عیماد عەلی: رەوای حەقە هەژارێکی ئەم شارە بۆ کەمێک نەوتی عەبادی، دەستی ئاوارەیەک ماچ بکات؟

سوپاس بۆ کلیک کردنە سەر تۆڕە کۆمەڵایەتیەکان و ناردنی بابەتەکە بۆ هاوڕێکانت

هەر ئەوەندە تەماشایەکی ئاوارە عەرەبەکەی کرد، کە ریزی بۆ وەرگرتنی نەوتەکەی عەبادی گرتبوو، بە چاوێکی گریاناوی و بە دڵێکی پر لە خەم و تەنگەنەفەسیەوە، گوتی کاکە ئەمە نەوتەکەی عەبادیە بۆ ئەمانە هاتووە؟ وتم بەڵێ . کەوتە دەربرینی حاڵی دڵی خۆی و وتی: دەشێت منێک ئەمە حاڵم بێت و لیترێک نەوتم لەماڵە پێنج کەسیەکەمدا نەبێت و ئەم وەزعە وا ببینم و…… دای لە پڵمەی گریان و قسەکانی پێ تەواو نەکرا و بۆ ماوەیەک بە بێ دەنگی وەستا و لە جێی خۆی بێ جوڵە و نوتق بە تێرامانەوە تەماشای پرۆسەی دابەشکردنی نەوتەکەی عەبادی بەسەر ئاوارەکاندا کرد، کە لە ناو شارێکی گەورەی ئەم کوردستانەی ژَێر زەوی پر لە نەوت و کانزایەدا ئەمە حاڵی بێت. ئەوەی بینیم هەر ئەوەندە مابوو بچم بەناخی زەویدا و ئاواتەخوازبووم کە پێش مردنم ئەو دیمەنەم لە ژیانمدا نەبینیبا. ئینجا وتی: کوری خۆم دەشێت ئەمانە حکومەتەکەیان لەبەغداوە نەوتیان بۆ بنێریت و حەقی خۆیانە و ئەو دڵسۆزیەی دەسەڵاتدارانیان پیرۆزیان بێت، بەڵام دەکرێت منێک لەسەر زەوی و ماڵی خۆم بەبژی و مەمرە بژیم و خاوەن قوربانی و بێ وڵات و بێ حکومەتی دڵسۆز بم، چی بکەم، بۆ وەزعمان بەیەکلادا ناخەن و خەریکی ملشکاندنی یەکترن.
ئینجا وتی: ئەم سەرمایە رەحم بەکەس ناکات و چاوەرێی من ناکات کە کەی هەمبێت برێک نەوت بکرم . وتی بەسەری تۆ لە سەرمادا بمرم دەمم بۆ دەستی ئەمانە نابەم، هەرچەند دراوسێیەکی عەرەبمان هەیە زۆر جار دەڵێت ئەگەر نەوتت پێویستە بەشت دەدەم .
وتم: مامە کَیان حەق وایە ئەم بەناو دەسەڵات و حکومەتەی ئەم حاڵەتەی دروستکردووە لەدەرئەنجامی نەزانین و بە هۆکاری دزی و گەندەڵی و ململانێی حزبی و شەخسی و بەدەنگی بەرز شکستهێنانی خۆی رابگەیەنەێت و، لەم کاتەدا نەک وازی لەم دەسەڵاتداریە بهێنابایە، بەڵکو دەبوو سەرە زەبەلاحەکانی دەسەڵاتەکەمان بەم وەزعەی تۆ خۆیان لەناوبردبایە و ئەم میلەتەیان نەگەیاندبایە ئا ئەم وەزعە . ئالەم دیمەنەوە وەزعی حکومەت و چۆنێتی بەرێوەچونی کاروباری دەسەڵات شیبکەنەوە و هەڵسەنگاندن بۆ هەست و شعور و میلەتدۆستیی بەرپرسەکانی ئەم گەلە خێر لەخۆنەدیوە بکەن.

سوپاس بۆ کلیک کردنە سەر تۆڕە کۆمەڵایەتیەکان و ناردنی بابەتەکە بۆ هاوڕێکانت