ڕێبین هه‌ردی : کوردبون لەدوای ١٢ی ئۆکتۆبەرەوە .

وتاریکورد ماڵپەرێکی سەربەخۆ و ئازادە

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئەوەی لە١٢ ئۆکتۆبەردا رویدا کارێکی ئاسایی‌و تەنها پێشێلکاریەکی سادە نیە ، تەنهاش بەشێک نیە لەدەرئەنجامی گرژی‌و ئاڵۆزیەک کە لەنێوان هێزە سیاسیەکاندا هەیە ، بەرکەوتەی تەنگژەیەکی کاتی‌و راگوزەریش نیە کە بتوانرێت بەتێپەڕینی کات چارەسەر بکرێت .
ئەوەی رویدا پێویستی بەگۆڕینی بیرکردنەوەو شێوازی روانینمان هەیە . هەڵەیەو راست نیە بتوانین بەهەمان دیدو هەمان شێوازی بیرکردنەوەی پێش١٢ ئوکتۆبەرەوە ، بیر لەروداو و پێشهاتەکان بکەینەوە . ئەم روداوە دابڕاوەو لەسیاقی مێژوی روداوەکانی کوردستاندا جێگەی نابێتەوە . چونکە روداوێکە گەرچی بکەرەکانی ئەیانەوێت پێشەکی‌و هۆکاری بۆ بدۆزنەوە ، بەڵام راستیەکەی ئەوەیە بێ هیچ هۆکارێکی لۆژیکیە بۆ ئەوەی روبدات .
بەبڕوای من تەنانەت٣١ی ئابیش لەئاستی ئەم روداوەدا نیە . چونکە ٣١ی ئاب بەهەمو ئەو مانایانەی خیانەت کە ڕووداوەکەی پێ وەسفکران ، بەڵام بەشێکی دانەبڕاو نەبون لەو ڕووداوانەی ڕووئەدەن . ٣١ی ئاب لەدۆخی شەڕو جەمسەرگیری‌و مێژویەک لەخوێن‌و کوشتاردا ڕوویدا . لەسیاقێکدا ڕوویدا سەنگەرەکان دژ بەیەک راوەستابون‌و لەشەڕێکی خوێناویدا بون لەگەڵ یەک . هەر بۆیەش ئەوکات‌و ئێستاش پێم وابوو ئەگەر بیر لەژیانێکی ترو دەستپێکێکی تر ئەکەینەوە ، ئەبێت لەم خیانەتە ببورین . ئەوساش‌و ئیستاش پێموابو سوربون لەسەر چەمکی خیانەتی ٣١ی ئاب‌و بازنەدان بەسەریدا کوردستان ئەخاتە گێژاوێکی بەردەوامی شەڕی ناوخۆوە کە بێ هیچ گومانێک براوەو دۆڕاوی تێدانیەو تەنهاو تەنها ئەبێتە هۆی درێژەدانی مەینەتیەکانی خەڵکی رەشوڕووتی کوردستان کە بونەتە سوتەمەنی راستەقینەی ئەو شەڕە .
بەڵام ئەوەی لە١٢ی ئۆکتۆبەردا ڕوویدا درێژەپیدانی هیچ ڕووداوێک‌و هیچ شەڕێک نیە کە ئامادە بێت ، هەمو ئەو پاساوە درۆزنانەی بۆ هۆکاری روداوەکە ئەهێنرێتەوە ، تەنها بەکەڵکی راگەیاندنی حیزبی دێن . خۆپیشاندان‌و سوتاندنی بارەگاو کوشتنی خەڵک ، جێگەی راستەقینەی شکات‌و لێکۆڵینەوەو دادگایە ، نەک ئەوەی لە١٢ی ئۆکتۆبەردا ڕوویدا . ئەوەی ئەو رۆژە ڕوویدا بەرهەمی ڕووداوەکانی پێشوی نیە ، بەڵکو بەرهەمی بڕیارێکی پێشوەختە کە هەڵگری چەندان پەیام‌و بێ نرخکردنی چەندان بەهای سەرەکیە کە بڕیارە ئەزمونی هەرێمی کوردستانی لەسەر دامەزرا بێت .
پەیامی یەکەمی ئەوەیە پارتی دیموکراتی کوردستان رێزی هیچ زۆرینەیەکی پەرلەمانی ناگرێت‌و هەرکەس یان هیزێک بیەوێت بەچەمکی ئاسایی زۆرینە مامەڵەی لەگەڵ بکات ، مەکتەبی سیاسیەکەی دژی ئەوەستێت‌و قەبوڵی ناکات . پەیامی دووهەمی ئەوەیە هیچ هێزێک لەو ناوچانە قەبوڵناکرێت کە لەژێر دەسەڵاتی ئەم هێزەدایە گەر پارتی وەک برا گەورەو حیزبی قائید قەبوڵ نەبێت‌و سەرۆکە ناشەرعیەکەشی بەشەرعی نەزانێت . هەرکەسیش سوربێت‌و تەنانەت بەرێگەی مەدەنی ئەم باڵادەستیە نەسەلمینێت ، بەهێزی چەکدار رەوانەی ئەودیو دێگەڵە ئەکرێت .
لەدوای١٢ی ئۆکتۆبەرەوە ئیدی ئەم بەهایانەش هیچ نرخێکیان نەما ، لەپێش هەمویانەوە هەڵبژاردن . هەڵبژاردن وەک رێگەیەکی دیموکراسی بۆ گۆڕانکاری هیچ بایەخێکی نەماوە ، پێشتریش بەهۆی بونی ژمارەیەکی زۆری تەزویرەوە نائومێدیەک لەهەڵبژاردن دروست بوبو کە خۆی لەرێژەی کەمی بەشداریکردنی خەڵکدا لەهەڵبژاردندا ئەبینیەوە ، لەدوای ١٢ی ئۆکتۆبەر تەنانەت هەڵبژاردنی پڕ تەزویریش نرخی نەما . دەرکەوت پارتی دیموکراتی کوردستان هەر هیچ نرخێک نە بۆ پەرەلمان وەک دەزگایەکی هەڵبژێراو دائەنێت‌و نە بۆ سەرۆکەکەشی کە بڕیارە یەکێک بێت لەو سێ پۆستە سیادیەی کە لەهەمو ئەزمونێکی سیاسیدا هەن .
یەکێکی تر لەو بەها دیموکراسیانەی چیتر بەهای نەما : خۆپیشاندانە . خۆپیشاندان چیدی ئامێریکی فشاری کۆمەڵگا نیە بەسەر حکومەت‌و دەسەڵاتدارانەوە ، بەڵکو بووە بە بیانویەک بۆ دەستپێکردنی شەڕێکی ناوخۆ یان وەک ١٢ی ئۆکتۆبەر ئاودیوکردنی هێزێک بۆ ئەودیو سنوری دێگەڵە . حیزبە سیاسیە باڵادەستەکانی کوردستان توانایەکی سەیریان هەیە بۆ ئەوەی خۆپیشاندان بگۆڕن بەپێکدادانی دو هێزی سیاسی . ئەمەش وائەکات چیدی خۆپیشاندان ئامرازێکی فشاری کۆمەڵگا نەبێت بەسەر دەسەڵاتەوە ، بەڵکو بووە بە بیانویەک بۆ پەڵپ‌و بیانوگرتن‌و زیانگەیاندنی هیزێکی سیاسی بەرامبەر بەهیزێکی سیاسی دی .
بەڵام لەهەمو ئەمانە ترسناکتر ، دابەشبونی کۆمەڵایەتی‌و کلتوری‌و سیاسی نێوان ئەو دو زۆنەیە کە دێگەلە سنورەکەی پێک ئەهێنێت . ئەوەی لە١٢ی ئۆکتۆبەردا ڕوویدا تەنها ئاماژە بۆ تەنگژەیەکی سیاسی ناکات ، تەنها ئاماژە بۆ تیکچونێکی سیاسی ناکات کە رەنگە دواتر بەدانوستان‌و هێمنبونەوەی دۆخەکە ئاسایی بکرێتەوە . ئەو برین‌و دابڕانەی لەدوای ئەم مێژووە دروست بووە ، رێکەوتنی درۆزنانەی لایەنە سیاسیەکان تێئەپەرێنێت‌و ئەبێتە سەرچاوەی تەنگژەی تر کە خودا ئەزانێت چ کات‌و ساتێکی تر روئەدات .
لەدوای ١٢ی ئۆکتۆبەرەوە هیچ رێکەوتنێکی سیاسی مانای نەماوەو هەمو ئەو رێکەوتنانەشی بەدوایدا دێن جگە لەخۆهەڵخەڵەتاندن‌و درێژەدان بەدرۆیەکی سیاسی کە حکومەتی یەکگرتوی هەرێمی کوردستانە هیچی تر نیە ، چونکە ئاشکرایە ئەم رێکەوتنە هیچ نابێت جگە لەملدان بۆ ویست‌و ئامانجەکانی هێزێکی سیاسی کە کەمینەیە . ملدان‌و تەسلیبونێک کە چەند هیزێکی سیاسی رەنگە ئەنجامی بدەن ، بەڵام ناخوشنودی‌و توڕەیی‌و بێزاریەک لەناو زۆنی دەرەوەی پارتی بەرهەمدێنێت کە پرە لەهەستی غەدرو ناحەزی‌و رق . ناخۆشنودی‌و بێزاریەک کە ئەشێت بەچەک‌و سەرکوتی بەردەوامی دەزگا سەرکوتکەرەکان خەفە بکرێت ، بەڵام هەرگیز لەناو نابرێت .
پێموایە سەرەکیترین‌و دیارترین مانای ١٢ی ئۆکتۆبەر پەردە هەڵماڵینە لەو درۆ سیاسیەی کە ئەڵیت کورد یەک گەل‌و یەک نەتەوەیەو ئەشبێت لەیەک چوارچێوەی سیاسیدا جێگەی بێتەوە . هەرکەس راستگۆیانە مێژوی سیاسی کۆن‌و تازەی کوردستانی خوێندبێتەوە ئەو راستیە بەئاشکرا ئەبینێت کە ئەوەی پێی ئەگوترێت نەتەوەی کورد هەرگیز یەک نەبوەو هەرگیزیش لەیەک چوارچێوەدا کۆنەبۆتەوەو هەرگیزیش لەیەک ریزو سەنگەردا نەبووە . کۆمەڵگایەک نیە هێندەی کۆمەڵگای کوردی پارچەپارچەو ناکۆک بەیەک‌و لەهەندێک ساتەوەختی زۆر هەستیاردا وەک دو دوژمن سەنگەری لەیەک نەگرتبێت . هەستئەکەم ١٢ی ئۆکتۆبەر ناچارمان ئەکات جارێکی دی ، بەشێوازێکی دی بیر لەچەمکی کوردبون وەک ئامرازێکی یەکگرتن‌و پێکەوەبون بکەینەوە . کوردبون تواناکانی خۆی بۆ یەکڕیزکردن‌و لەیەکچون‌و دروستکردنی یەک خەیاڵ‌و یەک ئامانج لەدەستداوە ، ئەمە ئەو راستیەیە کە لەدوای١٢ی ئۆکتۆبەرەوە ئەبێت دانی پیابنێین . هەر چارەسەرێکیش باز بەسەر ئەم راستیەدا بدات ، هیچ ناکات جگە لەدواخستنی بەردەوامی تەنگژەو قەیرانێک کە هەرگیز بەرۆکی ئەم هەرێمە ، بەم سیستەمە سیاسیە پوچەڵە بەرنادات .

سەرچاوە – ئاوێنە

تەنها بەکلیکێک لەسەر شێیر ، ئەم بابەتە بنێرە بۆ هاوڕێکانت لە فەیسبوک و تویتەر

 

 

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت