دکتۆر کەمال میراودەلی: تاوان و داد : 31 ی ئاب و هەموو خیانەت و تاوانەکانی تر.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

نەخشەرێگایەک بۆ سارێژیی و چارەسەریی 

دیسان وەک هەموو سالێک و، ئەمسال بە هۆی هەلبژاردنەوە گەرمتر، باسی 31 ی ئاب هاتۆتە گۆرێ.

دیارە مەبەستەکان ساغ و راستگۆیانە نین. زیاتر بۆ هاروژاندن و گومڕاکردنن لەوەی بۆ سارێژکردن و دادسەندن و دروستکردن . بە تایبەتی لەم کاتەدا کە پرسی ئەنفالکردنی رۆژاوا مەترسییەکی راستەقینەی رۆژانەیەو دەبوو هەموو چەقبەندیی و جەختی سیاسیی لە سەر رۆژاواو یارمەتی پەنابەرەکان و پشتیوانی رۆلەکانی ئەوێ بووبایە وەک مەزنە کارێکی فریاگوزاریی نەتەوەیی بە پەلەو هەرە لە پێش و هەرە پێویست. دەبوو هەموو کاندیدەکان رکابەرایەتییان لە سەردانی پەنابەرەکان و دواندنیان و بیستنی راستییەکان لە زمانی ئەوانەوە، بکردا یە، بەلام دیسان چەواشەیی، خیانەت، ساختەیی.

بێگومان خیانەتی31 ی ئاب جیاو بەدەر نییە لە زنجیرەی پرۆسەیەکی مێژوویی نازانستیی نا دیمۆکراتی نایاسایی و نا- دادوەریی کە پرۆسەی دەستپێکردن و ئیدارەکردنی ئەوەی پێی دەوترێ شۆڕشەکانی کوردە.

وەک سەرکردایەتییەکی بەربەری جاهیل و نابەرپرس کە بە فەرمان و پلان و یاریدەی داگیرکەران، ئەم نا ئەو، یان ئەم دژی ئەو، شۆرشی کردووەو جوولاوەتەوەو رۆلەکانی خۆی کردۆتە قۆچی قوربانی و خاکی خۆی بۆ داگیرکەران کردۆتە مەیدانی بۆردومان و رەشبکوژیی و ئاشبەتاڵ و ئەنفال، هەموو هەنگاوێک هەر جەهالەت و خیانەت و کارەسات بووە: هەر لە چۆنێتی دەستپێکی یاخیبوونی چەکداریی 61، جاشبون و دروستکردنی جاشایەتی و دوژمنایەتی خێڵایەتی بە ناهەق، جاشایەتی رەسمی 66، نۆکەرایەتی بۆ شای ئێران و فرۆشتنی خوینی شۆرشگێرانی کوردستانی رۆژهەلات، جاشایەتی بۆ شاو خومەینی، نۆکەرایەتی و خۆفرۆشتن بە بەعسی سوریا، کارەساتی هەکاری، کارەساتی پشتئاشان، کارەساتی ئەنفال و جێنۆساید، کارەساتی ماچی سەددام و دزین و داگیرکردنی راپەرین، کارەساتی ژێرپیدانی پەرلەمان و شەری فەرهودو تالان و پەرۆو پیلان، کارەساتی شەری ناوخۆیی و ئابڵوقەی ئابووریی، کارەساتی 31 ی ئاب، کارەساتی گەندەلی و داگیرکاریی خاک و سامان و دابەشکردنی خاک و نەتەوە، کارەساتی جاشایەتی بۆ تورکیاو کوشتنی شۆڕشگێرانی باکوور، و ئێستاش کارەساتی خیانەتی نەتەوەیی لە کوردستانی رۆژاواو بوون بە داردەستی ئەردۆگان و دوژمنە سەرسەختە عەقیدەیی و مێژووییەکانی کورد.

ئەمانە هەموو یەک پرۆسەو چەند پاکیجن و پێویستییان بەوە هەیە وەک نەتەوە بتوانین بە دروستی لە رێگای زانست و ئەکادیمیاو یاساوە و بە پێی هاورایی یەکی نەتەوەیی کە مەبەستی دادپەوەریی و بنەبرکردنی خیانەت ودەرسوەرگرتن و چارەسەریی و سارێژیی و بنیاتنان ویەکخستن و سەرخستنی نەتەوەیی بێت، ئەو پرۆسەیە پێداچوونەوەو بژار بکەین و سەرەتایەکی تازەو لاپەرەیەکی نوێ بکەینەوە کە دایەلۆگ و دادپەروەریی و ئازادی بیروارو دیمۆکراسی جێگەی تەقینەوە ئینتیهازییی و کورتنەفەس و مونافیقەکانی هاروژاندنەوەی ئەو رووداوانە بۆ بەردەوامکردنیان نەک بنەبڕکردنیان، بگرێتەوە لەگەڵ خوداو خەلک و خۆمان راستگۆ بین و هیچی تر ئەم گەلە بێکەس و بریندارە بۆ بەرژەوەندی تەسک و خیانەتکارانە بەکار نەیەت.

لە کاتی خۆپیشانادانەکانی شوبات- مایس ی 2011دا، پرۆژەیەکی زانستی فراوان و وردم بۆ چارەسەری تەواوی کێشەکانی کوردستان و دامەزرنادنی سیستمێکی دەستووریی دیمۆکراتیی دادپەروەریی پێشکەشی دەسەلات و حیزبەکان کرد کە هیچ وەلامێکی دروست نەکر د.

گەرچی زۆر جار دەوترێ رۆشنبیران یان نووسەران بەس رەخنەی رووخێنەر دەگرن و نەخشەی چارەسەریی و پلانی دروستکەرانەیان نییە، بە باوەری من تەواوی پرۆژەکە دروستکەرانە یە، کەجی تەنانەت لە میدیای ئەهلیی و دەرەوەشدا فرامۆش کرا بە بێ ئەوەی لە لایەکی ترەوە پرۆژەی لەم چەشنەو بەدیل هەبێت.

ئێستا بە بۆنەی ئەو هەروا هوریایەی دیسان دەربارەی 31ی ئاب و زۆر کێشەی تری کارەسات و ناکۆکی مێژوویی دروست بووە، ئەو بەشەی پرۆژەکە کە تایبەتە بە پرسی داپەروەریی پرۆسەیی، واتە مێژوویی لە رابردووەوە، لە 1961 ەوە تا ئێستا، بلاو دەکەمەوە و هیوادارم ئەم جارە ببێتە بابەتێک بۆ لێدوان و دایەلۆگ و دروستکردن و داپەروەریی.

ئەو گەلەی نەتوانێت راستییەکانی مێژووی خۆی بخوێنێتەوە هەرگیز تامی ئازادیی و داپەروەریی ناچێژێت.

 بۆ خوێندنەوەی تەواوی بابەتەکە  کلیک بکەرە سەر … تاوان و داد.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت