گۆران هەڵەبجەیی: کێ ئەم هاوسۆزیە بەگەر دەخات؟

[بەیەکڕێزی ، ڕێز بۆخۆت پەیدا دەکەیت و هەم هێز]
لە ئەنجامی ڕیفراندۆمەکەی باشووری کوردستان، وڵاتانی تورکیا و ئیران، عیێراق { تاڕادەیەکیش سوریا } کەوتنە هەڕەشە لەو بەشەی کوردستان.
ئەو وڵاتانە کە تێکەڵەیەکن لە ناسیۆنالیزم و ئاین و مەزهەب [شیعەو سوونە]، بەردەوام ناکۆک و ناتەباو دژ بە یەکبوون . تەنها شتێک کە بەردەوام لەسەری کۆک و تەبا بوون و پێکەوە کاریان بۆ کردوە، داژایەتی کورد بووە. هەر جارێک و لەهەر زەمەندێکدا کورد نزیک بووبێتەوە لە دەسکەوتێک، ئەوانە [ ئیدی هەر حیزبێک لەسەر دەسەڵات بووبێت]، پێکەوە کاریان بۆ لەبار بردنی ئەو دەسکەوتە کردوە و زۆر جاریش سەرکەوتووبوون.
لە بەرامبەردا کوردانی سێ پارەچە،چ وەک خەلک و ڕێکخراو و حیزب هەڵوێستێکی جومێرانەیان دەربڕی بۆ پشتگیری لە باشووری کوردستان.
* هەر پاش کۆتاهاتنی پرۆسەی دەنگدان ، کوردانی ڕۆژهەڵات لە زۆرێک لە باژێرەکانی ئەوبەشە بۆخۆشی دەربڕین و پشتگیری ڕژانە سەرشەقامەکان، کە بە هەزارەها مەزەنە دەکران.
بێگومان ئەم هەڵوێستە خۆڕسکەی کوردانی ئەو بەشەی کوردستان دەسەڵاتدارانی سەرکووتکەری جمهوری ئێرانی تووشی شۆک کردبوو . حەشامەتەک هێندە زۆربوون، بۆیە پیاوانی سەرکووتکەری ڕژێم نەیانتوانی هیچ پەرچەکردارێک بنوێنن وەک کردەی هەمیشەییان ئەو خەڵکە داپڵۆسن، بەڵکە تەنها تەماشاکەر بوون.
بێگومان هێزە سایسی و چەکدارەکانی ڕۆژهەڵاتیش هەڵویستیان ئاشکرایە کە بەردەوام پاڵپشت بوون بۆ باشوور.
* کوردانی ڕۆژئاوا لەسەری هەموویانەوە بەڕیز ساڵح موسلیم و سەرکردە سیاسی و سەربازیەکانی پەیەدە، جوانترین هەڵوێستیان نیشاندا، ئەویش بە ئامادەگییان بۆ کردنەوەی سنورەکانیان بەڕووی باشووردا، گەر بێت و تورکیا سنوورەکانی دابخات.
نەک هەر ئەمە بەڵکو ئامادەییان دەربڕی بۆ ناردنی هێزی شەڕڤانان بۆ پارێزگاری لە باشوور.
* کوردانی باکووریش لە حیزبی هەدەپە و کەسە تێکۆشەرە باڵاکانیان، وەک سەلاحەدین دەمرتاش و عوسمان بایدەمیر، هەرەوها لەیلا زانای تێکۆشەر و هاوخەباتکارانیان، هەموو هاوسۆزی و پشتگیریان بۆ کوردانی باشوور دەربڕی.
لەولاشەوە سەرکردەکانی هێزی گەریلا، لەسەری هەموویانەوە بەڕێز جەمیل بایک بەتووندی ئیدانەی ئەو هەڕەشانەی کرد کە لە باشوور دەکرێن لەلایەن تورکیاوە.
وێرای ئەمە هێزەکانی پاراستی گەڵ {گەریلاکانی پێکاکا} ئامادەییان دەربڕی بۆ ناردنی هێز بۆ داکۆکی لە کەرکوک و ناوچە دابراوەکان لە حاڵەتی هێرشی سوپای تورکیاو عیراقدا.
نکولی لە ناکۆکی نێوان هێزە سیاسەکانی کوردستان ناکرێت، چ لەیەک پارچەدا یاخود لە نیوان کوردانی پارەچەکانی دیکەدا، ئەمەش بەهۆی بەرژەوەندی و تێروانین و پەیوەندیانەوەیە بە هێزە دەرەکیەکانەوە. لە حاڵەتی ئیستادا تا ڕادەیەکی باش تەباییەک لە ئارادا هەیەو هەستی پێدەکرێت و ئەو ساردیەی جاران کاڵ بووەتەوە.
جا پرسیار ئەوەیە ئایا ئەم دۆخە لەبارە دەبێتە هەوێنی ،کاری هاوبەش و یەکخستنی ماڵی کورد؟ ئایا کاتی ئەوە نەهاتووە هەندێک لە حیزبە باڵادەستەکان لەکەلی شەیتان بێنەخوارەوە و دەستبەرداری بەرژەوەندی حیزبی و ئەقڵیەتی حیزبی گەورە وخۆسەپاندن کۆنترۆڵکردنی هەژمونی سیاسی و باڵادەستی ببن؟
ئایا کاتی ئەوە نەهاتووە ئەم هەوڵومەرجە وەگەڕ بخرێت بۆ کردنەوەی لاپەڕەیەکی نوێ لە گەڵ یەکتردا لە باشوور، هەروەها لە نێوان دەسەڵاتدارانی باشور و پارچەکانی دیکەدا.
گرنگە یەکیتی و پارتی کە زۆر جار زیادەڕۆییان کردوە لە مراعاتکردنی ئێران و تورکیادا، لە ئێستادا مراجەعەیەکی سیاسەتی خۆیان بکەن و تا چەند پێیان دەکرێت ئەو پەیوەندیە بخەنە چوارچیوەیەکی لۆژیکانەوە ڕێگەنەدەن ئەودوو وڵاتە هەژموونی خۆیان بەسەریاندا فەرز بکەن . گرنگە ئەو دوو حیزبە بزانن تەنها هیزێک کە دەکرێ پشتی پێ ببەسترێت کوردانی بەشەکانی دیکەن ،کە بە کردەوەش سەلماندوویانە.
جا هیوادارم حیزبە سیاسیەکان ئەم دەرفەتە لەدەست نەدەن و ئەم هاوسۆزیە گەرمەی کوردانی بەشەکانی دیکە فەرامۆش نەکەن و سودی لێوەربگرن بۆ پتەوکردنی پێگەی کورد.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies