Hemin-Hawrami

گۆران هەڵەبجەیی : سمینارەکەی هێمن هەورامی لە کۆبنهاگن .

لە 12 – 3 – 2016  کاک هێمن هەورامی بەرپرسی پەیوەندیەکانی دەرەوەی پارتی لە کۆبنهاگن سەمینارێکی سازکرد ، منیش وەک نوێنەری حیزبی شیوعی کوردستان بە نامەی فەرمی داوەت کرابووم . سەمینارەکە داخراوبوو ، واتە  کەس بۆی نەبوو  بێ داوەتنامە بچێتە ژوورەوە . جا پاشان ئەمەشتان بۆ ڕووندەکەمەوە کە بۆچی داخراوبوو .

بەر لە دەستپێکردنی سەمینارەکە گەشتمە هۆڵەکە دیتم هۆڵەکە جمەی دەهات ،منیش لە دوای دواوە جێگەیەکم بۆخۆم گرت .

پاش کەمێک کاک هێمن هات و دەستی بە ئاخاوتن کرد . چەند تەورێکی  بۆ سەمینارەکەی دیاری کرد لەوانە :

بارودۆخی سیاسی ئەمڕۆی کوردستان

قەیرانی سەرۆکایەتی

کێشەی پەرلەمان

شەڕی داعش و کێشەی ئابووری کوردستان

سەرەتا کەدەستی پێکرد تا خاڵی دووەم و سێیەمیش دابەزین بوو بۆ سەر هەندێک لایەندا بەتایبەتی بزووتنەوەی گۆڕان .

هەرچی کێشە و قەیرانی سیاسی و ئیداری لە کوردستان  هەیە ئۆباڵەکەی خستە سەرئەوان . پاشان پەڕیەوە بۆکۆمەڵی ئیسلامی ، لەوێشەوە بۆ پێکاکا ، ئینجا هەدەپە و کۆتایەکەشی پەیەدە .

بەکوورتی و کوردی هیچ لایەنێکی لێ دەرنەکرد ، بەڵام بڕێک موراعاتی یەکێتی کرد و وتی هیوادارم لە ژیر کاریگەری گۆڕان دەرچن بۆئەوەی پێکەوە بتوانین کار بکەین و دەبێ هەرواش بیت چونکە چارەنووسمان  پێکەوە گرێدراوە . لەدڵی خۆمدا گووتم دەبێ مەبەستی کارکردنی هاوبەش بێت لە تاڵانکردنی کوردستاندا .

وابزانم جارێک یا دووجار وەک سوژن و دەرزیەکە ، دەرزیەکیشی کرد بە خۆیانداو گووتی ، لەبەر ئەوەی زۆرتین ئەرکی بەڕیوەبردنی هەرێم لەسەر ئێمەیە وەک پارتی دیارە ئێمەش کەم و کووڕیمان هەیە ، بێئەوەی ئاماژە بەو  کەموو کوڕیانە بکات ، کە بە ڕای من لەکەمو کووڕی دەرچوون و بوونەتە کارەسات .

گرنگە ئاماژە بەوەش بکەم ، لە دوای هەر  بڕگەیەک دەبووە چەپڵە ڕیزان کە لە کۆتاییەکەیدا بێتام بوو بوو .

ئەوەی بەلای منەوە گرنگ بوو کە باسی بکات دۆخی پڕ قەیراناوی ئابووری کوردستان بوو کەحیزبەکەی و یەکیتی لێی بەرپرسیارن ، بەڵام دیار بوو بە ئەنقست ئەو خاڵە گرنگەی خستبووە دواخال بۆ ئەوەی باسی نەکات ،  هەرواش دەرچوو ، باسی نەکرد و بازێکی گەورەی دا بەسەریدا .

پاشان پشویەک  ڕاگەیەنرا لە کاتی پشوەکەدا  دیقەتم دا پتر 80% ی  ئەو کەسانە کە هاتبوون  بەمن نامۆبوون . وەک خۆیان باسیان کرد لە هەموو دانیمارکەوە ئەندام و دۆست و لایەنگرانیان هێنابوو ، وێرای ئەوەی لە سویدیشەو خەڵکانێکی زۆریان هێنابوو بەجۆرێک هۆڵەکە بە پلەی یەکەم ئەندام و لایەنگرانی خۆیان بوو ئەوەی دیکەش کە مابویەوە نوێنەری حیزبە کوردیەکانی هەر چوار پارچەبوون .

دیار بوو لە مێژەوە کاریان بۆ کردبوو تا بەجۆرە دەرچێت ، ئەوە هەقی خۆیانەو دەستیان خۆش بێت و من کێشەم لەگەڵ ئەوەدا نیە ، بەڵکو ڕەخنەی من لە ناوەڕۆکی سەمینارەکەیە ،کە ئێستا دێمە سەری .

پاش پشوو دەرگای پرسیارو سەرنج کرایەوە ، کاک سەعید کە کوردێکی باکوورەو ئەندامی پارتیە ئەو ناوەکانی وەردەگرت . سەرەتا لە ڕیزی پێشەوە ناوەکانی  وەرگرت و ئەوەش ئاسایە ، ئەوجا ورەدە وردە نزیک بوویەوە بۆ دواوە  ، جا بۆئەوەی بمبینێت من هەستامە سەرپێ و جەندین جار بە دەست ئاماژەم بۆ کرد کەناوم بنووسیت بەڵام هەر پشتگوێی  دەخستمم . دیار بوو ئەو تەنها هەڤاڵ و دۆستانی خۆیانی وەردەگرت .

 لە میانەی پرسیارکردندا ، تەنها کەسێک کە پارتی نەبوو پرسیاری کرد وابزانم کاک عەدنان بوو  ، ئەویش پرسیارێکی ئاسایی کرد . دەمێک زانیم کە بەنیاز نیە ناوم بنووسێت ، برادەرێکم ڕاسپارد کە ئاگاداری بکاتەوە تا ناوم بنووسێ . لە کۆتایی وەرگرتنی پرسیارەکاندا کاک هێمن گووتی ، لە یەکێک لە کەناڵە دانمارکیەکان  دیدارم هەیە بۆیە بە  سەعیدی وت  [6] ناوی تر وەربگرە و کۆتایی پێدەهێنین . لەو شەش ناوە من  پێنجەم ناو بووم . بەڵام لەدوای وەرگرتنی پرسیاری چوارەمین کەس ، بازی بەسەر ناوەکەمدا داو کەسی شەشەمی وەرگرت کە لە چەپڵە لێدەرەکان بوو . دوای ئەو چاوەڕێ بووم ڕێگە بەمنیش بدات پرسیاری خۆم بکەم  بەڵام بەداخەوە  بە بەهانەی  نەبوونی کات کۆتایی بە پرسیارەکان هینا . هەرچی دەستم بەرزکردەوە و هاوارام کرد هیج سوودی نەبوو .

ئەوانەی کە پرسیاریان کرد جگە لە خوشکێک نەبێت کە وتی کاک هێمن قسەکانت تووڕەییان  پیوەدیارە و ئەمانە قسەی کەسێکی دیبلۆماسی نین . ئیدی هەر هەموو پرسیارەکان یان سەرنجەکان بە ئاراستەی پشتگیریکردنی قسەکانی هێمن هەورامی بوون ، واتە هەمووی لە خانەی [ ئەشهەدو ] دابوون .

لە خوارەوە بەر لەوەی بڕوات سعیدم گرت و پێم گووت کارێکی جوانت نەکرد کە ڕێگەت پێنەدام پرسیاری خۆم بکەم ، وتی ببورە کاک گۆران کات نەمابوو ، منیش بە جوانم نەزانی لەوێدا  لەوبارەوە زۆر قسە بکەم و بڕیارمدا هەڵیبگرم بۆ نووسینێک ، چونکە کاک هێمنی لەگەڵدا بوو وە بەپەلەبوون بۆ چوون بۆ کەناڵە دانمارکیەکە . . سەیر لەوەدا بوو کەسێک بەناوی ئازاد کەرکوکی هەر لەوێدا پێم دەڵێت  : پرسیاری چی دەکەیت ، ڕازیبە کە ڕیگەمان دایت بێتە ژورەوە ، چونکە تۆ دژی پارتی خۆپیشاندانت کردوە .  منیش  ڕووم تێکرد و وتم پرسیارم لەتۆ نەکردوە ، وەڵامیشم پێیە بۆ ئەو قسانەت ، بەڵام وەڵامت نادەمەوە .

جا بە بۆچوونی من خۆیان لەسەر ئەوە ڕێککەوتبوون کە هەرکەسێک گومانی ئەوەی لێدەکرێت کە جۆرە پرسیارێک بکات و بەدڵیان  نەبێت و ئیحراجیان  بکات ، چاکتر وایە  ڕێگەی پێنەدەن . جا هەر واش بوو ، چۆن نەخشەی بۆ داڕێژرابوو هەرواش بەڕیوە چوو .

بێگومان هەڤاڵانی پارتی ئەوەیان لەبیر ماوە کە پشتر وابزانم بەر لەساڵێک کاک هێمن هەورامی سەمینارێکی سازکرد کە کراوە بوو ، لەوێدا بە هەندێک پرسیار ئیحراج کرا ، کە یەکێک لەوانە پرسیارەکانی من بوو کە نیتوانی بەرسیڤی موقنیعم بداتەوە .

بەرای من باشتر بوو بۆ کاک هێمن ، هەڤاڵان و لایەنگرانی خۆی کۆبکردایتەوە و وەک کۆبوونەوەیەکی حیزبی  قسەی بۆ بکردنایە  لەوەی کە ناوی نابوو سەمینار .

سەمینارێک ڕای جیاوزی تیدا نەبێت ، پرسیاری دژ بە قەناعەتی سەمینار گێڕی تێدانەبێت ، سەمینارێک هەر چەپڵە ڕیزان و پیاهەڵدان بێت ، سەمینارێک تەنها دابەزین بێت و بۆسەر هەندێک لایەن ، سەمینارێک حیزبەکەی خۆی بە فریشتەو فریادڕەسی سیاسی بزانێت ، ئەوە گوناهە ناوی لێبنرێت سەمینار .

جا بەرای من ئەو سەمینارەی کاک هێمن هەوارامی لە وە دچوو کە هەورامیەک کڵاش بۆخۆی دروست بکات ، بێگومان ئەو دەمە بە بەجوانترین شێوە و  باشترین کواڵەتی درووستی دەکات .

دەی  خۆ کاک هێمنیش هەروای کرد .

سەرنج/ بەهۆی هەندێک هۆکارەوە ، ئەم بابەتەم لە بڵاوکردنەوە دواکەوت .

بە کلیکێک لەسەر سمبولەکانی خوارەوە ، ئەم بابەتە دەگات بەهاوڕێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies