Titorr

شەماڵ عادل سەلیم : بێ‌ ئومێدم لەوەی قەڵەمی ئازاد بتوانێت لە مەملەکەتی ئەنفالدا زەمانەتی ژیانی خۆی بكات …؟!

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

 

به‌پێی‌ راپۆرته‌ پزیشکیه‌کان لە ماوەی ( 15 ) رۆژی‌ دیکه‌ دادە (  شیرین ئەمین  ) ی هاوسەری شەهیدی چاکسازی ( کاوە گەرمیانی ) * منداڵه‌که‌ی لەدایک ده‌بێت ، ئەو مناڵەی بەر لەهاتنە دنیاوە باوکە قارەمانەکەی بەدەستی چەتەو مافیا چاوزەقەکانی کورد خەڵتانی خوێن کرا …، ئا ئەویش رێک وەک دایە و بابە شەهیدە سەربەرزەکەی بە هەتیووی لەژێر حوکمی دەسەڵاتێک گەورەدەبێت کە بەخوێنی شەهیدوئەنفالکراوەکان بنیاتنراوە ، ئا … دەسەڵاتێک کە باسی دیموکراتی و عەدالەتی کۆمەڵایەتی دەکات و خۆی بە واریسی شەرعیی و خاوەن خانەوادەی شەهیدو ئەنفالکراوە سەربەرزەکان دادەنێت ولەبۆنەکاندا فرمێسکی تیمساحیان بۆ هەڵدەرێژێت ….. !!

کاوە گەرمیانی بۆیە ( سۆران ) ئاسا تیرۆر کرا ، چونکە ئەویش قەڵەمەکەی بەئاڕاستەی تێک وپێک شکاندنی سیاسەتی تاک ڕەوی چەقبەستووی ناولەپی دووبنەماڵەی دەسەڵاتداری هەرێمی دووئیدارەیی لە مەیدان بوو ، ئا … کاوە بۆ گەڕاندنەوەی متمانە و شکۆمەندی میللەتەکەی دەستی دابووە قەڵەم و لە گەرمیانی ئەنفالکراو وسوتێنراو بەدەستی بەعسی فاشی ودژی حکومەتی حزبی لە مەملەکەتی ( ئەل ئەنفال ) دا شێر ئاسا دەجەنگا ، کاوە بۆ چەسپاندنی دەستورێکی رۆشەن و ستراتیژیەکی نیشتمانی لە گەڵ دەسەڵاتی گەندەڵی حزبی لەشەردابوو ، کاوە دژی حزباندنی دەسەڵات بوو ، کاوە لە دژی گەورەدزەکان و گەندەڵ و گەندەڵکاران و بەهەدەربردنی سامانی هەرێمە بێنازەکەی دەنگی هەڵبڕیبوو و سپارتاکۆسانە چەکوشی ڕەخنە بنیاتنەرەکانی راست و چەپ دەوەشاند ، کاوە بوێرانە هاتبووە مەیدان و قۆڵی لێ هەڵماڵیبوو بۆ بنیاتنانی سیستەمێکی بەرهەمهێنی تەندروست کە زامنی ئەرک و مافەکانی تاکی کورد بکات لە چوارچێوەی یاسا و دادپەروەریدا ، کاوە لە لەناو جەرگەی گەرمیانە سوتاوەکەی مانی دەگرت و لەگەڵ کەس وکاری سەربەرزی ئەنفالکراوەکاندا ژەهری چاوەڕوانی دەنۆشی ، کاوە لە هەوڵی چەسپاندنی ئەوەبوو کە یاسا سەروەرو و رۆڵی خۆی ببینێ و دامەزراوە نیشتمانیەکانیش بە ئەرکی سەرەکی خۆیان هەڵبستن و نەک وەک دەورانی ئەمرۆ لە بازنەیەکی داخراوی حزبی ( بحزبێندرێن ) ، کاوە بە قەڵەم هەوڵی گۆڕینی ستراکتوری کۆمەڵگاو کەلتورە تەقلیدی و ئێکسپایەربووەکانی دەدا ، کاوە بۆ چەسپاندنی کۆلەکەسەرەکیەکانی دیموکراسیەت و هێنانە دی کۆمەڵگایەکی ئارام و تەندروست و خۆشگوزەران و درێژخایان و هەمەلایەن بۆ هەموان خەباتی دەکرد ، کاوە لە کاوله‌ خانوێکی بێ نازای شارەکەی شۆرشی قەڵەمی دژی مافیای حیزبی و حکومیەکەکان و فەرهوود کردنی سامانی نیشتمانی بەرپاکردبوو …

کاوەی مەرد بەپێچەوانەی قەڵەمە ( نەعامە ) ئاساکان کەسەریان خستۆتە ناو لینگیان ، هاواری دەکردوو و دەیگووت ( چۆن کۆیلە دەبێتە رۆژنامەنووس … ؟ ) ، ئا بۆیە کاوەی جوامێر لەبەردەم ماڵەکەی خۆی و لە باوەشی دایکیدا ، دەسترێژی گوللـه‌ی لێکراو تیرۆر کرا ….

بەڵێ …. کاوە گەرمیانی لەدوای خۆیدا پێگەیەكی گەورەی لەنێو دڵ و دەروونی هەژارانی كوردستان و خاوەن قەڵەمە بوێرکان بە جێ هێشت ، ژیان و هەڵوێست و كردەوە بوێرەکانی کاوەی گەرمیانی بووە سیمبۆلێكی نیشتمانی بۆ ڕەنگ و دەنگە جیاوازەکان و بۆ گشت ئازادیخوازان ، کاوە ناوێکی درەوشاوەی بۆ هەرهەموومان جێ هێشت کە سەروەت وسامانی هەموو دونیا دەهێنێ …..

زۆر باش دێتەوە یادم کاتی کاوەی جوانەمەرگ پێی گوتم : ( من نوێنەری خەڵکم و لە گەڵ قەڵەم دەستم تێکەڵ کردووە ……!! ، لە پێناو مناڵە ڕەش وڕووتەکانی کوردستان و زامن کردنی مافەکانیان هاتوومەتە مەیدان ، بۆمن وەک ( کاوە گەرمیانی ) زەردەخەنەێکی هەژارێک سەروەتی هەموو دونیا ئەهێنێ …. چی لە ڤیلاو سەیارە و دەفتەرە دۆلار و بلۆک وپاسەوانی شەخسی ژنی دووەم و سێیە وچوارەم و وەزیفەیەکی بەرز و بە سەفەرچون بۆ ( تورکیاو جۆرجیاو لوبنان و ئەوروپا ) بکەم ….، چی لە زەوی و خانو و پێشینەی خانو بکەم کە خەڵکی سادە وکەم دەرامەتەکان لە هەرێمەکەی من لە برسانا بمرێ ، ئاخر من چی لە پارە ی دزراوبکەم ……؟! )

بەڵێ ……. کاوە گەرمیانی جەنگاوەرێکی بوێری دژ بە ستەم و زۆرداری ونەهامەتی و گەورەدزەکانی هەرێمەکەی بوو ، هەربۆیە بێدەنگی و بێدەنگ بوون لەئاست تاوانی شەهید کردنی ئەم قەلەمە بوێرو ئازاو تیژو زیرەکە نیشانەی ترسنۆکی و لاوازی و ڕازیبوون و کوێلەتی وسەرلەقاندنی تاکی کوردە بۆ قاچاخچیەکان و بزنسمانەکانی نەوت وگازو گەندەڵکارانی کۆمپانیا وەهمیەکان و چەتە سمێل بابڕەکانی دەسەڵاتی کوردی قەڵەم کوژ …..!!

ـــــــــــــــــــــــــــــــــــــــــــــــــــ

( * ) كاوە محەمەد ئەحمەد ناسراو بە (كاوە گەرمیانی) ‌رۆژنامەنووسێكی شاری كەلار بوو لە دایکبووی ساڵی ١٩٨١، سەرنووسەری گۆڤاری( رایەڵ ) بوو كە لەشاری كەلار دەردەچێت ، لەماوەی رابردوودا بەهۆی نووسینەكانییەوە ، چەند بەرپرسێكی ئەو شارە چەند جارێك لەدادگا سكاڵایان لەسەر تۆماركردووە .

كاوە گەرمیانی‌ ، پەیامنێری‌ ( ئاوێنە ) و پەیامنێری ( راگەیاندنی ئازادی حیزبی شیوعی كوردستان ) بوو ، هەروەها سەرنووسەری‌ گۆڤاری‌ ( رایەڵ ) بووە ، دوو سكاڵای‌ یاسایی لەدادگای‌ تاوانەكانی‌ كەلار لەسەر ( مەحمود سەنگاوی ‌) ئەندامی‌ مەكتەبی‌ سیاسی‌‌ یەكێتی نیشتیمانی كوردستان‌‌و ( جەمال عەبدوڵڵا ) سەرنووسەری‌ گۆڤاری‌ ( بەڵگە )ی تۆماركردبوو ، بەڵام دادگا ئەو سكاڵایانەی‌ یەكلایی نەكردەوە و پشتگوێیانی خست .

شەوی پێنج شەممە كاتژمێر(هەشت و چل خولەک ) كانونی دووەمی (2013) ، ئۆتۆمبیلێكی جۆری ( لاندگرۆزەر ) چوونەتە بەر ماڵەكەی ‌و لەدەرگایان داوە‌و ، بەدایكیان وتووە كاوەمان بۆ بانگ بكەك لەگەڵ هاتنەدەرەوەی كاوە لە ماڵ بەر دەسترێژیان داوە( ٧ ) فیشەكی بەركەوتووە و یەكێك بەر سەری كەوتووە .

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت