عه‌بدوڵا که‌ریم مه‌حمود: جه‌مال رینگۆ/ بەشی چوارەم.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

دکتۆر به‌ختیاری پێشمەرگ)
به‌ختیارخالید تاهیر ناسراو به‌ دکتۆر به‌ختیار، که‌سێتییه‌کی خاکی و هه‌ست ناسک بوو، له‌ ته‌مه‌نی 9ساڵی دا هه‌ستی نه‌ته‌وه‌یی و چه‌وسانه‌وه‌ی چینایه‌تی له‌ ناخی دا سه‌ری هه‌ڵدا، به‌ به‌رده‌وامی رۆژنامه‌و گۆڤارو کتێبی ده‌یخوێنده‌وه‌، سه‌قاڵی نوسین بوو، هه‌موو هه‌سته‌کانی ناخی به‌ هۆنراوه‌ ده‌رده‌بڕی، زۆر عاشقی هه‌ڵوێسته‌ باڵاکانی یاخی بوونی جیڤاری پارتیزان بوو.
دکتۆر به‌ختیار له‌ 18- 05- 1950 له‌ گه‌ڕه‌کی گۆیژه‌ی شاری سلێمانی له‌دایک بووه‌، قۆناغی خوێندنی سه‌ره‌تایی له‌ سلێمانی و ناوه‌ندی و ئاماده‌یی له‌ که‌رکوک ته‌واو کردوه‌، له‌ 1968له‌ کۆلیژی پزیشکی زانکۆی موسڵ وه‌رگیراوه‌، له‌ 1972په‌یوه‌ندی کردوه‌ به‌ کۆمه‌ڵه‌ی مارکسی لینینی کوردستانه‌وه‌.
له‌ 1973 دا له‌ گه‌ڵ ساماڵی برای دا بۆ هه‌ڵمه‌تی خزمه‌تی ره‌نجده‌ری گونده‌کان روویان کرده گونده‌کانی سنووری پاریزگای دهۆک، له‌ ساڵی 1974 له‌ دوا قۆناغی خوێندنی پزیشکی ده‌ستبه‌ردار کۆلێجه‌که‌ی بوو، له‌گه‌ڵ سامانی برای دا روویان کرده‌ ناو شۆڕش و بوون به‌ پێشمه‌رگه‌، سامانی برای له‌ کاتی بۆردومانی فرۆکه جه‌نگیه‌کانی عێراق دا له‌ قه‌ڵادزێ بریدار بوو، بۆ چاره‌سه‌ر گه‌یاندیانه لای دکتۆر به‌ختیاری برای له‌ شاری مه‌ریوان ی رۆژه‌هه‌ڵاتی کوردستان.
دوای هه‌ره‌سی شۆڕشی ئه‌یلوول له‌ 1975 دکتۆر به‌ختیار گه‌ڕایه‌وه‌ ته‌وه بۆ زانکۆی موسڵ و له‌ 1976 کولیژی پزیشکی ته‌واو کرد، هه‌مان ساڵ وه‌ک پزیشکێک له‌ ناحیه‌ی خه‌له‌کان کاری کردوه‌، دواتر گوێزراوه‌ته‌وه‌ بۆ نه‌خۆشخانه‌ی سلێمانی، له‌ به‌ر هه‌ڵوێستی سیاسی گوازراوه‌ته‌وه‌ بۆ دهۆک، دواتر گه‌ڕاوه‌ته‌وه‌ بۆ سلێمانی.
ئه‌و سه‌رده‌مه‌ی ماڵی دکتۆر به‌ختیار له‌ گه‌ڕه‌کی ئیمام قاسمی که‌رکوک بوو. بووه‌ به‌هاوڕێ ی ئازاد هه‌ورامی و سامی هه‌ورامی و عومه‌ر خه‌تاب، عیزه‌دین قه‌ره‌ محه‌مه‌د، به‌ختیار ئه‌مین بوو.
دکتۆربه‌ختیار زۆر جار له‌گه‌ڵ کامه‌ران ی برای دا به‌ ئوتۆمۆبیله‌ ( فیاته‌ پۆڵۆنیه‌که)ی باوکی که‌ ژماره‌که‌ی 2165 ی سلێمانی بوو، ده‌رمان و پێداویستی پزیشکی یان به‌ نهێنی له‌ نه‌خۆشخانه‌ی سلێمانییه‌وه ده‌گواسته‌وه‌ بۆدووماڵ له‌ لای مه‌عهه‌ده‌ کۆنه‌که‌ی گه‌ڕه‌کی خانوه‌ قوڕه‌کان، له‌وێوه‌ ده‌گه‌یەنرانه‌ شاخ.
ساجید که‌رکوکی و مه‌لا به‌ختیار، پێش ئه‌وه‌ی روو بکه‌نه‌ شاخ و ببن به‌ پێشمه‌رگه‌ له‌ ماڵی دکتۆر به‌ختیار له‌ گەڕه‌کی عه‌قاری خۆیان حه‌شار داوه‌، دکتۆر به‌ختیار، رێبواری برای به‌ بیانووی نه‌خۆشی زه‌ردوییه‌وه‌ بۆ ماوەی چه‌ند رۆژێک له‌ نه‌خۆشخانه ده‌خه‌واند، ئه‌وانی له‌ ژووره‌که‌ی رێبوار حه‌شارده‌دا.
رێبواری برای زۆر له‌ کاره‌کانی دکتۆر به‌ختیاری راده‌په‌ڕاندو به‌پێی رێنماییه‌کانی کاکی، چکلێته‌ نامه‌کانی له‌ قوتوی نوقڵ و پسکیت دا ده‌گه‌یانده‌ شوێنه‌ دیاری کراوه‌کان.
دکتۆر به‌ختیار ده‌زگیران دار بوو، له‌ بری ئه‌وه‌ی ئه‌ڵقه‌ی هاوسه‌ری بکاته‌ په‌نجه‌ی خۆشه‌ویسته‌که‌ی و پێکه‌وه‌ ژیانی هاوسه‌ری پێک بهێنن، چه‌ند رۆژێک پێش ئه‌وه‌ی روو بکاته‌ شاخ و ببێ به‌ پێشمه‌رگه‌، به‌ ده‌زگرانه‌که‌ی وتبوو:
ئازیزم ژیان و دواڕۆژی خۆت به‌ ژیانی پێشمه‌رگی من مه‌به‌سته‌ره‌وه‌، چاره‌نوسی من له‌و شاخانه‌ نادیاره، هه‌موو چرکه‌یه‌کی رووبه‌ رووبوونه‌وه‌یە پێشمه‌رگه‌.
دوو ده‌زگیران، دوو عا‌شقی رۆحی، به‌ قه‌د هه‌موو دنیا یه‌کتریان خۆش ده‌ویست، ده‌یان خه‌ون و خۆزگه‌ و ئاوات و هیوایان هه‌بوو بۆ ژیان بۆ ئه‌وساو ئاینده‌، به‌ده‌م سوێی ئازاری دابڕان له‌ چرکه‌یه‌کدا هه‌ریه‌که‌یان به‌ره‌و ئاراسته‌یه‌کی جیا، به‌ره‌و دوو دنیای ته‌ریب هه‌نگاو ده‌نێن، بۆ هه‌تا هه‌تایه‌ جارێکی تر یه‌کتریی نابیننه‌وه‌.

عه‌بدوڵڵا که‌ریم مه‌حمود
سه‌رچاوه‌:
دیدارێک له‌ گه‌ڵ کاک کامه‌ران خالید برای شه‌هید دکتۆر به‌ختیار له‌ مانگی ئازاری 2021 له‌ غه‌زه‌لنووس.
د یدارێک له‌ گه‌ڵ هونه‌رمه‌ند رێبوار خالید تاهیر له‌ باره‌ی شه‌هید دکتۆر به‌ختیار.

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت