ڕه‌سوڵ بۆسكێنی: پێویسته ناوبانگی هه‌رێم بپارێزین.
ناوبانگ په‌یداكردن هه‌ستێكی چێژبه‌خشه، له‌سه‌ر ئاستی تاكه‌كه‌س و حزب و هه‌رێم و ته‌نانه‌ت له‌سه‌ر ئاستی ده‌وڵه‌تیش بایه‌خێكی تایبه‌تی هه‌یه، دره‌وشانه‌وه‌ی ناوبانگ له‌لایه‌ن كه‌سانی ده‌وروبه‌ر و لایه‌نه په‌یوه‌ندیداره‌كان دۆخێكی گرنگ و پڕ بایه‌خ و هه‌ستێكی چێژ به‌خشه و هه‌موو كه‌س ناتوانێ پێی بگات، دیاره ناوبانگی خراپ كه‌س حه‌سوودی پێ نابا و ئاواتی بۆ ناخوازێت، لە وڵاتە پێشكەوتووەكانی دنیادا بە دەستهێنانی ناوبانگ، بە هیچ شێوەیەك ئاسان نیە، كەسانی نائاسایی و، بێتوانا و بێ بەهرە، ڕێگەیان پێنادرێـت لە ڕێگەی میدیاوە دەربكەون و بەناوبانگ بكرێن. هاوكات كەسایەتیەك تەواو لێهاتوو نەبێت لە بوارەكەی خۆیدا، قبووڵكردنی ئەستەمە.
گەیشتن به ناوبانگ یەكێكە لەو هەنگاوانەی كەم كەس هەیە ئارەزووی نەكات و هەوڵی بۆ نەدابێت، به‌ڵام په‌یداكردنی ناوبانگ هه‌وڵ و ماندووبوونی ده‌وێت، بۆ گه‌شتن بە هیوا و ئاواتەكان ده‌بێ ئه‌م خاڵانه له‌به‌رچاوبگیرێن:
1- هەوڵدان و به‌رده‌وامی لەسەر ئەنجامدانی ئەو كارەی مەبەستتە وادەكات زووتر بگەیت به‌هیواكانت.
2- تێگەیشتن لە مەرامەكانی كەسانی دەوروبەر وا دەكات بۆ ئه‌وه‌ی بگەیت بە ئامانجەكه‌ت تێبگەیت، كه پێویستە یارمەتی كێ بدەیت و سوود لەیارمەتی كێ وەربگریت و لەكێ دووربكەویتەوە.
3- پێویسته به‌وردی مامه‌ڵه له‌گه‌ڵ بارودۆخه‌كاندا بكرێت و بزانرێت لەكوێدا بڵێیت بەڵێ و لەكوێدا بڵێیت نەخێر، بۆ ئەوەی لەلایەنی به‌رامبه‌ر قۆرخ نەكرێیت و دەنگی خۆتت هەبێت.
4- قبوڵی ڕه‌خنه له‌خۆگرتن بكەیت، كاتێك هەڵە دەكەیت سزا وەربگریت و ئەگەر هەڵەیەك بەرامبەرت كرا، پێویست بوو سزای كەسی بەرامبەر بدەیت .
5- ئاگاداری و خۆگونجاندن به‌پێی ئه‌و بارودۆخه‌ی كه تێیدایت، له‌گه‌ڵ لایه‌نی بەرامبەر تا به‌هۆی هه‌ڵوێست و بیركردنه‌وه‌كانت لێت بێزارنەبێت، هیچ كات سنور مەبەزێنە بۆ ئەوەی بتوانیت ئه‌وه‌ی مه‌به‌سته پێی بگەیت، ڕێگەش مەدە لایه‌نی بەرامبەر لەكاتی ڕەفتاركردنی سنوری تۆ ببەزێنێت.
هه‌موو ئه‌و خاڵانه‌ی له‌سه‌ره‌وه باسكران بۆ په‌یداكردن یا له‌ده‌ستدانی ناوبانگ، وه‌ك بۆ تاكه‌كه‌س پێویستن، به‌هه‌مان شێوه بۆ هه‌رێم و ده‌وڵه‌تیش پێویستن، له‌م ڕوانگه‌یه‌وه ده‌مه‌وێت بارودۆخی هه‌رێمی كوردستان له‌به‌رچاوبگرین، بۆ په‌یداكردن و پاراستنی ناوبانگی هه‌رێمی كوردستان.
بێگومان به‌درێژایی مێژوو سه‌ره‌ڕای ململانێ و كێشه ناوخۆییه‌كانی كورد، هه‌میشه زیانی زۆری به‌ركه‌وتووه و كێشه و ململانێكانی ناوخۆی بۆته هۆی ئه‌وه‌ی له‌ڕووی سیاسیه‌وه دوژمنه‌كانی به‌سه‌ریدا زاڵ و سه‌ركه‌وتوبن، سه‌ره‌ڕای ئه‌وه‌ش وه‌ك نه‌ته‌وه‌یه‌كی ئازا و قاره‌مان و میواندۆست ناسراوه، به‌ڵام دوژمنه‌كانی هه‌میشه هه‌وڵیان داوه كورد وه‌ك نه‌ته‌وه‌یه‌كی دڕنده و تاڵانچی و دواكه‌وتوو دوور له‌شارستانیه‌ت پیشان بده‌ن، بۆ ئه‌وه‌ی ناوبانگی كورد له‌كه‌دار بكه‌ن، درێغیان نه‌كردووه له چه‌وسانه‌وه و زوڵم و زۆرداری و سه‌ركوتكردن و ڕاگواستن و كۆمه‌ڵكوژی كورد و نه‌یانهێشتووه هه‌رگیز به‌مافی ڕه‌وای خۆی بگات، له‌په‌نا ئه‌وه‌شدا پاره و به‌رتیل و ده‌م چه‌وركردن، خراوه‌ته به‌رده‌م كه‌سه لاواز و بێ ئیراده‌كان، تا هه‌م بیانخه‌نه سنووری خیانه‌ت به‌رامبه‌ر به نه‌ته‌وه‌كه‌یان و هه‌م بڵێن ئه‌وه‌یه ماهیه‌تی كورد، زوڵم چه‌وساندنه‌وه‌ی كورد له‌م به‌شه‌ی كوردستان له‌سه‌ر ده‌ستی ڕژێمی به‌عسی عیراق گه‌یشته لوتكه له كیمیاباران و ئه‌نفال و كۆمه‌ڵكوژی و وێرانكردنی كوردستان، كه دواتر ئه‌نجامه‌كه‌ی به كۆڕه‌وێكی گه‌وره گه‌یشت، هه‌موو ئه‌مانه و كۆڕه‌وی دوای ڕاپه‌ڕێنی كۆمه‌ڵانی خه‌ڵكی كوردستان سه‌رنجی دنیای به‌لای خۆیدا ڕاكێشا، به‌هۆی دیمه‌نه هه‌ست ته‌زێنه‌كانی كۆڕه‌وه‌كه زوڵم و چه‌وسانه‌وه‌ی سه‌رنه‌ته‌وه‌ی كورد له دنیا ده‌نگی دایه‌وه و ناوبانگی به‌دبه‌ختی كورد و دڕنده‌یی دوژمنه‌كانی گه‌یشته گوێی لایه‌نه بڕیاربه‌ده‌سته‌كانی دنیا، ڕێكخراوی نه‌ته‌وه‌یه‌كگرتووه‌كان و كۆمه‌ڵگای مه‌ده‌نی هاتنه ده‌نگ و بۆ به‌ته‌نگه‌وه هاتنی كورد سه‌ره‌تا هاوكاری و پێویستیه مرۆییه‌كان و هۆكاری ژیانیان به‌كه‌موكوڕیش بێت گه‌یانده ئاواره كورده‌كان، دواتریش ڕێكخراوی نه‌ته‌وه‌یه‌كگرتووه‌كان بڕیاری نه‌وت به‌خۆراك به‌سه‌ر عیراق سه‌پێنرا بۆئه‌وه‌ی فریای به‌شێك له‌نه‌هامه‌تیه‌كانی كورد بكه‌ون، به‌مه‌ش باشووری كوردستان كه‌وته بارودۆخێكی تایبه‌تیه‌وه و چیدی كورد وه‌ك جاران به‌ته‌نیا له گۆڕه‌پانه‌كه نه‌بوو، هه‌ر به‌وه‌ش نه‌وه‌ستان بۆ به‌رگرتن له شاڵاوی به‌عس بڕیار درا ڕێگا بگیرێت له‌ئاسمان و زه‌وی هێرش و په‌لاماره‌كانی به‌عس بۆ سه‌ركورد و وێرانكردنی كوردستان، كورد به‌مه له‌ناوه‌نده جیهانیه‌كان ناوبانگێكی باشی په‌یدا كرد و هه‌ناسه‌یه‌كی ئاسووده‌یی دا و خۆی ئاماده‌كرد بۆ داهاتوو.
دوای پێكهێنانی په‌رله‌مان و حكومه‌تی هه‌رێمی كوردستان، ناوبنگێكی باش بۆ كورد په‌یدابوو، كوردستان بووه جێگای سه‌رنجی ناوه‌نده‌‌كانی جیهان و له هه‌موو بواره‌كانه‌وه ڕووی له گه‌شه و ئاوه‌دان كردنه‌وه كرد، دوای له‌ناوبردنی ڕژێمی سه‌دامیش له‌لایه‌ن ئه‌مریكا و هاوپه‌یمانه‌كانی پشتیوانی كرا، ئیتر ڕێكخراوه مرۆڤدۆسته‌كان و په‌یامنێر و ڕۆژنامه‌نووسان له وڵاتانی جیهان ڕوویان كرده هه‌رێم و ڕۆژانه هه‌واڵ و ده‌نگوباسه‌كانی كوردستانیان ده‌گه‌یانده وڵاته‌كانیان، ئه‌مه‌ش لایه‌نێكی گرنگ بوو بۆ ئاگاداری جیهان له ده‌نگوباسی كوردستان، له‌م ڕووه‌وه كوردستان ناوبانگی ڕۆژبه‌ڕۆژ له هه‌ڵكشاندابوو، زۆرجار له ته‌له‌فزیۆنی وڵاتانی تره‌وه باسی گه‌شه‌ی ئابووری و سیاسی و په‌روه‌رده‌یی كورد بڵاو ده‌كرایه‌وه.
كوردستان بووه جێگای چاوتێبڕینی كۆمه‌ڵگای نێوده‌وڵه‌تی و وه‌ك پێشبركێیه‌ك وا بوو له هاتنی وه‌فد و لیژنه‌ی وڵاتان، له‌یاد كردنه‌وه‌ی شه‌هیده‌كانمان له‌سه‌ر گۆڕی شه‌هیدان و له‌سه‌ر مۆنۆمێنتی گه‌وره‌ترین قوربانی نه‌ته‌وه‌كه‌مان له‌هه‌ڵه‌بجه و گۆڕه به‌كۆمه‌ڵه‌كان سه‌دان دیپلۆماتكاری وڵاتان و نوێنه‌ر و وه‌زیر و كاربه‌ده‌ستانیان له‌گه‌ڵ ئێمه ئاماده‌بوون، بۆ ده‌ربڕینی نیگه‌رانی و ماته‌مینی و هاوخه‌می خۆیان، عمرو موسا سه‌رۆكی كۆمكاری وڵاتانی عه‌ره‌بی و ته‌نانه‌ت كۆڵن پاوڵ وه‌زیری ده‌ره‌وه‌ی مریكا، گه‌وره‌ترین وڵاتی بڕیاربه‌ده‌ستی دنیا، له‌یادكردنه‌وه‌ی شه‌هیده‌كانمان له‌ته‌ك ئێمه‌دا ئاماده‌بوون و وتاریان خوێنده‌وه و هاوخه‌می خۆیان ده‌بڕی.
ئه‌گه‌رچی كورد خۆی نه‌یتوانی وه‌ك پێویست مامه‌ڵه له‌گه‌ڵ ئه‌م بارودۆخ و سه‌رده‌مه زێڕینه‌ی خۆیدا بكات، له‌به‌ر ناهوشیاری و نه‌زانی خۆی تووشی كاره‌ساتی شه‌ڕی ناوخۆیان كرد و كاریگه‌ریه خراپه‌كانی تائێستاش درێژه‌ی هه‌یه، ئه‌مه‌ش بووه هۆی زڕاندنی ناوبانگی كورد له‌ده‌ره‌وه.
شه‌ڕی ناوخۆ كاره‌ساتێك بوو وه‌ك مۆرانه چووه گیانی ناوبانگی كورده‌وه، بووه هۆكاری چه‌ندین ڕووداوی نه‌خوازراو و هێنانی سه‌رسه‌خترین دوژمنی كورد بۆ سه‌ر پایته‌ختی هه‌رێمی كوردستان و داگیركردنی په‌رله‌مانه‌كه‌ی، شه‌ڕی ناوخۆ بووه هۆی تاوانباركردنی یه‌كتر و له‌و ڕوانگه‌یه‌شه‌وه، سه‌ری كێشا بۆ ئازاردان و بیانوگرتن به خه‌ڵك و لایه‌نگرانی یه‌كتر و پێشێلكردنی مافی مرۆڤ و نه‌پاراستنی ئازادی تاكه‌كه‌س و مافی ڕۆژنامه‌نوسان و ده‌ربه‌ده‌ری خه‌ڵك و پێشێلكردنی مافی ژن و منداڵ و پیرو په‌ككه‌وته‌كان، له‌لایه‌كی تر ڕێگا ته‌خت بوو بۆ ئه‌و هه‌لپه‌رستانه‌ی ده‌مێك بوو خۆیان مه‌ڵاس دابوو، بۆ دزی و تاڵانی و به‌هه‌ده‌ردانی سه‌روه‌ت و سامانی ئه‌م وڵاته، هه‌موو ئه‌مانه به‌به‌رچاوی وڵاتانه‌وه ده‌كرا، ڕێكخراوه‌كانی مافی مرۆڤ و هاوشێوه‌كانی نیگه‌رانی خۆیان له‌بارودۆخه‌كه ده‌ربڕی، كاتێك چه‌ندین جار ڕێكخراوی (میدڵ ئێست وۆچ) ڕه‌خنه‌ی له هه‌رێمی كوردستان ده‌گرت له‌سه‌رپێشێل كردنی مافی مرۆڤ و زیندانی كردنی ڕۆژنامه‌نووس و خه‌ڵكانی تر، كاربه‌ده‌ستانی هه‌رێم له‌جیاتی چاره‌سه‌ری ئه‌و كێشانه به‌وه‌ڵامێكی لاواز و باوه‌ڕنه‌هێنه‌ر حاشایان ده‌كرد، گوایه شتی وا ڕووی نه‌داوه و له‌م هه‌رێمه مافی مرۆڤ پارێزراوه، له‌كاتێكدا ڕێكخراوه‌كانی نه‌ته‌وه‌یه‌كگرتووه‌كان و ڕێكخراوی مافی مرۆڤی جیهانی و ڕێكخراوی (میدڵ ئێست وۆچ) به واقیعی خۆیان له‌ناو ڕووداوه‌كاندا بوون و ئه‌و پاساوانه‌ی كاربه‌ده‌ستان له بێ متمانه‌یی زیاتر هیچی تری به‌رهه‌م نه‌ده‌هێنا، ئه‌مه ناوبانگی كوردی ئه‌وه‌نده‌ی تر خراپ كرد، به‌ڵام وڵاتان و ڕێكخراوه مرۆڤدۆسته‌كان و كۆمه‌ڵگای نێوده‌وڵه‌تی وازیان له‌كورد نه‌هێنا و پشتیان له كورد نه‌كرد، دوای چه‌ندان هه‌ولی به‌رده‌وام كۆتایی به‌شه‌ڕی ناوخۆی كورد هێنرا، بۆئه‌وه‌ی كۆتایی به‌م دۆخه بێزراوه بهێنرێ.
له‌لایه‌كی تر ڕاسته به‌هۆی ناوی قاره‌مانێتی پێشمه‌رگه و ڕووبه‌ڕوو بوونه‌وه‌ی له‌گه‌ڵ داعش و تێكشكانی ئه‌و ڕێكخراوه تیرۆریسته و باوه‌ش كردنه‌وه‌ی هه‌رێم بۆ سه‌دان هه‌زار له‌و ئاوارانه‌ی به‌ده‌ستی داعش ئاواره بوون، به‌بێ جیاوازی و له‌به‌رچاوگرتنی دین و مه‌زهه‌ب و ڕه‌گه‌ز و نه‌ته‌وه سه‌رپه‌رشتی كردن ئه‌مه‌ش پشتگیری بۆ هه‌رێم زیادی كرد، له ڕووی تۆماری مافی مرۆڤ و مافی تاكه‌كه‌سی و پاراستنی سه‌ربه‌ستیی و ئازادی ڕاده‌ربڕین و مافی ئافره‌ت و ڕۆژنامه‌نووسان و هه‌موو ئه‌و بنه‌مایانه‌ی كۆمه‌ڵگای سڤیل له‌سه‌ریان داده‌مه‌زرێت، ئه‌مه‌جگه‌له بژێوی ژیانی هاوڵاتیان و سه‌لامه‌تیان، له‌م ڕووه‌وه ناوبانگی هه‌رێم ده‌بێ له‌به‌رچاو بگیرێ، كه ڕێكخراوه نێوده‌وڵه‌تیه‌كانی وه‌كو ئه‌منیستی ئه‌نته‌رناشناڵ و ڕێكخراوی مافی مرۆڤ هه‌میشه پاڵپشتی میلله‌ته‌كه‌مان بوون له خه‌بات دژی ڕژێمی به‌عس و پاش ڕووخاندنیشی.
له‌گه‌ڵ ئه‌وه‌شدا تائێستا داهاتوویه‌كی گه‌ش و پڕشنگدار چاوه‌ڕێی ئه‌م هه‌رێمه‌یه، له‌به‌رئه‌وه پێویسته هه‌وڵی پاراستنی مافی مرۆڤ بدرێ و شه‌ری ناوخۆ بۆ هه‌میشه حه‌رام بكرێ و ئاشتی و ته‌بایی و هاوهه‌ڵوێستی لایه‌نه كوردیه‌كان داكۆكی لێ بكرێ، بۆ ئه‌مه‌ش لەلایەن کاربەدەستانی پەیوەندیداری حکومەت و حزبی هەوڵی چارەسەری ئه‌م بارودۆخه بدەن، بۆ ئه‌وه‌ی بتوانن سه‌رنجی نه‌ته‌وه‌یه‌كگرتووه‌كان و لایه‌نه بڕیار به‌ده‌سته‌كانی دنیا به‌لای خۆماندا ڕابكێشین تازیاتر کێشەی گەلەکەمان بەهێزتر بێت لەسەرئاستی جیهانی و پشتگیری لێ بکرێت و بتوانین ناوبانی هه‌رێم له‌سه‌ر ئاستی ڕێكخراوه نێوده‌وڵه‌تیه‌كان و جیهان بپارێزین، كه ئه‌وه ئه‌ركی هه‌ره له‌پێشینه‌ی كاربه‌ده‌ستانی ئه‌م هه‌رێمه‌یه، مۆدێلێكی حوكمڕانی باش پێشكه‌ش بكه‌ن بۆ ئه‌وه‌ی به‌هۆی ناوبانگی به‌رزی هه‌رێمه‌كه‌مان بتوانین مه‌ترسیه‌كانی دوور بخه‌ینه‌وه و داهاتووی ئه‌م وڵاته مسۆگه‌ر بكه‌ین.
