ريبوار ياسين فتاح: زنجیرەیەک لە قوربانیدان بۆ ئازادی.
وتاریکورد ماڵپەرێکی سەربەخۆ و ئازادە
کاتێک باس لە چیرۆکی عەلی حەسەن و شێروان شێروانی دەکەین، وەک چاودێر و رەخنەگرێک، خۆم دەبینمەوە لە هەمان ئەو رێگایەدا کە ئەوان پێیدا رۆیشتن. ئەمڕۆ، لە عێراق و کوردستان، هەر دەنگێک دژی گەندەڵی و ناعەدالەتی بەرز ببێتەوە، رووبەڕووی هەمان ئەو چارەنووسە دەبێتەوە.
عەلی حەسەن لە سوریا پەیکەرێکی شکاند و 38 ساڵ لە زیندان مایەوە. شێروان شێروانی وتارێکی رەخنەئامێزی نووسی و زیندانی کرا. ئەمڕۆش، ئێمەی چاودێر و چالاکوان، بە نووسین و راپۆرتەکانمان دەربارەی دزی و گەندەڵی، رووبەڕووی هەمان هەڕەشە و مەترسی دەبینەوە.
دایکی عەلی و باوکی شێروان لە خەمی کوڕەکانیاندا گیانیان سپارد. ئەمڕۆش، زۆر لە چالاکوانان یان دەبێت وڵات بەجێبهێڵن، یان رووبەڕووی هەڕەشەی کوشتن و بێسەروشوێنکردن ببنەوە. خێزانەکانیان لە ترسی بەردەوامدا دەژین.
لە رۆژهەڵاتی ناوەڕاستدا، لە سوریاوە تا کوردستان، لە عێراقەوە تا ئێران، فۆرمولای سەرکوتکردن یەکە: هەر کەسێک دەنگی دژی گەندەڵی و ستەم بەرز بکاتەوە، یان دەبێت بێدەنگ بکرێت، یان بێسەروشوێن بکرێت.
ئەمڕۆ، کاتێک راپۆرتێک لەسەر گەندەڵی و دزینی سامانی گشتی بڵاو دەکەینەوە، کاتێک پەردە لەسەر مامەڵە نایاساییەکانی دەسەڵات هەڵدەدەینەوە، دەزانین کە رەنگە چارەنووسمان لە هی عەلی و شێروان جیاواز نەبێت. بەڵام ئەمە رێگرمان لێناکات.
چونکە باوەڕمان وایە سەرەڕای هەموو مەترسییەکان، دەبێت دەنگی راستی بەرز بکەینەوە. دەبێت ئەو گەندەڵییە ئاشکرا بکەین کە ژیانی خەڵکی هەژاری وڵاتەکەمانی کردۆتە دۆزەخ. دەبێت ئەو راستییانە بڵێین کە دەسەڵات دەیەوێت بیانشارێتەوە.
رەنگە رۆژێک ئێمەش وەک عەلی حەسەن لە زیندانێکدا خۆمان ببینینەوە، یان وەک شێروان شێروانی زیندانی بکرێین. بەڵام دەزانین کە هەر دەنگێکی راستی، هەر وشەیەکی راست، بەردێکە لە بنیاتنانی کۆشکی ئازادیدا.
لە کۆتاییدا، ئەم چیرۆکانە پێمان دەڵێن: رێگای ئازادی و دادپەروەری قوربانی گەورەی دەوێت. بەڵام دەشڵێن: هیچ زیندانێک، هیچ هەڕەشەیەک، هیچ سەرکوتکردنێک ناتوانێت دەنگی راستی کپ بکات. چونکە دوای هەر عەلی حەسەنێک، دوای هەر شێروان شێروانییەک، سەدان دەنگی تر بەرز دەبنەوە.
ئێمە درێژەپێدەری رێگای ئەوانین. ئەمڕۆ، لە عێراق و کوردستان، سەنگەری بەرەنگاربوونەوەی گەندەڵی و ستەم، هەمان ئەو سەنگەرەیە کە عەلی و شێروان تێیدا خەباتیان کرد. رەنگە شێوازەکە گۆڕابێت، بەڵام ئامانج هەر یەکە: ئازادی و دادپەروەریی بۆ گەلەكەمان
وتاریکورد ماڵپەرێکی سەربەخۆ و ئازادە