پشتیوان هەڵەبجەیی: مانەوەی یەكێتی لەگەڵ پارتی خیانەتە نەك ڕێككەوتنی لەگەڵ ناوەند.

Avatar photo

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

كێشەكە لەوێوە دەستی پێكرد كە پارتی ڕایگەیاندا ئەیەوێت ئابوری سەربەخۆ بۆ كوردستان دابین بكات كە ئەو كات لەڕوی داراییەوە كوردستان هیچ كێشەیەكی نەبوو كە عێراق هەموو مافە داراییەكانی ئەم دەڤەرەی دابین كردبوو، بەڵام كاتێك كۆمەڵێك كۆمپانیای گەورە هێنرانە ئێرە و دەستكرا بە پشكنین و گەڕان و لێدانی بیرە نەوت، حكومەتی عێراق هەموو پەیوەندیە ئابوریەكانی لەگەڵ هەرێم كۆتایی پێهێناو گوتیان ناكرێت نەوتی خۆتان بۆخۆتان دەربێنن و لەگەڵ نەوتی بەسرە شەریك بن، داوایان كرد كە نەوت تەنها لەڕێگای عێراقەوە بفرۆشرێت، گوتیان نەوتەكەتان بە لەژێر زەویدا بمێنێتەوە بۆ نەوەكانتان و بژێوی و ژیان و مووچەو بودجەتان لەسەر عێراقە كە كورد لەهەموو مێژوویدا هێندەی ئەو چەند ساڵە بێكێشە نەبوو، بەڵام بەرزانی گوێی بۆ قسەی عێراق و ئەمریكا نەگرت و تاك لایەنە دەستی كرد بە هەڵكەندنی بیر و دواتر لەگەڵ توركیا ڕێككەوتنێكی پەنجا ساڵەی ئیمزا كرد بۆ ئەوەی لەو وڵاتەوە نەوت بفرۆشرێت كە ئەو كاتیش هەر تاك لایەنە ئەوەی كرد و پرسێكیشی بەیەكێتی نەكرد، بەڵام یەكێتی وەك ئەوەی لەحكومەتەكەدا شەریك بوو لەو بڕیارەشدا شەریك بوو بێ ئەوەی ئاگای لەناوەڕۆكی ڕێككەوتنەكە بێت، پاشان بۆری بۆ توركیا ڕاكێشراو نەوت نێردرا و یەكێتی تەنها تەماشا چی بوو دواتر داعش هات و هێزەكانی یەكێتی سەنگەریان قایم دەكرد تا داعش نەتوانێت زەفەر بەو شارە بەرێت لەملاوە پارتی هێزێكی برد و دەستی كرد بەفرۆشتنی نەوتی كەركوكیش كە لێرەدا ڕوون نییە ئەو دوو حیزبە چۆن ڕێككەوتوون لەسەر فرۆشتنی نەوتەكەی چونكە ناچێتە ئەقڵەوە یەكێتی لەكەركوك تەماشا چی بووبێت، بەڵام ڕوونە نەوتی كەركوك ئەفرۆشراو هیچ حسابێك بۆ یەكێتی و خەڵكی ئەو شارە و پارێزگای كەركوك نەدەكرا پارەی پترۆ دۆلارەكەشیان نەئەدایەوە بەو شارە. یەكێتی لەهەموو ئەمانەدا شەریكێكی بێدەنگ و ئاقڵ بووە و هەرگیز نەقسەی ڕۆشتووە و نەقسەشی كردووە .
هەموومان ئەزانین كە نەوتی هەرێم و نەوتی كەركوك ئەنێردرایە توركیاو لەوێوە بۆ جیهان ئەنێردرایەوە، بەڵام لە ئەنجامدا ئەم دەسەڵاتە نەیئەتوانی مووچە بەڕێك و پێكی بدات لەیەكەم هەنگاودا مووچەی كرد بەنیوە كە لەیاسای هیچ جەنگەڵێكدا نییە مووچەی فەرمانبەران بكرێت بەنیوە كە لێرەش یەكێتی تەنها تەماشا چی بوو

لەگەڵ ئەوەشدا تەواوی پرۆژەكان و بودجەی كۆمپانیا و شوێنەكان بڕاوە و مووچەی فەرمانبەران بەنایاسایی كراوە بەنیوە مووچە و ئەو نیوە مووچەیەش چەندین مووچە نەدراوە و هەندێك توێژی فەرمانبەران نەك هەر نیو مووچە بگرە لەنیو مووچەش نیوەی ساڵەكان نەدراوە، جگە لەمانەش مووچەی كەم ئەندامان و بێوەژنان و چاودێری كۆمەڵایەتی كە كەمترین مووچەیان هەیە و نەك هەر بەشی بژێویان ناكات بگرە بەشی پارەی ئاو كارەباشیان ناكات حكومەت نیوەی ئەوەشی بڕیوە، هەموو ئەمانە بەسیاسەتی سەرۆكی حكومەت و سەركردایەتی پارتی بووە و پرس بەهیچ كەس نەكراوە لەگەڵ ئەمانەشدا كاتێك خەڵك خۆپیشاندانی كرد و چەندین مانگ بەسەر شەقامەكانەوە بوون و داوای قوتی ڕۆژانەیان كرد بارزانی گوتی چ دەكەن بیكەن هەڵپەڕن، پاشان پارتی كاتێك لەپەڕلەمان باسی دەسەڵاتی كورسیەكەی كرا خێرا پەڕلەمانی پەك خست و حسابی بۆ دەنگی میللەتێك نەكرد كە لەهەمانكاتدا كاتێك دوای دوو خول سەرۆكایەتی یەكێتی دووساڵی دیكەی بۆ درێژ كردەوە بێمنەتانە بارزانی گوتی من داوام نەكردووە، دواتر وەزیرەكانی ناردە ماڵەوە و لەهەموو ئەمانەدا یەكێتی لەگەڵ پارتی بووە و لەهەڵەكاندا بەقەدەر پارتی تاوانبار كراوە و زۆرجار گەل لەهەڵبژاردندا سزای یەكێتی داوە كە بەحساب تەنازول بۆ پارتی ئەكات و پارتی هیچ حسابێكی بۆ ناكات.
لەگەڵ ئەمانەدا زانراوە كە پارەی ئەو نەوتە نەك هەرێم بگرە بەشی عێراقیش ئەكات كەچی بارزانی جۆرێك لەجۆرەكان سزای سیاسی ئەم میللەتەی ئەدا و ئەیویست لەڕێگای ئابوری و بڕینی مووچە و داراییەوە میللەت ناچار بكات كە بڵێن تەنها مووچە چاك بكە ئیدی ئێمە هیچمان ناوێت، بەڵام میللەت جگە لەپارتیەكان بەیەك دەنگ داوای چاك كردنی دۆخەكە و لابردنی بارزانیان ئەكرد بارزانی گوێی بەكەس نەدا و یەكێتی لەمانەشدا هەر لەگەڵی بوو تەنانەت زۆر جاریش ڕونكردنەوەكانیان بەجێگری سەرۆكی حكومەت بڵاو ئەكردەوە بۆ ئەوەی لەو ڕێگایەوە یەكێتی نابووت كەن، پاشان 2 ساڵ پارتی هەوڵیدا لایەنەكان بەتایبەت گۆڕان ڕازی بكات كە بەڕێكەوتنێكی حیزبی بارزانی لەپۆستەكەی بمێنێتەوە لەگەڵ هەوڵەكانیشیدا هەوڵی ئەدا كە كات بكوژێت، بەڵام هیچ حیزبێك ڕازی نەبوو لەپۆستەكەی بەو دەسەڵاتانەوە بمێنێتەوە .
بارزانی هەمیشە هەوڵیداوە قەیران بەقەیران چارەسەر بكات، ئیدی دوا كارتی ڕاكێشا كارتی ڕیفراندۆم، كاتێك هەستی كرد لەناوخۆدا هیچ پشتیوانێكی نەماوە و كاتی سەرۆكایەتیەكەی بۆ درێژ ناكەنەوە ئەمە گەمەیەی دروست كرد و ڕایگەیاند كە ڕیفراندۆم بۆ سەربەخۆیی ئەنجام ئەدات، بەڵام هەر لەناو پارتیەوە چەند دەنگێك بەرزبوونەوە و گوتیان ڕیفراندۆم بۆ سەربەخۆیی نییە، پاشان پارتی كەوتە ڕازی كردنی لایەنەكان بە ئەنجامدانی ڕیفراندۆم، هەموو وڵاتانی چواردەور و عێراق و ئەمریكا و نەتەوەیەكگرتووە و یەكێتی ئەوروپا و گوتیان مەكە و ئەنجامەكەی باش نابێت كەچی ئەو هەر سوربوو لەسەر قسەكەی خۆی و گوتی حساب بۆ قسەی هیچ كەس ناكەم.
یەكێتی لەهەموو ئەمانەدا وەك قەڵایەك لەتەنیشتی ڕاوەستا بەبێ ئەوەی هیچ حسابێكی بۆ بكرێت، هەر بەرزانی خۆی كاتەكەی دانا و هەر خۆشی بانگەشەی بۆئەكرد و هەر بەرزانیش بانگەشەی بۆ دەكرد و شاربەشار ئەگەڕا.

یەكێتی لەم هەموو نابوتیانەدا لەگەڵ پارتی بەشداربووە ئایا ئەمە خیانەتە كە میللەتێكیان پێكەوە برسی كردبوو یان ئەوە خیانەتە كە كۆتایی بەم برسیەتە بهێنێت و ڕێگری بكات لە كوژرانی هەزاران مرۆڤ.
ئایا سور بزانیت كە ئەمە گەلەكۆمەیەكی نێو دەوڵەتیە و عێراق و ئێران و توركیا بەئاگاداری و ڕەزامەندی ئەمریكا واژوویان كردووە و ئەبێت بگەڕێنەوە ناوچەكانی پێش شەڕی داعش و ساڵێك پێشتر خۆیان ڕێك كەوتوون لەسەر ئەوەی ئەو ناوچانە جێبهێڵن ئیدی شەڕ كردن خیانەتە یان كشانەوە و ڕێك كەوتن، شەڕێك كە سور بزانیت هەزاران كەس ئەبێتە قوربانی و شارێك وێران ئەبێت كردنی خیانەتە لەمیللەت یان نەكردنی و كشانەوە .
بەڕاستی خودی شۆڕش و خودی بەرەنگاری و خودی شەڕكردن بەناوی نیشتیمانەوە گەورەرین خیانەتە لەمیللەت و ڕۆحی میللەتی خوێن گەرم و گەنجی هەڕەشە, ئاخر ئەوەی ژیربێت ئەزانێت كورد لەو سەری مێژووەوە تا ئێستا هیچ بەدەست بووە هەمیشە گەورەكان یاریان كردووە و كورد تەماشا چی بووە و هەندێك جار دوای یاریە گەورەكان كورد وەكو بەكارهێنان بەكار هێنراوە لەسوچێكەوە بەشداری یاریەكەی پێكراوە بەبێ ئەوەی خۆشی زانیبێتی كە چلۆن بەشداری كردووە، كورد هەمیشە لەدەرەوەی یاریە گەورەكان بووە و هیچ كات نەخۆی بۆ یاری ئامادە كردووە نەزانیویەتی لەدونیادا چ دەگوزەرێت لەبەر ئەوە بووە كە هیچ كات وەك براوە دەرنەكەوتووە یان هاوپەیمانی براوە نەبووە هەمیشە یان دۆڕاو بووە یان لەگەڵ دۆڕاوەكان حەشر كراوە یان ئەسڵەن پەیوەندی بەدۆڕاوە و براوەوە نەبووە، بەهەموو مێژوودا وەرنە خوارەوە كورد یەك سەركردەی نەبووە كە خوێندنەوەیەكی ژیرانەی بۆ دۆخی سەردەمەكەی خۆی هەبوبێت با زۆر دوور نەڕۆین شۆڕشی ئەیلول ئەو هەموو پیاوەی دابەكوشت و دواتر بە یەك وشەی زلهێزەكان سەد و بیست هەزار چەك بەدەست كەتنە سەر چۆك، شێخ محمود لەبری ئەوەی لەگەڵ ئینگلیز ڕێكبكەوێت چوو هەموو هێلكەكانی خستە نێو سەبەتەی سوڵتانی عوسمانیەكانەوە و ئێستا دەركەوتووە كە لەو ساڵانەدا شێخ هەر خەریكی داگیركردنی زەوی و زاری هەژاران بووە و ئێستاش كەس و كاری شێخ بەسەر ئەو موڵكانەوە ئەژین. پاشان كۆماری مهاباد هەموو ئومێدێكیان ڕوسیابوو ئەویش لەگەڵ ئێران ڕێككەوتن و كۆمارەكەیان ڕوخاند و ئێستا دەركەوتووە كە قازی چی خزم و كەس و كاری هەیە لەو دەوڵەتەدا دایمەزراندوون، ئێمە ئەگەر چاوپۆشی لەگەندەڵیش بكەین ناتوانین ئەوە لەبەرچاو نەگرین كە یاریەكان لەشوێنێكی ترەوە ئەكرێت و سیاسیەكانی ئێمە نەك یاری چی نین بگرە تەماشا چیش نین و هەندێك جار بەرژەوەندی وڵاتێك لەوەدایە كە سەردەمێك دۆستمان بێت ئەمەش شتێكی كاتیە و زوو كۆتایی دێت، چونكە میللەتی كورد هیچ كات خۆی یاری چی باشی نەبووە و یاریەكانی زلهێزەكانیش لەسەر و ئیرادە و بیركردنەوە و خەیاڵی ئەمانەوە بووە و كوردیش بێكەسترین میللەتی دونیایە و بەرژەوەندی زلهێزەكان لەگەڵ عەرە و فارس و تورك زیاترە تا لەگەڵ ئێمە، بۆ فرۆشتنی نەوت بێت بە ڕۆژئاوا ئەو وڵاتانەی چواردەورمان زیاتریان هەیە تا ئێمە، بۆ پشتیوانی دەوڵەتان بێت ئەوان سەد ئەوەندەی ئێمە دەبن ئێمە سێ شارین سەد كوێخامان هەیە و سەد بازرگان سەریان تێكردووە.
دواجار دەپرسین مانەوەی یەكێتی بەو دۆخەوە لەگەڵ پارتی و شەریكە تاوانی پارتی خیانەتە یان كشانەوەی هێزێك لەبەر خاتری خەڵكی شارێك كە پێشتر پێمان دەگوت قودسی كوردستانە، وەک:
1- خیانەت ئەوەیە خاوەنی ئاشبەتاڵ و جێهێشتنی قازی محەمەد و قیادە مۆقەتە و سی و یەكی ئاب و شەنگال بیت.
2- خیانەت ئەوەیە میللەتێكت بەخۆتەوە سەرقاڵ كردبێت و خۆت سەرقاڵی پارە و دزی بیت .
3- خیانەت ئەوەیە هەموو دونیا بڵێ مەكە تۆبڵێی حساب بۆ یەك بەشەر ناكەم .
4- خیانەت ئەوەیە پێش كارەسات هەر تۆ قسە بكەیت و دوای كارەسات هەر تۆ قسە نەكەیت .
5- خیانەت ئەوەیە بتەوێت تا ئەبەد لەسەر كورسی بمێنیتەوە .
6- خیانەت ئەوەیە شێری ناوخۆ و ڕێوی دەرەوە بیت .
7- خیانەت ئەوەیە سامانی نیشتیمانی بەكاربێنی بۆ سزادانی سیاسی ئەو شارانەی كە چەپڵەت بۆ لێنادەن و ڕەخنە لە ئەدای سیاسەتت دەگرن .
8- خیانەت ئەوەیە لەبری چارەسەری دۆخی فەرمان بەران و دابین كردنی ژیان بۆیان بەخۆپیشاندەران بڵێی بچن هەڵپەڕن.
9- خیانەت ئەوەیە كە خۆت بەسەرۆك بزانیت و هێندەی مناڵێك مەعریفەت پێنەبێت و بێئابیت لە ئەدەب و هونەر و مێژو مۆسیقا و گۆرانی و كلتور و بواری كۆمەڵایەتی و ………….
10- خیانەت ئەوەیە میللەتی خۆت برسی بكەی
11- خیانەت ئەوەیە حساب بۆ لایەنەكان نەكەیت
12- خیانەت ئەوەیە پەڕلەمان پەك خەیت و گاڵتەت بەدەنگی میللەتێك بێت
13- خیانەت ئەوەیە وەزیرەكان بنێریتەوە بۆ ماڵەوە
14- خیانەت ئەوەیە ڕێ لەخۆپیشاندانی مامۆستا بگریت.
15- خیانەت ئەوەیە مناڵی هەژاران بەیتە بەر گوللە.
16- خیانەت ئەوەیە نەتوانی خانەنشینی حیزبەكەت و حكومەكەت بژیەنی
17- خیانەت ئەوەیە كوڕەكانت هێندەی مووچەی هەموو پێشمەرگەكان لەیەك شەی لاسفیگاسدا بدۆڕێنیت
18- خیانەت ئەوەیە ئەو بریندارانەی كە لەپاراستنی كێڵگە نەوتیەكانی تۆدا ئەكوژرێن بە پارەی سواڵ چارەسەر بكرێن
19- خیانەت ئەوەیە كەیاریەكە تەواوو بوو دەركەوێت كە بەشی بیست وڵات پارەت شاردۆتەوە و میللەتەكەشت برسیە
20- خیانەت ئەوەیە جاش بیت و بەكەر بڵێی جاش
21- خیانەت ئەوەیە حساب بۆ ڕێككەوتنی سیاسی و حیزبی نەكەیت و وەزیری دارایی بدەی بە حیزبەكەی بەرامبەرت و یەك فلس نەخەیتە ژێر دەستی .
22- خیانەت ئەوەیە وەزیری كارەبا بدەی بە حیزبێك و یەك لیتر گازۆئیلی نەدەیتێ و كاتێك وەزیرەكە دەستلەكار ئەكێشێتەوە كارەبا فول بكەیت.
23- خیانەت ئەوەیە لەسەر وشە ڕۆژنامە نوس بكوژیت.
24- خیانەت ئەوەیە بەتەنها دەستت گرتبێت بەسەر بازاڕەكاندا و جگە لەچڵكاو خۆرەكان كەس بۆی نەبێت دەست بۆ پرۆژەیەك یان كارێك بەرێت.
25- خیانەت ئەوەیە گەورەترین كۆمپانیا داوەت بكەیت بۆ پرۆژەیەك و بەڵام لەیەكەم دانیشتن پێی بڵێی ئەبێت نیوەی قازانجەكەی بۆ من بێت.
26- خیانەت ئەوەیە كۆمپانیای چڵكاو خۆرەكانت دەستیان گرتبێت بەسەر بازاڕی دەرماندا و بەدەرزی بەسەر چوو چاوی دەیان كەسیان كوێر كردبێت و تۆ وەك حكومەت و هەرێم وشەیەكت نەبێت.
27- خیانەت ئەوەیە دەستت گرتبێت بەسەر تەواوی بازاڕ و كاروبار و كاسپی ڕۆژانە و تەنانەت ئاوفرۆشەكانی بازاڕیش بەشێكی قازانجەكەیان بچێتە گیرفانی تۆوە .
28- خیانەت ئەوەیە هەموو شتێك تەزویر بكەیت ، دەنگدان و سندوقەكان و تەنانەت خوداش تەزویر بكەیت و خودایەكی توڕە لەزاری جنێو فرۆشەكانەوە بەخەڵك بفرۆشی.
29- خیانەت ئەوەیە بەهەزاران تانكەر نەوت بدزیت و لەم لایەوە بێیت گەنجێك لەسەر شیر و دایبی حوكم بدەیت.
30- خیانەت ئەوەیە لەگەڵ دوژمنێكی سەرسەخت شەڕت هەبێت و هەزاران ڕۆڵەی ئەم گەلەت دابێت بەكوشت و خۆت بەنهێنی بازرگانی نەوتی لەگەڵ بكەیت.
31- خیانەت ئەوەیە ژنی شەهیدەكانت لە ناچاری و نەبونی ژیانێكی شایستەدا لەشی خۆیان بۆ شیری مناڵەكەیان بفرۆشن .
32- خیانەت ئەوەیە سەد ساڵ خەباتت هەبێت و مناڵێكی هەموو بنەماڵەكەت لوتی خوێنی لێنەهاتبێت.
33- خیانەت ئەوەیە موزایەدە بەژیانی خەڵكەوە بكەیت و نەخۆت ژیانی میللەتەكەت ڕابگریت نەبهێڵیت ناوەند ژیان دابینبكات.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت