sherko-bekes_resize

دکتۆر کەمال میراودەلی : بۆ شێرکۆ – دە ئاخ لەم کاتەدا مەڕۆ !! .

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

 

(١)

دە ئاخ لەم کاتەدا مەڕۆ

شارێک دوای خۆت جێ مەهێڵە

پڕ لە پاڵەوانی پەڕۆ

 

دە داخ لەم ساتەدا مەرۆ

شارێک دوای خۆت جێ مەهێلە

پڕ لە دەرد و دزو درۆ

 

دە ئاخ لەم کاتەدا مەڕۆ

کە چاوەڕوانتە قامیشلی

تەمادارتە سەرێ کانی

دە داخ لەم کاتەدا مەڕۆ

سەری شۆڕە سلێمانی

 

ئەوە رۆژاوا دەکوژرێ

ئەو نابێت بە بوومەلەرزە

دەڵێی خامۆشیی قەبرە

ژێر بارانی مەرگە تەرزە

 

ئەوە ئەنفالێکی ترە

مناڵی ساوا قووت دەدرێ

کەچی سلێمانییەکەی تۆ

خەو لە چاوانی نازڕێ

 

بەر لەوەی یەکجاریی قفڵ دەیت

دوا دەرگای سەختی ئەم ژیانە

بۆ پێت نەوتین كێ ئەم شارەی

ئاوا کرد بە گەوادخانە ؟

 

دە ئاخ لەم کاتەدا مەڕۆ

ئەدەبی کوردیی هەتیوە

زمانیان کردووە بە چقڵ

لە ناو دڵی هەڵچەقیوە

 

چۆن توانیت لەم شارەدا بژی

شیعرو ژنی تیا دەکوژرێ

لە نادییەکدا نان بخۆی

گۆشتی ژنی تیا دەبرژێ ؟

 

چۆن توانیت لە وڵاتێکدا بژی

شاخ و باخی فرۆشراون

لە ناو باخێکدا پیاسە کەی

رەگەکانی هەڵکێشراون ؟

 

دە ئاخ لەم کاتەدا مەڕۆ

جەستەی شیعر پڕ برینە

دە داخ لەم ساتەدا مەڕۆ

کاتمان نییە بۆ ئەم شینە

 

ئەوە كچانی خۆراوا

بە خوێنیان شیعر دەنووسن

پیاوەکانی باشووریشت

بێ زمان و بێ نامووسن

 

دە داخ لەم کاتەدا مەڕۆ

جەستەی شیعر هەمووی خوێنە

دە داخ لەم ساتەدا مەڕۆ

دڵی شیعرم مەگرێینە

 

دە ئاخ لەم کاتەدا مەڕۆ

هۆنراوەت ماوە بینووسی

دە داخ لەم رۆژەدا مەڕۆ

جێم مەهێلە بە مەئیووسیی !!

 

[  ئەم هۆنراوە رۆژێک پێش هەواڵی مەرگی شاعیر نووسراوە  ]

 

(٢)

هەواڵی مەرگت چەند ترسناکە !

 

چەند ترسناکە

هەواڵی مەرگت چەند ترسناکە

وەک رووخانی شاخ

وەک کوژرانی باخ

وەک تەقینی ناخ

هەواڵی مەرگت چەند ترسناکە

 

دامرکا سووتوی دوایین جگەرەت

چەندە تەنیاتر بووە تەنیایی

تۆش زیاد نووستیت و هەڵنەستایتەوە

ئاخری گەیشتیت ، بە دوا دڵنیایی

 

چەند ترسناکە هەواڵی مەرگت

دڵم ناوێرێ لێی رابمێنێ

زمانم ناوێرێ کە ناوی بێنێ

گیانم رادەکا ، رایناگەێنێ

چەند ترسناکە

هەواڵی مەرگت چەند ترسناکە

 

هەر وەک رۆژگار لە پڕ رابوەستێ

هەر وەکو شیعر زریکەی لێ هەستێ

وەک گەردوون زەنگ بێ ، گوێیە نەیبیستێ

چەند ترسناکە

هەوالی مەرگت چەند ترسناکە

 

شیرکۆ دە مەڕۆ ، دە وەختی نییە

ئەم شارەم خوایە خۆ بەختی نییە

قەلایەکی سەرسەختی نییە

نە نوور ، نە سایەو ، نە درەختی نییە

 

کونجێکی دڵم کانی شیعر بوو

ئەمڕۆ بوو بە گڕ

سووتاندمی ئاخر ، ئاخر هەواڵی

زەبرێكی جەرگبڕ

تۆ خۆت دەمێکە ، ئامادەبوویت بۆی ،

وەسیەتێکی کڕ

[[ با بە بێ گیانیش نیگای دڵداران گیانی من بێت

با بە بێ ژیانیش ، بۆنی گوڵزارو شیعرو مۆسیقا ، ژیانی من بێت

دەبا هاندانی هەست و هۆنراوەی کچان و کوڕان ، دیاریی من بێت

با هەلبژاردنی بستێ خاکی خۆم بۆ جەستەی شیعرم ئیختیاری من بێت . ]]

 

سەرنج و تکایەک بۆ هەمووان  :

شیرکۆ پەنجا ساڵە بەشێکی بناغەییە لە مێژووی شیعری سلێمانی و کوردستان . کەسمان وەک مرۆڤ تەواو نین . کەمترین شت بۆی بکەین هەقی خۆیەتی وەسیەتەکەی بێ زیادو کەم جێبەجێ بکرێت و پێشنیاز دەکەم گەر پەسند بێت ، ئەم چوار دێڕە شیعرەی دوایی کە ناوەرۆکی وەسیەتەکەیەتی و وەک شیعر دامڕشتۆتەوە لە گۆشەیەکی گۆڕەکەی بنووسرێت . ئەمەش دەقی وەسیەتنامەکەی شیرکۆ یە .

” من نامەوێت لە هیچ كام لە گرد و گردۆڵەكەكاندا بنێژرێم كە دیارن و ناویان ئەبرێ ، یەكەم لەبەرئەوەی پڕبونەتەوە و دوەم لەبەرئەوەی من حەز بە قەرەباڵغی زۆر ناكەم، من ئەمەوێ ئەگەر سەرۆكی شارەوانی و ئەنجومەنی شارەوانی شارەكەم رێگەم پێبدا و ئەوەم پێ رەوا ببینن كە لە پاركی ئازادیدا و بە تەنیشت مۆنۆمێنتەكەی شەهیدانی (1963) ی سلێمانیەوە بمنێژن، ئەوێ خۆشترە و تەنگەنەفەس نابم ، من حەز ئەكەم بە مردویش نزیكی ئەو خەڵكە‌و ژن ‌و پیاو‌ی شارەكەم‌ و دەنگی مۆسیقا ‌و گۆرانی ‌و هەڵپەڕكێ‌ و یانە جوانەكانی ئەو پاركە بم .

با كتێبخانەكەم‌و دیوانەكانم و وێنەكانم ببرێن بۆ شوێن مەزارەكەم ، با كافتریایەك‌ و باخچەیەكی بچكۆلانە لەو شوێنەدا هەبێت بۆئەوەی شاعیران‌ و نو‌سەران‌ و كچ ‌و كوڕی دڵدار ببنە میوانم ، من ئەمەوێ لە ئێستەوە بەچاوی خەیاڵ تەماشای ئەو پاركە بكەم‌ و دوای مردنی خۆم ببینم ، ئەمەوێ بەدەم چریكەی دیلان ‌و ئەڵڵا وەیسیەكەی مەردان ‌و سرودی ( خوایە وەتەن ئاواكەی ) ـەوە ئاڵای كوردستانم تێوە پێچرابێ ‌و بنێژرێم ، من ئەمەوێ لە پرسەكەمدا مۆسیقا لێبدرێت ، لەناو مەزارەكەمدا تابلۆی جوانی هونەرمەندانی شارەكەم هەڵبواسن ، من ئەمەوێ دوای خۆم‌ و بەناوی ( بێكەس ) ەوە خەڵاتێكی ساڵانە تەرخان بكرێ ‌و بدرێت بە جوانترین دیوانە شیعری هەڵبژێردراوی ئەو ساڵە ‌و خەرجی ئەم خەڵاتەیش لەو میراتە بدرێ كە جێیدەهێڵم .

 

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت