Ibadi

ئارام قزلەریی : کەچەڵ حەسەن .. حەسەن کەچەڵ .

چەندساڵێک  لەمەوبەر بە هەمان ناونیشان وتارێکم نوسی . مەبەست لەو وتارە ئەوەبو جگە لە گۆڕینی دەموچاوەکان ، هیچ جیوازیەک نیە لە نێوان صەدام و جەعفەری و عەلاوی و هەموو ئەو دەسەڵاتدارە عەرەبانەی دەبنە سەرۆک وەزیران یان دەبنە وەزیر لەناو حکومەتی بەناو فیدڕاڵی عێراقدا .

لە دوای ڕوخانی ڕژێمی بەعسەوە لەلایەن ئەمەریکاو هاوپەیمانیەکانی ، حکومەتی عیراق بە دەورگێڕانی کورد وەک هێزێکی سەرەکی سەرلەنوێ دامەزرایەوە . ئیتر لەو ڕۆژەوە تا ئەمڕۆ کورد لەگەڵ دەموچاوە نوێکانی حکومڕانی دوای سەدام لەمشتومڕدایە بۆ وەدەستهێنانی ماف . ئەوەی حکومڕانەکانی عێراقی نوێی لە وانی پێشتر جیادەکتەوە چەند فاکتەرێکە .

1 / گەورەیی ناکۆکییەکانی ناو ماڵی شیعە .

2 / ناڕێکی ماڵی سونە .

3 / ناڕێکی کۆی پێکهاتەکانی عێراق .

4 / هەڵوەشاندنەوەی هێزە سەربازی و ئەمنییەکان .

5 / نەبوونی زەمینەیەکی بەهێز بۆ دروستکردنی کارەکتەرێکی هاوشێوەی صەدام .

گەڕانەوە  بۆڕابردوو نەبینینی  جیاوازییەکانە  لەگەڵ ئەمڕۆ ، کلتورێک  درێژ بۆتەوە بۆ ئەمڕۆ ، شمشێرەکان هەمان شمشێرن ، بەدەست هەمان هۆزی داگیرکارو پەلهاوێژ لە نیوە دورگەی عەرەبییەوە تا ئەمرۆ چۆن بیردەکاتەوە و چۆن هەوڵیان داوە کۆنتڕۆڵی بیرو رەفتار و زەویی گەلانی تر بکەن ، ئەمڕۆ بەهەمان شێوە هیچ گۆڕانکاری بەسەردا نەهاتوە جگە لە گۆڕینی دەموچاوەکان .

تاکی کورد بێزار بووە لەبەڵێنە بێ بنەماکان ، عێراق پێکهاتەیەکە لەبنەمادا لەسەر خواستی گشتی دانەڕێژراوە ، کورد پێهاتەیەکی ئەو سێکوچکە نەخوازراوەیە لەژێر ڕەشماڵی بەناو عێراقدا بەزۆر خزاوەتە گۆشەیەکییەوە ، گەر گۆرانکاریی بەهێزەکانی ناوچەکە نەبووایە ، کورد لەهەمان گۆشەدا دەمایەوە لەدوورەوە دەبوایە بیڕوانیایە پێگەی بەغداد و بڕیارەکانی بەغدادیش تەنها لەسەر خاکداگیرکردن و جینۆسایدکردن و کۆتایی هاتنی دەبوو . لەو ماوەدا کۆمەڵێک بڕیار و ڕێکەوتنی ژێر بەژێر پڕ لەپیلان  ، هیچ کارێکی باش چاوەڕوانی لەدەسەڵاتە یەکبەیەکەکانی عێراق بۆ کورد ناکرا ، ئێستاش پاش ئەوەی عێراقی نوێ بنیادنراو ، کورد وەک فاکتەرێکی باش و نیت پاکی لەوەی وەک گەلێکی دوور لە تۆڵەسەندنەوە هاتەوە پێشەوەو خوازیار بوو لە عێراقی نوێدا دەوریی باش و مافی باشی هەبێت ، کەچی هەر ڕۆژەی بەبیانووی  کارێکەوە بە ئاراستەیەک مافی پێشەل دەکرێت ، گەر بڵانسی هێزی سەربازی و سیاسی نەبێت بەهەمان زەمەنی دەسەڵاتەکانی پێستر ڕەفتاری لەگەڵ دەکرێت .

لەوەدەچێت رووخانی سەدام ، وانەو شەرم نەبووبێت بۆ دەسەلاتە نوێکان ، لەماوەی دەسەڵاتە نوێکەدا کۆمەڵیک بەڵێنو گفت درا ، بۆئەوەی کورد وەک هێزێکی دەرکەوتەو هاوبەش لە عێراقدا بەشدار بێت ، بەڵام داڕشتە فێڵاوییەکان بۆ دورخستنەوەو پێشەلکردنی داخوازییەکانی کورد ، سەرۆک وەزیران لەدوای سەرۆک وەزیران تەنها بەڵێنەکان دەبنە مەرەکەبی سەر پەڕەو لە ئەرشیڤی بەڵێندانانی عێراقدا هەڵدەگیردرێن .

 کەواتە بیرکردنەوەکان بەردەوام دەبن و خولیاکان لەبەغداد و لەماڵی پێکهاتە عەرەبییەکەی حاکمدا ، گۆرانکاریی لێ چاوەروان ناکرێت  ، لەلای کورد ئەوەی دڵخۆشکەرەیەو ساڵ لەدوای ساڵ خۆی پێ دەخەڵەتینیت  ، ڕەفتارکردنە لەگەڵ ناو و دەموچاوە نوێکاندا ..

عەبادی بێت یان مالیکی و … هتد ، لەهەر نەرمونیانیەکیاندا بەهۆی گۆڕنکارییە بەهێزەکانی سیاسی و دیبلۆماسی و سەربازیی ماڵی کوردەوەیە ، نەک لەخۆشی خۆیان  …

 

نەفرەت لە فاشست وردو درشتی

دوژمنی کوردن هەموو بەگشتی

جەعفەر مالکی حەیدەر عەلاویی

صدام و عودەی عەلی کیمایی

نیە جیاوازی  لە نێوانیانا

مەگەر لەدەنگ و دەموچاویانا

هەر هەموو مارن بۆ گەردنی کورد

کوردیش بۆ ئەوان خۆی کردوە بە پرد

ئیتر وەختیەتی بە نەعلەتیان کەین

چاک تا خراپیان لە وڵات دەرکەین

 

 

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies