ئەبوبەكر عەلی : كوژراوی پێشمەرگەی ئێمە بەمانا ئیسلامییەكەی شەهیدێكی راستەقینەیە .

وتاریکورد ماڵپەرێکی سەربەخۆ و ئازادە

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئەبوبەكر عەلی ، نوسەر و لێكۆڵەر و ئەندامی سەركردایەتی یەكگرتووی ئیسلامی كوردستان ، لە دیمانەیەکیدا باس لەوە دەکات کە لە کۆمەڵگەی کوردەواریدا هەلومەرجی پێویست بۆ گەشەکردنی نیە . سەلەفیەت داعشێكی بێ چەكە ، مرۆڤ بەسەردەمەكەی خۆی نامۆ دەكات و لەژینگە كۆمەڵایەتیەكەی دایدەبڕێت .
ئەبوبەكر عەلی لە چاوپێکەوتنیدا لەگەڵ سڤیل باس لەوە دەکات کە ” لەكۆمەڵگای ئێمەدا ئەو بارودۆخ و هەلومەرجە لەئارادا نییە ، كە داعش پێویستیەتی بۆ ئەوەی تیایدا گەشە بكات ، بەڵام ئەمە مانای پاڵ لێدانەوە نییە . چونكە ئەگەر 300 كەسیشمان هەبێ كاریگەر بووبن بەفیكری سەلەفی جیهادی توندڕەویی داعش ، دەبێ بەخەسارەی بزانین و حیسابی بۆ بكەین .
لە چاوپێکەوتنەکەیدا ئەبوبەکر عەلی داوای دانانی سنور بۆ سەلەفیەکان دەکات و دەڵێت : ” سنوردانان بۆ بانگەشەی سەلەفی لەهەرێمی كوردساندا ، كە بەبڕوای من سەلەفییەت داعشێكی بێ چەكە ، ئەو فەزا فیكری و رۆحی و سایكلۆژیە دەخولقێنێ كە بۆچوونێكی وەكو سەلەفی جیهادی دواتر تیایدا گەشە بكات و سودی خراپی لێوەربگیرێت . چونكە سەلەفیەت مرۆڤ بەسەردەمەكەی نامۆ دەكات ، لەژینگەی كۆمەڵایەتی و چواردەورەكەیدا دەبێتە مرۆڤێكی نامۆ . كاتێك مرۆڤیش بەم جۆرەی لێبێ ، زۆر ئاسانتر دەكەوێتە ژێركاریگەری گوتاری سەلەفی جیهادی و توندوتیژی وەكو داعش .
لەبارەی ئەوەی کە دەڵێت سەلەفیەكان داعشێكی بێ چەكن ، بەڵام ئەوانیش دەڵێن داعش لەمنداڵدانی ئیخوانەوە دروستبووە ئەو سەرکردەیەی یەکگرتووی ئیسلامی باس لەوە دەکات کە ” داعش ئیخوان بەناموسڵمان و كافر و مورتەد دەزانی ، ئەمە حەقیقەتێكە ، بۆیە تیكەڵكردنی ئەم دوانە بەیەكتر هەڵە و ناتەندروستە ، داعش لەهەناوی قاعیدەوە هەڵقولاوە ، شكستی دەوڵەتە لەعێراق و سوریا ، هەروەها بەرهەمی تیكشكانی سونەیە لەعێراق و ئەو شەڕە تایفییە كە لەناوچەكەدا بوونی هەیە ، لەگەڵ ئەو دۆخە وەحشەتناكەی لەئەنجامی ستەم و زۆڵم و زۆری رژێمە وەحشیگەری بەعس لەسوریا هەیە ، بەڵام لەگەڵ هەموو ئەمانەدا حەقیقەتێك هەیە پێویستە بگوترێت ، ئیخوان لەرووی میژووییەوە ، هەندێك لەحەرەكاتی ئیسلامی تریش ، هەڵگری تێز و دروشمی خەلافەت و دەوڵەتی ئیسلامی و پیادەكردنی شەریعەت بوون ، كە لەئێستادا و لەڕووە سیاسیەكەوە وازیان لەم دروشمانە هێناوە ، بەڵام خەڵكانێكی وەك داعش و سەلەفییەتی توندڕەو بوونەتە میراتگری ئەم دروشمانە .
ئەبوبەکر عەلی دەڵێت : لەچوارچێوەی رەخنەگرتن لەئیسلامییەكان گوتوومە ئیسلامییەكان و رەخنەگری ئیسلامی نابێ تەنیا بڵێ ئەو خەلافەتەی داعش ئیعلانی كردووە ، خەلافەتی ئیسلامی نییە و مەرجەكانی خەلافەتی راستەقینەی تییدا نییە ، بەڵكو پێویستە بڵێین خەلافەت ئەزمونێكی مێژوویی حوكمرانییەتی موسڵمانانە لەمیژوودا و هیچ ئیلزامێكی دینی بۆ ئێمە تییدا نییە ، مێژوو ئەو فۆرمەی لەحوكمڕانی تێپەراندووە ، هەروەها پێویستە بڵێین دەوڵەتی ئیسلامی هیچ شەرعییەتێكی ئیسلامی نییە و وەك چەمك و داواكاری و دروشمێك لەسەدەی بیستەمدا دەركەوتووە ، زادەی ململانێی ئایدۆلۆژی و سیاسییەكانی ئەو قۆناغە مێژووییەیە ، لەو شوێنانەشدا كە ئەم تێزەی تێدا پیادەكرا ، نەتوانرا نموونەیەكی سیاسی جیاوازی وا پێشكەش بكرێت ، كە گەلە موسڵمانەكانی سایەی هەست بەئازادی و كەرامەتی خۆیان بكەن و سەرنجی گەلانی تری موسڵمان و جیهانیش بەلای خۆیاندا رابكێشن ، چونكە دەوڵەتی ئیسلامی بەو جۆرەی لەئەدەبیاتی ئیسلامی سەدەی رابردوودا خراوەتەڕوو ، لەگەڵ بنەماكانی دیموكراسی و مافەكانی مرۆڤ و هاوڵاتی ناكۆكە .
هەر لەو چاوپێکەوتنەیدا ناوبراو تیشک دەخاتە سەرئەوەی ” لەئێستادا جارێكی دیكە خەریكە ئیسلام دەبێتەوەوە بەرەهەندێكی ناسنامەی ناسیونالیزمی كوردی و پاڵنەرێكی بەهێز بۆ ئەم هێزە ، لەم چوارچێوەشدا پێشمەرگەی ئێمە بەمانا ئیسلامییەكەش شەهیدێكی راستەقینەیە . بەڵام بۆ خاوەن ئاینەكانی دیكە لەرووی ئاینیەوە ناكرێت ئێمە حوكمی ئاینی بۆ ئەوان دەربكەین ، لەبەرئەوەی پرسەكە پرسێكی دیینیە ، پێویستە مەرجەعە دینییەكانی خۆیان لەو بارەوە قسە بكەن و ئێمە تەنیا دەتوانین لەڕووە نیشتمانییەكەوە پێناسەی ئەوان بكەین ، وەك موسڵمان ناتوانێن لەجیاتی مەرجەعە دینینەكانی ئەوان قسە بكەین .
ئەبوبەکر عەلی باس لە بەشداری کورد لە شەڕی موسڵ دەکات و چەند خاڵێک دەخاتەڕوو :
1 – هێزی پێشمەرگەی كوردستان كاری سەرەكی رزگاركردنی ناوچە كوردستانییەكان ئەو ناوچانە بێت كە كوردیان تێیدایە.
2 – پێویستە شەڕێك نەكەین بەخراپە سودی لێوەربگیرێت بۆ تێوەگلان لەشەری نەتەوایەتی و مەزهەبی نەخوازراو .
3 – پێویستە ئاگاداری تواناكانی پێشمەرگە ببین و قوربانییەكی زۆر نەدەین ، چونكە لەبنەڕەتدا ئەو شەڕە شەڕی خەڵكی دیكەیە و دەكرێت ئێمە یارمەتیدەر بین .
4 – هێزی پێشمەرگەی كوردستان بەشداری پێبكرێت ، بەڵام وەك هێزی پیشتیوانی ، چونكە بوونی پێشمەرگە لەبەرەكانی پێشەوەی شەڕ بۆ هێزی پێشمەرگەی كوردستان قورس دەبێت . بەشێوەیەكی گشتیش تێڕوانیینەكانی سەرۆكایەتی هەرێم و وەزارەتی پێشمەرگەم لەمڕوەوە پێ تەندروستە ، كە داوادەكەن پێویستە لەو چوارچێوەیەدا كورد بەشداری شەڕەكە بكات ، بۆ ئەوەی بەكەمترین قوربانی و زۆرترین دەستكەوتەوە دەربچین.
بۆ دوای کۆتایی هاتنی داعشیش ئەبوبەکر عەلی دەڵێت : من نازانم ، بەڵام پێویستە سەركردایەتی كورد بەرنامەڕێژی هەبێت ، هەندێك شتی گشتی راگەیاندراوە ، بۆ نمونە ئەو سنورانەی بەخوێن كێشراون پێویست ناكات جارێكی دیكە گفتوگۆی سەرەتاییان لەبارەوە بكرێت ، هەروەها گرنگە مەسەلەی ناوچە كوردستانییەكان دوای داعش بەهیچ شێوەیەك لەیاد نەكرێت ، بۆ كات و گەمە و مانۆری سیاسی لەعێراقدا بەجێنەهێڵین ، ریفراندۆم لەو ناوچانە ئەنجام بدەین. ئەگەر لێوەشاوەیەكی سیاسیی باشمان بۆ دوای داعش نەبێت ، ناتوانین وەبەرهێنانی سیاسی گەورەی تێدا بكەین ، بۆیە پێویستە ستراتیژییەكی نەتەوەیی روونمان هەبێت . لە كۆتاییشدا پێویستە لەبیرمان نەچێت ، شەڕی داعش بكەینە شەڕی زەمینەسازكردن بۆ سەربەخۆیی كوردستان . بۆ ئەمەش پێویستە مەسەلەی چارەنووسی ناوچە كوردستانییەكان یەكلابكەینەوە ، ئیدارەی ململانییەكانیش لەعێراق بەشێوەیەك بكەین ، بچێتە خزمەت ماڵئاوایی دوایی لەم قەوارە دۆزەخییە بێكەڵكەی لەماوەی یەك سەدەی رەبەقدا بۆ ئێمە بوو بەسەرچاوەی جینۆساید و جۆرەها مەینەتی .

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت