یوسف خەلیل : سەرنج پێش هەنگاو .

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

گەرەكە هەمیشە بپرسین لە خوود .. لە ئاراستە .. لە كاردانەوە .. چی بكەین تا هەنگاو بنێین ؟ بێگومان گەر بمانەوێ‌ بزانین چ دەكەین پێویستمان بە دایالۆگ هەیە تا پێش و پاشی هەنگاو دیاری بكەین ، مرۆ كاتێ‌ بەنێو كەندڕەكانی بیابان و كەنارەكانی بەندەری ژیندا رێدەكات گەلێك باڕێژە و رەهێڵە و شنەی شەماڵ رووبەڕووی دەبنەوە .. چۆن بتوانێ‌ رێبكا و پەنجەی پەشیمانی نەگەزێ‌ ! بۆیە پێش هەنگاونان گەلێك پرسیار لە دایك دەبێت .. پاشان دیدە ئاراستەی بەر لە هەنگاو دەكات .. تا بە شێوەیەكی ئەندازەیی و بێ شكست پێ هەڵبنێ‌ ! بەڵكو لە ئاكامی رێ ڕۆشتنەكەی .. ئارام و ئاسوودە بێنێتە كایە و كورد واتەنی كاڵەك بە ئەژنۆ نەشكێنێ‌ و بە هەڵەدا تێنەپەڕێ‌ ..

واتە پڕۆگرام یاخوود بەرنامە پڕۆسەیەكی گرنگە بۆ بنیاتنانی سبەینێكی پڕ لە خۆر ! تا بەڵكو ( تاك و گروپ و كۆمەڵ ) سوودمەند بن لە كاردانەوەكانی ، ئەمەش بێ بیركردنەوە بە نێو هزری پڕ لە ناخ و دیالۆگی بەردەوامی تاكەكان لە هەموو روویەكەوە دێتە دی ..

بێگومان لەگەڵ داڕشتن و لە دایك بوونی بەرنامەدا فاكتەرێكی گرنگ چاو هەڵدێنێ‌ .. ئەویش پەیوەست بوون و پەیڕەوكردنن .. كە دەبنە تەواوكەری پڕۆژەكانی بەرنامە .. كە گرنگە مرۆڤ پەیوەست بێ بە شەونمەكانیەوە و قوربانی بدا لە پێنا و رێ هەڵەنەكردن و جێنەمان لە دوورگەی نەهات و نەماندا ..

بەرنامە تەنها بۆ بوارێك لە بوارەكانی ژییان .. هزری گیرۆدەی بیركردنەوە نەكردووە ، بەڵكو هەموو كون و كەلەبەرەكانی ژییانی لە ناخی مرۆڤدا لە ئامێز ناوە ، واتە گرنگە بۆ هەموو كردەوەیەك كە بمانەوێ‌ پێی هەڵسین هەمیشە دەبێت بڵێین ( چی بكەین دەگەین بەچی ) گرنگە ئێستا ئەو كارە ئەنجام بدەین یاخوود فەرامۆشی كەین بۆ كاتێكە دیكە ، بەمەش دەتوانین بەهەڵەدا نەچین .. ئەمێستا ئێمە لێرە لەم هەرێمە نەوجەوانەدا رێدەكەیین ، راستە ئێمە هەمیشە ماوەمان نەبووە بۆ داڕشتنی بەرنامەیەكی پووختە بۆ جێبەجێكردنی ئەركەكانمان ..

واتە دەبێت لەمەودوواوە رێنەدرێت هیچ پڕۆژەیەك بێ داڕشتنی بەرنامە ئەنجام بدرێت ، چونكە ئاكامە شكستەكانی تەنها كۆمەڵانی خەڵك و چینی ژێر دەستە دەبنە قوربانی ، بۆیە گرنگە لە پێناو بەرژەوەندی گشتی و ئایندەیەكی روون بۆ ئادەمیزاد و سەركەوتنی پڕۆژە ئابووری و رامیاری و خزمەت گوزارییەكاندا .. زیاتر كۆشش و ماندووببین و دایالۆگی هەمیشەییمان بەردەوام بێت ، بەمەش دەتوانین ئایندە رۆشنتر و جوانتر بێنینە بەر دیدەی لاوانمان .. تا ئاشناببین بە خەونە جوانەكانی بنیاتنان ..

 

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت