ستارە عارف: جەژنی نەورۆز سەرهەڵدان و ئالنگاریە.

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ڕاگرتنی مەراسیمی پیرۆزکردنی جەژنی نەورۆز بە پاساوی داگیرکردنی عەفرین هەڵەیەکی زەقە، چونکە جەژنی نەورۆز نابێت بە هیچ پاساوێک ڕابگیرێت و پیرۆز نەکرێت، بە پێچەوانەوە ئەمە خواستی دەوڵەتانی داگیرکار و دوژمنانی وەک تورک و عێراق و سوریا و ئێرانە لەدژی کورد و لەناوبردنی ناسنامە نەتەوەیەکەیەتی، بە داگیرکردنی عەفرین یەکەم هەنگاو، کە دوژمنی تورک دەیهاوێژێت قەدەغەکردن و ڕاگرتنی پیرۆزکردنی جەژنی نەورۆزەکەیەتی، بۆیە ڕاگرتنی لەباشور هەڵەیە و خزمەتی ئەو پیلانە دەکات، جەژنی نەورۆز سەیران و گەشت و کەیف و سەفا نیە، بەڵکو نەورۆز لەبنەڕەتدا جەژنێکی نەتەوەیی و سەرهەڵدان و نوێبونەوەی ڕۆحی نەتەوەیی و ژیانەوە و هێمای خۆڕاگریە، جەژنی نەورۆز نوێکردنەوەی ئالنگاری و تەحەدایە بە ڕوی دوژمندا، لەدوای لۆزان و سایکس بیکۆوە دوژمنانی کورد بە پیلان جەژنی نەورۆز لەکورد قەدەغە دەکەن، چونکە سیمای بەرخۆدانی کورد بوە، کورد لەدژی قەدەغەکردنی نەورۆز لەلایەن داگیرکارانیەوە قوربانی داوە و خوێنی ڕشتوە، ئەوە ڕاستە جوت بنەماڵە چەتەکە لەم هەرێمە، هەمو ئەم بەهانەیان لەبەعس زیاتر لەناو بردوە، بەڵام لەناوەڕۆکدا نەورۆز ناسنامەی گەلێکە.
دەبێت نەورۆزی ئەمساڵ ببێتە پاڵپشتی عەفرین و گیانمان بە بەردا بکاتەوە و نەک ڕابگیرێت، ئەوەی عەفرین لێمانی دەوێت بڵندکردنی مەشخەڵی ئاگری نەورۆز و بەهێزکردنی گیانی بەرخۆدان و بەرەنگاری دوژمنانی تورک و عەرەب و فارس و ڕۆحی بەرخۆدان و تەسلیم نەبونە، کورد تەنیا جەژنێکی ڕاستەقینەی هەیە، کە هەر چوار دەوڵەت و ئیسلامی سیاسی لێی قەدەغەی دەکەن، بۆیە دەبێت کورد لەباشور و ئەوروپا لەوە هوشیارتر بن، کە جەژنی نەورۆز و لەبەرکردنی بەرگی ئاڵو واڵا و گۆڤەند و هەڵپەڕکێ، بە کەیف و سەفای بێ مانا تێ بگەن و کاڵفامانە دژایەتی بکەن، ئەوانە بەشێکن لەناسنامەی کورد، تەنیا بۆ کەیف و خۆشی نین، بەڵکو بۆ تەحەدای دوژمن و نمایشکردنی کلتورە و پایەکی سەرەکی هەبونمانە.
عەفرین ئەمڕۆ بەهۆی ناسنامەکەیەوە بەو جۆرە نامرۆیی و وەحشیەتگەریە جینۆساید و کۆمەڵکوژ دەکرێت، لەبەرئەوەی کوردن و بە کوردی دەدوێن و جەژنی نەورۆز پیرۆز دەکەن و بەرگی کوردی دەپۆشن و ژێردەستەیی دوژمن ڕەتدەکەنەوە، دەبێت کورد فێری تەحەدایی دوژمنەکانی بێت و کلتورەکەی بپارێزێت، نەک بە پیلانی دوژمن و ئیسلامی سیاسی ڕایبگرێت و قەدەغەی بکات.
بۆ ڕوبەڕوبونەوەی داگیرکردنی عەفرین لەلایەن تورکەوە وەحشەکانەوە، کورد دەبێت بە بەرگی کوردی ئاڵ و واڵا و پیرۆزکردنی جەژنی نەورۆز دوژمنانی عەفرین بێزار بکەن و ڕوبەڕوی ببنەوە، سەرەڕای قورسی ڕەوشی عەفرین و داگیرکردن و جینۆسایدکردنی، هێشتا ئیرادەیەکی بەهێزی بۆ پیرۆزکردنی جەژنی نەورۆز هەیە، دەبێت جەژنی نەورۆزی ئەمساڵ بکەینە جەژنی پتەوکردنی ئیرادە و بەرەنگاربونەوەی داگیرکردنی عەفرین و ئەو پیلانگێڕیە نێودەوڵەتیەی لەسەر کورد هەیە، نەک تەسلیم بون و کشانەوە.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت