Marks

نامه‌یه‌كی عاشقانه‌ی ماركس بۆ هاوسەرەکەی ‌

ئازیزی دڵه‌كه‌م
ئه‌وا دیسان نامه‌ت بۆ ده‌نووسم چونكه‌ ته‌نیام ، هه‌میشه‌ به‌لامه‌وه‌ سه‌خت بووه‌ كه‌ به‌ته‌نیایی له‌زه‌ینی خۆمدا گفتوگۆ له‌گه‌ڵ تۆدا بكه‌م به‌بێ ئه‌وه‌ی تۆ له‌و باره‌یه‌وه‌ شتێك بزانی یان بیبستی یان ته‌نانه‌ت بتوانی وه‌ڵامیشی بده‌یته‌وه ‌.
دابڕانی كورت ، شتێكی باشه‌ ، چونكه‌ ئه‌گه‌ر دوو خۆشه‌ویست به‌شێوه‌یه‌كی هه‌میشه‌یی و له‌سه‌ر یه‌ك ریتم پێكه‌وه‌ بن ، مه‌سه‌له‌كانی ژیان . گه‌لێ دووباره‌ ده‌بنه‌وه‌و به‌شێوه‌یه‌ك تێكده‌چرژێن ده‌سته‌وسان ده‌بن له‌جیاكردنه‌وه‌یان .
دووریی ، ته‌نانه‌ت بورج و قه‌ڵا گه‌وره‌كانیش له‌به‌رچاو بچووك ده‌كاته‌وه‌ ، له‌كاتێكدا شته‌ بچووك و چرووك و هیچه‌كان به‌ته‌ماشایه‌ك له‌نزیكه‌وه‌ ده‌بن به‌شتی گه‌وره ‌.
خوو و نه‌ریته‌ بچووكه‌كان كه‌ له‌وانه‌یه‌ به‌شێوازێكی هه‌ستیارانه‌و فیزیكیانه‌ ببنه‌ هۆی ئازاردان و دڵ یه‌شانی مرۆڤ ، به‌ڵام كاتێ له‌یه‌ك دوورده‌كه‌وینه‌وه‌و له‌به‌رچاوی یه‌ك نابین ، ئاواده‌بن و نامێنن .
هه‌ست و سۆزی قووڵ كه‌ به‌هۆی نزیكی و به‌ریه‌ك كه‌وتنی ئازیزانه‌وه ‌، شكڵ و شێوه‌یه‌كی بچووك و دووباره‌ به‌خۆیانه‌وه‌ ده‌بینن ، به‌هۆی جادووی دوورییه‌وه‌ ده‌گه‌شێنه‌وه‌و ده‌چنه‌وه‌ ره‌هه‌ندی سروشتیی خۆیان . ته‌نیا دووریی ده‌بێته‌ هۆی ئه‌وه‌ی تۆ له‌من و له‌خه‌ونه‌كانی ته‌نیاییم ، بفڕێنرێیت و له‌چاو ون بیت ، منیش به‌خۆشه‌ویستیم بۆ تۆ ، یه‌كسه‌ر تێده‌گه‌م كه‌ زه‌مانی دووریی پێوسته‌ بمێنێ و ئه‌و باران و خۆره‌ی ژیان و گه‌شه‌كردنی گژو گیایان پێوه‌ به‌نده ، ده‌بێ دابكه‌ن و هه‌ڵبێن .
ئه‌و كاتانه‌ی له‌به‌رچاوم نیت و لێم ونی ، عه‌شقی من بۆ تۆ ، به‌جوانی خۆی ده‌نوێنێ ، ئه‌وه‌نده‌ شتێكی مه‌زنه‌ ، دنیایه‌ك وزه‌و توانای كه‌ڵه‌كه‌ بووی گیانم و شته‌ تایبه‌تییه‌كانی ناو دڵمی داگیركردووه ‌. هه‌ر ئه‌و عه‌شقه‌ ده‌بێته‌ هۆی ئه‌وه‌ی دیسان هه‌ستبكه‌م كه‌ ئینسانم ، چونكه‌ به‌ئه‌زموونی هه‌ستێكی قووڵ و ره‌نگاو ره‌نگدا گوزه‌ر ده‌كه‌م .
لێكۆڵینه‌وه‌و فێربوون و په‌روه‌رده‌كردنی نوێ ، گیرۆده‌ی كردووین و ده‌ستی گرتووین ، شك و گومانیش بۆته‌ هۆی ئه‌وه‌ی له‌سه‌راپای تێگه‌یشتنه‌ بابه‌تی و زه‌ینییه‌كانماندا ورد ورد به‌دوای هه‌ڵه‌دا بگه‌ڕێین ، هه‌موو ئه‌مانه‌ به‌شێوه‌یه‌ك ره‌نگڕێژ كراون كه‌ سست و ولاوازیان كردووین و وایان لێكردووین هه‌ر خه‌ریكی گله‌یی و گازنده‌ بین . به‌ڵام عه‌شق دیاره‌ عه‌شقی فۆیرباخی نا نه‌ عه‌شق بۆ میتاپۆلیزم و نه‌ بۆ پڕۆلیتاریا به‌ڵكو عه‌شق ته‌نیاو ته‌نیا بۆ یارو به‌تایبه‌تیش عه‌شقی من بۆ تۆ ، ده‌بێته‌ هۆی ئه‌وه‌ی مرۆڤ سه‌رله‌نوێ هه‌ست بكات كه‌ مرۆڤه‌ .
له‌م دنیایه‌دا بێشومار ژن هه‌یه‌و زۆریشیان رووخۆش و جوانن . به‌ڵام من له‌كوێ ده‌توانم رووی گه‌شی تۆ په‌یدا بكه‌م كه‌ هه‌ر به‌شێكی بچووكی و ته‌نانه‌ت هه‌ر خه‌تێكی یان چرچییه‌كی به‌یاد هێنه‌ره‌وه‌ی گه‌وره‌ترین و شیرینترین یاده‌وه‌ریی ژیانی منه‌ ، ته‌نانه‌ت له‌كاتی رووبه‌ڕووبوونه‌وه‌ی ئازارو ژانه‌ بێكۆتاییه‌كان و ئه‌و زیانانه‌دا كه‌ لێم كه‌وتوون و تا ئه‌به‌د قه‌ره‌بوو ناكرێنه‌وه‌ ، هه‌رگیز گله‌یی و گازنده‌یه‌كم لێ نه‌بیستووی .
هه‌ر كاتی گۆنای شیرینی تۆ ماچ ده‌كه‌م ، سه‌راپای ئێش و ئازاره‌كان له‌خۆم دوور ده‌خه‌مه‌وه‌ .

دووباره‌ سڵاو، ئازیزی دڵه‌كه‌م .
هه‌زاران جار خۆت و مناڵه‌كان ماچ ده‌كه‌م .

كارلی خۆت .

کارل مارکس

کارل مارکس لە 21 – 07 – 1865 ئەم نامەیەی لەمانجستەری بەریتانیا بۆ جێنی خیزانی نووسیوە .

کلیک بکەرە سەر سمبولەکانی خوارەوەو ، ئەم بابەتە ئاشنا بکە بە هاوڕێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies