نەبەز گۆران : سمتەكەی كیم كارداشیان و ماڵپەرە كوردییەكان .

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

 كاتێك لە خەو هەڵدەستیت ، دەتەوێت تەماشایەكی ماڵپەرە كوردییەكان بكەیت ، تا بزانیت لە ناوخۆی كوردستان چ باسە . كە دەكەویتە گەڕان ، تووشی شۆك دەبیت ، لەبری زانیاری سیاسی و هونەری و كلتوری ، زانیاری جەستەی ژنانی دونیای دەرەوە بەشێكی زۆری ماڵپەرەكانی داگیركردووە !
دوو تایپی ماڵپەر دروست بوون ، تایپێكیان سێبەری حیزبن و باكیان بە كاری میدیایی نیە ، لەبەر خاتری لایكێك چیان دەستبكەوێت لەم دونیایەدا ، بڵاوی دەكەنەوە بەبێ‌ ئەوەی ، زەڕەیەك باكیان بە كۆمەڵگەبێت . ئەم تایپە سێبەرە ، بە بێ‌ ئاگا ئەو كارانە ناكەن ، زۆر بە ئاگاییەوە دەیكەن و لەگەڵ ناشیرینكردنی ئەركی رۆژنامەنووسیدا ، دەیانەوێت دەستبخەنە ناو بنەما كۆمەڵایەتیەكان و بەناوی ئازادییەوە ، نەوەیەك بەرهەم بهێنن ، مێشكی خاڵی بێت لە زانیاری و مێشكی پڕبێت ، لە ناسینی لەنجەو لار و ئەندامانی جەستەی ئەكتەرە سینەمایی و هونەرمەندە بیانییەكان .
هەر كەسێك خوێنەری ماڵپەرە كوردییەكان بێت ، دەزانێت بۆ نمونە :
( كیم كارداشیان ) شەو لە كۆی دەخەوێت ! پێڵاوە تازەكانی چۆنن ! سوراوەكەی بایی چەندە ! ئەمانە و دەیان زانیاری بێ‌ كەڵكی لەم جۆرە ، وەك ژەهر دەرخواردی نەوەیەك دەدرێت.
رۆژانە چەندین كتێبی نایان دەنووسرێت ، چەندین كتێبی نایاب وەردەگێردرێت . چەندین لێكۆڵینەوە دەكرێت ، لەیەك لەو ماڵپەرە كوردیانە نابینیت گۆشەیەك ، هەواڵێكیان هەبێت لە سەرئەمە. چونكە دەزانن ئەمە زانیاری و رۆشنبیری و هوشیارییە ، كاری تێدا ناكەن . لێ‌ لەبەرامبەر ئەمەدا ، بۆ دروستكردنی نەوەیەكی خاڵی لە هوشیاری ، هەواڵی بێكەڵك و زانیاری بێ‌ كەڵك لەسەر جەستەی خانمان بڵاو دەكەنەوە و خۆیان لە ماڵپەری كۆمەڵایەتیەوە كردوەتە ، ماڵپەری سێكسی ! ئەگەر بەرپرسانی ئەو ماڵپەرانە گرێی جەستەی ژنیان هەیە ، با سەر لە پزیشك بدەن ، ئەگەر پێیان وابێت ئەمە كاری میدیاییە ، راست نیە و ئەمە بێحورمەتیكردنە بە كاری میدییایی . میدیایەك ئەم كارانە دەكات ، لەناو میدیای راستەقینەدا جێگای نابێتەوە و بە میدیای رەنگ زەرد دەناسرێت .
مۆدێلی ئەم جۆرە هەواڵانە ، یەكەمجار لە میدیا بێ‌ سەرو بەرەكانی عەرەبەوە گوازرایەوە بۆ میدیای كوردی . میدیایی كوردیش سێبەرەكانیان كە سەر بەحیزبن دەستیانكرد بە پەخشكردنی ئەم هەواڵانە . پاشان چەند میدیایەكی كە ، بۆ سەرنج راكێشانی خوێنەری لاوی كاتی ، بەردەوامیان پێدا . لە ئێستادا هەواڵی وا بڵاو دەكەنەوە ، مرۆڤ شەرم لە خۆیدەكات ، میدیا گەیشتبێتە ئەو ئاستە نزمە ، لە پەیامە راستەقینەكەی خۆیەوە كە ( هوشیاری ، پەروەردە ، كلتور ) بووبێتە میدیای گەران بە شوێن لەش و لاری ژناندا.
دەبێت بۆ خوێنەری كورد چ سودی هەبێت ، ئەكتەرێك یان هونەرمەندێك، كراسی تازەی كڕیوە ؟ چ میدیایەكە هێندە بێ‌ ئیشە لەم خەمە گەورانە ، پەنا دەباتە بەر بێ‌ مانایی ؟
وەك وتم، دوو تایپن ، تایپە سێبەرەكە بە مەبەست دەیكات ، تایپەكەی دیكەش ، بۆ لایك دەیكات و بە نیازە لە رێگای ئەم جۆرە هەواڵانەوە ، خۆی دەرخات !
نە دەبوو رۆژنامەنووسان ، چیتر لەوە زیاتر قبوڵ بكەن ، كۆمەڵێك نەخوێندەواری گەورەی گەلەكەمان ، بە ناوی رۆژنامەنووسیەوە بێن ، شكۆی میدیا بشكێنن . وەك نمونە : كاتێك سەرنجی ماڵپەری ( بی ، بی ، سی ) دەدەیت ، لە سەرەوە تا خوارەوە ، پرە لە زانیاری پەروەردەیی ، سیاسی ، كلتوری ، هونەری و دێیت سەرنج لە ماڵپەرێكی كوردی دەدەیت ، دەبینیت پڕە لە زانیاری لەسەر لەش و لاری خانمان و جێ‌ خەوتنیان ، ئیدی كە ئەمە دەبینی لەبەر خۆوە دەڵێیت : بابە ، ئەم جیهانە بچوكە چیە ، میدیای كوردی تێیكەوتووە . ئەم بێ‌ خاوەنیە چیە رووی لەم میدیایە كردوە . كە پێتانناكرێت ئەركەكەی خۆتان وەك خۆی بەرێوە ببەن ، بۆچی هەڵدەستن بە وێرانكردنی شوێنێك كە شوێنی ئێوە نیە . ئەی ئەو سەرنووسەرانەی ، ماڵپەرەكانتان بوەتە شوێنی پەخشكردنی بێ‌ مانایی ؟ گوناه نیە ئێوە سەرنووسەربن و ئەم بێ‌ مانایە دەرخواردی خەڵك بدەن ؟ خۆتان وەڵام بدەنەوە …

س – فەیسبوکی نوسەر

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت