بورهان شێخ ڕه‌ئوف: وزەی ئەتۆم و وزەی ژن.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

وزەی ئەتۆم یان ناوكی ئەو وزە كۆكراوەو شاراوەیە كە لەناو گەردیلەدایە و بەهۆی هێزی ناوكەكەی یەكیان گرتووە, هەربۆیە كاتێك ئەلبێرت ئەنشتاین كاری لەسەر بیردۆزە بەناوبانگەكەی ( نیسبی ) دەكرد ئەو هاوكێشە ماتماتیكیەی بۆ دەركەوت: E=MC2
ئەم شێواز و هاوكێشەیە ئەوە ڕاستییەی بۆ دەرخست كە ماددە دەكرێت بگۆڕێت بۆ وزە، هەرچەندە ئەمە وتەیەكی ئاسایی و ئاسانە بەڵام ئەوەی سەلماند كە دەكرێت لە بڕێكی كەمی ماددە بڕێكی زۆری وزە بەرهەم بهێنرێت، دەكرێت ئەم پرۆسێسە لەڕێ‌ی پرۆسەی دابەشكردن و شكاندن و لەتكردنی گەردیلە ئەنجام بدرێت.
بەڵێ‌ دۆزینەوەو ئاشكراكردنی ئەم وزە شاراوەیە لە نیوەی یەكەمی سەدەی ڕابردوو شۆڕشێكی گەورەی لە هەموو بوارەكانی زانست و سیاسەت و تەرازووی هێز لە جیهاندا گۆڕی ئەگەرچی ئەم وزە تازەیە ئەگەر لە دەستی ئەمین و قایم و یاسادا نەبێت دەكرێت كارەساتی گەورەی لێبكەوێتەوە بە لە ناوبردنی جیهانیشەوە، بە پێچەوانەشەوە ئەگەر لە بندەستی سیستم ویاسای دادوەرانەدا بێت دەكرێت ببێتە فاكتەری ئارامی و سەقامگیری لە جیهاندا.
تائێرە بابەس بێت ئەتۆم و وزە و توانا سەرسوڕهێنەرەكانی، ئەوە بابەتێكی زانستی درێژە و با لێی گەڕێین بۆ پسپۆڕانی ئەو بوارە، بەڵام ئەوەی لە ئێستادا جێگەی سەرنجی من و زۆر لە چاودێرانە دەركەوتنی وزەو توانای ژنانە لە ڕۆژئاوای كوردستان ئەو ژن و كچانەی كە لە پێنج ساڵی ڕابردووی شۆڕشی كورد و بەتایبەتی پێكهاتەكانی باكوری سوریا ڕۆڵ و كاریگەریەكی ئێجگار گەورەو لە ڕادەبەدەریان پیشانی جیهان دا.
ئەو تێكۆشەر و قارەمانەی كەلە شەڕی 130 ڕۆژەی كۆبانی دا لەگەڵ پیاواندا حەماسەیەكیان خوڵقاند كە هەموو مرۆڤایەتی لە ئاستیاندا سەرسامە و دەست لەسەر سنگ سەری ڕێزو نەوازشی دانەواند.
بەڵێ‌ ڕۆڵی ژنان لەناو بزوتنەوەو شۆڕشەكانی كوردا دەگەڕێتەوە بۆ سەرەتاكانی ساڵەكانی هەشتاكان لەناو شۆڕشی ڕۆژهەڵاتی كوردستان لە دوای شۆڕشی گەلانی ئێران و سەرهەڵدانی شۆڕش لەوبەشەی كوردستان، دوای نكوڵیكردنی ڕژێمی تازە لە ئێران لە مافە نەتەوایەتی و دیموكراتیەكانی كورد, كۆمەڵەی شۆڕشگێڕی زەحمەتكێشانی كوردستانی ئێران ئەو سەردەقەی شكان و ژنانی بە شێوەیەكی بەربڵاو ڕێكخست لە ناو هێزەكانیدا.
من ئەو هۆنراوەی شاعیری مەزن شێركۆ بێكەسم لە بیرە كە بۆ كچە پێشمەرگەی شەهیدی كۆمەڵە (بەیان ) نوسیبووی لە جوانترین وەسفدا وتبووی تائەو كات مریشكە كونجەی ماڵەكەیان و بەیان هیچ جیاوازیەكیان نەبوو بەڵام ئیتر و لە ئێستا بەدواوە من كاسكێتێك دەكەمە سەر كچی شیعرم، من حەت حەتۆكە دەكەمە مل كچی شیعرم …تاد . درود بۆ گیانی نەمری شێركۆ.
لە باشوریش لە نێو ڕیزەكانی یەكێتی نیشتمانی كوردستان و لەشۆڕشی نوێ‌ دا دانە دانە ژن هەبوو ناكرێت باسی ڕۆڵ و سەرمەشقی ئەوانە بەرچاونەگیرێت بەڵام هەر لە چوارچێوەیەكی تەسك و پۆشینی جل وبەرگی پێشمەرگە و پیاوانەدا مایەوەو پێش نەكەوت.
لە كۆتاییدا ئەوەی مەبەستی ئەم وتارە كورتەی من بوو دۆزینەوەی ئەو وزەو تواناو ئینێرجیە شاراوەی ژنانە لە ڕۆژئاوای كوردستان، كە تا ئێستا ئاكامێكی زۆر باش و بەكەڵكی بۆ ئەو شۆڕش بەرخۆدانەی ئەوێ‌ هەبووەو چاوەڕوانی شتی زۆر مەزنتری لێدەكرێت بە تایبەتی شەڕی بەرەنگاری و بەرخۆدانی قارەمانانەی چەند ڕۆژی ڕابردووی عەفرین، جارێكی تر ئەو ڕاستییەی سەلماند ئەمانە چ هێزێكن و بەشێكی گەورەی ئەو سەروەری و قارەمانێتیە بۆ ئەوان تۆمار دەكرێت.
بۆیە چۆن ئەتۆم دوو ڕووی باش و خراپی هەیە ئەم هێزە تازە دۆزراوەو شاراوەی پێشووش دەبێت بۆ خزمەتی مرۆڤایەتی و یەكسانی و ئازادی و دادپەروەری ئاوەدانی بەكاربهێنرێت نەك شتی تر.
ناكرێت ئەم وتارە كۆتایی پێ بهێنم و ئاماژە بەو بیرو هزر و قوتابخانەیە نەكەم و نەڵێم دەستانخۆش بۆ ئەم شۆڕش و بەرخۆدان و داهێنانە و، دەڵێم یەپەژە واتە (یەكینەكانی پاراستنی ژن ) دیاری ئەوان و كوردە بۆ مرۆڤایەتی.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت