دڵشاد مەجید: کۆسرەت ڕەسوڵ، سەرکردەیەکی سەربازی زمان و جەستە ئفلیجە، یا سیاسیەکی تۆڵەلێسەنەرەوەی لێهاتووە؟ بەشی دوومی.

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

تائێستا بەشێکی زۆر لەخەڵکی کوردستان پێگەو تواناو هێزی کۆسرەت رەسوڵ لە دوای ڕاپەڕین و تا ئەوکاتەی لەسەرۆکایەتی حکومەتی سلێمانی لادرا نازانن، بەڵام هەولێریەکان بەشێوەیەکی گشتی و پارتی و بنەماڵەی بارزانی، کۆسرەت رەسوڵ باش دەناسن. پارتی تا ئەو کاتە تەنیا لەهاتنەوەو بوونی کۆسرەت دەترسا، پارتی هیچ کاتێک ترسی وەک حزب نە لەیەکێتی نە لە مام جەلال نەبووە. کەبتوانن بگەرێنەوە هەولێر، تەنیا بوونی کۆسرەت گەورەترین هەڕەشە بوو لەسەر بوونی پارتی لەهەوڵێر. هەروەها خەڵکی یەکێتی هەولێریش هیچ تەماو هیوایەکیان، نە بە یەکێتی وەک حزب، نە بە مام جەلال هەبووە، کە لەهەولێر بیانپارێزێ و رزگاریان بکا، هەموو خەڵکی هەولێر، بەئێستاوەش چاوەرێی کۆسرەتیان دەکرد، کە کارێک بکات، بۆ پاراستنیان لە پارتی . بۆ؟ لەبەر ئەم خاڵانەی خوارەوە:
1- کۆسرەت رەسوڵ، هەژمون و دەسەڵاتی تەواوی لەرێگای وەلائی سەرکردە سیاسی و سەربازییەکانی هەولێر و خەڵکی ئاوارەی کەرکوک هەبوو. هەروەها سەرجەم لێپسراوانی مەڵبەندو کۆمیتەو ئاسایش و پۆلیس و لێپسراوە سەربازیەکان لەژێر فەرمان و بەر دەستی کۆسرەت بوون.
2- کۆسرەت لەپاڵ دەزگای زانیاری، تۆرێکی دەزگای موخابەراتی بەهێزی لەناو پارتی و حکومەتی بەعسی ئەوکاتە هەبوو، هیچ ڕاپۆرتێکی دەزگای زانیاری لەم شارە ( لەھەولێر) پێش ئەوەی بگاتە دەزگای زانیاری دەبوایە بەفلتەری کۆسرەت دارۆشتبوایە.
3- کۆسرەت زۆر سیاسیانەو پشوو درێژانە، بەکەمترین زیان، توانی گەرەک بەگەرەک شاری هەولێر لەپارتی خاوێن بکاتەوە، بەردەوام هەوڵی نەدەدا دەست پێشخەربێ لەلێدانی پارتی. بەڵام پارتی وا گەمارۆ دابوو، چەکدارانی پارتی لەژێر ئەو گوشارە زۆر کاری خراپیان دەرهەق بەخەلک دەکرد، تەقەیان لەخەڵک دەکرد خەڵکیان دەگرت، تەقینەوەیان دەکرد. ئەمە وای لەخەڵکی هەولێر کرد کەخۆیان داوا لەکۆسرەت بکەن، کە دەبێت پارتی لەشاری هەولێر دەربکرێ. بەم جۆرە کۆسرەت سۆزی خەڵکی هەولێری بۆخۆی راکێشاو وەک کەسێکی ئاشتخوازو دژ بەشەری براکوژی هەژمار دەکرا.
4- کۆسرەت زۆر سیاسیانە توانی سەرجەم هێزە کوردیەکان و عیراقیەکان، لەبەرەیەک کۆبکاتەوە بۆ شەر و پەلاماردانی هێزەکانی سوپای عێراق لەخوار هەولێر. تەنیا پارتی ئەوکاتانە بەشداری نەکرد، بەو کارەی بۆ خەڵکی هەولێرو کوردستانی سەلماند، کە ئەوە پارتیە شەڕی براکوژی دەوێ، شەری حکومەتی عێراق ناکا.
5- کۆسرەت لەیەک کاتدا لەهەولێر سەرپەرشتی دوو بەرەی شەری دەکرد، بەرەی شەڕی پارتی و بەرەی شەری شەوانی دژ بەسوپای عیراق.
6- کۆسرەت توانی گورزی کەشندە لەهێزەکانی پارتی بدا، وای لێهاتبوو لەهەر بەرەیەک کۆسرەتی لێبوایە، هێزەکانی پارتی چوکیان دەشکاو هێرشەکانیان تێک دەشکا. پارتی بەتەواوەتی مەئویس بووبوو لەگرتنەوەی هەولێر. ھەر ئەمەبوو وای لەیەکێتی کرد، کەبەرەی تازەتر دژی پارتی بکاتەوە، یەکێتی گەیشبووە نزیک شاخەکانی سەری رەش و سەفین. ئەگەر 31 ئاب سوپای عیراق هێرشی نەکردبایە، یەکێتی بۆ رۆژی 2مانگی 9 دەگەیشتە قەزای سۆران و لەولاوەش لەلای بالیسان دەگەیشتە پردی قەندیلی سەر زێی گەورە.
7- ئەوە کۆسرەت رەسوڵ بوو، پارتی و بارزانی ناچارکرد کەپەنا و هاوار بۆ بەغدا ببات، بۆ گرتنەوەی شاری هەولێر. هەرچەندە ئەگەر کۆسرەت تووشی شکستێکی سەربازی بوو لە هەولێر، بەڵام سەرکەوتنێکی سیاسی گەورەی بەدەستهێنا، کە مۆرکی خیانەیەتی نەتەوەیی و نیشتمانی بەنێوچەوانی بنەماڵەوە بنێ.
8- پارتی و هێزەکانی ئەوەندە دەترسان لەکۆسرەت، رۆژی 31ی ئاب شار بەتەوایی کەوتوو بووە دەست پارتی و سوپای عیراق، بەڵام کۆسرەت و هێزەکەی کە نزیکەی 200 سەیارە دەبوو تا ئێوارە لەگەرەکی باداوەی شاری هەولێر بوون، پارتی نەدەوێرا نزیکیان بکەونەوە، کۆسرەت و هێزەکەی لە ترسی کۆپتەرەکانی عیراق، شەو زۆر بە ئیسراحەت لەرێگای بیستانە هەولێریان جێهێشت.
9- کۆسرەت و هێزەکەی لەگەردەلولی تۆڵە لەساڵی 1997 توانی شکست بە پارتی بێنێ، بەڵام ئەگەر تەدەخولی سوپای تورکیا و هەرەشەکانی عیراق نەبوایە، شاری هەولێر جارێکی تر دەکەوتەوە دەست یەکێتی. ئەم شەرانەش گشتی بەسەرپەرشتی کۆسرەت بوو.
10- بەڵام ئەمە بەو مانایە نایەت، کە ئەوکات ھەولێر لەژێر سایەی دەسەڵاتی کۆسرەت رەسوڵ شامی شریف بووبێت، خەڵکی ھەولێر لەبێ مووچەیی و ئابلۆقەی و تۆپبارانی پارتی و نەبوونی کارەبا دەیناڵان، ئەمە جگە لە بڵاوبونەوەی باندە چەکدارەکانی دزی و ڕاووڕوت، بەدەیان ھاوڵاتی بە بیانووی ھەواداری پارتی ماڵ و ئۆتۆمبێلی لێ دەدزراو تاڵان دەكرا و سەرانەی لێ دەسەندرا.. ئەوباندانەش ھەموویان چەکداری کۆسرەت رەسوڵ و جەبارفەرمان و حاکم قادری بەرێوەری ئاسایشی گشتی ئەوکات بوون..
مەبەست لەسەردکردن و خستنەڕووی ئەم خاڵانانەی سەرەوە. کۆسرەت رەسوڵ کەسێکی کاریگەر و بەهێزوو بەتوانای یەکێتی بوو، کە دەوری باڵای هەبووە لەکۆڕانکاریە سیاسی و عەسکەری و هاوکێشە ئیقلیمیەکان.. لەپاڵ ئەوەی کەسێکی عەسکەری بوو، کەسایەتیەکی سیاسی و مفاوزوێکی پشوو درێژ بوو، هەروەها کەسێکی ئارام بوو هیچ کات لە بەرامبەر نەیارەکان و ڕاگەیاندنەکان هەڵنەدەچوو.
حەزدەکەم بەسەرهاتێکی خۆمتان بۆ بکێرمەوە، کە گەواهی ئارامی و سیاسی بوونی ئەو پیاوە دەدەن.
