نەبەز گۆران: لیژنەی جنێودان، لیژنەی تیرۆری كەسایەتی.

ئەمڕۆ لە كۆڕەكەی خۆیدا، لە هۆڵی(سینەما سالم) مامۆستا (فاروق رەفیق) ئاماژەی بە ئەو دونیا پڕ لە كارەسات دا. وتی: ئێستا لیژنەی جنێودان و لیژنەی تیرۆری كەسایەتی پەیدابووە! ئەم رستەیەی بیركردنەوەی بردم بۆ جەنگەڵەكەی تۆڕە كۆمەڵایەتییەكان و ناچاریكردم شتێك بنووسم. ئەگەرچی ئەم تۆڕە كۆمەڵایەتيیانە ڕووبەرێكی گشتییە و، ئەشێت مرۆڤ لەم ڕووبەرە گشتیەدا دونیایەك نما بكات، دونیاكە بتوانێت كەمێك جیاواز بێت لەوەی كە دەبێت ببێت. ئەما، لە ئێستادا تۆڕە كۆمەڵایەتییەكان گەر مرۆڤ خۆی نەپارێزێت لێیان و، دیوارێك بەدەوری ماڵەكەی خۆیدا هەڵنەچنێت لەم رووبەرە گشتییەدا دەبێتە كەرەستەیەكی خەسارچوو.

بێگومان حیزبی كوردی چوویە هەرشوێنێكەوە بەقەت بارستایی خۆی ئەو شوێنەش پیس دەكات. (بەداخەوە) لەناو كلتوورەكەشماندا پانتاییەكی زۆر هەیە كە مرۆڤەكان بتوانن لەوێدا پیسیەكانی خۆیان هەڵبرێژن، واتە هەم كلتوورەكە و هەم فەزای ئایدۆلۆژی حیزبی كوردی و، فەزای تۆڕە كۆمەڵاییەتیەكان جیهانێكی دروستكردوە لەم جیهانەدا، هەرچی شایەنی نەوتنە، هەرچی كەنابێت بوترێت، لەپشت ناوی خوازرا و لەپشت دەمامكە نەناسراوەكانەوە دەوترێت. (كار گەیشتوەتە ئەوەی پیاو گەلێكی تەواو نەخۆش، بۆ دەستكەوتنی رستەیەك لە كەسێكی بەناوبانگ، خۆیان دەكەن بەژن!!)
هەرچۆن جاران حیزبی كوردی ( لیژنەی ئیختیالات) یی هەبوو، لە ئێستاشدا (لیژنەی جنێو، لیژینەی سوكایەتیكردن، لیژنەی تیرۆركردنی كەسایەتی، لیژنەی پەلاماردانی خێزانی یەكتری و … هتد)ی هەیە. هەموو ئەم لیژنانەش زۆر بە رێك و پێكی لەلایەن كارەكتەرە بیمارەكانی حیزبەوە ئاراستە دەكرێن و، كۆی ئەندامانی لیژینەكانیش لەوانە بیمارترن كە ئاراستەیان دەكەن.
پێویست ناكات دەست بۆنمونە ببەین، چونكە نمونەكان زۆرن و رۆژانە و شەوانە ئەوانەی لەناو ئەم تۆڕە كۆمەڵایەتییانەدان، دەرگیری ئەو كارەساتە دەبن. ئەمە دیاردە نییە تا وەك دیاردە سەیری بكەین، ئەمە ئایدۆلۆژیایە، ئەم ئایدۆلۆژیایە ڕەگ و ریشەی هەیە لەناو یادەوەری كارەكتەری كوردیدا. تیرۆركردنی كەسایەتی و جنێودان بەوانەی لە دەرەوەی چوارچێوەی حیزبی بیردەكەنەوە، نزیكەی شەست ساڵە لەناو ئەم كۆمەڵگەیەدا ئیشی لەسەر دەكرێت. (بەداخەوە زمانەكەشمان چونكە زمانێكی نێرانەیە، یارمەتیدەرێكی زۆرە بۆ بەرهەم هێنانی جنێو و سوكایەتی.)
هیچ حیزبێك لەم هەرێمەدا نییەـ دەستەیەك، تاقمێك لەو بیمارانەی لەناو تۆڕە كۆمەڵایەتییەكاندا بەرنەدابێتە ئەویتر. هەموو حیزبەكان لە راستەوە بۆچەپ، لە چەپەوە بۆ ئیسلامی، لە ئیسلامییەوە بۆ بەناو عیلمانییەكان، بەژدارییەكی گەورەی دروستكردنی ئەم جەنگەڵەن. هەرچۆن لەشوێنێكدا خۆیان دەكەن بەفریشتەو بەرامبەرەكەشیان دەكەن بە شەیتان، لەشوێنێكی دیكەدا خۆیان لێدەبێتە فریاد رەس و ئەویتریان لێدەبێتە وێرانكەر. تەواوی دونیاكەیان هێندە ئاستی دابەزیووە بۆ خوارەوە، ئیدی دەرەتانێك نەماوەتەوە بۆ هەڵسەنگاندنی، لەبری هەڵسەنگاندنی مرۆڤ ناچارە لەو دونیایە دوربكەوێتەوە. كاتێك نەتوانرا دونیایەكی پیس چاك بكەیت، چارەسەر ئەوەیە خۆت بپارێز بۆ ئەوەی دونیاكەت وەك دونیای ئەوانی كە پیس نەبێت.
پرۆژەی تیرۆركردنی كەسایەتی رەخنەگر، تیرۆركردنی دیدی جیاواز، تیرۆركردنی بیركردنەوەی جیاواز، پرۆژەیەكە لەگەڵ لەدایك بوونی حیزبی كوردیدا دروست بووە. ئەو جەنگەڵەی ئەمڕۆ لە تۆڕە كۆمەڵایەتییەكان دەیبینین و بیمارەكانی حیزب لەپشتیەوەن، بەشێكە لەو پرۆژەیەی هەرجارە و بە شێوازێك خۆی دەردەخات و، ئەمڕۆ لەم تۆڕە كۆمەڵایەتییانەدا خۆی دەردەخات.
كێشە ئەوەیە مرۆڤ گەلێكی زۆر هەن، هێشتا لە رووبەری گشتی و ڕووبەری تایبەت تێنەگەیشتوون. ئەوەی لەناو تۆڕە كۆمەڵایەتییەكاندا هەیە شوێنێك نییە، ئیتر وەك ڕووبەری تایبەت سەیری بكەیت، چونكە ماڵەكەت ماڵێكە هەموو ئەوانی كە بە ئاشكرا یان بە نهێنی دەتوانن بێنە ناوییەوە، بۆیە تایبەتمەندی تێدا كەم بووەتەوە. كاتێكیش دەبێتە رووبەری گشتی، لەبری ئەوەی ئەم پانتاییە بكرێتە كەرەستەیەك بۆ بینین و وێناكردنی شتی نوێ‌، بەشێكی زۆری كراوەتە كەرەستەیەك بۆ جنێودان، تیرۆركردنی كەسایەتی و بەرهەم هێنانی مرۆڤی بیمار.
ئەوانەی رەخنە بەجنێو تێگەیشتوون، ئەوانەی دیدی جیاواز بە سوكایەتی و پەلاماردانی خێزانی یەكتری تێگەیشتوون، ئەوانە مرۆڤ گەلێكی گوناهن. كەسانێكن پێویستیان بەوەیە سەرلەنوێ‌ پەروەردە بكرێنەوە و، سەرلەنوێ‌ ئەو چەمكانەیان پێ‌ بناسرێتەوە كە نایناسن. بەڵام حیزبی كوردی لەبری ئەوەی بیمارەكانی خۆی بەرەو شوێنێكی باش ئاراستە بكات، كردونی بە كەرەستەیەك بۆ بە جەنگەڵكردنی تۆڕە كۆمەڵایەتییەكان و لەوێوە دەست بۆ خێزانی هەموو كەس دەبەن.
ئەوەی مامۆستا (فاروق رەفیق) لە كۆڕەكەیدا بە دوورستەی دەریخست، وەستانی زیاتری پێویستە. وەستانێك سەرلەنوێ‌ زمانەكەمان، كارەكتەری كوردی، ئایدۆلۆژیای حیزبی، مامەڵەكردن لەگەڵ رووبەری گشتی، بخوێنرێتەوە و، دەست بخرێتە سەر كۆی برینەكان. بەبێ‌ دەستخستە سەر بنەوانی برینەكان زەحمەتە لەوە تێبگەین بۆچی بەشێكی زۆری كارەكتەرە حیزبییەكان حەزیان لەو زەلكاوەیە حیزب بۆیان دروستدەكات؟ یان بۆچی نایانەوێت تێبگەین؟ ئەی بۆچی جێژدەبینن لە جنێودان؟ بۆچی ئاستی خۆیان دەبەنە ئەو ئاستە نزمەوە؟ جێژ لەوەدا چییە كاتێك دەست بۆ خێزان دەبەن؟ ئەمانە و دەیان پرسیاری دیكە جێگای قسەلەسەر كردن.
ئەوەی لەپشت ناوی خوازراو، لەپشت ماڵی بێ‌ دایك و باوكەوەیە، گەر بیمارییەكی راستەقینەی دەرونی نەبێت، چ چێژێكی تێدایە كەسایەتی ئەویتر تیرۆر بكات؟ بۆ بەشێكی زۆری ئەو بیمارانە جەسارەتی خۆناساندنی خۆشیان نییە؟ كاتێك دەبینین بەشێوەیەكی بەرنامە بۆ دارێژراو ئەم كارانە دەكرێن، ناچار لەگەڵ مامۆستا (فاروق) دا دەڵێین: بێگومان ئەمانە لیژنەی جنێو، لیژنەی تیرۆركردنی كەسایەتیان دروستكردووە. بەرهەمەكەشیان دیارە كە ئەو جەنگەڵەیە كە دەیبینین.