ڕۆژنامەنوسێک جەستەی دەبەخشێت ..
بەڕێزان /
سەرۆكی هەرێمی كوردستان
سەرۆكی پەرلەمانی كوردستان
وەزیری تەندروستی هەرێمی كوردستان
وەزیری خوێندنی باڵای هەرێمی كوردستان
هەموو مرۆڤێك لە هەر شوێنێكی دنیا
بابەت / بەخشینی جەستە
سڵاوی مرۆڤ و ژیان
(یوسف خەلیل) م ناوە ، دانیشتووی شاری سلێمانیم ،وەك نووسەر و رۆژنامەنووس كارم كردووە و تواناكانی خۆمم بەخشیووە ، دەمەوێ لە ڕێی بەڕێزتانەوە ئەم پڕۆژەیەشم ڕابگەیەنم و هەنگاوێكی مرۆڤانە و ژیان دۆستانە بنێم و سەر لە نوێ خۆشەویستی و وەفا لە نێو كۆمەڵگاكەمدا نوێ بكەمەوە .. بە بەخشینی ئەندامانی جەستەم لە پاش مردنم :
• بە و مرۆڤانەی كە پێویستیان بە ئەندامانی جەستەم هەیە .
• بە و خوێندكار و قوتابیانەی سوود لە ئەندامانی جەستەم وەردەگرن بۆ تەواو كردنی توێژینەوەكانیان ..
بەم كارەشم دەمەوێ گیانێكی دیكە ببەخشم بە كەسێك پێویستی بە ئەندامانی جەستەی من هەیە .. چونكە ڕابردوو رۆشت ! سبەینێش دەتوانین ببین بە ڕووناكی بۆی ! بەڵام ئێستا ئێمە هەین و دەژین و پێویستمان بە یەكدی هەیە ..
*با گیانی لێبوردەیی و وەفا و خۆشەویستی و قوربانی دانمان بۆ یەكدی نوێ كەینەوە !
* با كاتەكانمان بە فیڕۆ نەدەین و لە پڕۆژەی مرۆڤ دۆستانەدا بخەینەكار !
* با بیر لە دژایەتی كردن و شەڕ و لە ناو بردنی یەكدی نەكەینەوە !
*با دەست لەناو دەست ئەمڕۆمان بگۆڕین و لە دوێنێمان نەچێت !
* با خەندەی خۆشەویستی ببەخشین !
* با ئایندەی منداڵانمان پڕ بكەین لە وەفا و مرۆڤ دۆستی !
ئەمەشە وام لێدەكات شانازی بە مرۆڤبوونی خۆمەوە بكەم و بە هەموو مرۆڤایەتی بڵێم بێ پایان خۆشم دەوێن ..
بچوكتان
یوسف خەلیل
كوردستان / سلێمانی
07701981730
