ئەبوبەکر جاف : بۆچی ژیانی مامۆستا كەریم كابان بۆ ئێمە بووە بە كێشە ؟ بۆچی دەمانەوێت نەژی ؟ .

بۆچی دەمانەوێت مامۆستا كەریم كابان بمرێت ؟ هەواڵی مەرگی كەریم كابان بە درۆ بێت یان بە ڕاست ، زۆر بە چڕی بەریەک دەكەون .

ئەوە مەرگی كەریم كابانە یان ژیانی كەریم كابانە ، یان تەمەنی كەریم كابانە بووە بە گرێیەك لای ئێمە ؟
ئێمە كێشەو گرفتمان لە گەڵ ژیانی كەریم كاباندا هەیە یان لە گەڵ مەرگیدا ؟
مەرگ بۆ خۆیی و لە خۆیدا هەڵگری مانایایەك نییە چونكە ئەزموون ناكرێت ، ئەزموونێك نییە بۆ گێڕانەوە ، كەواتە هەرچۆنێك قسەو باس لەسەر مەرگ بكەین ، ژیان بەرهەم دێنینەوە . هەست دەكەم مامۆستا كابان ئەو ژیانە بێ ژیانەیە كە دەبوایە زەمەنێكە مردبا . ئێمە مامۆستا كەریم كابانمان كردووە بە بار بە سەر ژیانەوە . ساڵانێكە مامۆستا زیندووش بوو بەڵام ئێمە ژیانمان لێسەندبووەوە . واتە ناچارمان كردبوو كە ، ئەو لە كاتی بەسەرچوودا دەژی .
دەبوایە بمردبایە ، ئێمە سەدان جار بەر ئەو دیدگایە دەكەوین كە مامۆستا كەریم كابان بە كەڵكی ژیان نەماوە . بێكەڵكی مامۆستاش لە ئاوابوونی دەنگ و دووبارەبوونەوەیدایە ؟، یاخود لەو تەمەنەیدا كە زیاتر لەهەر كەسێك لە نەوەی خۆی ژیانی درێژكراوەتەوە ؟ یان مامۆستا نوێنەرایەتی نەوەیەك دەكات كە بە زۆر خەریكی خۆڕاكێشانن و نامانەوێت نوێنەرەكانیشیان ببینین .
مەرگی كەریم كابان لە كوێی ژیانی ئێمەدایە ؟ چونكە مەرگی ئەوانی دیكە لە پەیوەندیدا بە ژیان و مەرگی ئێمەوە گرێدراوە .
مەرگی كەریم كابان چیمان پێدەڵێت و چاوەڕوانی چی لێدەكەین ؟ ئایا پەیوەندی بەو مەرگدۆستییەی ئێمەوە هەیە كە پاڵەوان و جوامێرەكانمان ئەوانەن كە مردوون ؟ ئەیا لە ژیاندابوونی هونەرمەندێك بەهاو سەرمایەی كەم دەكاتەوە ؟ قەدری كەسانێك لە نەبوون و دورەدەستیی و لە ناوچوونیاندایە ؟ .
من هەست دەكەم ئێمە كێشەمان لە گەڵ ژیاندن و تێگەیشتن بۆ ژیان هەیە . ئەگەر كەسێكی دیكە وەرگرین ، ئەم كەسە مامۆستا كەریم كابان نەبێت بەو سەرمایە هونەریی و كولتورییەوە كە هەیەتی ، ئێمە بە هەمان ئەندازە موشتاقی مەرگی بووین ؟ واتە كەسێكی ئاسایی لەو دیو ئەو سەرمایە ڕەمزی و مەعنەوییانەوە كە دەیكات بە كارێكتەرێكی میللی .
نەخێر. كەواتە ئەوەی دەمانەوێت بمرێت ، سەرمایەو كاپیتاڵێكی مەعنەویی و ڕەمزییە نەك كەسێك . بۆ دونیای ئێمە بۆچی درێژبوونەوەو ڕاكێشانی سەرمایەیەكی مەعنەویی و ڕەمزی بۆ ژیانی ئێمە دەبێتە كێشە ؟ .
دەبێت لە ژیان و مەرگی مامۆستا كەریم كابان تێبگەین لەناو پەیوەندیدا بە ژیان و مەرگی ئێمەوە . واتە ژیان و مەرگی كەریم كابان بۆ خۆی چ مانایەكی نییە ، ئەوەی چاوەڕوانین لێی ماناو خولقاندنی ماناو بەهاتە بۆ ئێمەی چاوەڕوان . ئێمە كێشەمان لە گەڵ ژیانی كەریم كاباندا هەیە نەك مەرگی ، كێشەی ژیانی كەریم كابان لە پەیوەندیدا بە ئێمەو ژیانی ئێمەوە .

بەکلیکێک لەسەر سمبولەکانی خوارەوە ، ئەم بابەتە دەگات بەهاوڕێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies