بەهرۆز جەعفەر: کابینەکەی زەرفی سەرکەوتوو ئەبێت؟.

ئەمە پرسیار و هەوڵی ژمارەیەک ئاژانسی میدیایی کوردستان و دەرەوەیە، لە بەر کاتی پشوو، بە کورتی بە مۆبایلەکەی بە دەستمەوەیە سۆراخی وەڵامێک بۆ ئەو پرسیارە ئەکەم؛ یەکەم/ کاراکتەری ڕاسپێردراو بۆ […]
سمبولی کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

ئەمە پرسیار و هەوڵی ژمارەیەک ئاژانسی میدیایی کوردستان و دەرەوەیە، لە بەر کاتی پشوو، بە کورتی بە مۆبایلەکەی بە دەستمەوەیە سۆراخی وەڵامێک بۆ ئەو پرسیارە ئەکەم؛
یەکەم/ کاراکتەری ڕاسپێردراو بۆ پێکهێنانی حکومەتی عێراق « عەدنان زەرفی لەکاتێکدا دەست بەجوڵەکانی ئەکات کە عێراق لە بەردەم ئەم ئاڵنگاریانەدایە:
1- حیزبی دەعوە کە لە ساڵی (1957) ەوە تاکە حیزبی کاریگەریی شیعی بوە پەرت بوەو، بنەمای کێشەو بەرەکانی ئێستای عێراقیش لەلایەک ئەوەیە حوکمڕانی حەڤدە ساڵی دوای ڕووخانی سەدام ئەوەی نیشانداوە کە ئەدایەکی ناجۆر و خراپیان لە گەندەڵی و جیاکاریی کۆمەڵایەتی و ئابوریی و تایەفی کردووە، لەلایەکی تریش زیاتر لە چواردە ساڵ حیزبی دەعوە فەرمانڕەوایی عێراقی دوای سەدامیان کردوە، بەڵام ئێستا ئەو حیزبە لاوازو پەرتەوازەن و لێکترازانی تیا دروستبوە.
2- عێراق بۆتە گۆڕەپانی یەکلاکردنەوەی ناکۆکیەکانی نێوان ئێران و ئەمریکا و لە زەوی و ئاسمانەوە ئەم دوو هێزە دەرەکیە پەلاماری یەکتر ئەدەن.
3- عێراق وڵاتێکی قەرزارە و نرخی نەوتیش نزمترین ئاستی خۆی تۆمارکردووە لە دوای جەنگی کەنداو- 1991، بەجۆرێک نیواو نیو لە تەخمیناتی حکومەت و پەرلەمان کورتی هێناوە.
4- پێشوتر کاراکتەری بەهێزتر لە عەدنان زەرفی خۆیان تاقی کردۆتەوە، وەکو عادل عەبدلمەهدی و محەمەد عەلاوی و پیرۆزبایشیان لێکراوە لەلایەن ئێران و ئەمریکاوە.
5- عێراق و جیهان و ناوچەکە کەوتۆتە بەردەم هەڕەشەی ڤایرۆسی کۆرۆنا.
6- پاڵپشتی و گوتاری کاندیدی ڕاسپێردراو بەرانبەر بە کورد ڕوون نیەو هاوشێوەی پێش خۆی « عەلاوی» نازانێت لەگەڵ کێ گفتوگۆ بکات!. بەهەمان شێوە ڕوون نییە کورد لە بەغدا بە دوای چیەوەیە!؟.
7- ئێران هەر لە سەردەمی قاجارەکان و « شا» ەوە تا ئەم چل ساڵەی تەمەنی کۆماری ئیسلامی هیچ کاتێک نەکەوتۆتە دۆخێکی وەها سەغڵەت و نالەباری ناوخۆییەوە، هەڵوێستە نەرمەکانی ئەمدواییەی وەزارەتی دەرەوەی ئێران بەرانبەر وڵاتانی کەنداو، پاشەکشێکانی لە یەمەن و لوبنان و تاڕادەیەک بێدەنگیەکانی لە عێراق و لە ئەفغانستان بەڵگەی ئەوەن کە ئەمریکا لە کوشتنی قاسم سولەیمانی دا زۆر وورد ئامانجەکەی پێکاوە. بەڵام لەهەمو حاڵەتێکدا عێراق بۆ ئێران ئاوی حەیاتەو بە بێ پاڵپشتی ئێران دروستکردنی حکومەتێکی ئەمریکی لە عێراقدا زۆر قورسە.
8- کاراکتەری زەیدی پاڵپشتی شەقامی نیە چونکە پێشوتر لە کاری حکومی دا بوەو بە واقیعیش ئەم پەرلەمان و حکومەت و نوێنەرایەتیەی لە عێراقدا هەیە تەزویرە، لە باشترین حاڵەتدا لە دوا هەڵبژاردندا 20٪ ی عێراقیەکان دەنگیان داوە. بەواتایەکی تر 80٪ ی عێراقیەکان باوەڕیان بە هیچ فیگەرێکی سیاسی نەماوەو ئەبێت هەڵبژاردنی پێشوەختە ڕابگەیەندرێت و هەر سێ سەرۆکایەتیەکە خۆیان هەڵبوەشێننەوە.
9- سەرەتای یەکەمین هەڵەی کاندیدی ڕاسپێردراو « زەرفی» دەرکەوت لەبارەی ئەوەی نازانێت کە پەیوەندییە گشتیەکان چیەو ڕای گشتی چۆن ڕام ئەکرێت، ئەوەش بە بەڵێنی قەبە بۆ تەخدیدکردنی شەقام هاوشێوەی کردنەوەی هەژماری بانکی و پارە خستنە سەر حیساب بۆ هەر هاوڵاتیەک و، دابینکردنی یەکەی نیشتەجێ بون بۆ هەموو عێراقیەک و ، دامەزراندنی هەموو دەرچووەکانی زانکۆ و…تادوایی . تەنانەت ئەگەر دەست بۆ ئەو کارانە ببات لەم کاتەدا هەڵاوسانی ئابوریی زیاتر ڕووئەکاتە عێراق و وێرانتر ئەبێت. بنەمای سەرکەوتنی هەر پرۆژەیەک بریتی یە لە ئیدارەدانی ستراتیجی، ئیدارە لە کوێیەو ستراتیج لە کوێیەو تیمی جێبەجێکار کێیەو…تادوایی؟.

دووەم/ دەرفەتەکانی بەردەم کاندیدی ڕاسپێردراو بۆ پێکهێنانی حکومەت
– تا دێت بونی ئەمریکا لە عێراق زیاتر ئەبێت و لەمەولا ئەمریکا هاوشێوەی جۆرێک لە « ئینتیداب» لە عێراق ئەمێنێتەوەو سەرلەنوێ عێراق داگیر ئەکاتەوە « یان بونیاد ئەناتەوە/ ئازاد ئەکاتەوە…». ئەمەش بە پاڵپشتی بۆ پێکهێنانی حکومەتێکی بەهێز دێتە دی. ئەمریکیەکان پێویستیان بەوەیە هەموو هەوڵە شکستخواردوەکانی لایەنە عێراقیەکان نیشانی دونیا بدەن کە عێراق توانای خۆ- بەڕێوەبەریی نییە.
– ئیدارەی ئەمریکا بڕیاریداوە ژمارەی هێزەکانی لە عێراق زیاتر بکات. هاوکات لەبەرئەوەی حکومەتی توانای ڕووبەڕووبونەوەی ئەو هێرشانەی نییە ناوبەناو ئەکرێتە سەر بنکەکانی ئەمریکا لەمەولا ئەمریکا سیستەمی C-RAMs و پاتریۆت لە ئاسمانی عێراق و هەرێمی کوردستان جێگیر ئەکات تا هەر هێرشێکی نادیار پوچەڵ بکاتەوە.

سەرئەنجام
شەقامی سیاسی لە عێراق بە گشتی و ناوەندی سیاسی شیعی بەتایبەت تا بڵێی پەرت و دابەشبووە، هەروەها شەقامی ناڕازیش هەیە، هیچ کاراکتەرێک ناتوانێت کۆدەنگی عێراقیەکان بەدەست بهێنێت، ئەوەی رووئەدات و هەیە لەلایەن پەرلەمان و حکومەت و سەرۆکایەتی کۆمارەوە ئەکرێت ناوبنرێت « کات کوشتن» و کات بەڕێ کردن تا ئەم چوار ساڵەو خولی دەستکەوتە حیزبی و کەسییەکانیان پتر مسۆگەر بکەن. دواجار ئەگەر لە چوارچێوەی سەرلەنوێ ئامادەگیەکی تری ئەمریکادا گڵۆپی سەوز لە دەستنیشانکردنی « زەرفی» دا هەڵ نەکرابێت، ئەوا « زەرفی» جگە لە زەرفێکی بەتاڵ هیچی تر وەرناگرێت. بە پێچەوانەوە ویلایەتە یەکگرتووەکان پێویستی بەوەیە خۆ- گیفکردنەوەی هەموو لایەنەکان ببینێت بە حەشدی شەعبیشەوە، ئینجا سەرلەنوێ ڕاستەوخۆ خۆی بگەڕێتەوە گۆڕەپانەکەو حکومەتێکی ئەمریکی پێک بهێنێت.

سمبولی کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت
بەهرۆز جەعفەر

ئەرشیڤی بەڕێز: بەهرۆز جەعفەر