ئامانج نەقشبەندی: کۆمەڵێک 30 ساڵ و، هەندێک بەراورد.

گەڵێک لە ئێمە دەزانین کە حەزرەتی مەسیح سڵاوی خودای لێ بێت تەنها ( 30 ) و وردەیەک ساڵ تەمەنی بردە سەر لەم سەر زەمینە، مێژووش پێمان دەڵێت: ژمارەی قوتابیەکانی، کە […]
سمبولی کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

گەڵێک لە ئێمە دەزانین کە حەزرەتی مەسیح سڵاوی خودای لێ بێت تەنها ( 30 ) و وردەیەک ساڵ تەمەنی بردە سەر لەم سەر زەمینە، مێژووش پێمان دەڵێت: ژمارەی قوتابیەکانی، کە ڕایسپاردن دوای خۆی پەیامەکەی بگەیەنن بە خەڵک تەنها ( 12 ) حەواری بوون ؟! سەرباری ڕاوەدونان و زوڵم و زۆر ئاینی مەسیحیان لە هەموو جیهاندا بڵاوکردەوە …
بەهەمان شێوە پێغەمبەر درودی خودای لەسەر بێت سەردەمی خۆی و هەر چوار خەلیفەی راشید کە بە هەمان شێوە تەنها (۳۰) و وردەیەک ساڵی خایاند دوو ئیمپراتۆریەتی گەورەی فارس و رۆمیان شکست پێ هێنا، لە ڕۆژهەڵات نزیک بوونەوە، لە سنوری هیند و چین و لە ڕۆژئاوا دەسەڵاتیان گەیشتە ووڵاتی تونسی ئێستا. لەو 30 ساڵەشدا بە دەیان کەسانی لێهاتوو بلیمەت و جەنگاوەر و پلاندانەریان تێدا هەڵکەوت، کە ناوی گەلێکیان لە مێژوودا بە پیتی زێڕین نوسراوەتەوە …
لە مێژووی کوردیشدا گەر وەک نموونە و ئاماژەیەکی کورت باسی مەولانا خالیدی نەقشبەندی بکەین، کە سەرباری تەمەنێکی کورت 48 ساڵ و لە ماوەی چەند ساڵێکی کەمدا، کە بە پەنجەی دەست دەژمێردرێن، سەرباری پیلان و شکات و هاندانی دەسەڵات بۆ دژایەتی کردنی و مردن لە غوربەت دا، ڕێبازێکی ئاینیی لە کوردستان و تەواوی ڕۆژهەڵاتی ناوەڕاستدا بڵاوکردەوە کە ئێستاشی لەسەر بێت پەیڕەوانی ڕێبازەکەی بە ملیۆنان کەس ئەژمار دەکرێن …
بەڵام لێرەدا و لە پاش نزیکەی 30 ساڵ لە دەسەڵاتدارێتی کوردیی پرسیارێک دێتە ئاراوە: ئاخۆ لە سێ دەیەدا چیتان کرد؟ ئاکامەکە چی بوو؟ ئێمەتان بە کوێ گەیاند و دەستکەوتەکانتان کامەن؟ چەند بیرمەندتان پێگەیاند، کە باسکردنیان چێی شانازی میللەتێک بێت؟ لە ماڵوێرانی زیاتر چیتان خوڵقاند؟ بەدەر لە کۆیلە دروستکردن و خۆدەوڵەمەند کردن و جەهل زیاتر؟ بەرهەمەکەتان کامەیە؟ ئاخۆ دەزانن 30 ساڵ لە ژیان تاک و کۆمەڵگەی مرۆڤایەتیدا چەند زۆرە و چ جیاوازی و ئەفراندنێک دەتوانرێت ئەنجام بدرێت؟ ئاخۆ هیچ کەسێک لەو دەسەڵاتە بۆ ساتێکیش شریتی عومری بابردووی ئەم میللەتە دێنێتەوە پێش چاوی، کە جگە لە خوێن و خیانەت و گەندەڵی و بەهەدەردانی سامانی مادیی و ڕۆحی و جەستەیی و وێرانکردنی مۆڕاڵ و لێکترازانی خێزان و کوشتنی ڕۆحی ئینتیما و وابەستەبوون بە خۆشەویستی خاک و نیشتیمان و نەتەوە زیاتر هیچی دیکەیان تێدا ئەنجام نەداوە…

سمبولی کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت
ئامانج نەقشبەندی

ئەرشیڤی بەڕێز: ئامانج نەقشبەندی