ئارام عەلی عەزیز: مرۆڤایەتى سەرلەنوێ دەبووژێتەوە.

خۆپیشاندانە جەماوەریەکانى عیراق، لوبنان، جەزائیرو سودان و چیلی و چەندین دەوڵەتى دیکەى ئەوروپایی دەیسەلمێنن، کە ئەو خۆپیشاندانانە سەرهەڵدان و بەهارى ئینسانن. داواکاریی و دروشمى خۆپیشاندەرانیش وەکو یەکن، کە خۆى دەبینێتەوە […]
بۆ ناردنی ئەم بابەتە بۆ سەر بەشی بەرێزت یان هاوڕێکانت لە تۆڕە کۆمەڵایەتییەکان، کلیک بکەرە سەر ئەو سمبولانە

خۆپیشاندانە جەماوەریەکانى عیراق، لوبنان، جەزائیرو سودان و چیلی و چەندین دەوڵەتى دیکەى ئەوروپایی دەیسەلمێنن، کە ئەو خۆپیشاندانانە سەرهەڵدان و بەهارى ئینسانن. داواکاریی و دروشمى خۆپیشاندەرانیش وەکو یەکن، کە خۆى دەبینێتەوە لە کۆتایی هێنان بە نادادپەروەریی و راماڵینى گەندەڵکاران.
ئەم بەهارە لە خۆرهەڵاتى ناوەڕاست هەڵقوڵا، هەنگاو بە هەنگاو گەورەو فراوان بوو، هەڵە نیە ئەگەر پڕۆسەکە بە مەنجەلێک بشوبهێنین ، کە لە بنەوە بڵق دەدات و دەکوڵێت تا دەگاتە سەرەوە. بنەوەى سەرهەڵدانەکە لە تونس و میسر دەستیپێکردو گەیشتە لیبیاو یەمەن و سوریا، قۆناغی دوەمى بەهارەکە گەیشتە فەرەنساو ئەوروپاو بوە بەهاری فەرەنسایی، قۆناغی سێیەم گەیشتە سودان و جەزائیرو باکورى ئەفریقیاو بوە بەهارى ئەفریقایی، ئەمڕۆیش گەیشتە عیراق و لوبنان و بوو بە جیهانیی. داواکاری تەواوى خۆپیشاندەرانیش هێنانە کایەى دادپەروەریە، لە ناوەڕۆکی خۆیدا گەڕاندنەوەى شکۆمەندیە بۆ ئینسان. ناسنامەى ئینسان بوون تیایدا زاڵە بەسەر هەموو ناسنامە ناڕەسەنەکان.
گەندەڵکارو کەرەستەکانى سیستەمى ستەمکاریی، ئینجا چ حکومەت بێت یان پەرلەمان، چ حزب بێت یان دیکتاتۆرەکان بەم سەرهەڵدانانە هەڵدەوەشێنرێنەوەو دەنیشێنرێن و دواتر فڕێدەدرێنەدەرەوە، لە جێگاى ئەوانیش سیستەمى دادپەرەوەریی تازە دادەمەزرێنرێت.
بەو واتایە ئەم پرۆسەی بەهارە گێژەنێکى مێژووکردە، بە شەپۆلەکانى کۆن قووتدەدات و لە هەناوى خۆیدا نوێ دێنێتەکایەوە. کۆن هەڵدەوەشێنێت و لە گەرمەى جەنگ و ململانێشیدا لە گەڵ ئەم کۆنە، بابەتیانە پێداویستیەکانى سیستەمى نوێ وەکو پرۆسەیەکی دیالێکتیکى فەراهەم دەکات. بەو مانایەى پرۆسەى رووخاندن و بنیاتنانەوەى لە یەک کاتدایە. بە هەموو ماناکانى وشە شۆڕشە. شۆڕشێک کە سیستەمى جیهانیی کۆتایی پێدێنێت و فڕیی دەداتە ناو زبڵدانی مێژوو.
ئەم بەهارە، سایکس پیکۆو سیستەمە دیکتاتۆریەکانى خۆرهەڵاتى ناوەراستى لەناوبرد، زەمینەى بیروبۆچوون و ناسنامە ناڕەسەنە رەگەزپەرستەکانى بە هەموو جۆرەکانیەوە نەهێشت، ئاسۆیەکی فراوانى ئینسانبوون و هاووڵاتیبوونی کردەوە، کە لە ژێر سایەى دەوڵەتى قانوندا، ناوکى ئایدۆلۆجیی یەکەى نوێی سیستەمى جیهانی پێکدەهێنێت.
لەو روەوە ئەو رووداوو گۆڕانکاریانە، ئەو بەهارو سەرهەڵدانانە لە کەسایەتى نەخشەى خاکى پیرۆزى نێوان فورات و نیلدا، کە لانکەى شارستانیەت و سەرەتاى دەستپێکردنى مێژووە، وەردەچەرخێن بۆ بووژانەوەى شارستانیی و، دواجار کۆتایی بە تەواوى سیستەمیی ستەمکاریی جیهانی دێنێت، کە لە رووداوەکانى رۆژگارى ئەمڕۆماندا ئاوابوونى خۆرەکەى دەبینین. بەمەیش نەتەوەیەکگرتوەکان و ئەنجومەنى ئاسایش هەڵدەوەشێنەوە، سیستەمى نوێ لە جێگەى ئەوان دێتەکایەوە، بەمەیش شکۆمەندی بۆ ئینسان دەگەڕێنرێتەوەو سیستەمێکی دادپەروەر دادەمەزرێنرێت.

بۆ ناردنی ئەم بابەتە بۆ سەر بەشی بەرێزت یان هاوڕێکانت لە تۆڕە کۆمەڵایەتییەکان، کلیک بکەرە سەر ئەو سمبولانە
ئارام عەلی عەزیز

ئەرشیڤی بەڕێز: ئارام عەلی عەزیز