رۆژێکیان لەماڵی کۆسرەت لەهەولێر بەئامادەبوونی ئەحمەد چەلەبی، کۆبوونەی یەکێتی و پارتی بوو، نوێنەری پارتی دکتۆر ڕۆژ بوو، پارتی ئەو ڕۆژە لەپەنای دانووسان قەزای چومانی گرت. تەنیا من وەک رۆژنامەی کوردستانی نوێ چووم تەسریحێک سەبارەت بەو دانیشتنە وەربگرم، پرسیارێکم لە دکتور رۆژ نوری شاویس کرد، ووتم بەرێزتان لەپاڵ گفتووگۆ. ئەمرۆ شاری چۆمانتان گرت، ئایا ئەمە ئەوە ناگەیەنێ کە ئێوە ناتانەوێ کۆتایی بەشەری ناوخۆ بێنن؟ دکتۆر رۆژ رووی گرژ کردو جوێنی ناشرینی پێدام و تووی ئێوەو ئەمسالی ئێوە دەتانەوێ شەری براکوژی بەردەوام بێ. دواتر هەمان پرسیارم لە کۆسرەت رەسوڵ کرد، کۆسرەت رەسوڵ بەدەم پێکەنین و بەئارامی، بەچاو نوقاندنێک (دیاربوو پرسیارەکەی پێ خۆش بوو) ووتی گرتنی گوندێک شارێک رەبیەیەک، ساردمان ناکاتەوە لە بەکۆتایی هێنان بەشەری براکوژی. گەر بمانەوێ بە دووسەعات دەیگرینەوە.
لەهەولێر، یەکێتی واتە کۆسرەت، خەڵکی هەولێر مام جەلالیان وەک سەرۆکی حزب و سمبوڵێک دەبینێ، نەک وەک هەمووشتێک.
لەهەولێر کۆسرەت هەموو شتێک بوو، دەیانووت ئەگەر کۆسرەت نەبێ، یەکێتی و مام جەلال هیچیان بۆ هەولێر پێ ناکرێ. هەر کاتێ مام جەلال یا سەرکردەیەکی سلێمانی بهاتوونایە هەولێر ئەگەر لەژێر باڵی کۆسرەت نەبوونایەو نەیان دەتوانی یەک هەنگاو بهاوێژن. ئەمە کەسایەتی کۆسرەت بوو. بەڵام کاتێک مام جەلال و سەرکردە سیاسیەکانی سلێمانی، لەسەرۆکایەتی حکومەتی سلێمانی لایانداو وویستیان پەڵ و باڵی بکەن. لێرەوە کۆسرەت ئیعلانی شەری ساردو ژێربەژێرەی دژ بە تاڵەبانی و سەرکردەکانی سلێمانی کرد، کە ئەو هەموو ماندووبوون و شەونخوونیەی ئەو بۆ پاراستنی یەکێتی و مانەوەی یەکێتی لەو سنوورەی تا دێگەڵە، لەبەرچاو ناگرن و هەوڵی بچوکردنەوەی دەدەن. ئەویش زۆر لەسەرخۆ گەمە سیاسیەکانی خۆی لەدژی ئەو دوو ئاراستەیە، بەهاوکاریی و سوود وەرگرتن لە دەنگە سیاسیە نارەزاییەکانی ناو یەکێتی، هەروەها بەکارهێنانی پارتی.
لەلایەک توانی سەرئێشەی بەردەوام بۆ ماڵباتی تاڵەبانی بخولقێنێ. لە لایەکی تریش ئەو سیاسیانەی سلێمانی کەدژی بوون، توانی ئاوتی دەرەوەی یەکێتیان بکات یانیش لە پێگەو جەماوەریان بدات.
ئەگەر دژایەتکردنی پێگەی سیاسی کۆسرەت لەلایەن پارتیەوە، بوبێتە هۆکاری هەڵگیرساندنی شەڕی ناوخۆ و دەرکردن و دەرپەڕاندن و یەکێتی لەهەولێر. ئەوا دژایەکردنی کۆسرەت رەسوڵ لەلایەن خودی یەکێتیەکان لەسلێمانی بووە هۆکاری بەهێزکردن و پارچەپارچەکردنی خودی یەکێتی وەک حزب.. چۆن؟ لە نووسینی داھاتوو وەڵامی ئەم پرسیارەش دەدەینەوە.