نەبەز گۆران: ئێمە لەناو سیستەمی سەرمایەداریدا.

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

ئەم هەرێمەی ئێمە، وەك خاڵێكی بچوك لەناو سیستەمی سەرمایەداریدایە. ئەوەی ئەمڕۆ جیهان بەڕێوەدەبات، گوتاری سیاسیی نییە، سیستەمی سەرمایەدارییە. لەهەرشوێنێك ترسێك هەبێت لەسەر ئەو سیستەمە، ئەو شوێنە دەبێتە خاڵی لاواز بۆ كۆی سیستەمەكە و هەوڵی چارەسەركردنی دەدرێت. هەرێمی كوردستان دەیەوێت بەگوتارێكی حیزبی، دەسكاری نەخشە گەورەكەی سیستەمەكە بكات! ئەم دەسكاریكردنە هەمیشە وەك ترسێك و گۆڕینی نەخشە گەورەكەی سیستەمەكە سەیردەكرێت و تەواوی سیستەمەكە هەوڵی راگرتنی دەدات.
هەر ئەو رۆژەی میدیای (بی، بی،سی) نووسی: “ئەگەر هەرێمی كوردستان جیاببێتەوە، ئیدی عێراق لەرووی ریزبەندی بەرهەم هێنانی نەوتەوە، دەكەوێتە دوای دوژمنەكانی ئەمریكا و ئەوروپا.” بەم هەواڵە تەواوی سیستەمەكەی توشی ترسێك كرد. نە رۆژئاوا، نە ئەمریكا، نە ئەو عەقڵەی لەپشتگوتارە سیاسییەكانەویە، ناتوانێت بەرگەی ئەم گۆڕانكارییە گەورەیە بگرێت.
یەكێك لە كێشە گەورەكانی عەقڵی سیاسیی كورد ئەوەیە، نایەوێت بەوردی مامەڵە لەگەڵ ئەم سیستەمە بكات، سەرەتا زۆر بەگەرمی هەرێمی خستە ناوییەوە و، ئێستا دەیەوێت وەك جەستەیەكی نامۆ لەناو سیستەمەكەدا دەركەوێت، كاتێك ئەم جەستە نامۆیە لە سیستەمەكەدا دەردەكەوێت، ئیدی تەواوی ئەوانەی پەیوەستن بەسیستەمی سەرمایەدارییەوە دژی دەبن.
ئەمرۆ ئەو (ئەنجومەنی سیاسیی كوردستان، داش عێراق) ە راگەیاندرا، رەنگە ئەمە هەوڵێك بێت بۆ ئاشتبوونەوە لەگەڵ سیستەمەكە. پێناچێت ئەوەی دەنگدەرانی (بەڵێ‌) چاوەڕێیاندەكرد رووبدات. بەیاننامەی دووهەمی ئەو ئەنجومەنە، خۆبەستنەوەبوو بە گوتارەكەی (سیستانی) بناغەی گوتارەكەی (سیستانی) هێنانە ناوەوەی ئەو جەستە نامۆییە بۆناو سیستەمەكە و بۆناو ئەو نەخشەیەی گە پێشوتر سەرمایەداری كێشاوییەتی. بە پێچەوانەی هەمووانەوە بروام وایە ئەنجومەنەكە بۆ خۆقوتاركردنە لەو نامۆبوونە و، گەرانەوەیە بۆ نەخۆشە كۆنەكەی سیستەمی سەرمایەداری.
جیاواز لەم ململانێیەی سەرمایەداری لە جیهاندا دەیكات، هەر یەك لە ئێمەی تاكی كورد دەتوانین لەشوێنی خۆمانەوە خەونی دەوڵەت ببینین و لەگەڵی بین، ئەما ئەم خەونە لەروی تەحقیقەوە پێویستی بە خۆگونجانە لەتەك دونیای سەرمایەداری. شەڕی ئێستا شەڕی ئابوورییە، شەڕی سەرمایەدارییە. مەترسیدروستكردن بۆ ئەم سیستەمە، خۆ پەراوێزخستن و لەخۆدانە.
(لەبەر ئەوەی كورد بە درێژایی مێژوو دەوڵەتی نەبووە، شعوری هەستكردن بە دامەزراوەی یاسایی تێدا لاوازە.)
(ئەنجومەنەكەی داش عێراق) لەروی تێگەیشتنی یاساییەوە، جارێكی تر ئەو هەستنەكردنەیە بە دامەزراوەی یاسایی. هەستنەكردنە بەو لۆبییە گەورەی دژی هەرێمە. هەستنەكردنە بەو پرۆژەیەی ناوی دەوڵەتە و پێویستە پاییە بنەرەتییەكانی لەسەر دامەزراوەی یاسایی دروستبن. ئەما بەدیووە سیاسییەكەیدا پێدەچێت ئەم ئەنجومەنە بەشێك بێت لە سیستەمی سەرمایەداری و جەستەیەكی غەریب نەبێت بەو سیستەمە. گەر بە پێچەوانەی ئەمەوەبێت بێگومان تەواوی هاوڵاتییان باجەكەی دەدەن. هەرێمی كوردستان شوێنێك نییە توانای بەكارهێنانی كارتی بەهێزی ئابووری هەبێت، شوێنێكە تەنها توانای دروستكردنی ترسیی هەیە بۆ سەر جوڵە ئابوورییەكانی ناوچەیەك. ئەم ترسانەش دروستیدەكات ترسی كاتین، جیهانی سەرمایەداری نایەت لەبەر خاڵێكی بچوك تەواوی نەخشە و پرۆژەكانی خۆی پەراوێزبخات و بیكاتە خزمەتی ئەم خاڵەوە. تا ئاستێك دەست و پەنجە لەگەڵ ترسەكە نەرمدەكات، كەزانی بەردەوامە بە شێوازی خۆی دەیوەستێنێت.
یانی، تا ماوەیەكی كاتی ئەم خۆبەغەریبكردنە لەناو سیستەمەكەدا قبوڵدەكرێت، پاش ماوەیەك هەمان ئەو سیستەمەی كە پێشوتر تۆ بەهەرچوار پەلەوە چویتە ناوی، زانی لەشوێنی خۆت نامێنی، هەرچوارپەلت دەوەستێنێت. من بروام وایە ئەنجومەنی داش عێراقەكە، دەیەوێت لەم رێگایەوە خۆی بخاتەوە ناو سیستەمەكە و پاشان ئەو كێشە تاكەكەسیانەش چارەبكات كە نزیكەی پانزەساڵە لەسەر (شوێن) لەم هەرێمەدا بوونی هەیە.
پاش دروستكردنی ئەو ئەنجومەنەی داش عێراقە، ئیدی قسەكردن لەسەر دامەزراوەی یاسایی، وەك پەرلەمان و حوكومەت، قسەكردنە لە سێبەرێك كە خۆی بوونی نییە و بووە بەسێبەر. دەبێت لەم قۆناغەدا قسە لەسەر دامەزراوەی یاساییی نەكەین، چونكە كۆتاییان هاتووە و دسەڵاتداری كورد ناتوانێت خۆی بگونجێنێت لەگەڵ دامەزراوەی یاسایی. دەبێت قسە لەسەر جوڵەی سیاسیی بكەین و، بزانین دەسەڵاتداری كورد كە ناتوانێت لەگەڵ دامەزراوەی یاسایی بژیت، دەتوانێت لەگەڵ سیستەمی سەرمایەداری بژیت. گەر ئەمەشی پێنەكرا، ئەوكات سیستەمەكە دەستیكرد بە چەپۆك كێشا بە هەرێمدا، شوێن چەپۆكی سەرمایەداری وەك شوێن چەپۆكی سیاسیی نییە، شوێن چەپۆكێكە تەواوی ئەوەی بونیادت ناوە لەبنەوانەوە هەڵیدەتەكێنێ‌.