڕن وچاوەڕوانیی (خنەخن) و(چاڵچاڵێن) و (کورسی کورسی) کەڵەگاکانی باشور ناکات کەبەهۆی چاوچنۆکی و خۆپەرستی یەوە هێشتا حوکمەتۆڵکەیەکیان دانەمەزراندووە! تورکیا مەرحەبای نە پارتی و نە یەکێتی ناکات، ئەگەریش بیکات ئەوە هەر بۆ دادۆشین و جێگەخۆشکردنە.. گرێبەستی پەنجا ساڵ فرۆشتنی نەوتمان بە هەردەپەنجەکە بۆ مۆر کردووە بە نرخی تاڵانفرۆشیی، گەندەڵیش هەمو کایەکانی پیسکرد و گەیشتە زانکۆ و پلە زانستی یەکانیش، هەتا ئێستا دەرمانی ساختە هاوردە دەکرا، ئێستا دکتۆر و پرۆفیسۆری ساختەش هەیە و بێچاوێنی بێت هەردەڵێی قارچک و دومەڵانی بەهارانن لە خۆوە هەڵدەتۆقین.
باکوری کوردستان: سەرکردایەتی پێکەکە و هەمو باڵەکانیشی هەر لە سەرکردایەتی یەوە هەتا کادیرە پێشکەوتووەکان و کادیرانی ناوەند بە هەردو باڵی سیاسیی و سەربازی یەوە رەنگ و بۆیەکی نۆیی گرتووە و ئەندامەکانی تەنها کوردنین! زۆربەی سەرکردەو کادیرە پێشکەوتووەکان لە زیندانەکانی تورکیادان، قەندیل لە ژێرهەڕەشەدایە، پەیوەندی یەکانی پێکەکە و باڵەکانی لە باکور و خۆرهەڵات و باشور و خۆرئاواو سوریا نەک هەر دەستێکی بەڵکو هەر پەنجەیەکی دەستەکانیشی بە پەنجەیەکی دوژمنێکەوە پەیوەستە.. هاوڕێ و هاوپەیمانەکانیش لە یەکەمین ئەزموندا درۆزن ، دوڕو، بەرژەوەند پەرست، ناپاک و بێ مۆڕاڵ دەرکەوتن. وەزیری ناوخۆی تورکیا سڵێمان سویلو رایگەیاند کە 27 بیست و حەوت کیلۆمەتر چونەتە قۆڵایی خاکی عێراق و چیای قەندیل تەخت دەکەن. مامۆستا ع.ع. شەونم لە هۆنراوە بەنێوبانگەکەی پێشمەرگە دا لەسەرەتای شۆڕشی ئەیلول1961 وتویەتی:
( زۆری سەرکەش هەوڵیداوە کورد نەهێڵێ
خاکی کوردستان بە بۆمباو چەک بکێڵێ
هەڵدێراون لەو شاخانە، بونەتە پەندی زەمانە
ئەم وڵاتە گۆڕستانی دوژمنانە)
بەڵام سەرکەوتنە مێژویی یەکەی شەڕڤانان و شێرە کچانی کورد لە باغۆز خەونێکی دیکەی دوژمنانی نایەچاڵ و دوامۆڵگەی چەکدارانی داعش بوبە گۆڕستانێکی دیکەی دوژمنان و تورکیاش لە کاردانەوەدا جاری لەجێی خۆی چەقیوە، بۆ (کەرێتی یەک) دەگەڕێت سەرشۆڕی و قوندڕینی بەدواوە نەبێت!
خۆرئاوای کوردستان: سوریای بەشار ئەسەد ئامادەی گفتوگۆیە لەگەڵ سوپای سوریای دیموکرات( قسد) وسەلماندنی دەسەڵاتی خۆبەڕێوەبردن( فیدراڵی) لە دەڤەرەکانی خۆرهەڵاتی باکوری سوریا، گوندەکانی باکوری حەڵەب و گوندەگانی دیرەزور و ئەو مافانە لەدەستوری وڵاتیشدا جێگیربکرێت. مەنبەج خاڵێکی ستراتیژیی زۆر گرنگە بۆ پێکەوە بەستنەوەی کانتۆنەکانی رۆژاوا کە پتر لە نیوەی دانیشتوانەکەی کوردە، ئێستا یەپەکە گەمارۆی داوە و هەوڵدەدەن بۆ دامەزراندنی هەرێمێکی خۆبەڕێوەبەر (فیدراڵ) لە سوریایەکی ئازاد و سیستمێکی فەرمانڕەوایی فیدراڵدا. رزگارکردنی مەنبەج پلانەکانی تورکیا و چەکدارەکانی ئەردۆگان و داعش تێکدەدات و لە پەلوپو دەکەون، هێزەکانی ئاک پارتی ئەردۆگان لە باکوری حەلەب و پارێزگای رەقە دادەبڕێت کە هێزێکی دڕندەو خوێنخۆرن و وەک سەردەمی سوڵتانەکانی عوسمانی پەروەردەدەکرێن بۆ هێزێکی تایبەت بە سوڵتان بۆ کاروباری جەنگ و کاردێریی. یەکەمین جار سۆڵتان ئۆرخان لە سەردەمی خۆیدا و لەساڵی 1326زایندا فەرمانیدا ئەو هێزە دابمەزرێت بەناوی یەنیچەری ـ ئینکیشاری (لەشکری نوێ) لە منداڵی بێ دایک و باوک وئەو منداڵ و کوڕو کاڵانەی دەفرێندران یا لەبازاڕەکانی کڕین و فرۆشتنی مرۆڤدا دەیانکڕین. سەدام حسەینیش هێزێکی لەوجۆرەی دامەزراند بەناوی (گیان بەخشەکانی سەدام ـ فدائیی سەدام) ئاک پارتیش بەهەمان شێوەو بۆ هەمان مەبەست منداڵانی بێ دایک و باوک کۆدەکاتەوە وپەروەردەیان دەکات بۆ ئامانجە گڵاوەکانی. ئەو هێزە ئێستا لە مەنبەج و جەرابلوس دامەزراون. هەر ئەم هێزە بو زیانی زۆریان بە هێزەکانی روسیا دەگەیاند، بۆیە فڕۆکە جەنگی یەکانی روسیا گورزێکی قورسی لێوەشاندن، ئەوانیش لە تۆڵەدا فڕۆکەوانە روسەکەیان لەکاتی دابەزیندا بەپەڕەشوت بەئاسمانەوە تیرۆرکرد، زیانی زۆریشیان بە یەپەکە و دانیشتوانی سڤیل گەیاندووە جگە لە دزی و راو و روت، بۆیە لە کاتی رزگارکردنی شارەکەدا رەشترین رۆژی خۆیان بەچاو دەبینن، چونکە هێزە هەڵبژاردەکەی فەرەنساش زۆر لێیان بەداخە چونکە بەرپرسانی کارە تیرۆریستی یەکانی فەرەنسا و بەلجیکا لەو شارەوە ئەنجامدەرەکانیان راهێناوە و لە رێگەی تورکیاوە رەوانەی ئەوروپاکران. دەستگیرکردنی ئەو تاوانبارانە گرنگی یەکی تایبەتی هەیە، نهێنی ئەو تاوانانەو تێوەگلانی ئەردۆگان و ئاک پارتی ئاشکرا دەکات و پەڵەیەکی رەشیش دەنێت بە تەوێڵی رژێمەکەی ئاک پارتی یەوە و خودی ئەردۆگانیش سوک و ریسوا دەبێت و وەک گەورە تیرۆریستێک ئابڕوی دەتکێت و بۆ شەرڤانانیش کە جگە لە سەرکەوتنێکی سەربازیی، سەرکەوتنێکی سیاسیشە هەمو توانایەکیان دەخەنەکار. سەرکەوتنی ئەم پلانە هاوبەشەی ئەمەریکاو فەرەنسا و گەلانی چەوساوەی سوریا و هاودەنگیی روسیاش رێگەی لەبەردەم ئەمەریکادا تەختکرد کە هێزێکی چاودێریی و کۆنترۆڵ لە سەر سنوری نێوان تورکیا و سوریا جێگیربکات و دەستبەکاربێت بۆ ئەنجامدانی ئەرکەکانی.ئەم هەنگاوەی ئەمەریکا ئەردۆگان و ئاک پارتی دەهری دەکات و لەپاڵ هەرەشە و هاشوهوشی پەڵاماردانی ناوچەکانی خۆرهەڵاتی فورات، خۆیان بۆ هێرش و پەڵاماردان ئامادە دەکەن و دەڵێن هێزەکانی ئەمەریکا بەر پەلامار ناکەون و ئامانجمان تەنها هێزەکانی (یەپەگە) کە بڕبڕەی پشتی سوپای سوریای دیموکرات ـ قوات سوریە الدیمقراگیە(قسد)ەیە، بەڵام ئەو خورمایەی ئەردۆگان دەیخوات دەنکەکەی لە گیرفانی ئەمەریکادایە، بۆیە ستیڤ ماکور کە بەرپرسێکی باڵای وەزارەتی بەرگریی ئەمەریکا(پنتاگۆن)ە تورکیاو ئەردۆگان و لەشکرەکانیانی هوشیارکردەوە کە باش چاوبکەنەوە و ( هێزو قورسایی خۆتان بزانن و سەرتان لێنەشێوێت، بەڵێ کەس نکولی لەوەناکات کە تورکیا دوەمین هێزی پەیمانی باکوری ئەتلەسی(پەیمانی ناتۆ)یە، بەڵام نەکەن لە شاری مەنبەج نزیک ببنەوە، ئەوە هەڵەیەکی کوشندەیە و دوایی پەشیمانی کەڵکی نابێت بۆتان چونکە هەرکاتێک هێزەکانی ئەمەریکاو هاوپەیمانەکانی روبەڕوی هەرمەترسی یەک ببنەوە دەتوانن لەشکرێکی 12 هەزار سەربازی لە ماوەی تەنها 12 خولەک دا تەفروتونا بکەن.) شایانی وتنە نوێترین چەکەکانی ئەمەریکا بەسەرپشتی فڕۆکە هەڵگرە زەبەلاحەکەی کەنداوەوە بریتی یە لە فڕۆکە شەڕکارەکانی جۆری ئێف 35 کە15 تەن تەقەمەنی وێرانکار هەڵدەگرێت. ئەمە جگە لە رۆکێتەکانی جۆری پرشنگ کە لە خاکی سعودی یە دانراون و هەریەکەیان یەک هەزار کیلو تەقەمەنی هەڵدەگرێت و دەتوانێت لە دوریی 2 دوهەزار کیلۆمەتریشەوە ئامانجەکانی بپێکێت.
روسیا بایداوەتەوە بەلای کوردی رۆژاوادا، بەونیازەی بۆ رزگارکردنەوەی عفرین هاوکاربێت و رێگە لە فڕۆکە جەنگی یەکانی تورکیا دەگرێت کە ئاسمانی دەڤەرەکە بەکاربهێنن.
چەند گروپێکی پێکەکە لە هێزەکانی سوریا ی دیموکرات(قسد) وەک تاکتیکێکی ژیرانە لە ژێر دروشمی (ئێمە داشی دامە نین) جێگۆڕکێ و پێدزکە دەکەن وەک ئەوەی بڕیاریاندا بە گژ چەکدارانی داعش دا نەچن لە دێرەزور. ئەوانە دەڵێن ئەرکی هەنوکەیی ئێمە بریتی یە لە رزگارکردنەوەی عفرین، شانبەشانی ئەوانە دەجەنگین کە بۆ ئەو ئامانجە هاوکاریمان دەکەن. ئەم هەڵوێستە بۆ ئەمەریکا لەچەند سەرێکەوە مەترسیدارە، بەڵام ئەو گروپانەی یەپەگە دەزانن چی دەخوازن. ئەوان کە شەڕیان لە دژی چەکدارانی داعش نەدەکرد، رویاندەکردە دەڤەرەکانی ئەلباب، عەزاز و جەرابلوس و کردنەوەی بەرەی نوێی روبەڕوبونەوەی تورکیاو سیاسەتەکانی ئەردوگان، ئەمەش پلانێکی ژیرانەی (یەپەگە)یە وەک تاکتیکێکی سەرکەوتو کە ئەمەریکاو هاوپەیمانەکانی بەخۆیاندا بچنەوە و بزانن کورد سەربازەکانی یاری شەترەنج نییە.
ئەمانە هەموی کارێکیان کر.
ئەمەرییکاو روسیا لە هەمو کاتێک پتر هاودەنگبن لەسەر بنیاتنانی سوریای فیدراڵ، ئەمەریکا ژوان بێتەوە لە کێشانەوەی هەمو هێزەکانی، چونکە ئەمەریکا بکشێتەوە دەبێت روسیاو ئێران وتورکیاش بکشێنەوە و هێزی بێگانە لە سوریادا نەمێنێت، دیارە ئێران و تورکیاش (کەرێتی)گرتونی و ناکشێنەوە، ئەوکاتەش کاسەکە لەسەری ئەواندا دەشکێت بەڵام چۆنیەک نا،هەر یەکەیان بەجۆرێک و لەئاستێکدا.
ئەمەریکاو یەکینەکانی پاراستنی گەل(یە پە گە) رێککەوتنێکیان مۆردکردووە بۆ ماوەی دە ساڵ هاوکاری دولایەنە.گرنگترین و هەستتیارترین بڕگەکانی رێککەوتنەکە چەند خاڵێکە وەک:
1 ـ دامەزراندنی هەرێمێکی فیدراڵ لە باکوری سوریا، رەچاوکردنی بارودۆخی سیاسیی ناوچەکە پێویستە.
2 ـ سوپای سوریای دیموکرات و یەکینەکانی پاراستنی گەل(یەپەگە) هاوکارێکی بنەڕەتیی و چالاک و کاریگەرن لە بەرەنگاریکردنی تیرۆردا، بۆیە ئەرکی سەرشانمانە هەمو جۆرە یارمەتی یەکی سەربازییان بدەین بە چەک و جبەخانە و ئازوقە و مەشق و راهێنانی کادیرانی سەربازیی و بەریوەبردنەوە. ئەوە جگە لە هاوکاری شارستانیی.
ئەنجامی پێکهاتن و تێگەیشتنی ئەمەریکاو روسیا( ترەمپ و پۆتین)، روسیا خەریکی ئامادەکردنی پلانی کوتایی ئاشتکردنەوەی (یەپەگە) و هەڵکردنی گڵۆپی ێەوزە بۆی، بۆ رزگارکردنەوەی عفرین لە دەست چەکدارانی سەر بە تورکیا.وەزیری دەرەوەی وڵاتی یۆنان نیکۆس رایگەیاند ئەو وڵاتەی تورک بە نیشتیمانی خۆی دەزانێت و ناویناوە(ترکیا)، ئەوە خاک و نیشتیمانی یۆنان و کوردە(بێگومان ئەرمەن و تەنانەت بولگارەکانیش)
ولاتی تورکیاش بەسەرۆکایەتی رەجەب تەیب ئەردۆگان بە چوارچاو لە ئەم گۆرانکارییانە دەڕوانێت و زمانی هەڕەشە و خۆفشکردنەوەشی زۆر دابەزیوە و بە ئەمەریکاو ئەوروپا و روسیاش دەڵێت هەوڵ مەدەن دەوڵەت بۆ کورد دامەزرێنن چونکە دەوڵەتی ئەوان کۆماری تورکیایە! ئەمە نامەیەکی بێناوەڕۆکە بۆ ئەمەریکاو روسیاو هاوپەیمانان، لە سەردانەکەشیدا بۆ دیاربەکر، رو لە کورد دەکات و دەڵێت (دەوڵەتی تورکیا رێگە نادات ئازادی ومافەکانی کور پشتگوێ بخرێن و خودی خۆم روبەڕوی ئەوانە دەبمەوە گەرەکیانە مافەکانی کورد پێشێل بکەن.لەلایەکی دیکەشەوە رو لە ئەمەریکاو خودی ترەمپ دەکات و وتی: ئێوە وڵاتی تورکیاتان کردە یەکەمین ئامانجتان، بەڵام ئێمە توانیمان پلانەکانتان ئاشکرابکەین و دڵنیابن چۆکدانادەین لەبەرامبەر دوژمنکارییەکانتاندا. ئەم دڵەڕاوکەیەی ئەردۆگان لەوەوە هاتووە گوایە نەخشەی نوێی ئەمەریکا بۆ خۆرهەڵاتی ناوەەند، کوردستانی رۆژاوای تێدایە وەک هەرێمێکی فیدراڵی سەربەخۆ لە سوریایەکی ئازاد و فیدراڵدا. رۆژنامەیەکی تورکیاش ئەو نەخشەیەی ئەمەریکای دەستکەوتووە و بڵاویکردۆتەوە کە دوای دەستبەسەردا گرتنی(رەقە) هەرێمێکی فیدڕاڵی سەربەخۆ لە چوارچیوەی وڵاتی سوریای فیدراڵدا بۆ کورد دادەمەزرێت. ئەوەی ئەم رۆژانە لە سەر زەوی و لە پراکتیکدا رودەدات ئەمڕۆکە 14/12/2018شەڕڤانانی هێزەکانی سوریای دیموکرات توانیان بەخوێن شاری هەژین سەر بە دەڤەری گوندەکانی دێرزور (ریف دیرالزور) رزگار بکەن کە دوا مۆڵگەی چەکدارانی دوژمن بو لە خۆرهەڵاتی روباری فورات و دواگروپیشیان کە لە مۆڵگەیەکدا مابونەوە تارومار کران. ئەم سەرکەوتنانەی شەڕڤانان ئەردۆگان و ئاک پارتی کردۆتەێەگی چوارچاو، هاشەوهوشەی هێرش دەکەن بۆ خۆرهەڵاتی روباری فورات و سەرکەوتنێکی وەک (رزگارکردنی عەفرین) دەکەنە سزای (چەکدارانی رێکخراوی تیرۆریستیی پەکەکە). هۆکارەکەش دەگەڕێتەوە بۆ ئەوەی لە دانەستاندنە نهێنی یەکانی نێوان ئەمەریکاو تورکیادا، جەیمس جیفری پێداگر بو لەسەر بەردەوامبونی خاڵەکانی چاودێریکردنی سنورەکانی نێوان تورکیاو سوریا سەر بە هێزەکانی سوریا دیموکراتن کە ژمارەیان 30 سی هەزار شەڕڤانە. ئەمەریکاش لە زمان وتەبێژی وەزارەتی بەرگری(پنتاگۆن) کاپتن شۆن رۆبەرتسۆن رایگەیاند کە رێگە نادەین و لە هیچ لایەنێک بێدەنگ نابین پەلاماری باکور و خۆرهەڵاتی باکوری سوریا بدات. شەڕڤانانیش لای خۆیانەوە لەو پەڕی ئامادەباشیدان و بانگەوازی وڵاتپارێزی (نەفیری عام) یان راگەیاند بۆ هەمو ئەوانەی دەستیان چەک دەگرێت بەرگری لە نیشتیمان بکەن.. وەک خۆئامادەکردنێک بۆ سەندنەوەی عەفرین لە داگیرکاران.
لەکۆتاییدا پێویستە خەیاڵ پلاو نەکەین و بپرسین ئایا لە پراکتیکدا ئەمەریکا و هاوپەیمانەکانی لەلایەک و روسیا وتورکیا و ئێران و بەریتانیاو فەرەنساش هەڵوێستی راستینەیان دور لە بانگەشەو لێدوانی میدیایی، بەکردار و لە پراکتیکدا چیدەبێت، مەتەڵەکەش ئاسانە، ئەگەر لەشکری تورکیا بجوڵێت و پێششرەوی بکات بەرەو خۆرهەڵاتی روباری فورات، ئەوەشەڕڤانان چاک دەزانن کە ئەمەریکا و روسیا گڵۆپی ێەوزیان بۆ ئەردۆگان هەڵکردووە و ئەم جارەش کارەساتەکانی داگیرکردنی عفرین دوبارە دەبێتەوە و خوێنی (کوڕە ئازاکە) دەفرۆشن.

بۆ ناردنی ئەم بابەتە بۆ سەر بەشی بەرێزت یان هاوڕێکانت لە تۆڕە کۆمەڵایەتییەکان، کلیک بکەرە سەر ئەو سمبولانە
نوری کەریم

ئەرشیڤی بەڕێز: نوری کەریم