شێرزاد شێخانی: ساری نوێ.

شێرزاد شێخانی

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

هەولێریات
لەفلیمی ( الحدود )ی غەوار ( درید لەحام ) لەسەر سنووری شەرقستان و غەربستاندا گییر دەخواو ڕێگەی نادەن بپەڕتەوە ئەوبەری حدود. چەند رۆژەک لەوێ عاسی دەبی ناچار لەچایخەنەیەک دادەنیشی چاوەڕێ دەکا بەشکو خوا هیدایەتی هاوسنوورەکان بداو سنوورەکە بکەنەوە. لەودەمەدا داوا لەشاگردی چایخانەکە دەکا جەریدەیەکی لۆ بینی خۆی بە خیندنەوەی پێوە مەشغول بکا. ئەویش پێی دەرێ ( جەریدەی تازەمان نیە، یەک نوسخەمان هەیە ئەویش ئی یەک سار پێش ئێستایە )!. غەواریش دەرێ ( بڕۆ بیهینە، فەرقی جەریدەی ئەوڕۆو پێش سارەکی نیە، هەمووی هەر یەک بابەتن )!.
سارو مانگ و رۆژی مەش لەو هەرێمەدا هەروەکی ئەو جەریدەیە وایە. هیچ گۆڕانکاری تێدا نیە. دونێ وەکی ئەوڕۆیە، حەفتەی پێشتر وەکی حەفتەی ئێستایە، ساری پێشتریشمان هەر وەکی ساری تازە وایە، هیچ شتەک ناگۆڕێ پیاو دری پێخۆش بیتن.
ئەگەر سەرنج بدەن سی ویەک سار پێش ئێستا ئاواتەکانمان هەر وەکی ئێستایە. هەر لەچاوەڕوانیداین بەشکو ساری تازەمان خێروبەرەکەت لەگەر خۆی بینی و ئاشتی وئاوەدانی و خۆشگوزەرانی بێتە کایەوە، بەران ساریش تەواو دەبی هیچ نابینین، ئەگەر خراپیتریش نەبیتن . بەوەش هەموو ئاواتەکانمان دەبنە تڕی بنگۆمێ.
تەمەشای برووسکەی پیرۆزبایی سەری ساری مەسئولانی کورد بکەن بە درێژایی سی و یەک سار هەمان کلیشەی جارانە، ئاوات دەخوازن ساری نوێ ئاشتی وئارامی بیتن، بەران دەبینی هەر خۆیان ملی یەکتری دەشکێنن!. هیوادەخوازن ساری ئاوەدانی بیتن، دەبینی غاز نامینێ، کارەبا تێکدەچ، ئاوی خواردنەوە بە تانکەر پەیدا دەبی!. بێ لەوانەش قەیرانی مووچەو بودجەش یەخەی میللەتەکەمان دەگری!. رۆژ بە رۆژیش بە ئاینوئۆینی تازەوە دەیان نەوعە باجو سەرانەشمان بەسەردا دەسەپێنن!.
سی سار پێش ئێستا لەنەتیجەی کشانەوەی ئیداراتی حکومەتی بەغدا، مۆزەف ومامۆستایان معاشیان نەبوو، کەتنە سەر ساجی عەلی، ئێستاش ئەگەر بەغدا پارە نەنێری حکومەت ناتانی مووچەی مۆزەف و مامۆستا بەرێکوپێکی بداتن!.
سی سار پێش ئێستا ئەزمەی کارەبامان هەبوو، رۆژانە هەر چار پێنج سەعاتەک کارەبا دەدرا، ئێستاش عەینەن تاسو حەمامە، رۆژانە ئەوپەڕەکەی چار پێنج سەعات بەرێکوپێکی کارەبا دەدرێ!. لەوەش خۆشتر وەزارتی کارەبا بەبێ هیچ شەرمو حەیایەک دەرێ: دونیا زۆر سارد بی، کارەبا کەمدەبتەوە!.
سی سار پێش ئێستا جادەی رێیە خاریجیەکانمان سەقەت و پەقەت بوون، ئێستاش رۆژانە خەرکەکی زۆر بە تامپۆنی سەیارە لەو رێیانە گیان لەدەستدەدەن کە زۆربەیان ئەندامی یەک عائیلەشن!.
سی سار پێش ئێستا ئەزمەی ئاومان هەبوو، هاوینان خەرک لەزۆربەی گەڕەکەکان بێ ئاو دەبوون، ئێستاش لەهاوینان خەرک بێ ئاو دەبی و مانگی سێ جاریش بۆڕی ئیفراز دەتەقی!.
هەموو میللەتانی دونیا سار بەسار پێشدەکەون، حکومەتەکانیان حەولدەدەن ژیانوگوزەرانی خەرکی چاکتر بکەن و خزمەتگوزاری پێشبخەن، لای مە حکومەت ئاخر شت بیری لێبکاتەوە خزمەتگوزاری وپێشخستنی هەرێمەکەمانە. خەستەخانەی حکومی وێران بووە، لەبەرامبەردا خزمەتگوزاری تەندروستی درایتە دەست بازرگانان. کارەبا کە پێویستیەکی ژیارییە، درایتە دەست خاوەن موەلیدە ئەهلیەکان!. حەتا ئاوی خواردنەوەش دەبی بەپارە بیکڕین.
پێشکەوتنو خۆشگوزەرانی ئەوە نیە دوو سێ هەزار عیمارەی برندو گوندی ئەڵمانی وئینگلیزی وئیتاڵیت هەبی، پێشکەوتن وخۆشگوزەرانی ئەوەیە میللەتەکەت ئاووکارەبای بەردەوامی هەبی وەکی هەموو میللەتانی دونیاش بژێوی ژیانی تەئمین بی. خەرک گێی لەوە نیە سەری سار چەند مەسئول برووسکەی پیرۆزبایی لۆ دەنێرن ، بەرکو چاوەڕێی ئەوەیە تا چەند ئەو مەسئولانە هەست بەموعاناتی خەرکەکە دەکەن و چییان پێیە لۆ ساری تازە لەخزمکەتگوزاری وئاوەدانی وخۆشگوزەرانی.
زۆر شەرمەزارییە لۆ دەسەراتی کوردی میللەتەکەیان دەیان سار قوربانی دەستی رژێمە دیکتاتۆرەکانی بەغدا بی، پاشی سی و یەک سار لە ئازادی حەسرەت لۆ سەردەمی دیکتاتۆریەتی بەغدا هەرکێشن.
دە بەسە واز لەو برووسکە دووبارەبووانە بینن کە کەس ناشیانخینتەوە، پێمان بڕین تا چەند ساری دی چاوەڕێ بین هەتاکو وەکی میللەتانی دونیا بژین. باقی وەلسەلام ..