بەهرۆز جەعفەر: یەکێتی و یەکێتی و یەکێتی!

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

تۆ باسی چپە چپی پاکستان و تورکیا بکە، ئەو باسی ئەوە ئەکا فڵان کەس سی و پێنج ساڵ خەباتی هەیە تازە ئەپاڕێتەوە ناوەکەی لە کۆنگرەکە بخەنە لیستەوە، تۆ باسی تیۆرێک تا ئابوریی هاوچەرخی دوای ئادەم سیمس لەگەڵیدا بگونجێ باسی ڤینس کێبڵ – Vince Cable بکه ئەو باسی جەماعەتی کەرکوکیەکان ئەکا. تۆ بڵێ ئەوە لە دەریای ناوەڕاست ئەمریکاو بەریتانیاو یۆنان و میسرو قوبرس و فەڕەنسا یەکیان گرتوە کوتلەیەکی گەورەیی غازی سروشتی و ئاسایشی هەرێمایەتی بەڕێوە ئەبەن و ئەمە سەری لەناو خوانی ڕۆژئاواو باشوری کوردستاندایە، ئەو ئەڵێ بابە ئەوەتا هی وا بوە بە ئەندامی سەرکردایەتی واو وا…یە. تۆ بڵێ ئاسایشی کوردستان پیرۆزەو ئەبێ بیپارێزین یەکێ لە ڕێگەکان ئەوەیە ئەمنی ئەلیکترۆنی و Cyber Security تیا بچەسپێ، ئەو ئەڵێ بابە تۆ ڕێگەکەت وون کردوە ئەوەتا فڵان و فیسار ئاوهاو ئاوها هێزی تایبەت بەخۆیان هەیە واو وای پێ ئەکەن…ئیتر ئاوا. کت و مت، ئەم قسانەی ئێستا سەرکردایەتی و دۆستان و هاوڕێیان ئەیکەن، لە ساڵی ( 2007 ) ەوە ئێمە بەردەوام و گەلێ جار بەتوندتریش وتومانەو لینکەکان و ئەرشیفیش ماوە.
بە دیاریکراوی چوار ئەرکی گرنگ هەبو، دەبو لە کۆنگرەی (ی،ن،ک) دا چارەسەر بکرایە، تەنانەت کۆنگرەش نەبوایە هەر دەبو یەکێتی بیانکات، بەڵام وا دەردەکەوێ هیچیانی نەکردوە بۆیە ئەم حیزبەو ئەم زۆنەو هەرێمی کوردستانی بەگشتی خستۆتە بەر دۆخێکی مەترسیدار؛
یەکەم/ دەبو کۆنگرە پەیڕەو و پرۆگرامێکی گونجاو بنوسنەوە، نەکراوە. ( لە ڕاستی دا ئەبێت پەیڕەوێک بنوسرێتەوە بەپێی ئەو پەیڕەوە سەرکردایەتی حیزبەکە دەستنیشان بکرێت، کەچی ئەم برادەرانە سەرکردایەتی حیزبەکەیان هەڵبژاردوە تا پەیڕەوێک بنوسێتەوە!).
دووەم/ پەیکەری حیزبەکە پیاچونەوە ی پێ بکرێت. نەکراوە.
سێهەم/ سەرۆک یان دەستەی سەرۆکایەتی بۆ ئەم حیزبە هەڵبژاردرێت، نەکراوە.
چوارەم و لەهەموی گرنگتر/ دەبو وە دەبێت ئایدۆلۆجیای ئەم حیزبە، جیهانبینی ئەم حیزبە، تێگەیشتنی ئەم حیزبە بۆ بەڕێوەبردن و حوکمڕانی، بۆ ڕووداو و دیاردەکانی ئەمڕۆی جیهان، بۆ بارودۆخی بەغدا، بۆ سامانە مرۆییەکان، بۆ سامانە سروشتیەکان، ستراتیجی یەکێتی و میکانیزمەکانی گەیشتن بەو ئامانجانەی لە ستراتیژەکەدا هاتوە دیاری بکرێت…. کەچی ئەمە هەر نەکراوە و،، پێ ناچێت ئەگەر ئەم ئەقڵیەتەی کە لە ڕابردوو بینیمان و ئەوەی ئێستاش هەیە تەنانەت ئەم شتانەی بەلاوە گرنگیش بێت.
سەیرم دێ! ئێستا بچۆ کافتریایەک دوو کارمەندی تیا بێت، ڕەنگە ئەو دوو کارمەندە هەندێ کۆد و سیاسەت و نهێنی و بابەتی تایبەتی خۆیان هەبێت بۆ کارەکانی ناو کافتریاکە. بەڵام لەناو حیزبێکی وەک یەکێتی دا کە چل و پێنج ساڵ تەمەنیەتی و سی ساڵە لە حکومەتدایە هیچ یەکێتیەکی کارکردن یان تایبەتمەندییەک نیەو نەماوە. لەبەرئەوە هەر مەگەر وەک نوستالۆژیایەک بڵێین دەبەسە… هەڤاڵ … دەبەسە… برام بەسە. ئەوە ساڵێک نیەو. شەش نیەو. دە و دوانزەو پانزە ساڵ نییە. بەسە قوربان ئیتر بەسە. تەرکیزی هەموو کەسێکی ئەم کوردستانەتان کوشتوە با بیر لە شتێکی تر بکرێتەوە… دە بەسە بەس!. ڕۆژئەبێتەوە هەموو کونج و قوژبنێک هەر باسی یەکێتی و یەکێتی و یەکێتییە!. لەسەر مانگ مرۆڤ خەریکی کشتوکاڵە، شەڕ لە زەوی نەماوە کەوتە ئاسمان، کەچی هاوڕێ قیادییەکانی ئێمە لەناو شەستیەکەی سولێمانی هەر لەبەیانی تا ئێوارە ئەیژمێرن ماڵی کاک کۆسرەت ئەونەو ماڵی مام جەلال ئەونەو ئەوەکەی تریش ئاوت کراو…دە بەسە کاکە بەسە.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت