ئارام قزلەریی: شەمەندەفەرەکەی یەکێتی بەرەو کوێ.
ئەو ڕاستیانەی من خستومنەتە ڕوو قسەی دڵی زۆرینەی یەکێتیەکانە. بەڵام بەداخەوە بەرژەوەندیەکان لە موچەیەکی یەکێتیەکی دڵسۆزەوە تا دەگاتە خاوەن ملێۆنان دۆلارو کۆشک و کۆمپانیای گەندەڵی زۆرێک لە بەرپرسان و ماستاو چیەکان و سودمەندەکان. ئەم بێدەنگیەی خوڵقاندوەو کە ئایندەی ئەو بێدەنگیەش باجەکەی دەبێتە هۆی شکستی یەکێتیەکەمان و بە فیڕۆدانی خوێنی شەهیدە نەمرەکانمان.
ئایا یەکەم بەیانامەی دامەزراندنی یەکێتی نیشتیمانی کوردستان ساڵی 1975 لە شام ئەمە بەرهەمەکەی بوو؟. واتە( الاتحاد الوطني الكردستاني لماذا)؟ .
شێخەکان و موریدەکان لە دەباشان! ڕێنیشاندەرێکی دڵسۆز بە یەکێتین؟. یان خۆبەرە پێشەوەیەکی لێزان و بازرگانێکی چاوچنۆک و خۆپەرستن؟.
هێندەی سەرنشینی فارغۆنەکانی شەمەندەفەرێک یەکێتی نیشتیمانی کوردستان، ئەندامانی ئەنجومەنی سەرکردایەتی و مەکتەب سیاسی هەیە.
ژمارەی ئەندامانی ئەنجومەنی پیران بە کۆنگێرسمان و بە سێناتەکانەوە! هەر دوو هێندەی ژمارەی ئەندامانی ئەنجومەنی سەرکردەکانی یەکێتین، بەڵام هەموو جیهان دەبەن بەرێوە.
یەکێتیەکەی ئێمە بەم هەموو سەرکردایەتی و بنکردایەتیەوە لە ئاست بەڕێوەبردنی شارێکی تێکۆشەری وەک شاری سلێمانیان نیە و تواناو دەسەلاتەکانی ئەندام کۆمیتەیەکی ساڵانی هەشتاو نەوەتەکانیان نەماوەو زۆربەی زۆریان دەستیان گرتوە بە کڵاوەکانیانەوە با نەیبات و ورتە لە کەسیانەوە نایەت. هەموو خۆشەویستیەک و ڕێزی کادران و دڵسۆزانیشیان لە دەستداوە بەهۆی ئەو بێ هەڵوێستیەی لەم بارو دۆخە ناهەموارەی یەکێتیدا تیایاندا بەدی ئەکرێت.
رۆژانە چەندین گۆڕانکاری لە جومگە هەستیارەکانی یەکێتیدا دەکرێت لە پۆستە ئەمنی و حکومی سەربازی و حیزبیەکانیشدا هەر هەموشی بە بریاری خودی بافڵ تاڵەبانی و بە پشتیوانی قوباد تاڵەبانیە.
دڵنیاشم نە ڕاوێژ بە ئەنجومەنی سەرکردایەتی دەکرێت، نەهیچ حسابێکیش بۆ ئەنجومەنی باڵای بەرژەوەندیەکانی یەکێتیش دەکرێت، تەنانەت ئەوانەشی بەرپرسی ئۆرگانە هەستیارەکانیشن دورو نزیک ئاگادارنین و زۆرجار لە میدیکانەوە گۆڕانکاریەکان دەبیستن ،گەر سوکە ڕاوێژێکیشیان پێ بکرێت، جگە لە ( پرسە گورگانە ) بەولاوە هیچی تر نیە.
بە پێی وشە بریقەدارەکانی ناو فەرهەنگە نا سیاسیەکانیانی هەندێ بەرپرس بوایە کە لەبەردەم کەناڵەکانی ڕاگەیاندن و میدیاکاندا دەیکەن و خۆیان بەدەیانی وەکو ( ئەرۆستۆتالیس و سوقرات و ئەفلاتون و ڤۆڵ تێرو و نیتشە ) ناگۆڕنەوە، لەڕوی زانستیشەوە پێی دەچێت ئەنیشتاین و ئەدیسۆنیش پەروەردەی بەر دەستی ئەوان بوببن.
بەداخەوە جگە لە نەهامەتی بەولاوە بۆ یەکێتی هیچی تریان لێ بەرهەم نەهات، گەر بە پێی زیرەکی و لێهاتوی ئەو بەرپرسانە بوایە، دەبوو ئێستا یەکێتی سێ کیشوەری جیهانی ڕزگار بکردبایە لە ( کۆیلایەتی کۆڵۆنیاڵیزمی سەردەمی جیهانگیری نوێدا ).
نەگ ئەمە حاڵ و گوزەرانی هاوڵاتیان بێت بە تایبەتیش یەکێتیەکان کە لە هەرێمێکی دادۆشراودا، ژێرخان و سەرخانی جیلی ئێستاو ئایندەی وڵاتەکەمان لە ژێر خاڵی سفرەوە بێت و هەر هەموویشی دەستی بەسەردا گیرابێت بۆ خۆیان و نەوەکانیان.
لەئێستادا جیاوازتر لەخەبات و تێکۆشان و بوێری سەردەمی شاخ و ڕابوردومان هەموو بیرو هزری ئێمەی یەکێتی یەکان، تەنها بوە بەخەیاڵ و هیوا خواستن و بۆچونی بێ کردار!.
هەر هەموشمان لەبازنەیەکی داخراو و دڵە ڕاوکێیەکی بێ ئومێدیداین و لە سەر گوتنی ڕاستی و ڕەخنەکانمان لە چاوەڕوانی ئەوەداین کە لە ناکاودا هێزە سەرکۆتکەرەکان هەڵکوتنە سەرمان و لەوە زیاتر تێکمان بشکێنن.
لەبەر ئەوەی هیچ وەفاداریەک لە ئێستادا بەدی ناکرێت و نەماوە بۆ خەبات و مێژوی ڕابردوی تێکۆشەران و نە حسابیش بۆ شەهیدو خانەوادەکانیشیان دەکرێت.
ئەوەی لە ئەمڕۆدا گرنگە ماستاو کردن و چۆکدادان و خۆ گێل کردنە لەو ناحەقیانەی بەرامبەر دڵسۆزان و تێکۆشەران دەکرێت لەناو ڕیزەکانی یەکێتیدا. ئەو بێدەنگ و بێ هەڵوێستیەش تەنها بەو کەسانە دەکرێت کە کاسە لێسن و بازرگانن بەسەر مێژوی تێکۆشەران و خوێنی پیرۆزی شەهیدە نەمرەکانمانەوە.
گەر وا نەبوایە دەبوو سەرجەم چین و توێژەکانی ناو ڕیزەکانی یەکێتی بەیەک دەنگ بمان گوتایە سەرۆک بافڵ ئەو سیاسەتە یەکلایەنەی جەنابتان پەیڕەوی دەکەن، یاریکردنە بە خوێنی 22 هەزار شەهیدی قارەمانی یەکێتی و سەدان هەزار ئەنفال و کیمیاباران کردن و جینۆ سایدکردنی سەرجەم پێکهاتەکان بە هەموو چین و توێژو ئاینەکانیانەوە.
جێگای داخە یەکێتیەک بەو هەموو قوربانی و مێژوە پڕ لە سەروەریەوە بکەوێتە دەست کۆمەڵێ سەکردایەتی نەشارەزاو بێ ئەزمون و خۆپەرست.
دیارە هەڵەکان تەنها هەر خودی بافڵ تاڵەبانی نییە، بەڵکو سەرجەم بەپرسە دێرینەکان و تەنانەت کاک لاهوری شێخ جەنگیش و خاتو شاناز پشکیان بەر دەکەوێت هەر یەکەیان بە پێی پێگەو دەسەڵاتەکانی ڕابوردویان کە هەیان بوەو ئێستاش هەیانە.
لە پێش هەموو بەرپرسان و دەسەڵاتدارانیشەوە بێ هەڵوێستی و بێدەنگی خانەوادەی شەهیدان و پێشمەرگە دێرینەکان و کادران و کەم ئەندامان و زیندانیانی سیاسیە! کە سەرۆکی دەستکراوە و بێ منەت کردوە! کە حساب بۆ هیچ لەم چین و توێژە قوربانی دەرانە نەکات و تەنها سیاسەتی زەبرو توڕەیی و گرتن و لابردن و دەرکردن و فڕاندن پەیڕەو بکات، تا دەگاتە ئاستی سڕینەوەو لە ناو بردنیش دوور لە هەموو عورفەکانی سیاسی و حیزبی و یاسایی و دبلۆماسی سەردەمیانە!.
