ئازاد ڕەفیق چالاک : بۆچی‌ پارتی‌ زویر و نیگه‌رانه‌ ؟.

وتاریکورد ماڵپەرێکی سەربەخۆ و ئازادە

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ڕێككه‌وتنی‌ یه‌كێتی‌ و گۆڕان گۆمێكی‌ شڵه‌قاند ، كه‌ پڕبوو له‌ بێزاری‌ و بێ‌ ئومێدی‌ هاوڵاتیان و له‌ چه‌قبه‌ستنی‌ سیاسی‌ و گه‌مه‌ی‌ ناڕه‌وای‌ حیزبایه‌ت ی‌، كه‌ ده‌ویسترا ڕاستییه‌كان به‌ زۆری‌ زۆردار ئاوه‌ژو بكرێنه‌وه‌ و درێژه‌ به‌هه‌ڵه‌ و گه‌نده‌ڵی‌ و ناعه‌داله‌تییه‌ گه‌وره‌كان بدرێ‌ و په‌رده‌پۆش بكرێن .
له‌گه‌ڵ ئه‌وه‌ی‌ سه‌ركرده‌ و لایه‌نگرانی‌ گۆڕان و یه‌كێتی‌ هۆكاری‌ ڕێككه‌وتنه‌كه‌یان ده‌گێڕنه‌وه‌ بۆ مێژووی‌ هاوبه‌ش و نزیكی‌ دید و بۆچونیان له‌مه‌ڕ چاره‌سه‌ركردنی‌ كێشه‌كانی‌ هه‌رێم و خه‌باتی‌ هاوبه‌ش و ڕزگاربون له‌م دۆخه‌ چه‌ق به‌ستوه‌ سیاسییه ‌، به‌ڵام ده‌كرێ‌ هۆكارێكی‌ تری‌ كاریگه‌ر بۆ ڕێككه‌وتنی‌ ئه‌م دوولایه‌نه‌ ئه‌وه‌بێت ، كه‌ خودی‌ پارتی‌ ، گۆڕان و یه‌كێتی‌ گه‌یاندبێته‌ ئه‌و قه‌ناعه‌ته‌ی ‌، كه‌ هه‌ریه‌كه‌یان به‌جیا له‌گه‌ڵ پارتی‌ ڕێكده‌كه‌ون ، كه‌متر حیسابیان بۆده‌كرێ‌ و مافی‌ خۆیان پێ‌ نادرێ‌ و گوێیان لێ‌ ناگیرێ‌ و به‌رده‌وام بچوكتر له‌ قه‌باره‌ی‌ خۆیان سه‌یر ده‌كرێن و به‌رده‌وامیش ده‌توانرێ‌ په‌راوێز بخرێن .
لوت به‌رزی‌ و عینادیی‌ سیاسی‌ پارتی‌ و تاكڕه‌وی‌ و ناژیرانه‌ مامه‌ڵه‌كردنی‌ له‌گه‌ڵ سه‌رۆكی‌ په‌رله‌مان و وه‌زیره‌كانی‌ گۆڕان ، ( پارتی‌ مه‌به‌ستی‌ بو بێت یان نا ) نامه‌یه‌كی‌ هه‌ڕه‌شه‌ ئامێزبوو بۆ هه‌موولایه‌نه‌ سیاسییه‌كانی‌ هه‌رێمی‌ كوردستان به‌ یه‌كێتی‌ نیشتمانی‌ كوردستانیشه‌وه‌ ، كه‌ هه‌رحیزبێك نه‌چێته‌ ژێر ئیراده‌و ویستی‌ پارتیه‌وه‌ ، ئه‌واهه‌مان چاره‌نوسی به‌رپرسه‌كانی‌ گۆڕانی‌ ده‌بێت ، پارتی‌ ناڕاسته‌وخۆ به‌هه‌مووانی‌ وت ئه‌وه‌ی‌ بڕیار ده‌دات ده‌نگی‌ خه‌ڵك و دامه‌زراوه‌ شه‌رعی‌ و فه‌رمییه‌كانی‌ په‌رله‌مان و حكومه‌ت و ده‌سه‌ڵاتی‌ دادوه‌ری‌ نین ، به‌ڵكو ئه‌وه‌ ته‌نها حیزبێك و ته‌نها سه‌ركرده‌یه‌كه‌ ئه‌و ماف و ڕۆڵه‌ی‌ هه‌یه‌ و هیچی‌ تر!!
به‌شێك له‌سه‌ران و كادرانی‌ پارتی‌ سه‌ره‌تا باسیان له‌وه‌ده‌كرد ، كه‌ ڕێككه‌وتنی‌ دوولایه‌نی‌ سیاسی‌ كارێكی‌ باشه‌و پارتی‌ له‌بری‌ ئه‌وه‌ی‌ مامه‌ڵه‌ له‌گه‌ڵ داخوازی‌ دوو حیزبدا بكات ، ئه‌وا بۆ ئه‌و ئاسانتره‌ مامه‌ڵه‌ له‌گه‌ڵ یه‌ك حیزب و یه‌ك داخوازیدا بكات ، واته‌ پارتی‌ باوك و دایكه‌ و لایه‌نه‌ سیاسییه‌كانیش هه‌رزه‌كاری‌ موزعیجن و داخوازیكانیشیان له‌ پارتیی‌ خاوه‌ن ماڵ ، ته‌واو نابێت !
كاردانه‌وه‌ و نیگه‌رانی‌ پارتی‌ زۆربه‌ڕونی‌ ئه‌و ڕاستیه‌ ده‌رده‌خاته‌وه ‌، كه‌ پارتی‌ هیچ لایه‌نێكی‌ كوردی‌ به‌هێزی‌ ناوێ‌ و هیچ جۆره‌ شه‌راكه‌تێكی‌ ڕاسته‌قینه‌ی‌ قبوڵ نیه‌ و كاتێكیش باسی‌ ” قبوڵكردنی‌ ته‌نها ئیراده‌ی‌ گه‌ل ده‌كات ” ، وه‌ك له‌ كۆبونه‌وه‌ی‌ ( م . س ) هاتووه ‌. ئه‌وه‌ له‌بیرخۆی‌ ده‌باته‌وه ‌، كه‌ سه‌ره‌ڕای‌ ده‌نگۆی‌ پرۆسه‌ی‌ ته‌زویری‌ ڕێكخراو له‌ هه‌ڵبژاردنه‌كاندا ، پارتی‌ ته‌نها توانیوه‌تی‌ له‌ ده‌وروبه‌ری‌ یه‌ك له‌سه‌ر سێی‌ ده‌نگی‌ خه‌ڵكی‌ به‌ده‌ست بهێنی‌ و ئاشكراشه‌ كه‌ هه‌موو لایه‌نه‌ سیاسییه‌كانی ده‌رچووی‌ هه‌ڵبژاردنه‌كانی‌ هه‌رێم جگه‌ له‌ پارتی‌ چ به‌پرۆژه‌ و چ به‌هه‌ڵوێست خوازیاری‌ سیستمی‌ په‌رله‌مانی‌ و ڕێكخستنه‌وه‌ی‌ ده‌سه‌ڵاته‌كان و هه‌مواركردنه‌وه‌ی‌ یاسای‌ سه‌رۆكایه‌تی‌ و ده‌ستوری‌ هه‌رێمن ، كه‌واته‌ ئیراده‌ی‌ زۆرینه‌ی‌ خه‌ڵكی‌ كوردستان ، كه‌ پارتی‌ ئیدیعا و بانگه‌شه‌ی‌ بۆده‌كات كامه‌یه‌ و له‌ كوێیه‌ ؟!
به‌بۆچونی‌ به‌نده‌ ، پارتی‌ به‌رده‌وام ده‌بێت له‌ هێنانه‌كایه‌ی‌ گرژی‌ و به‌هه‌موو شێوه‌یه‌ك دژی‌ ئه‌م ڕێكه‌وتنه‌ ده‌وه‌ستێ‌ و ئاماده‌شه‌ ده‌ست بۆ هه‌موو موحه‌ره‌ماتێك به‌رێت و لاشی‌ گرنگ نابێت هه‌رێم و هاوڵاتیان سوودمه‌ند یا زه‌ره‌رمه‌ند ده‌بن ، ئه‌وه‌ی‌ ئه‌م حیزبه‌ بناسێ به‌رچاوی‌ لێڵ و تاریك نابێت و ده‌زانێت ، كه‌ هه‌ژاركردنی‌ هاوڵاتیان و ده‌ستبه‌سه‌راداگرتنی‌ قووت و موچه‌ی‌ خه‌ڵك و به‌هه‌ده‌ردانی‌ سه‌روه‌ت و سامانی‌ گشتی‌ و ڕكه‌به‌رایه‌تی‌ لایه‌نه‌ سیاسیه‌كانی‌ هه‌رێم و كوردانی‌ شۆڕشگێڕی‌ ئه‌مدیو و ئه‌ودیو ، ته‌سلیم بوون به‌لایه‌نه‌ ده‌ركییه‌كان پیشه‌ی‌ ئه‌م حیزبه‌ بوه‌ و هه‌موو ئه‌وهه‌نگاوانه‌ش بێ‌ دوو دڵی‌ ده‌چنه‌خانه‌ی‌ دژایه‌تیكردنی‌ به‌رژه‌وه‌ندییه‌ باڵاكانی‌ كورد و پوچه‌ڵكردنه‌وه‌ی‌ ڕیفراندۆم و خه‌ونی‌ سه‌ربه‌خۆیی‌ كوردستان ، كه‌ به‌رده‌وام به‌رپرسانی‌ پارتی‌ بانگه‌شه‌ی‌ بۆده‌كه‌ن و خۆیانكردۆته‌ تاكه‌ سوارچاكی‌ ئه‌و گۆڕه‌پانه‌ !
گه‌ر پارتی‌ كه‌مێك به‌ته‌نگ دواڕۆژی‌ كورد و خه‌بات و خوێنی‌ شه‌هیدان و گه‌یشتن و به‌ئامانجه‌ له‌مێژینه‌كانی‌ بهاتایه‌ ، ده‌بوایه‌ خۆشخاڵی‌ خۆی‌ بۆ ئه‌و ڕێككه‌وتنه‌ ده‌ربڕیبایه‌ و ئه‌وه‌ی‌ به‌ده‌رفه‌ت بزانیبایه‌ و به‌په‌له‌ داوای‌ كۆبونه‌وه‌ی‌ هه‌موو لایه‌نه‌ سیاسیه‌كانی بكردایه‌ و هه‌رچی‌ له‌به‌رژه‌وه‌ندی‌ یه‌كڕیزی‌ خه‌ڵكی‌ كوردستان و لایه‌نه‌ سیاسیه‌كاندایه‌ ئه‌وه‌ی‌ هه‌ڵبژاردایه‌ بۆ تێپه‌ڕاندنی‌ ئه‌م بارودۆخه‌ و ئه‌و ڕیفراندۆمه‌ی‌ كه‌ باسی‌ ده‌كات و به‌كرده‌وه‌ش بیسه‌لماندایه‌ كه‌ پارتی خه‌مخۆری‌ گه‌له‌ نه‌ك كورسی‌ و سه‌رۆكایه‌تی‌ ، ئه‌وكات لای‌ لایه‌نه‌ سیاسیه‌كان و خه‌ڵكی‌ كوردستان به‌شێوه‌یه‌كی‌ تر سه‌یرده‌كراو ماوه‌ی‌ كورسیه‌ زێڕینه‌كه‌شی‌ به‌ڕه‌زامه‌ندی‌ هه‌مووان جارێكی‌ تر شه‌رعیه‌تی‌ پێ‌ ده‌به‌خشرایه‌وه ‌.
پارتی‌ ، له‌ماوه‌ ڕابردوودا بۆ خۆڵكردنه‌ چاوی‌ خه‌ڵك و ڕابواردن به‌سازان ، به‌رده‌وام داوای‌ كۆبونه‌وه‌ی‌ له‌ گۆڕان كردوه‌ ، به‌ڵام كۆبونه‌وه‌كه‌ی‌ مه‌كته‌بی‌ سیاسی‌ پارتی‌ زۆر به‌ڕوونی‌ ئه‌و ڕاستیه‌ی‌ ده‌رخست كه‌ ” هه‌ڵوێستیان به‌رامبه‌ر گۆڕان نه‌گۆڕاوه ‌” و ئاماده‌ش نین هه‌ڵه‌كانیان ڕاست بكه‌نه‌وه‌ ، ئه‌ی‌ كه‌ ئه‌مه‌ بیروڕای‌ پارتی‌ بووه‌ ، داوای‌ دانیشتن و كۆبونه‌وه‌ی‌ له‌گه‌ڵ گۆڕان و كۆبونه‌وه‌ی‌ پێنج قۆڵی‌ بۆ چ مه‌به‌ست و له‌پێناوی‌ چیدابووه‌ ؟ .

کلیک بکەرە سەر سمبولەکانی خوارەوەو ، ئەم بابەتە ئاشنا بکە بە هاوڕێکانت

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت