26-07-2017 Meriwan-Wrya-Qnie

مەریوان وریا قانیع: پێنج سەرنج لەسەر ھەڵبژاردنەکانی بزوتنەوەی گۆڕان.

یەکەم: لە دوای مردنی نەوشیروان مستەفاوە پارتی و یەکێتی چاوەڕوانی ئەوەبوون بزوتنەوەی گۆڕان نەتوانێت لە دەوری ھاوبەشێک کۆببێتەوە و بۆ چەندان پارچە و ئارستەی جیاواز دابەشببن و وەک بزوتنەوەیەکی کۆگیر کۆتاییان پێبێت.. ئەمەشیان بە ئەمریکییەکان و وڵاتانی تر وتبوو. بەڵام ئەوەی بینیمان پێچەوانەی ئەمە بوو، ئەم بزوتنەویە لە ماوەی نزیکەی دوو مانگدا، پێچەوانەی ئەو چاوەڕوانییەی سەلماند و تا ڕادەیەکی باش بەسەر ناکۆکییە ناوەکییەکانیاندا زاڵبووە و خۆی وەک بزوتنەوەیەکی کۆگیر ڕێکخستۆتەوە. ئەمەش سەرەتایەکی ماقوڵە و پێویستی بە قووڵکردنەوە و گەشەپێدانی زیاتر ھەیە.
دووھەم: تا ئەم ساتە بزوتنەوەی گۆڕان بەسەر کێشەی تەوریسی سیاسیدا سەرکەوتوە و لەدوای مردنی نەوشیروان مستەفاوە دەسەڵات لەناو بزوتنەوەکەدا نەگواسترایەوە بۆ کوڕ و برا و خزم و کەس و کارە نزیەکانی نەوشیروان مستەفا. تەوریسیی سیاسیی نەخۆشی ژمارە یەکی ناو کایەی سیاسەتە لە کوردستاندا و خۆپاراستنی گۆڕان لەم نەخۆشییە کارێکی سیاسیی گرنگ و بەسودە.
سێھەم: ئەو خاڵەی کە بزوتنەوەکە تیایدا دەرنەچووە و بەتەواویش فاشیل بووە سیاسەتی جێندەر و بەھێزکردنی پێگەی ژنانە لەناو بزوتنەوەکەدا. سەرکردایەتییە تازەکەی ئەم بزوتنەوەیە سەرکردایەتییەکی پاتریارکیی پیاوسالارانەی تەقلیدییە و تەواو ناکۆکە بە خواستی سەرەکی ئەم بزوتنەوەیە لە بەرپاکردنی گۆڕانکاریی ھەمەلایەن لەناو کۆمەڵگای کوردیدا. لەم ڕووەوە سەرکردایەتی ئەم بزوتنەوەیە ھەڵگری ھەموو نەخۆشییەکانی تری ناو ھێزە سیاسییەکان و ناو کەرتە تەقلدیی و دواکەوتوەکانی کۆمەڵگای کوردییە.
چوارھەم: ھەندێک لەوانەی لەم ھەڵبژاردنەدا چوونەتە پێگەی سەرۆکایەتی و ئاستی باڵای بزوتنەوەکەوە کەسانێکن باشتربوو پشووبدەن و شوێنی خۆیان بۆ خوێن و توانای نوێ بەجێبھێڵن. دەبوایە سەرکردایەتیی بزوتنەوەکە ڕەنگدانەوەی پێگە جەماوەریەکەی ئەم بزوتنەوەیە بێت کە پڕیەتی لە گەنجانی پڕ وزە و بەتوانا. دەبوایە سەرەتایەکی تەندروستیان بۆ ”خانەنشینبوونی سیاسیی“ لە کوردستاندا بھێنایەتە کایەوە.
پێنجەم: شێوازی بەڕێوەچوونی ھەڵبژاردنەکان بێ پەڵە و نوقسانیی بەرچاو نەبوو، ڕێکەوتنی ژێربەژێر و تەوافوقی نادیموکراسییانە پرۆسەی ھەڵبژاردنەکانی لە مەساری ڕاستەقینەی خۆیا بردە دەرەوە و ئەو کەلەپوری ھەڵبژاردنەی تیادا زیندووکردەوە کە لەناو یەکێتی نیشتیمانیەوە ھاتووە، کەلەپوری دروستکردنی تەوافقێکی نادیموکراسییانە بەر لە پرۆسە دیموکراسییەکان.
بە کورتیی، ئەوەی گۆڕان لە ئێستادا و لە دوای مردنی ڕێکخەرەکەیانەوە ئەنجامیانداوە، دەسکەوتێکی سیاسیی گرنگە بۆ بزوتنەوەکە، بەڵام گۆڕان بۆئەوەی بەردەوام بێت و بتوانێت ھێزێک بێت ھەندێک ئومێدی عەقڵانی لەسەر بینابکرێت، دەبێت بەسەر ھەموو ئەو کورتھێنانەی ئێستایدا سەربکەوێت. گۆڕان لە ئێستادا خۆی لە دابەشبوون و پارچەپارچەبوون و تەوریسی سیاسیی پاراست، بەڵام بۆئەوەی بتوانێت ھێزێک بێت بۆ گۆڕانکاریی پێویستە خاوەنی ھێز و ئیرادەیەکی نوێ بێت و لەخەمی پیادەکردنی بەرنامە سیاسییەکەیدا بێت.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies