عیماد عەلی : ئایا کورد دەتوانێت خۆی بە هیچ لایەکدا یەکلانەکاتەوە ؟
بۆ چەندین جارە دەبیستین کە داوادەکرێت کورد خۆی بە هیچ لایەکی ئەو دوو جەمسەرەی لەم ناوچەیە دروست بووە یەکلانەکاتەوە . ئەمەش وەک دوایەکی رەوا و عاتفی و بۆ دوارۆژی کورد قازانجێکی یەکجار گەورەی هەیە . بەڵام بەم وەزعەی کورد و کارەکتەر و سیاسەت و پێکهاتەی سەرکردایەتی و بیرکردنەوە و رەفتار و هاوکێشە ئاڵۆزەکان و ناکۆکیە هەمەحۆرەکانی نێوخۆوە ، ئەم داخوازییە هەستکرۆژە دێتە دیی ، یان داوایەکی دڵسۆزانەی دوور لە واقعی کوردستانە .
جارێک خودی هەرێمی کوردستان بە شێوەیەکی کرداری و ، لە گۆشەنیگای پەیوەندیەکانی لایەنەکان و مامەڵەیان و جموجوڵەکانیان لەسەر ئەرزی واقیع ، بەسەر هەردوو جەمسەرەکەی روسیا و هاوپەیمانەکانی و ئەمریکا و هاوپەیمانەکانی دابەشبون و ، تەنانەت لە چارەسەرکردنی کێشە نێوخۆییەکان و کۆبونەوەکانیشیاندا ، لەسە ئەو ریتمە دەرۆن و لەو ئاوازە دەرناچن . پەیوەندی زۆنی سەوز لەگەڵ بەغدا و بەشەکانی تری کوردستان ، پەیوەندی زۆنی زەرد لەگەڵ تورکیا و بەشەکانی تری کوردستان، مامەڵە و موزایەدەکانی هەردوولا لەسەر پرسە کوردستانیەکان و ئامانجەکانی کورد لەم ئانوساتانەدا ، ئەو راستیەکمان بۆ دەردەخەن .
ئەگەر کورد بەخۆی لە نێو خۆی خۆیدا بەم جۆرە بێت و ، نەتوانێت تەنانەت هەنگاوێک لەیەک نزیک بێتەوە ، لە کاتێکدا کە هەماهەنگی و یەکێتی پێویستیەکی لەرادەبەدەری قازانجبەخشی ئایندەیەکی نزیکمان بێت و ، لە هیچ کاتێکدا ئەوەندە پێویستمان بە یەکگرتوویی و هەماهەنگی و لێکتێگەیشتن و هەنگاو نان لەمەر گۆرانکاریە چاوەروانکراوەکان نەبێت . کەچی بە رۆژی نیوەرۆ دەبینین کە ئاش لە بارێکدایە و ئاشەوان لە خەیاڵێک . بۆیە گەر هەڵوێستی سەرجەم لایەنەکان بخوێنینەوە ، هیچیان لەو پێگەدا نین کە متامنەیان پێ بکرێت ، بتوانن رەوشەکە بە ئاراستەیەکدا ببەن ، پێوێستیە هەنوکەییەکانی ئەم ئانوساتە مەیسەر بکەن و ، سەرەرای ئەم هەموو قوربانیدانە لە دواجاردا دەستمان لە بن هەنبانەکەوە دەرنەچێت . کێشەکە لەوەدایە کە هەر لایەک لە روانگەی پێویستی حزبەکەی و کەسە دەسترۆیشتوەکانی رەفتار دەکات و هیچ بەرژەوەندیەکی گشتی لەبەر چاو ناگرێت و لەو نێوەشدا هیچ خەتێکی سوریان بۆ بۆچون و سیاسەت و رەفتارەکانیان دانەناوە .
تۆیەک کە لە ئێستاوە خۆت بەسەر جەمسەرەکاندا دابەش کردبێت و لایەنگیریت بە زەقی پێوەدیار بێت ، پیش ئەوەی خاڵی یەکلاکەرەوەت لێ دیار بێت ، ئەی چۆن لە کاتی یەکلاکەوتنی هاوکێشەکان چۆن دەتوانێت خۆت بەلایەکدا راست بکەیتەوە کە لەقازانجدا بێت . تۆیەک کە ئێستا هەنگاوەکانت لە قازانج و بە ئاراستەی جەمسەرێک بێت ، چۆن دەتوانین داوات لێبکەین : لە یەکلایی بونت بەسەر دووجەمسەرەکەدا خۆت بپارێزە . بۆیە داواکردن لە سەرکردایەتی کورد لە جێبەجێ کردنی ئامانجێکی ئاوها کە لەئەمرۆوە خۆی یەکلا کردۆتەوە ، داوایەکی خەیاڵی و لەجێی خۆیدا نیە و ، جگە قسە کردنی دوور لە واقع و سیاسەت و ، نەناسینی لایەنە کوردسیەکان هیچی تری نابینم .
ئەوەی دەتوانرێت بکرێت ، ئەگەر سەرکردایەتی کورد تۆزێک لە ئاستی باڵادا بیر لە کورد بکاتەوە ، دەشێت لە باشترین ئەگەردا ، لە هەماهەنگیەکی نهێنی و هاوکاری یەکتردا ، لە دابەشکردنی هەڵوێستەکانیان و ئاراستەی هەنگاوەکان لە نێوان خۆیاندا بۆ مامەڵە کردن لەگەڵ جەمسەرەکان ، رۆڵ دابەش بکەن ، ئەمەش بە حکومەتێکی یەکگرتوو دەکرێت کە نیمانە . ئەم ئاواتەش بە هۆی ناکۆکی و نەبونی هەماهەنگی پێشوەخت لە ئاستی نێوخۆ و بۆ چارەسەرکردنی قەیرانە نێوخۆییەکان ، لە سەر ئاستی ناوچەکەش زۆر جێگەی بروا نیە کە کاری وابکرێت . بۆیە لە باشترین ئەگەردا ئەوەی هەر لایەک لە جەمسەرەکەی وەک ئیستا زیاتر نزیک بێتەوە و ، کام جەمسەر سەرکەوتو بوو لە ململانێکە داشی ئەو لایەنە کوردیە سەردەکەوێت و ، لەوێدا ئەرکەکانی تر دابەش بکرێت . بەڵام لەم حاڵەتەشدا ئەوەمان لەبەرچاو بێت ، کەدوولەت بونی هەرێمی کوردستان زیاتر دەبێت و وەزعەکە چەق دەبەستێت و چارەسەری قەیرانەکانی دوادەکەوێت ، یان دابەشبون کۆتایی تاکە ئەگەری دوا ئەنجام دەبێت . بۆیە ، قەت نە عەقڵ و نەش بیری باش و هەڵسەنگاندنی زانستی رێگە نادەن کە وا بزانین ئەم لایەنانەی کوردستان ئەوەندە خەمی گەل و نیشتمان و بەرژەوەندیەکانیان لە مێشکدایە ، کە تۆزێک لە بەرژەوەندیە تەسکەکانی خۆیان خۆش بن . دەبێت هەر لە ئیستاشەوە بە یەقینی لەو باوەرەدا بین کە کورد دابەشبووە بەسەر جەمسەرەکاندا و لە کاتی یەکلابونەوەی هاوکێشەکان ئەگەر زەرەریش نەکات ، قازانج و زرەرەی لەیەک دەدەرێت و سەری بنمایەکەی دەخوات .
کلیک بکەرە سەر سمبولەکانی خوارەوە ، ئەم بابەتە بنێرە بۆ هاوڕێکانت
