شێرزاد شێخانی : شکستە حەیاچووەکانی پارتی .

رۆژ لەدوای رۆژ هەڵویست و روداوەکانی ناوچەکەو جیهان دژ بەسیاسەتەکانی پارتی دیموکراتی کوردستان ئەشکێنەوە .. هەرچی هەنگاوێکی ئەم حزبە بە تایبەتیش لەم دواییانەدا هەڵیناوە بەنەرینی وەڵامی دراوەتەوە ، ئەمەش چانسی ئەو میللەتەی ئێمەیە کە بەدەست رەفتارو سیاسەتەکانی ئەم حزبەوە ناوبانگی ناشرین بووە ، کارێکی باشە هەرچی سیاسەتێکی ئەم حزبە لەسەر ئاستی نێوخۆو دەرەوەش بەپێچەوانەی حەزو خواستەکانی ئەکەوێتەوە ، ئەگینا بەم سیاسەتانەوە پارتی بێگومان هەرێمەکەی ئێمەی بەرەو هەڵدێری دیکتاتۆریەت ئەبردو ئەزمونەکەشمانی لەبار ئەبرد .

سەرۆک و سەرکردەی ئەم حیزبە بۆ شاردنەوەی شکستی سیاسەتەکانیان لەسەر ئاستی ناوەوەو داپۆشینی عەیبەی کودەتاکەیان بەسەر شەرعیەتی پەرلمان و ئیفلیجکردنی حکومەتەکەیان ، بەیتو بالۆرەی سەربەخۆییان بۆ دوبارەو دەبارە ئەکردەوە ، بەڵام دەرکەوت نەوەکا ئیعلانی سەربەخۆیی لەسەر دەستی سەرۆکی ئەم حیزبە ، بەڵکو ریفراندۆمەکەش لەلایەن زۆربەی وڵاتانی دونیا رەتکرایەوە ، ئەوەتا ئەمریکاش لەسەر زاری جێگری وتەبیژی وەزارەتی دەرەوە لەوەڵامی پرسیاری پەیامنیری ” روداو ” ەکەی نێچیرڤاندا وتویەتی ” ئێمە هەمیشە روون و ئاشکرابوین و ئەو سیاسەتەمان نەگۆڕاوە کە پاڵپشتی لەعیراقێکی یەکگرتوو فیدرال و فرەلایەن و دیموکراسی ئەکەین . ئەمەش رێک پێچەوانەی حەزی سەرانی پارتی و سەرۆکەکەیانە کە ئەیویست لەعیراق جیابێتەوەو حوکمی دیکتاتۆری لەجیاتی فرەلایەنی لەهەرێمدا جێگیر بکات و خۆیشی وەکو دیکتاتۆرێک نمایش بکات لەبری حوکمێکی دیموکراسی “. سەربەخۆیی و ریفراندۆمەکشمان فت بەهۆی سیاسەتە بێسەروبەرەکەی سەرانی پارتیەوە .
با بێینەوە سەر حکومەتە ناسک و نازدارەکەی پارتییەوە کە بەدرێژایی شەش ساڵی رەبەق هەوڵی مانونەمانیان ئەدا بۆ سەربەخۆیی ئابوری ، دکتۆرێکی فاشیلی چڵکاوخۆریان لە ئەوروپاوە هێناو وتیان وەزیرێکە لەهەمو شەرقولئەوستەدا هاوتای نیە ، ئەم وەزیرە زۆر بێباکانە بەرامبەر بەغدا فەرموی ئێمە نەوتفرۆشتن و خەیار فرۆشتنمان لا وەکو یەکە ، دەرکەوت نەشارەزایی لەنەوتفرۆشتنەکەدا هەبوە نەوەک عارەبانچییەکیش توانی خەیاریش بفرۆشێت ، دەرکەوت هەمو خەبیری ئەم پیاوە تەنها لەدزی وفزی و بەتالانبردنی سامانی میللەت و شاردنەوەی لە بانکەکانی دەرەوەدا ، بەمەش هەرێمی نوقمی زەلکاوی قەرزی تا بیینەقاقا کردو ، دوملیاری پێ ژماردین لەبری کێشەی داناغازو 18 ملیاری تریشی قەرزوقۆلی ئەملاو ئەولاو ، تەنانەت موچەی فەرمانبەرانیشی بڕی بۆ دانەوەی موستەحقاتی کۆمپانیا نەوتییەکان ، لە کۆتایشدا حکومەت بایدایەوە لای بەغداو بەچاوشۆڕییەوە رازی بو بەوەی عەبادی موچەکەمان بۆ بنێرێت و ئەوانیش نەوتەکەی رادەست بکەن ، نازانم بۆچی هەر لەسەرتاوە ئەو غرورەیان گرت و هەر پێش چوار پێنج ساڵ نەوتەکەیان نەئەدایەو ” کفى الله المۆمنین شر قتال “؟ . ئەمەش شکستێکی تر .
کاتێک پارتی بەبریارێکی مەکتەبی سیاسییەکەی رێگری لە هاتنی سەرۆکی پەرلەمان کرد بۆ هەولێر ، سەرکردەکانی رۆژانەو هەمو سەرەسەعاتێک بە لێدوانێکی تازەوە دوپاتیان ئەکردەوە کەوا گۆڕان کۆتایی هاتو قۆناغی یوسف محمەد بەسەرچو جارێکیتر ناگەرێتەوە پەرلەمان ، ئێستا بەکۆمەڵ لەبەر دەرگای بزوتنەوی گۆڕاندا ئەپاڕێنەوە بەڵکو سەرۆکی پەرلەمان بگەرێننەوە و “عفا الله عما سلف “. ئەمەش شکستێکی تری ئەم حزبە .
سەرباری ئەو ملیار دۆلارانەی پارتی بۆ هەڵمەتی هەڵبژاردنەکانی حزبەکەی ئەردۆگان سەرفکردو ، سەرەرای ئەو گرێبەستە پەنجا ساڵیانەی حزبەکەی لەگەل تورکیاو حزبەکەی ئەردۆگاندا ، کەچی دوای بردنەوەی حزبەکەش بەپارەی پارتی و بەپشتیوانیەکانیشی لەهەلمەتی هەلبژاردنەکاندا ، سەرۆکی حکومەتەکەی پارتی و جێگری سەرۆکەکەشی زۆر بەئاشکراو غەمگیینیەوە رایگەیاند کەوا ئێمە زۆر تەنیاین ؟!.. ئەمەش شکستێکی تری پارتی .
دوای هەوڵێکی زۆرو دروستکردنی دەیان قەیرانی سیاسی و دارایی و فشارێکی زۆری سەرانی پارتی و سەرفکردنی ملیۆنان دۆلار بۆ کڕینی هەڵوێستی هەندێ حزبی بچوکی کوردستان بۆ هێشتنەوەی مەسعود بارزانی لەسەر کورسی دەسەڵات وەک سەرۆکی هەرێم ، ئەوەتا جارێکیتر هەر چوار حزبەکە پابەندبونیان بەپرۆژە چوار قۆڵییەکەوە دوپاتکردەوەو داوای گۆڕینی سیستەمی سیاسی هەرێمو بەدیموکراسیکردنی کردەوە ، ئەمەش وای لەسەرۆکی هەرێم کرد دواجار ئیعتراف بەبەسەرچونی ویلایەتەکەی بکات و داوای چارەسەر لەو حزبانە بکاتەوە .. ئەمەش شکستێکی تری پارتی .
پارتی هەمو هەوڵێکی خۆی خستەگەر بۆ ئەوەی گۆڕان لەپرۆسەی سیاسی بکاتە دەرەوە ، فشارێکی زۆریشی خستە سەر حزبە گەورەکان بەتایبەتیش یەکێتی و یەکگرتو بۆ ئەوەی بەیەکەوە حکومەتێکی تازە دامەزرێنن گۆران و کۆمەڵیش بکەنە دەرەوە ، بەڵام یەکێتی جارێکی تر دوپاتی کردەوە کەوا ئامادە نیە لەسەر حیسابی گۆڕان و هیچ حزبێکی تر رێکەوتن لەگەڵ پارتیدا بکات ، تەنانەت کار گەیشتە ئەوەی یەکگرتووش لەلێژنەی ئاساییکردنەوە بکشێتەوە ئەمەش پارتی توشی شۆک کرد کە ئەم حزبە جورئەتی ئەوەی هەبێت لەم زروفەدا پشت لەپارتی بکات .. ئەمەش شکستێکی تری پارتی .
لەهەڵمەتی هەڵبژاردندا پارتی دروشمی ئەوەی هەڵکرد کەوا بەشی هەر هاوڵاتییەک لەنەوتی هەرێم لەناو زەرفێکدا بنێرێتە ماڵەکانیانەوە ، بەڵام ئێستا نەک هەر بەشە نەوتەکەی پێنەدرا بەڵکو لەموچەکەشیانی بڕی بۆ دانەوەی قەرزی کۆمپانیا نەوتیەکان .. ئەمەش شکستێکی تری پارتی .
بەدرێژایی تەمەنی ئەم حکومەتانەی پارتی قەڵەمە بەکرێگیراوەکانی هەمیشە وەسفی نێچیرڤانیان ئەکرد بە ئەندازیاری ئاوەدانی و بوژانەوە ، ئێستا دەرکەوت کەوا ئەم ئەندازیارە نەیتوانی بۆری ئاوەڕۆکانی گەڕەکە هەژارەکانیش بکاتەوە کاتێک باران و لافاو هەلئەسێت و سەدان ماڵ ئەکەونە ژێر ئاو و ئاوەرۆری پیسی گەرەکەکانەوە .. ئەمەش شکستێکی تری پارتی .
زۆر دەمێکە وتومە ئەم حزبەی پارتی حزبێکی بێ مۆراڵە ، حزبێکی عەقلیەت دواکەوتووە ، حزبێکی هەرزەکاری سیاسییە ، حزبێکە هیچ شەرم دایناگرێت لەبەرامبەر هەر خیانەتێک و شکستێکی سیاسی و ئابوری و خزمەتگوزاری ، ئەگینا ئەم شکستانەی ئێستا هەر حزبێک یا کەسێک توشی هاتبایە دەم و دەست دەستی لەکار ئەکێشایەوە ، ئەگەر زۆر ئازاش بوایە و جورئەتی ئەوەی هەبوایە تەحەمولی بەرپرسیارەتی ئەو هەمو شکستەی بکردایە ئەوا ئەبو وەکو سامۆراکانی ژاپۆن شیرێکیان بکردایە بەسکی خۆیان و شەرەفمەندانە خۆیان بکوشتایە نەوەک کوشتنی میللەتێک بەم سیاسەت و هەڵوێستە نەشازانەی خۆیانەوە .

بە کلیکێک لەسەر سمبولەکانی خوارەوە ، ئەم بابەتە دەگات بە هاوڕێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies