نەبەز گۆران : باڵی چایەكە و باڵی شەربەتەكە .

ببورن هەرچەند هەندێك لە هاوڕێيانم دەڵێن قسە بكە ، من هیچ پێمخۆشنییە لەسەر ( گەعدەكەی چاڤیلاند ) قسە بكەم . چونكە كە تۆ ( گەعدەت ) كرد دەبێت چاوەڕێی شەرە چەقۆش بكەیت . خۆ نەچوویت كارێكی هونەریی گەورە بكەیت ، ( بەهجەت یەحیا و عەدنان كەریم و … هتد ) بهێنیت تا چاوەرێی جیهانێكی ئارام و هونەر دۆست بیت .
عادەتەن ( گەعدە ) شەرە چەقۆ و تەقەشی تێدەكەوێت . سروشتی ئەو جۆرە لە وێرانكردنی هونەرە هەر ئاواییە. تۆ كە خۆت بەشێكی لە بەرهەم هێنانی توندوتیژی ، دەبێت لە شوێنێكیشدا لەگەڵیدا بەربكەویت . هەر ئەوەندە و قسەی دیكەی ناوێت .
دەمەوێت زۆر كۆمیدییانە وێنەی حیزبی كوردیی بكێشم . كە دەڵێم : حیزبی كوردیی ، مەبەستم كۆی حیزبەكانی ئەم باشورەییە .
هەمیشە باڵی دەسترۆیشتوو لەناو حیزبی كوردیدا بوونی هەیە . كە وتت باڵی دەسترۆیشتوو، یانی پارەكان ، ئۆتۆمبێلەكان ، خەز و بەزەكە هەمووی لەوێییە . جا مرۆڤی باشوریش وایلێكراوە هەڵپە بۆ پارە و خەزو بەز وێرانیكردووە و جگە لەوە خەونی تریی پێوە نەهڵێدراوە .
جارێكیان كادیرێكی دواكەوتووی حیزبێك وتی : باڵە دەسترۆیشتووەكانی حیزب ، دەتوانن هەمووشت بكەن ، تەنانەت دەتوانن ژیانیشت لێبسەننەوە .
بۆ نمونە : وەك گاڵتە پێكردنێك بە دونیای حیزبی كوردی باسی دوو دوكان دەكەم :
باڵە نارازییەكان .
گڕ گڕ هەڵدەسن ، چاپخانەیەكی گەڕو گول دادەنێن . شەكری چایخانەكە لەناو عەلاگەیەكی لۆچكراوی چڵكنداییە . چایچیەكان یەكی جگەرەیەك بە لێویانەوەیە و سەر و ریشیان تێكەڵبووە . مشتەرییەكانیان ئێمەین كە هیچ شوێنێكمان نیە ، كە دانیشتیین تا یەكی قۆرییەك چای نەخۆین هەڵناسیینەوە .
چایخانەی باڵە نارازییە داماوەكەش لە حەشمەت شارەوانی ، وێنەی پاڵەوانە نیشتیمانییەكان هەڵدەواسن ، ئێ‌ چیبكەن نەكا كتوپڕ باڵە دەسترۆیشتووەكە بە بیانووی تەجاوز بدات بەسەریاندا و تێكی بدات . بەڵام خوا هەڵناگرێت كوڕی زۆر باشن و كورسییەكانیان هێندە كۆنن گەر بە باشی لەسەرییان دانیشی ، زرمەت هەڵدەستێت . چەند كورسیت دەوێت لە خزمەتتدایيە ، نە پەرلەمان لەسەر كورسییەكانیان پەكدەخرێت ، نە لەبەر خاتری كورسییەك پەرلەمانتارەكان دەكەن پە چالاكوانی تۆڕە كۆمەڵایەتییەكان ، نە لە بۆنەكاندا بەیاننامەی ناخۆش دەردەكەن و منەت بەسەر خەڵكا دەكەن .
لەناو چایخانەی باڵە نارازییەكەدا ، باس باسی بایكۆت و ، خراپی سیستەم و ، كرینی ( یاریزانی ) تازەیە بە نرخێكی هەرزات بۆ باڵەكە ! زۆر مەترسیش كەوتە سەر بازارەكەیان ، یەك عەرەبانەی نۆكاو یان شفتە دادەنێن و ، ئەو ناوە قەرەباڵغ دەبێتەوە و سەركردەی باڵەكە دڵخۆش دەبێت .
لە هەمووشی ناخۆشتر دایم لەتەنیشت چایخانانەی باڵە نارازییەكانەوە ، دوكانێكی سیدی ( گەعدە ) فرۆشتن خۆی قوت دەكاتەوە ، بەندی وا لێدەدەن هێندەی لقی چواری پارتی ئیزعاجە .
بەڵام باڵە دەست رۆشتیووەكە .
لە سوچەكەی سەرەوە بۆخۆی یەك شەربەت خانەی پاك و خاوێن دادەنێت . بە بۆنەی كردنەوەكەیەوە ئامادەیيە هەموومان ببات بۆ ( سیتەك ) بەس ئێمە ناچین ، چونكە مەبدەئین و چایخانەكە جێناهێڵین !
لەوێ‌ باس باسی ئەوەیە ، چۆن ملی یەكێك لە باڵە نارازییەكە بشكێنرێت . حوكومەت لەوێ‌ هیچ عەیبی نیە . باسی بایكۆت و شت هەر ناكرێت . چونكە بایكۆت ئەوەندە باشبوو ئەم ماوەیە نەیانهێشت خوێندكارانی بەشە ناوخۆییەكان ، سەر ئێشە بۆ حوكومەت دروست بكەن .
لەو شەربەتخانەیەی باڵە دەسترۆیشتووەكە بۆنی عەتری شاگردەكان رۆژە رێك دەڕوات . هەر لە دوورەوە سەیری هەردوو كیان بكە ، چایخانەی باڵە نارازییەكە و شەربەتفرۆشی باڵە دەسترۆیشتووەكە ، یەكسەر ئەزانی كامیان تەنكەرە نەوتەكان ئاودیوو دەكات .
كاكە ئەو فەرماندە زل زلانە حەقی خۆیانە بێنە سەر تەلەفزیۆنەكان باسی نەوتەكە بكەن . هیچیان بۆنەماوەتەوە ئەو قسانە نەبێت . ئەوەی جاران بەسەریاندا دەڕژا گیراوەتەوە ، ئیتر بۆ خۆیان خەریكی شینی هەریسەكەن.
جا لەم كەین و بەینەدا كاتێك دەزانی یەكێك لە حیزبەكانی تر دێت ، لەو ناوە دوكانێكی پاقڵە فرۆشتن دادەنێت. برادەرێك دەیووت بۆ پاقڵە ؟
ئێ‌ منیشم گوتم : ئەمانە جگە لە شتی خراپ هیچیان هەیە بیدەن بەم خەڵكە ؟
شەوان لە میدیاكانەوە خەریكی قسەی سواوی بێكەڵكن و ، خەریكی پركردنی خەڵكن لەسەر توندو تیژی و لەناو هەر مرۆڤێكدا گورگێكیان دروستكردووە . كاتێكیش شتێك روودەدات خۆیان لێدەبێت پەپولە و نیگەرانی خۆیان دەردەبڕن !
وەلحاڵ بە چایخانە و شەربەتەكەدا دەزانم ، چ حیزبی كوردیی ، چ كۆمەڵگەی باشوور لە چ دۆخێكی بەدبەختیداییە بە دەست ئەمانەوە . لە گشتیشی ناخۆشتر كابرای نەخوێندەواری سەر بۆیاخ ، كە هێشتا نازانێت ئیمزای خۆی بكات و پەنجەمۆر دەكات . شەوان لە میدیاكانەوە ( هەڵبەت لە ستۆدیۆی مەملەكەتی ستایش و بێدەنگی ) یەوە خەریكی تاوتوێكردنی بارو دۆخەكەیە . بۆ بەیانیەكەشی قسە بێماناكانی زەختی هەندێك خەڵك هەڵدەسێنێت و ، لە چایخانەكە سەری ئێمەی پێدێشێنن . برادەرانی شەربەتی دەسترۆیشتوویش گاڵتەیان بەم باسانە دێت و بۆ خۆیان خەریكی كاسپی خۆیانن .
ئەوان بە بێدەنگ كاسپی دەكەن بەشەربەت و نەوت و ئیتر ئەو جۆرە شتانەوە . ئێمەش لەم خوارەوە بە دیار باڵە نارازییەكەوە ئەوەنە چایمان خوارد و خەمان خوارد بۆ ئەم دۆخە ، ناوسكمان رەش هەڵگەڕا .

– خوێنەری بەرێز هەندێكجار گاڵتەكردن بۆ تەفسیركردنی دۆخەكە ، زۆر باشترە لەوەی بە رژدی قسە بكەیت . چونكە هەموو شتێكیان لە ماناكانی خۆی داماڵیووە . ئیتر ئاوا .

بە کلیکێک لەسەر سمبولەکانی خوارەوە ، ئەم بابەتە دەگات بە هاوڕێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies