Barzani-Farm

شەماڵ عادل سەلیم :: مەزرەعەی هەندێ لەمەسئولە دزەکانی هەرێمی بەتەمای خوا ؟

سمبولی تۆڕەکۆمەڵایەتیەکان کلیک بکەو، ئەم بابەتە بنێرە بۆسەر بەشی خۆت یان هاوڕێکانت

ماوەیەکە هەندێک لە مەسئولە دەست رۆیشتوەکانی هەردوو حزبی باڵادەستی هەرێمی بەتەمای خوا خەریکن ئەودەڤەرەی ئێمە وەک میراتی باوکیان بەش بەشی دەکەن و بەکەیفی خۆیان خانوو شوقەو ڤێلاو هوتێل باڵەخانەو مەزرەعەی لێ دروست دەکەن و خۆیان و ماڵ ومناڵیان های لایڤ دەژین بێ ئەوەی کەس بتوانی دەم بکاتەوەو پێیان بڵێ ئەرێ بۆ وادەکەن ، ئێ ئەوان مەسئولن و ئەوڕۆ بەقودرەتی قادر بونەتە سێبەری خوا لەسەر زەوی و کێ دەتوانێ فزە بکاو بڵێ : کلتوری مەزرەعەو دزینی نەوت وپارەوسامانی خەڵکی کوردستان و دابەش کردنی زەوی و ئاسمان و خەفەکردنی دەنگی نارەزایی خەڵک و لەخوێن خەڵتانی خۆپیشاندەران وتیرۆرکردن ودەمانچە دابەشکردن ،تۆخکردنەوەی چەمک و رەهەندەکانی بەدیکتاتۆری بوونە ، ئا رێک وەک ئەوەی سەدام و حزبەکەی لە عیراق پەیرەویان دەکرد ….!!

بەڵێ .. سەدامی دیکتاتۆریش هەر وای دەکرد ، ئا ئەویش زۆر حەزی لە مەزرەعە بوو ، لەوێ پشوی دەداو شەوانی لەتەک جاریەکان بەسەردەبردو هەرلەوێشەوە بەمەستی بریاری رزگارکردنی فەلەستین و شەڕی نگریسی قادسیەی جاڕدا ….!! ئا سەدامیش پارەو سامان و نەوتی و خێراتی وڵاتی بۆخۆی و خانەوادەو دارودەستەو دوڵ وزوڕنا ژەنەکانی سەرف دەکرد وەک ئەوەی ماڵ و ملکی حوسێنی بابی بێت و کەسیش نەیدەتوانی فزە بکات ، ئا سەدامیش رەخنەگرەکانی لە زیندانا توند دەکردوولەناو تیزاب دەیتواندنەوە خانوەکەشی بەسەر خانەوادەکەی دەروخاند و بە مخەریب ناوزەدی دەکردن، سەدامیش بەچەپڵەو هەلهەلەو موبایەعەوهۆراکیشان بوە ئەوسەدامەی کە هەرهەموومان بە مێژوە خوێناویەکەی ئاشناین و باش دەزانین چ دڕندەیەک بوو ، نەک تەنها سەدام و خانەوادەکەی بەڵکو براو خاڵ ومام و گورگەکانی عەشیرەتەکەشی لەناو روباری پارەی دزراوی میللەت مەلەوانیان دەکردو خەلکیش لەبرسانا دەمرد ….ئێ ئەوان مەسئول بوون وەک هەندێ لە دزەکانی دەڤەری ئێمە کە لەسەر خوێن و ماندوبوونی خەلکی هەرێمی کوردستان بوونە خاوەن ڤێلاو سەیارەو تەیارەو ڤیزاوماستەرکارت و ژێرزەمینی تەژی لە دەفتەرە دۆلارو مەزرەعە و سێ – چوار ژن ی بەئاشکراو چەندینی بەدزی …..

ئێ دەبا هەر خەڵکی بەشمەینەتی کوردستان بێ پارە بێ ….! دەبا هەژارانی هەرێمی کوردستان ئەندامی لەشیان بۆ پەیداکردنی بژێوی ژیانیان بفرۆشن ، دەبا کارمەند و پێشمەرگەو مامۆستاو موچەخۆرەکان هەر چاوەڕوانی موچە بن ، دەبا هەر وا کوردستان وێران بێت و ببێتە زبڵدانی کاڵا و کەل و پەل و خواردەمەنی ئێکسپایەری تورکیاو ئێران وچین ، ئێ دەبا هەروا سیستەمی خوێندن، تەندروستی و خزمەتگوزارییەكانی دیكەش وێران و کاوڵ وتەپێندراو بێت ، ئێ دەبا هەروا کەس و کاری شەهیدوئەنفالکراوەکان لەبری قەرەبووکردنەوەیان لەناو کەلاوەکانیان نوزەنوزیان بێت ولەقوروچڵپاوی رۆژگاری رەشیان ون بن ….!، دەبا هەر حکومەت پێکنەیەت و پەرلەمانیش هەروا بێ ئیش وکاربێت ، با قەبرستانەکان و گلکۆی ئازیزانمان لەناو جەرگەی شارەکان لەگەڵ زەوی تەخت بکرێت و لەشوێنیان باڵەخانەی زەبەلاح لەسەر ئێسکوپروسکی ئازیزانمان بەهەنجەتی (ماستەرپلانی سەقەت ) بەرزبکرێتەوەو مەسئولە پۆشتەکان پۆزلێبدەن و سیمای راستەقینەی شارەکان بگۆڕن ….!!

کێ بەکێیە .. با ئەودەڤەرە هەر وا بێ ساحێب بێ ….!!

دەبا هەروابێت …..؟!

گرنگ مەسئولەکان و خانەوادەو دارودەستەو دەڵاڵەکانیان تێرو پڕوجوان و پۆشتە وپەرداخ بن ، ئا ئەوان گرنگن ، ئەی ئەوان نەبن کێ دەتوانی لاسایی سەدام بکاتەوە ، بەڵێ جاران سەدامێک مان بوو ئیستا بەدەیان سەدام لەمەیدانن ، چینی هەژارو کرێکارو بێدەرامەتەکانیش ئەوانەی نانیان نییە با ( کێک و پسکیت ) بخۆن و شوکری خوا بکەن و هەستنەوەسەرپێ ….. !!

بەڵێ هیچ دیکتاتۆرێک لەپڕ نابێتە دیکتاتۆرتاوەکو دڵنیا نەبێت لە کەمژەیی گەلەکەی ، رێک وەک ئەوانەی ئێمە …. بەڵام وەک پێشینان فەرموویانە ، کەجام پڕبوو لێ ی دەرژێ ، ئەوکاتیش پەشیمانی دادی کەس نادا و سەدام ئاسا لەناو ژێرزەمین و کونی مەزرەعەکانیان وەک مشکی تۆپیو رادەکێشرنە بەردەم دادگای گەل ولەسەرکاروکردەوە پۆخلەوەکانیان دادگایی دەکرێن …..

بەڵێ … بەڵێ رێک وەک سەدام و دارودەستە قێزەوەنەکەی درەنگ یا زوو دەخرێنە زبڵدانی مێژوەوە ……!!