Barzani-Erdogan

شەریف هەژاری : وردببنەوە لە تەوقیتی چاوپێکەوتنەکەی مەسعود بەرزانیی و چوونی وەزیری دەرەوەی ئێران بۆ تورکیا !

چاوپێکەوتنەکەی ئەمدواییەی مەسعود بەرزانی ، پاش چوونی وەزیری دەرەوەی ئێران بوو بۆ تورکیا ، کە بە ئاشکرا چ وەزیری دەرەوەی ئیران و چ وەزیری دەرەوەی تورکیا لە کۆنگرە ڕۆژنامەنووسییەکەیاندا ڕایانگەیاند : تورکیا و ئێران لەسەر دۆسییەی سوریاش هاوڕانەبن ، ئەوا لە بەگژداچوونەوەی مەترسییە ناوچەییەکان هاوڕان و هاریکاری یەکتر دەبن .

هەر شیکەرەوەیەکی دۆخی سیاسیی ناوچەکە ، بەڕوونی لەوە دەگات کە تورکیا و ئێران خەریکە دەست لە هاوپەیمانە زەبەلاحەکانیان کە ‘ ئەمریکا و ڕووسیا ” یە دەشۆن لە بارەی بەگژداچوونەوەی کوردەوە ، چونکە نە ئەمریکا و نە ڕووسیاش لەگەڵ دژایەتیکردنی ڕاستەوخۆی کورد نین لە ناوچەکەدا، بەڵام ئەوەی تورکیا و ئێران لەسەری کۆکن ” دوای سەردانەکەی وەزیری دەرەوەی ئێران بۆ تورکیا ” ئەوەیە کە : ئەم دوو داگیرکەرەی دوو بەشە گەورەکەی کوردستان ڕێکەوتنی نهێنییان کردبێت لە دژایەتیکردنی دواڕۆژی کورد لە ناوچەکەدا .

ڕاستوڕەوان لەم کاتەدا : ئۆپۆزسیۆنی سوریا لە جنێف ، هاوتای حافیز ئەسەد و کوڕەکەی هەڵوێستی فاشیستانەی خۆیان لەبارەی دۆزی حەق – نەتەوەیی کورد خستەڕوو ، کە بڕوایان بە مافی نەتەوەیی گەلانی سوریا نییە – بەڵکوو بڕوایان بە مافی ” سوریایی بوون ” هەیە ، هەڵوێستێک کە هاوتای هەڵوێستی دیکتاتۆرە فاشیست نەتەوەیی و مەزهەبییەکانی وەک خامنەیی و ئەردۆگانە !

کەچی لەم ساتە تەواو هەستیارەدا ، مەسعود بەرزانی کە خۆی بە نوێنەری گەلی کورد ئەزانێ و بمانەوێت یان نا مەوقیعەکەشی وای لێ دەخوێنرێتەوە لە دەرەوەدا ، ئەوا : تەواو بە گیانێکی نا – نەتەوەیی و نا – سیاسییانەوە چاوپێکەوتن دەکا و بۆچوونەکانیشی زیاتر دڵی داگیرکەران خۆش دەکا و دەبێتە مایەی زیاتر لێکترازانی حیزبە کوردییە خۆخۆرەکانمان !

مەسعود بەرزانی لە بەشێکی چاوپیکەوتنەکەیدا ، ئەیەوێت جیهانی ڕۆزئاوا وەک پەکەکە لە پەیەدە بڕوانن و دەڵێت : هیچ جیاوازییەکیان نییە !

باشە با بشزانین کە هیچ جیاوازییەک لە نێوان پەکەکە و پەیەدە دا نییە ! بەڵام بۆ دەبێت سەرکردەیەکی کورد کە خۆی بە کاراکتەری سەرەکی درووستکردنی دەوڵەتی سەربەخۆی کورد بزانێت ، کەچی پێی ناخۆش بێت کە پەیەدە خۆرئاوای کوردستان ڕزگار بکات ! هەرچەندە ڕاستە تاکحیزبی لە خۆراوای کوردستان مایەی ڕەخنەیە ، بەڵام ئەمە نابێت بگاتە ئەو ئاستە نا – تەندرووستەی کە مەسعود بەرزانی بیەوێت جیهانی ڕۆژئاوا وەک ” تیرۆریست ” لە پەیەدە بڕوانن ، ئەم گیانی یەکترخۆریی و نابەرپرسیارانەیە تا کەی !؟ ئەمە بۆچوونی مەسعود بەرزانی بێت کە پارتییەکان بە ” سەرۆکی نەتەوەیی کوردیی عەیارە ٢٤ ی ئەزانن ”، ئەی بۆچوونی کادیرە پارتییەکانی دیکە ئەبێت چۆن بێت !؟

لە بەشێکی تری دیمانەکەیدا ، مەسعود بەرزانی دەیەوێت درزی زیاتر بخاتە نێو ڕیزی لایەنە سیاسییەکانی باشوری کوردستان ، لە بری ئەوەی دوای مام جەلال خۆی بە برا گەورە و بەرپرسیاری سەرەکی یەکێتیی کوردان  ” هەر هیچ نەبێت لە باشوری کوردستان ” بەکردەوە بسەلماندبایە ، کەچی دەڵێت : گەر گۆڕان ناڕازی دەبن ئەوا بۆ کوێ دەڕۆن کەیفی خۆیان ! بەڕاستی ئەم لێدوانە لێوانلێوە لە گیانی نا – نەتەوەیی و نا – سیاسییانە ! بەڕاستی کاتێک مرۆڤ بیردەکاتەوە لەوەی کە : سەرەڕای ئەوەی مەسعود بەرزانی کاتی سەرۆکایەتییەکەی بەسەرچووە و ئەو کەیسەش سەرچاوەی هەندێک لە قەیرانەکانە لە باشوری کوردستاندا ، ئەوا هەر هیچ نەبێت دەبوو لێدوانەکانی بەرامبەر بەو پارتانەی کە پارتەکەی بارزانی زوڵمیان لێ دەکات ” وەک ئەو زوڵمەی کە پارتەکەی بارزانی لە گۆڕانی دەکات ” ئەوا دەبوو زۆر نەرمونیانتر و بەرپرسیارانەتر ببوایە .

لە کۆتاییدا دەڵێم : وردببنەوە ئێران و تورکیا ڕێدەکەون بۆ قاتوقڕکردنی کورد سەرەڕای دوژمنایەتیی مێژوویی و ئایدۆلۆژیی نێوان ‘ تورک و فارس ‘، ڕامێنن شیعەی عێراق چەندێک دژی کوردە ، تێڕامێن چەندێک سونەی عێراق دژی مافە نەتەوەییەکانی کوردن ، بڕوانن چەنێک ئۆپۆزسیۆنی ئەسەد چەنێک فاشیستن بەرامبەر مافەکانی کورد، حەماسەت بتانگرێت بۆ جینۆسایدەکانی کوردان بە دەستی ئەسەد و داعش و کۆماری ئیسلامی ئێران و تورکیای ئەردۆگانی!! کەچی ئەوەی لەناوبەری هەمیشەیی کوردبووە و کوردە : ئەو گیانە خۆخۆرییەی خودی سەرکردەی حیزبە کوردییەکانە کە بەرژەوەندیییە حیزبی و خودییەکانیان دەپەرستن ! ئافەرین سەرۆکی پارتی بەڕاستی سەلماندت کە یەکێتیی کوردان لەم دۆخە تەواو هەستیارەدا لە بەرچاودەگریت !!  گرنگترین فاکت ئەوەیە : هەر هیچ نەبێت یەکێتیی کوردان لە باشور دا بهێنیتە کایەوە ، ئەوەش زۆر ئاسانە ، تەنها با پارتەکەت کەمێک سازش بکات و لە کەلەی شەیتان بێتە خوارەوە ! دواتریش گەر ئێوە لە باشور دا یەکگرتووبن ئەوا بڕوای تەواوم ئەوەیە کە : کاریگەری لەسەر پارتەکانی بەشەکانی دیکەش دەکات و ئەو کات ئەوانیش چاوتان لێ دەکەن !

 بە کلیكێک لەسەر سمبولەکانی خوارەوە ، ئەم بابەتە دەگات بە هاوڕێکانت

 

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies