کاوسێن بابەکر: سەردانەکەی نێچیرڤان قەتیسکردنی سیاسەت لەبازنەی تەسکی حزبیدا!

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

سەردانە کتوپرەکەی نێچیرڤان کەتەنها 28کاتژمێر دوای سەردانەکەی ماکرۆن بۆ بەغدا هات، جگە لەنامەیەکی ئەردۆگان بۆ ماکرۆن نەبوو کە ناوەرۆکەکەی بریتی بوولە: (ماکرۆن خۆت ماندوو مەکە کارتی کوردەکان لەدەستی مندایە)!
دوای سەرکێشیەکانی ئەردۆگان لەدەریای سپی ناوەڕاست و سنور بەزاندنەکانی بۆ گەڕان بەدوای ووزەدا و پێکداکێشانی کەشتیەکانی لەگەڵ کەشتی فەڕەنسا لەنزیک لێوارەکانی تونس و هەراسان بوونی میسرو قوبرس و یۆنان و ئیسرائیل… ماکرۆن کەوتە هەولی دروستکردنی بەرەیەک دژ بەو سەرکێشێانە و سەردانی ئەم دواییەشی بەشێک بوو لەو هەوڵانە،کە عێراق و هەرێم کەوتونەتە بەر سەرەڕۆییەکانی ئەردۆگان و ڕۆژ نیە فڕۆکەکانی سنوری هەرێم نەبەزێنن و خەڵکی سڤیل و هێزی پاسەوانی سنور نەکەنە ئامانج و شەهیدو برینداریان نەکەن. جگە لە سوتاندنی پوش و پاوان و ڕەزوباغی هاوڵاتیان و کە ئەمەش بەناچاریی چۆڵکردنی زیاتر لە 500 گوندی سەر سنورەکانی لێ کەوتۆتەوە. ئەمە واپێشاندەدا کە دەبێ عێراق و هەرێم لەپێشەوەی ئەم بەرەیە دابن! بەڵام بەداخەوە هەر دوای کۆبونەوەکەی نێچیرڤان و ماکرۆن داوا لەنێچیردەکرێ بگاتە ئەنقەرە و ئەم سەردانەی ماکرۆنیان بۆ باس بکات! ئەوەش گەیاندنی ئاماژەیەکە بۆ ماکرۆن کە کوردەکان کارتی دەستی ئەردۆگان خۆنی و چۆنی بوێ وایان هەڵدەسوڕێنێ، لەکاتیکدا فەڕەنسا هەر لەکاتی کۆڕەوەوە تائێستا جگە لەهاوکاری و چاکە هیج خراپەیەکی بۆ هەرێم نەبووە، بەپێچەوانەوە ئەوان بوون یاسای 688 یان لە یوئێن دەرکرد و ناوچەی دژەفڕینیان سەپاندو بەردەوام هاوکاری مادیان گەیاندۆتە هەرێم و مەشقی سەربازی و چەک و پێداویستی جەنگیان ناردووە، بەڵام تورکیا جگە لەشەڕو ئاژاوە هیچی بۆ کورد پێنیەو دەیان کیلۆمەتر چوار گۆشەیان لەسنورەکانی هەرێم بەبیانوی پێ کاکا داگیرکردووەو بازاڕی کوردستانیان پڕ کردووە لە کەلوپەل و مەوادی بێکەڵک و بەسەرچوو. جگە لەتۆپ باران و ئاگری فڕۆکە کە زەرەرو زیانێکی زۆری مادی و گیانیان لەخەڵکی هەرێم داوە، وەک خۆیان دەڵێن بەهیچ شێوەیەک ناهێڵن کیانێکی سەربەخۆی کوردی لەهیچ کوێی ئەم سەرزەمینە دروستبکرێ و ئەگەر لەمەریخیش بێ، ئەوان دەیڕوخێنن! کەچی لایەنێکی کوردی بۆ پاراستنی دەستەڵاتی حزبەکەی ڕێکەوتنامەی 50 ساڵەی لەگەڵ واژۆ دەکات کە تائێستا ناوەرۆکەکەی نەپەرلەمان و نە حزبە هاوپەیمانەکانی نازانن چی تێدایە.
پارتی جارێکی تریش سەلماندی کە ئەوان سورن لەسەر پاراستنی دەستەڵاتی خۆیان و هیچ شتێکی تر جگە لەوە بۆ ئەوان گرنگ نییە!
ئەو بەرەیەی ماکرۆن هەلێکە بۆ هەرێم هەڵکەوتوووەو کۆمەڵێک دەوڵەتی بەهێز بەنیازن تورکیا تەمبێ بکە ن، کە یەکەمین لایەن قازانج بکات هەرێم و کوردە و ئاوانەبێ هیچ هێزیک لەناوچەکە ناتوانن جڵەوی تورکیا بکەن کە گەورەترین هەڕەشەی سەر دواڕۆژی هەرێم و کوردستانی گەورەیە.
ئەگەر کورد ئامادەیی نەبێ دوور نیە پاشەکشەی تورکیا بەمەرجی لەناوبردنی خۆسەری و لەقاڵبنانی هەرێم بێ ئەوەش تەنها بە نەزانی خۆمان ئایندەی گەلەکەمان دەخەینە بەردەمی عەفریتێک کە بەخواردنی ئایندەی کورد نەبێ داناسەکنێ.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت