ئاکۆ برایم: سەرنجێک لەسەر خۆپشاندانەکەى شارى بانە.

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئەوەى کەلە بانە رویداوە، هەڵچوون و نارەِزایەتی یەکى خەڵکى توڕە و قین لەدڵى ئەو شارەیە، لەبەرامبەر کوشتن و سوکایەتى پێکردن بە کۆڵبەران و کاسپکاران. ئەوان رژاونەتە سەر شەقام تا رژێمى پەت و سێدارە ناچار بکەن تا دەستبەردارى ئەو تاوان و کوشت و بڕە بێت. بەکوردى و بەکورتى ناڕەزایى و خۆپیشاندانەکە خۆرسکە و دوورە لەهەموو هەڵچوون و کارێکى سیاسى، هیچ گروپ و حزب و لایەنێکى لەپشت نى یە، بۆیە هەقى خۆیەتى کە حزبەکانى دانیشتوى ئۆردوگا و ورگ زلەکانى ئۆپۆزسیۆن، نەیکەن بەهات و هاوار و بەیاننامە دەرکردن و پاڵپشتى کردن، میللەت فریو مەدەن و خەڵک بەکوشت مەدەن و ماڵو حاڵیان وێران مەکەن، لەبەر ئەوەى ئەو راپەڕینە دوور و نزیک پەیوەندى بەئێوەوە نى یە و، خۆشتان مەکەن بەخاوەنى، چونکە لەمێژە میللەت ئێوەى تەڵاقداوە، ئەزانێت چین و بایى چەندن، بۆیە تکا دەکەم بۆخاترى ناو و ناو بانگ و خۆدەرخستنتان رەوشەکە مەشڵە ژێنن، ( مەبەستم ئەوە نى یە کە من دژى راپەرین و سەرهەڵدانى جەماوەریم. نەخێر من لەهەر بستێکى ئەم کوردستانە ناڕەزایى هەبێت و لەدژى دوژمن میللەت رابێت، بەگیان و دڵ پشتیوانیانم) بەڵام ئەوەى کە دەیڵێم ئەوەیە کە ئەو پارتانە هیچیان پێناکرێت، لێچونەتەوە، تواناى بەرەنگارى و بەرخودانیان نى یە،ناتوانن پارێزگارى لەخۆشیان بکەن.

میللەت و خەڵکیشیان تەواو بى باوەڕکردووە، ماوەى چارەکە سەدەیەکە بچووکترین چالاکى یان لەهیچ شوێنێک نەکردوە، ئێستاش کە میللەت لەدژى زوڵم وستەم رابووە، خۆتان مەکەن بەسوورەى بەرلەشکر و مەبنە دەمڕاست و خاوەنى ئەو راپەڕینە، لەبەر ئەوەى ئێوە وەک پیشەى هەمیشەیتان هیچتان پێناکرێت، جگە لەوەى کە بیانوویەکى باش دەدەن بەرژێم تا زیاتر دەستکراوە بێت و، زۆرترین تاوان و سێدارە و زیندان دەرهەق بەومیللەتە بکات، ئێوە هیچ سەنگ و قورسایى تان لەو بەشە نى یە و هیچ پێگەو رێکخستنێکى جەماوەریتان نى یە، تا ببنە جێگەى متمانە و رەزامەندى خەڵک و،میللەت پێتان دڵخۆش بێت. بەو ئومێدە شەڕى مان و نەمان بکات هەرچى تایبەتیشە بە برادەرانى پەکەکەو یەرەکە و کۆدار کە بەپێى رۆژ و بەرژەوەندى لەگەڵ ئێران مامەڵە دەکەن، بەهوشیارى و زیرەکانە مامەڵە بکەن و نەیکەنە تەق و تۆق و یەک دوو رەبایە بگرن، چەند پاسدار و پۆلیسێک بکوژێت. پێى وابێت تۆڵەى کردۆتەوە ئێرانى تۆقاندوە، نا نەخێر ئەوە جگە لەوەى کە دۆخەکە زیاتر خراپ ئەکات، دەستى ئێرانیش کراوەتر ئەکات، تا باشتر و چاکتر پەلامار بدات،، هەموو نموونەى باکور (ئامەد و شیرناخ و ماردین و شارەکانى دیکەمان) لەبەر چاوە، کە چۆن باش چەندین مانگ هێرش و پەلامار، سەرەنجام رەوشەکە ئاسایى بویەوە، ئەوەى کە زیانى پێکەوت و ماڵ و لانەى لێ تێک چوو، هەر کوردە هەژار و داماوەکە بوو، کەبەشى زۆرى کوردى رەسەنى ئەو ناوچەیە لەتاو شەڕ و قات و قڕى کوردستانى جێهێشت و چووە قوڵایى شارەکانى تورکیە. بۆیە ئەگەر هەمان سیناریۆ و شەڕ لەو ناوچەیە دووبارە بێتەوە، بەدورى مەزانە کە رژێم لەتورکیا خراپ تر دەکات بەتایبەت بۆ ئێستا لە رقى ریفراندۆم و سەرکەشیەکانى باشور پەست و نیگەرانە. رەنگبێت تەواو کۆنترۆڵى سنور بکات و پشتێنەیەکى بەهیز و مەحکەم بکێشێت، کە زیانى بۆ هەموو لایەک هەیە.

گەر سەرنج بدەیت لە رەوش و گوزەرانى کوردانى باکور قوربانیانى شەڕو کوشتارەکانى پێشوو بۆ دەیان ساڵى تریش ناتوانن بێنەوە سەرخۆیان، ژیانێکى سادە و ساکار  و مەمرەو مەژى بەسەربەرن. بۆیە کورد ئەڵێ لەبابێت و لەباران بێت لەبەفر کەم دەبێتەوە. هەرچى بێت لەکۆتایدا هەر نەگبەتى و دەردى سەرییەکە بۆ ئەو خەڵکە دەبێت، کە رەنگە رژێم لەبەرامبەردا رەوشى ئاوارتە رابگەیەنێت و، قەدەغەى هاتوچۆ لەناو شارو گوندەکان بکات، میللەت بەرەو برسێتى و لەناوچوون بەرێت. ئەوەیان رەئى خۆمە و چۆن لێکى دەدەنەوە بەچى تاوانبارم دەکەن گەردنتان ئازاد بێت، بەڵام راستییەکە و نکوڵى لێ ناکرێت. ئەویش ئەوەیە هەرگیزاو هەرگیز رژێمێکى گەورە و زەبەلاحى وەک ئێران بە دووحزبى دەستەمۆ و دانیشتوى ناو ئۆردوگاى وەک (کۆمەڵە و دیموکرات )ناروخێت، بگرە هەر باکیشى پێان نى یە و حسابى نەبوویان بۆدەکات، هەتا پشتیوانى نێو دەوڵەتى مان نەێت، هەتا وەک رژێمى سەدام، ئەمریکا و وڵاتە زلهێزەکان نەبنە هاوپەیمان و پشتیوانى کوردو، گلۆپى سەوز بۆ روخاندنى رژێم هەڵنەکەن، هەموو جوڵانە و چالاکى و شۆڕشێک لەو چەندشارە کوردانەدا بێ ئاکامەوە. هەر بەنوشوست و ماڵوێرانى بۆکورد کۆتایى دێت.

 

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت