شــــــــوان خورشید: پەرتەوازەیی نێوماڵی کوردی.
بە یەكریزی هەر گەل و نەتەوەیەك تۆكمەی و سەركەوتنی ئەو گەل و میللەتە فەراهەم دەكات و وا دەكات دوژمنان بە ئاسانی نەتوانن دەسكەوت و سەركەوتنەكانیان لە باربەرن، بەڵام بە پێچەوانەوە گەلی كورد هەرچەندە لە هوتاف و شیعارەكانیان و دانیشتنە ڕۆتینیەکانیاندا زۆر قسە لەسەر یەكریزی نێو ماڵی كوردی دەكەن، بەڵام ئەوە تەنها قسەی زلە، قسەی زلیش ناچێتە نێو گیرفانەوە، بۆیە ئەگەر بێت و قسە لەسەر هۆكارەكانی نەبونی یەكریزی لە نێو گروپ و هێزو حیزبە سیاسیەكان بكەین، گەلێك هۆكار بەدی دەكەین، كە گرنگترینیان خۆی لەم خاڵانەی خوارەوە دەبینێتەوە:
1- تێوەڵانی دەرەكی بەتایبەت ئەو وڵاتانەی کوردستانیان بەسەردا دابەشکراوەو، هەندێ لایەن و لاوازی هەستی نەتەوایەتی لە نێو لایەنە سیاسیەكان لەبەر ئەوەی ئەوەندەی بەرژەوەندی حیزبی ڕەچاو دەكەرێت، ئەوەندە بەرژەوەندی نەتەوەی، هەستی نەتەوەیی رەچاو نەكراوە و حیزبە سیاسیەكان لە سەر گۆڕەپانی سیاسی كوردستان كارێكیان كردوە نەك لەلای خۆیان تەنانەت لای تاك بە تاكی كوردیش هەستی نەتەوایەتیان كزكردوە، ئەتوانین بڵێین هەر نەیان هێشتوە،کارێکیان کردوە، بیری نەتەوەیی، هەستی کورد بون،والێ بکەن کورد شەرم لە کورد بون بکاتەوە، لە ساییەی حیزبەکانی سەر گۆڕەپانی بەناو خەباتی کوردایەتی.
2- دوژمنانی گەلی كورد لە چواردەورمان كە كوردستانی بەسەردا دابەشكراوە ڕۆڵی سەرەكیان هەبووە، لە تێكدانی یەكڕێزی و، ناشرین کردنی، بیری نەتەوەیی کوردو، دروستكردنی دوبەرەكی لە نێوان لایەنە سیاسیەكانی گەلەكەمان، ئەوەندەی دوژمنان نیاز و بڕیارە هەستیارەكانی سیاسەتی كوردی دەخوێننەوە و ئاگاداری رەش و سپی سیاسەتی ئێمەن، ئەوەندە خۆمان سەری لێ دەرناكەین، بۆیە هەموو كاتیك ئەگەر بمانەوێت كارێكی باش پێشكەش بە بزوتنەوەی كوردایەتی بكەین و یەكریزی گەلی كورد پتەو بكەین، دوژمنان پلانێكی دژبەری ئامادەكراویان بەرامبەری هەیە و سەرلەبەری خەونەكانمان هەڵدەوەشیننەوە، بێ گومان بەیارمەتی خودی خۆمان،یان ڕاستتر بڵێین بەیارمەتی حیزبە کوردیەکان، نزیکتر بە هاوکاری حیزبی فەرمانڕەوا.
3- داگیركەرانی كوردستان بەرنامەی یەكریزی گەلی كوردیان پێ هەزم ناكریت و هەر كاتیك هەولێكی لەو جۆرە هاتە ئاراوە، هەر بە بەكارهێنانی خودی خۆمان هەوڵەكەكانمان لە چاڵ دەنێن. بۆیە دەڵێین بە یەكریزێ گەل، ئاسایشی نەتەوەی گەلی كورد لە دایك دەبێت، و پیلان و پلانەكانی دوژمنان تێك دەچێت و لە چاڵ دەنرێت.
4- بەداخەوە فرە حیزبی ئاستەنگێكی دیكەیە لەبەر دەم یەكبوون و یەكریزی گەلی کورد، هەرچەندە بونی فرەحزبی لە هەر كۆمەڵگایێت، نیشاندەری پێشكەوتنی ئەو میللەتەیە، بەڵام لەم وەڵاتەی ئێمەدا فرە حیزبی كارەساتە!، چونكە خەڵكەكە وا ڕاهێنراون بەرژەوەندی حزبی لە سەروی بەرژەوەندی نەتەوەیی دا بنێن، بۆیە ئەوە كارەساتە و فرەحزبی لە مەرخۆمان دەرگایێكە بۆ لەناو بردنی پڕۆژە و پلانەنەتەوەییەكانی كورد، چونكە هەندێك، گروپ و ئەو حزبانەی كە لە گۆرەپانەكەدان، هیچ بەرنامە و ئەجندای نەتەوەیی و نشتیمانییان نیە، لە بنەڕەتدا ئەوان دروستكراوی دەستی دوژمنان و نەیارانی كوردن و بۆ بەرژەوەندی داگیركەران دروستكراون، لەلایەکی ترەوە فرە حزبی کاتێک جوانەو ڕوناکی دەبەخشێتە چوار دەوری، دیموکراسیەت و ئازادی ڕادەربڕین فەراهەم کرابێت،بۆ سەرجەم تاک و کۆمەڵ و بیروڕا جیاوەزەکان و حیزب و بزوتنەوەکانی کوردستان، نەک ئەوەی کە هەیە لەساییەی حیزبی دەسەڵاتدار، چەندین حیزب و بزوتنەوەی داردەستیان دروست کردوە،وەک و مەقاش بەکاری دەهێنن، لە هەڵبژاردنەکان و،کۆکردنەوەی بەناو ڕەئی ئەحزابی دەرەوەی دەسەڵات و لەپەڕلەمانیش بۆ پێک هێنانی نیسابی قانونی بۆ دەرچواندنی چەند یاسایەک و تێپەڕاندنی لە بەرژەوەندی حیزبی فەرمانڕەوا،وەک کۆتای پێکهاتەکان.
5- لە رابردودا هەندێ هێز و لایەن و گروپ ئەوەندەی ئەجیندای دوژمنانیان جێبەجێكردوە، ئەوەندە لە هەوڵی یەكریزی گەلی كورد و مافەڕەواكانی كوردستان نەبونە ئەوەی بانگەوازیشی بۆ كردوە نەی توانیوە وەكو پێوویست ئەو ئاواتانەی گەلی كورد بێنێتە دی، چونكە ئەو حزبانەی لە بەرژەوەندی نەیاران كاریان كردوە، بوون بە كوسپ، تا گەلی كورد بە خواستەكانی خوی نەگات.
بۆیە دەكرێ ئەم بابەتە قسەی زۆری لەسەر بكرێت و هۆكاری زۆر هەڵبگرێت. بێشك لەپێناو یەكریزی میللەت پێوویستە هەموو حیزبە سیاسییە نیشتمان پەروەرەكانی گەلەكەمان لە جیاتی كاركردن بۆ بەرژەوەندی تەسكی حیزبایەتی خۆیان، بەهەستێكی نیشتیمان پەرەرانە و لەبەرژەوەندی گشتی خەڵكی كوردستان، یەكریزی لایەنەسیاسییەكان ببێتە ئامانج و ستراتیجی سەرەكییان. چونكە تەنیا بەیەكڕێزیی و دوبارە ژیانەوەی هەستی نەتەوەیی خەونی دوژمنان لە گوڕ دەنرێت و گەلی كورد دەگات بە ئامانج و ئاواتەکانی، بۆیە دەکرێت هەر لە ئێستاوە گەر ئەحزابی کوردی، دەیەوێت کاروانی خەباتی، بۆ ڕزگاری نیشتمانی جۆش بدات، دەبێ یەکڕیزی بکاتە ستراتیژی کارو خەباتی و هەموو ئەو کلک گرێدان و وابەستەییەی بە دوژمنان و داگیرکەرانی کوردستانەوە هەیەتی بەلاوەی بنێ و،وەک کورد ڕێچکەی خەباتی نەپساوە بگرێت و لەسەر بنەمای هەستی نەتەوەی و بوژانەوەی ئەو بیرە،خەباتی کوردانەی خۆی درێژە پێ بدات،ئەو کات دەبینین چ گۆڕانکاریەک دەبێتە بنەمای کوردسانێکی بەهێزو سەرکەوتوو.
